Mouye auho, ovanthu ovanyingi-nyingi vetavela okuti Jesus Kristu watyitua po Natale, otyo valingila otyipito tyokuhinangela onthiki atyitwa. Nthiki imwe wasokelea-le inkha Ovakristau votete, vana vaendele na Jesus navo ankho valinga otyipito tyo Natale? Oityi Ombimbiliya ipopia konthele yokulinga ovipito viomanima? Inkha tuvasa omakumbululo omapulo oo, maetukuatesako okunoñgonoka inkha o Natale o pala Ovakristau.

Tete, Ombimbiliya kaipopi onthiki naike yokunyana otyipito tyo nthiki Jesus atyitwa ine yomunthu omukuavo ankho ufenda Huku. Ombimbiliya ipopia vala konthele yovanthu vevali vanyanene ovipito vionthiki vatyitwa. Ovanthu ovo ankho kavafende Huku yotyotyili iya movipito ovio amumoneka ovipuka ovivi. (Gênesis 40:20; Marcos 6:21) Ngetyi tyipopia omukanda umwe utiwa Enciclopédia Britânica, Ovakristau votete ankho kavalingi ‘oviso viovipito vionthiki omunthu atyitwa, mokonda vilingwa vala novanthu vahafende Huku.’

Ombimbiliya kaipopi onalupi Jesus atyitwa. Konthele yotyo omukanda umwe utiwa Cyclopedia ya McClintock na Strong wati: “O Testamendu Omphe, kaipopi onthiki patyi Jesus atyitwa, tyihe otyo vala petupu apa tuvasa papopia onthiki Jesus atyitwa.” Pahe soka: Inkha Jesus wahandele ovalanduli vae valie ovipito monthiki atyitwa, okuti ñgeno kevepopilile okuti lie-lie otyipito monthiki natyitwa?

Vali, Mombimbiliya mutupu apa papopia okuti Jesus novalongwa vae valile o Natale. Ngetyi tyapopia omukanda Enciclopédia Católica mo ingelesi, onthele yotete yapopia konthele Yonatale, yapopiwa momukanda weeta onohanyi mbenima walingua na Philocalus menima lio 336 pomuvo wa Kristu. Otyo tyapopiwa puetyi Ombimbiliya yahonekwa kohale iya no puetyi Jesus ankho eya-le kohale pano pohi. Tupu ngetyi tyiapopia omukanda Cyclopedia de McClintock e Strong, otyipito tyo Natale katyahindilwe na Huku, tupu katyikahi mo Testamendu Omphe. *

Jesus Omulongesi Omunene, wapopile etyi ankho ahanda ovalongwa vae valinge. Mombimbiliya tuvasamo ovipuka alongesa. Mahi mutupu onthele ipopia okuti, tuna okulia o Natale. Soka kongeleka ei: O mulongesi umwe, kahande ovalongwa vae valinge otyipuka eheveitile, ine hamwe okulinga otyipuka ngetyi vahanda. Tupu na Jesus kahande ovalongwa vae, valinge etyi tyahahonekelwe Mombimbiliya.​— 1 Coríntios 4:6.

Pena omuvo umwe Ovakristau votete ankho valinga otyipito tyimwe. Ove utyii otyipito patyi? Ehinangelo lio Nonkhia mba Jesus. Iya apopilila ovalongwa vae okuti, vena okuhinangela ononkhia mbae. Jesus wevepopila onalupi vena okutyilinga no ñgeni tyilingwa. Atyiho otyo, aloo umwe onthiki yatyo tyikahi Mombimbiliya.​— Lucas 22:19; 1 Coríntios 11:25.

Ngetyi tuatala, o Natale otyipito tyokutyitwa. Ovakristau votete ankho kavali o otyipito tyilingwa novanthu vahafende Huku. Tyihe-otyo vala Ombimbiliya kaipopi okuti Jesus nae ankho ulia o Natale. Puetyi ovanyingi vetyinoñgonoka, ovanthu Ovakristau ovanyingi-yingi mouye auho, avatokola okuhali vali o Natale.