Miyón mani chjota xi kʼoasʼin makjainle nga kʼia kitsin Jesús nga bʼasje Navidad. Tonga a sakʼoa chjonangilai yaoli tsa kʼoati tsakʼasje sʼuí Navidad je chjotale Cristo xi siglo 1 tsakatio. Xi ijngosani, a ʼyaní jmeni xi tso je Biblia tʼatsʼe nga bʼasje chjota nga fele nó. Nga jchaa xi tʼatsʼe jebi, koasenkaoná nga koa̱njinná tsa chʼa̱sjee je Navidad kʼoa tsa mai.

Xi títjon, je Biblia alikui kʼoatso tsa sʼuíle tsakʼasje Jesús nga jele nó kʼoa tsa kʼoati kisʼin je choʼndale Niná xi tsakatio nichxin kjoatse. Ya Biblia to jao chjota síkʼaxki xi sʼuíle tsakʼasje nga jele nó kʼoa nga jao chjota jebi alikui choʼndale Jeobá koan. Xi ijngosani, alikui nda kichomani nga kʼoakisʼin (Génesis 40:20; Marcos 6:21). Je Encyclopædia Britannica kʼoatso nga je chjotale Cristo xi títjon tsakatio nga tsín kʼoakisʼin je “kostumbre xi kisʼele je chjota nga sʼuí tsakʼasje nga fele nó”.

Je Biblia alikui kʼoatso kʼiáni kitsin je Jesús. Je Diccionario de historia de la Iglesia itso: “Alikui jme xo̱n kjio xi kʼoakjoan tso jmé nichxinni kitsin Jesús”. Kʼiatsa kuilani koanmele Jesús nga sʼuíle katachʼasje, kʼoajin kitsole chjotatjenngile kʼiáni kitsin.

Xi majaoni, je Biblia alikui kʼoatso kʼiatsa Navidad tsakʼasje je Jesús. Je New Catholic Encyclopedia, kʼoatso nga tokʼia jaʼaitʼa títjon nga kichʼasje Navidad ya calendario xi tsʼe chjota judío xi “Cronógrafo de Filócalo tsakʼin, kʼiala nga nó 336”. Jebi nʼio koanskanni nga kʼoakoan, toje koanjngo nga kichji je Biblia kʼoa to jenkjín siento nó jaʼato nga jaʼai Jesús i̱ Sonʼnde. Kʼoa je Cyclopedia xi tsʼe McClintock kao Strong kʼoatso nga je Navidad tsín tsʼe Niná kinroani kʼoa tsín ya faʼaitʼa je Nuevo Testamento. *

Je Jesús kʼoakitsole je chjotatjenngile jmeni xi mele nga sʼin kʼoa je kjoafaʼaitsjen xi kitsjoale yaa Biblia faʼaitʼa. Tonga tsínkʼia kʼoakitsole tsa Navidad katabʼasje. Tojo sʼín jngo maestro, nga tsín sasénle kʼiatsa je xti xi tsoyale kui kʼoasʼin jmeni xi tsín je kʼoakatsole. Kʼoatisʼinni, je Jesús alikui mele nga kui kʼoasʼin chjotale jmeni xi tsín ya tjítʼa je Biblia (1 Corintios 4:6).

Tonga tjín jmeni xi nʼio tjínle kjoandosin xi kuenta kisʼin je chjotale Cristo xi títjon tsakatio. Nga kisikjaʼaitsjenya je Kjoabiyale Cristo. Jesoaa Jesús xokitsole je chjotatjenngile kʼiáni kʼoa jósʼin si̱kjaʼaitsjenya je kjoabiyale. Jmeni xi kitso Jesús kʼoa jme nichxinni kinikʼien yaa Biblia tjítʼa (Lucas 22:7, 19; 1 Corintios 11:25).

Tojosʼin tiʼyaa, je chjota kʼoasʼin makjainle nga kʼoasʼin kitsin je Jesús nga bʼasje Navidad. Tonga je chjotale Cristo xi títjon tsakatio alikui kui kostumbre jebi kitjenngi. Xi ijngosani, je Biblia alikui kʼoatso tsa Navidad tsakʼasje je Jesús. Miyón mani je chjotale Cristo xi tjío jngo tjíjtsa Sonʼnde xi tsín Navidad bʼasje.