Ӕгас зӕххыл дӕр милуангай адӕмы уырны, Рождествойы бӕрӕгбон Йесо Чырыстийы гуырӕнбон кӕй у. Фӕлӕ цымӕ фыццаг ӕнусы чырыстӕттӕ, зӕгъӕм, Йесойӕн йӕ апостолтӕ ӕмӕ йӕ ахуыргӕнинӕгтӕ, Рождество бӕрӕг кодтой? Стӕй цымӕ Библийы гуырӕнбонты тыххӕй цы фыст ис? Ацы фарстатӕн дзуапп куы базонӕм, уӕд бамбардзыстӕм, чырыстӕттӕн Рождество бӕрӕг кӕнын ӕмбӕлы ӕви нӕ.

Фыццаджыдӕр зӕгъын хъӕуы уый, ӕмӕ Библийы афтӕ никуы ис фыст, Чырысти кӕнӕ Хуыцауы иузӕрдион лӕггадгӕнджытӕй ӕндӕр исчи йӕ гуырӕнбон кӕй бӕрӕг кодта. Ис дзы ӕрмӕстдӕр дыууӕ адӕймаджы гуырӕнбоны кой, фӕлӕ сӕ иу дӕр Йегъовӕйӕн, Библийы кӕй кой цӕуы, уыцы Хуыцауӕн, нӕ лӕггад кодта. Дыууӕ гуырӕнбоны дӕр ӕрцыд ӕвирхъау хабӕрттӕ (Райдиан 40:20; Марчы 6:21). Иу энциклопедийы куыд фыст ис, афтӕмӕй фыццаг чырыстӕттӕ гуырӕнбонтӕ никуы бӕрӕг кодтой, уымӕн ӕмӕ ахӕм ӕгъдау уыди, бирӕ хуыцӕуттӕн чи куывта, уыцы адӕммӕ (Encyclopædia Britannica).

Йесо кӕд райгуырд, уый фӕдыл Библи бӕлвырдӕй ницы дзуры. Макклинток ӕмӕ Стронджы энциклопедийы фыст ис: «Чырысти цы бон райгуырд, уый базонӕн нӕй нӕдӕр Ног Фӕдзӕхстӕй, нӕдӕр ӕндӕр искӕцӕй» (McClintock and Strong’s Cyclopedia). Уӕвгӕ, Чырыстийы куы фӕндыдаид, цӕмӕй йын йӕ фӕдылдзӕуджытӕ йӕ гуырӕнбон бӕрӕг кодтаиккой, уӕд сын ӕнӕмӕнгӕй загътаид, цы бон райгуырд, уый.

Дыккаджы та уый, ӕмӕ Библийы афтӕ никуы ис фыст, ӕмӕ Чырысти кӕнӕ йӕ ахуыргӕнинӕгтӕй чидӕртӕ Рождество бӕрӕг кодтой. Иу энциклопедийы куыд фыст ис, афтӕмӕй Рождествойы кой фыццаг хатт цӕуы, «ӕвӕццӕгӕн, нӕ эрӕйы 336 азы фыст чи ӕрцыд, уыцы „Филокалусы хронографы“, ома ромаг къӕлиндары» (New Catholic Encyclopelia). Куыд зыны, афтӕмӕй уыцы хронограф фыст ӕрцыд, Чырысти зӕххыл куы уыди ӕмӕ Библи фыст куы фӕци, уымӕй цалдӕр ӕнусы фӕстӕ. Макклинток ӕмӕ Стронджы энциклопедимӕ гӕсгӕ, «Рождество бӕрӕг кӕныны ӕгъдау Хуыцау не ’рфидар кодта, стӕй Ног Фӕдзӕхсты дӕр йӕ кой нӕй» (McClintock and Strong’s Cyclopedia) *.

Ӕппӕты хуыздӕр Ахуыргӕнӕг, Йесо Чырысти, йӕ ахуыргӕнинӕгтӕн бӕлвырд бацамыдта, цы хъуамӕ арӕзтаиккой, уый. Ӕмӕ уыцы амындтӕ фыст ӕрцыдысты Библийы. Фӕлӕ сын Рождество бӕрӕг кӕныны тыххӕй никуы ницы загъта. Ӕмӕ ахуыргӕнӕджы куыд нӕ фӕнды, цӕмӕй йӕ ахуыргӕнинӕгтӕ йӕ ныхасы сӕрты ахизой, раст афтӕ Чырыстийы дӕр нӕ фӕнды, цӕмӕй йӕ фӕдылдзӕуджытӕ, «фыст цы у, уый сӕрты... хизой» (1 Коринфӕгтӕм 4:6).

Фӕлӕ зӕгъын хъӕуы уый, ӕмӕ фыццаг чырыстӕттӕ бӕрӕг кодтой иу ахсджиаг хабар – Чырыстийы мӕлӕт Ӕрымысӕн изӕр. Чырысти йӕ ахуыргӕнинӕгтӕн загъта, уыцы хабар бӕрӕг кӕнын кӕд хъӕуы, уый ӕмӕ йӕ бӕрӕг кӕнын куыд хъӕуы, уый сын ӕвдисгӕ дӕр ракодта. Уыцы бӕлвырд амындтӕ, стӕй, цы бон амард, уый дӕр, фыст ӕрцыдысты Библийы (Лукайы 22:19; 1 Коринфӕгтӕм 11:25).

Куыд федтам, афтӕмӕй бирӕтӕ Рождество нымайынц Чырыстийы гуырӕнбоныл, фӕлӕ йӕ фыццаг чырыстӕттӕ нӕ бӕрӕг кодтой, уымӕн ӕмӕ гуырӕнбонтӕ равзӕрдысты, бирӕ хуыцӕуттӕн чи куывта, уыдоны динтӕй. Уымӕй уӕлдай, Библийы афтӕ фыст никуы ис, ӕмӕ Йесо Чырысти кӕнӕ ӕндӕр исчи Рождество бӕрӕг кодта. Ӕмӕ ӕппӕт уыдӕттӕ зонгӕйӕ ӕгас дунейы дӕр милуангай чырыстӕттӕ аскъуыддзаг кодтой, Рождество кӕй нӕ бӕрӕг кӕндзысты.