Minilyon sa bilog nga kalibutan ang nagapati nga ang Krismas amo ang pagselebrar sang birthday ni Jesucristo. Pero napamensaran mo na bala kon ang mga Cristiano sang unang siglo, yadtong suod kay Jesus, nagselebrar sang Krismas? Kag nakahibalo ka bala kon ano ang ginasiling sang Biblia parte sa birthday? Ang paghibalo sang mga sabat sa sini nga mga pamangkot makabulig sa aton nga mahibaluan kon bala dapat saulugon sang mga Cristiano ang Krismas.

Una, wala sing may ginsambit ang Biblia nga may nagselebrar sang birthday ni Jesus ukon sang iban pa nga matutom nga sumilimba sang Dios. May duha lamang ka tawo nga nagselebrar sang ila birthday nga ginsambit sa Biblia. Pareho sila nga indi alagad ni Jehova, ang Dios sa Biblia, kag may malain nga natabo sa tion sang selebrasyon sang ila birthday ukon kaadlawan. (Genesis 40:20; Marcos 6:21) Suno sa Encyclopædia Britannica, ang mga Cristiano sadto indi ugyon sa “kustombre sang mga pagano nga pagselebrar sang birthday.”

Wala sing may ginsiling ang Biblia kon san-o gid natawo si Jesus. “Indi gid mapat-od sa [Bag-ong Katipan] ang petsa sang pagkatawo sang Cristo ukon sa bisan diin nga reperensia,” siling sang McClintock and Strong’s Cyclopedia. Ang matuod, kon gusto ni Jesus nga selebrahon sang iya mga sumulunod ang iya birthday, ginsugid niya kuntani sa ila ang petsa sang iya pagkatawo.

Ikaduha, wala sing rekord sa Biblia nga nagasugid nga nagselebrar si Jesus sang Krismas ukon ang bisan sin-o sa iya mga disipulo. Suno sa New Catholic Encyclopedia, una nga ginsambit ang pagselebrar sang Krismas “sa Chronograph of Philocalus, isa ka almanac sang mga Romano, nga ang mga ginsulat diri natabo sang 336 [C.E.].” Maathag nga madugay na nga nakompleto ang Biblia sang ginsambit ang Krismas kag siniglo na ang nagligad sang si Jesus ari sa duta. Gani ang McClintock and Strong nagsiling nga ang “pagsaulog sang Krismas wala ginsugo sang Dios, ukon indi ini mabasa sa [Bag-ong Katipan].” *

Bilang Daku nga Manunudlo, si Jesus naghatag sing maathag nga mga sugo kon ano ang gusto niya nga himuon sang iya mga sumulunod, kag nasulat ini sa Biblia. Pero wala nalakip sa iya mga sugo ang pagselebrar sang Krismas. Ang manunudlo sa eskwelahan indi gusto nga lapason sang mga estudyante ang iya ginasugo, amo man si Jesus, indi niya gusto nga ang iya mga sumulunod “magsobra sa mga butang nga nasulat na” sa Balaan nga Kasulatan.—1 Corinto 4:6.

Sa pihak nga bahin, may isa ka importante nga okasyon nga pamilyar gid sa mga Cristiano sadto—ang pagdumdom, ukon Memoryal, sang kamatayon ni Jesus. Si Jesus mismo nagsiling sa iya mga disipulo kon san-o ini saulugon kag ginpakita niya sa ila kon paano ini himuon. Ining espesipiko nga mga instruksion, kag ang petsa sang iya kamatayon, narekord sa Biblia.—Lucas 22:19; 1 Corinto 11:25.

Nabinagbinag naton nga ang Krismas isa ka pagsaulog sang birthday, kag wala ginsunod sang mga Cristiano sadto inang pagano nga kustombre. Isa pa, wala ginsambit sa Biblia nga si Jesus ukon ang iban pa nagsaulog sang Krismas. Bangod sini, minilyon ka Cristiano sa bilog nga kalibutan ang wala nagasaulog sang Krismas.