YIHULA YA WAZE AKUTANGA MIKANDA YETU . . .
Shina Natale Yili ya Akwa-Kristu?
Tununu a tununu ja atu a hashi heswe kakutayiza ngwo, Natale yili chiwanyino cha tangwa lia kusemuka cha Yesu Kristu. Achinyonga kama, shina akwa-Kristu a ku sekulu yitangu ni masepa jenyi te kakulinga chiwanyino cha Natale? Shina unanyingika yize Mbimbiliya yinambe hakutwala ku chiwanyino chino? Kuwana kumbululo lia yihula yino muchitukwasa kunyingika nyi Natale, yili ya akwa-Kristu nyi ka.
Chitangu, Mbimbiliya kuyishi kuvuluka chiwanyino cha tangwa lize Yesu kusemukine, chipwe lia tuvumbi ja Zambi ashishika. Yisoneko yinasolola yiwanyino ya atu aali wika waze alingile chiwanyino cha tangwa liakusemuka cho. Atu wano te hi tuvumbi ja Yehova ko, Zambi wa Mbimbiliya, nawa ha yiwanyino yacho halingiwile yuma yipi chinji. (Uputukilo 40:20; Marku 6:21) Kulita ni mukanda Encyclopedia Britannica, akwa-Kristu te keshi kutayiza “mianda ya waze keshi kuwayila Yehova ngwe, ya kulinga chiwanyino cha kusemuka.”
Tangwa lika Yesu asemukine?
Mbimbiliya kuyishi kusolola pundu tangwa lize Yesu asemukine. Mukanda Cyclopedia wa McClintock ni Strong unambe ngwo, “Kutushi kuhasa kuwana tangwa lize Yesu asemukine mu Mbimbiliya, ha Usendo Waha chipwe ha chisoneko cheswacho.” Chino chinasolola pundu ngwo nyi Yesu te kazangile hanga tumbaji jenyi apwe ni kwiuluka tangwa lia kusemuka chenyi, kachi iye kaalwezele tangwa lize asemukine.
Chamuchaali, Mbimbiliya kuyishi kusolola ngwo Yesu hanji umwe wa kuli tumbaji jenyi kalingile chiwanyino cha Natale. Mukanda New Catholic Encyclopedia unambe ngwo, kulinga chiwanyino cha Natale kachisonekene mu umwe mukanda wa A-Roma wakwamba ngwo, “Cronógrafo Philocalus, malongeso jacho mahasa kupwa a ha mwaka wa 336 [M.J.]” Yino yalingiwile muze Mbimbiliya te hanayihwisa kuyisoneka nawa muze te hikwapalika sekulu jinji chize haze Yesu apwile hano hashi. Kashika, mukanda wa McClintock ni Strong unambe ngwo, “chiwanyino cha Natale hi cha kuli Zambi ko, nawa kuchakatukile mu Mbimbiliya, mu mukanda wa Usendo Waha.” *
Chiwanyino chika Yesu alwezele tumbaji jenyi hanga alinge?
Yesu kahanyine pundu usogwelo kuli tumbaji jenyi hakutwala ku yize iye te anazanga hanga o alinge, nawa yuma yacho yili yakusoneka mu Mbimbiliya. Chiwanyino cha Natale kuchishi mu kachi ka yuma yacho. Ngwe chize longeshi keshi kuzanga hanga longi jenyi alinge yuma yize kaatumine kulinga, ni Yesu neye kazangile hanga tumbaji jenyi eche manyonga jo ahiane “yuma yize yinasonewa” mu Mukanda Usandu.—1 A-Korindu 4:6.
Alioze kuli chiwanyino chize akwa-Kristu te akulinga, chiwanyino chacho te kanachinyingika kanawa—Chiwanyino cha Kwiwuluka Kufwa cha Yesu. Yesu mwene kalwezele tumbaji jenyi mashimbu waze te machilinga ni chize te atamba kuchilinga. Usongwelo wa mashimbu waze atamba kulinga chiwanyino cha kufwa chenyi, uli mu Mbimbiliya.—Luka 22:19; 1 A-Korindu 11:25.
Ngwe chize twamona, Natale yili chiwanyino chakwiuluka tangwa lia kusemuka, kashika akwa-Kristu akunyima te keshi kuchilinga. Nawa Mbimbiliya kuyishi kusolola ngwo Yesu hanji umwe kavumbi wa Zambi washishika kalingile chiwanyino chino. Ha mukunda wa yuma yino yeswe, akwa-Kristu amwenemwene kananyingika pundu ngwo, o katambile kulinga chiwanyino chino.
^ kax. 6 Mba unyingike nawa kuze kunakakatuka mianda ya Natele tala ha chikuma, Yihula Ya Waze Akutanga Mikanda Yetu . . . Ha chikuma chinambe ngwo, “Umwenemwene Uka Uliko Hakutwala ku Natale?” Mu Kaposhi wa Kutalila wa Dezembro 1, 2014, nawa kali mu site www.pr418.com.
Kota Muzanga Chinji Yuma Yize Mumona
YIHULA YIZE ATU AKUHULA CHINJI
Mumu liaka Yela ja Yehova Keshi Kulinga Yiwanyino ya Matangwa a kusemuka?
Tala yikuma yiwana yize yinasolola mumu liaka Zambi keshi kulinga yiwanyino ya matangwa a kusemuka.
CHIWANYINO CHA YESU
Iwuluka Kufwa cha Yesu
Tunechi hanga ukalikungulule ni yetu ku chiwanyino chino chilemu. Mukalilongesa chize mwono wa Yesu ni kufwa chenyi muyihasa kukukwasa mu mwono we.
