Wainma maʼin wayuu aainjakana miʼiraa shikiira jemelin Jesuu süka müinjatüin shia naashin. ¿Naainjapuʼuinche na nikirajüinkana Jesuu tia miʼiraakat? ¿Jamüsüche sünüiki tü Wiwüliakat süchiki tü ekeraajaakalü ouyase? Watüjaale saaʼu tia, wayaawateerü aaʼu naainjainjatüle na anoujashiikana tü miʼiraa aainjünawaikat shikiira jemelin Jesuu.

Nnojotsü aküjünüin suluʼu tü Wiwüliakat saainjünüin miʼiraa shikiira shikeraajüin nuuyase Jesuu otta waneinnua aʼyataalii nümüin Maleiwa. Piama neʼe wayuu aainjakana miʼiraa shikiira shikeraajüin nouyase saashin tü Wiwüliakat. Naya wayuukana nnojoishii anoujain nünain Jeʼwaa otta eejatü outaa sünain (Génesis 40:20; Marcos 6:21). Nnojoliipuʼushii aaʼinrüin miʼiraa na nikirajüinkana Jesuu shikiira ekeraajaa ouyasee (Encyclopædia Britannica).

Nnojotsü süküjain tü Wiwüliakat kasoʼulajachin jemelin Jesuu. «Nnojotsü süküjain karaloʼuta tü kaʼi jee tü kashi jemeikalü oʼu Jesuu», müsü Diccionario de historia de la Iglesia. Nüshajirüinje Jesuu kasoʼulajachin jemelin nia nücheküle naainjain na nikirajüinkana miʼiraa shikiira shikeraajüin nuuyase.

Nnojotsü süküjain tü Wiwüliakat naainjüle Jesuu miʼiraa shikiira jemelin nia jee nuluwataale na nikirajüinkana sünain. Wanee shiyaawajia kashi natuma na Romaanokana soʼu tü juyakat 336 soʼu wakalia, Cronógrafo de Filócalo münüsü, eejatü sünain tü kaʼi aainjünakalü oʼu miʼiraa shikiira jemelin Jesuu saashin New Catholic Encyclopedia. Akumajaasü sukuwaʼipa tia miʼiraakat kojuya juya süchikijee kettaain süshajünüin tü Wiwüliakat jee nnojoitpa Jesuu saaʼu tü Mmakat. Anuujeseʼe sünüiki tü karaloʼutakat Cyclopedia de McClintock y Strong: «Nnojotsü nuluwataalain Maleiwa jee nnojotsü aküjünüin suluʼu Nuevo Testamento süchiki tü miʼiraa aainjünakat shikiira jemelin Jesuu». *

Nüküjain Jesuu namüin na nikirajüinkana tü naaʼinrajatkat, suluʼusü tia tü Wiwüliakat. Nnojoliipajaʼa nuluwataain naya sünain aainjaa miʼiraa shikiira jemelin nia. Nnojoleerü anain nümüin wanee ekirajüi, «nikirajala waya sünain» namüle na nikirajüinkana süchiki wanee kasa nnojotka niʼikalain. Akaʼaya neʼe Jesuu, niyoutuin sunoujain wayuu sünain tü nnojotkat süküjain tü Wiwüliakat (1 Corinto 4:6, TNM).

Eeinjaʼa wanee kasa anasü aluwataanaka anain na nikirajüinkana Jesuu: outkajaainjana süpüla sotuin naaʼin tü kaʼi outakalü oʼu nia. Niʼitaala Jesuu shikii tia outkajawaakat otta nüküjain jamüinjatüin sukuwaʼipa natuma. Süpüshuaʼa tü nümakat süchiki tia otta tü kaʼi aainjünajatkalü oʼu, aküjünüsü suluʼu tü Wiwüliakat (Lucas 22:19; 1 Corinto 11:25).

Watüjaaitpa saaʼu müin aka saaʼin miʼiraa shikiira ekeraajaa ouyase tü miʼiraa aainjünawaikat shikiira jemelin Jesuu. Akaʼaya shia, nnojotpuʼusü naaʼinrüin shia na nikirajüinkana Jesuu süka namaʼanajeejatüin shia na manoujainsaliikana. Jee müsia, nnojotsü süküjain tü Wiwüliakat naainjain miʼiraa Jesuu otta na nikirajüinkana shikiira tü kaʼi jemeikalü oʼu nia. Müshiijeseʼe wainmain maʼin na anoujashii nnojoliikana aainjain miʼiraa tisienpüroʼu shikiira jemelin Jesuu.