Batu babañata mwa lifasi balumela kuli Kirisimasi ki mukiti wa kuhupula lizazi lanaapepilwe Jesu Kreste. Kono kana Bakreste ba mwa linako za baapositola, ili bane bali balikani ba Jesu babatuna, nebaezanga mukiti wa Kirisimasi? Kana mwaziba zeibulela Bibele ka za kueza mikiti ya kuhupula mazazi a kupepwa? Kuziba likalabo za lipuzo zeo kukalutusa kuli luzibe haiba Bakreste baswanela kuezanga Kirisimasi.

Sapili, mwa Bibele hakuna litaba zebonisa kuli nekuezwanga mukiti wa kuhupula lizazi lanaapepilwe Jesu kamba mutanga yomuñwi wa Mulimu. Mañolo abulela feela za batu bababeli bane baezize mukiti wa kuhupula mazazi ane bapepilwe. Bubeli bwa batu bao nesi balapeli ba Jehova, yena Mulimu yabulezwi mwa Bibele, mi zeneezahezi fa mikiti yeo neli zemaswe. (Genese 40:20; Mareka 6:21) Ka kuya ka buka ya Encyclopædia Britannica, Bakreste ba kwa makalelo nebasa lumeli mwa “sizo sa sihedeni sa kuezanga mikiti ya kuhupula mazazi a kupepwa.”

Bibele haibuleli luli lizazi lanaapepilwe Jesu. Buka ya McClintock and Strong’s Cyclopedia ili: “Lizazi lanaapepilwe Kreste haliyo mwa Testamente Yenca kamba mwa buka ifi kamba ifi.” Niti kikuli kambe Jesu naabata kuli balateleli bahae baezange mukiti wa kuhupula lizazi lanaapepilwe, naaka babulelela lizazi lanaapepilwe luli.

Sabubeli kikuli, Bibele hakuna foibulela kuli Jesu kamba yomuñwi wa balutiwa bahae naaezanga mukiti wa Kirisimasi. Ka kuya ka buka ya New Catholic Encyclopedia, kuezanga mukiti wa Kirisimasi nekubulezwi lwapili “mwa buka ya Chronograph of Philocalus, ili buka ya Siroma yehatiswanga silimo ni silimo mokuñolwanga lika zeama taba kamba kezahalo yeñwi ili zeo mwendi lizwa mwa buka yeneñozwi ka silmo sa 336 [C.E.].” Taba yeo ibonisa hande kuli buka yeo neiñozwi Bibele inze ifelizwe kale kuñolwa ili lilimo zeñata-ñata kuzwa fanaatezi Jesu fa lifasi. Kacwalo, buka ya McClintock and Strong ibonisa kuli “kuezanga mukiti wa Kirisimasi haki taelo yezwa ku Mulimu, mi taelo yeo haiyo mwa Testamente Yenca.” *

Ka kuba Muluti Yomutuna, Jesu naafile litaelo zeutwahala hande kwa balateleli bahae ka za lika zene baswanela kueza, mi litaelo zeo liñozwi mwa Bibele. Kwa litaelo zeo, hakuna fateñi taelo ya kueza mukiti wa Kirisimasi. Sina feela muluti hanaasike atabela kuli bana ba sikolo basike balatelela litaelo zabafile, Jesu ni yena utabela kuli balateleli bahae ‘basike baikezeza kufita zeñozwi’ mwa Mañolo Akenile.—1 Makorinte 4:6.

Kono kunani kezahalo yabutokwa yene baezanga Bakreste ba kwa makalelo, yona ya kuhupula lifu la Jesu. Jesu kasibili naabulelezi balutiwa bahae kuli baezange mukiti wo mi naababonisize ni mobaswanela kuuezeza. Litaelo zeikutwahalela hande ze ni lizazi luli lanaashwile, liñozwi mwa Bibele.—Luka 22:7, 19; 1 Makorinte 11:25.

Sina molubonezi, Kirisimasi ki mukiti wa kuhupula lizazi la kupepwa, mi Bakreste ba kwa makalelo nebasa lateleli sizo sa sihedeni seo. Kuzwa fo, Bibele haibuleli kuli Jesu kamba mutu yomuñwi akile aeza mukiti wa Kirisimasi. Ka kuya ka litaba za niti zelunyakisisize, Bakreste babañata mwa lifasi kaufela bafitile fa kuutwisisa kuli habaswaneli kuezanga mukiti wa Kirisimasi.