Mundo enteropi ashtaca gentecunaca crinmi, Navidadca Jesús nacirishcata yaringapami can nishpa. Shinapash Jesuspa callari catijcunaca ¿Navidadta yarinllu carca?¿Imatata Bibliaca cumpleañoscunamanda yachachin? Chai tapuicunata yachajushpami Jesusta catijcuna Navidadta yarina cashcata o na yarina cashcata intindipashun.

Bibliapica Jesuspa cumpleañosmanda, o Taita Diosta sirvijcunapa cumpleañoscunamandaca na parlanllu. Jehová Diosta na sirvijcunapa ishcai cumpleañoscunamandallami parlan. Ishcandi cumpleañoscunapillatami jatun llaquicuna tiarca (Génesis 40:20; Marcos 6:21). Encyclopædia Britannica nishca shinaca, Jesusta punda catijcunaca, Taita Diosta na sirvij gentecunashna cumpleañoscunata rurangapaca na munanllu carca.

Bibliapica Jesús ima punllapacha nacirishcataca na villanllu. Diccionario de historia de la Iglesia nishcaca ninmi: “Cristo ima punlla, ima quillapi nacirishcataca maijan libropipash na villajunllu” nishpa. Shinaca, pai ima punlla nacirishcata yarishpa paipa catijcuna cumpleañoscunata rurachun munashpaca, Jesusca pai ima punlla nacirishcataca imashinapash villachinmanmi carca.

Shinallata, Jesuspash o paipa catijcunapash Navidadta yarishcataca maijan libropipash na villajunllu. New Catholic Encyclopedia nishcaca ninmi: “Romanocunapa calendariopimi, primera vez Navidadmanda parlai callarirca. Chai calendarioca huata 336mandami cashcanga” nishpa. Imashinami ricupanchi, Bibliata escribi tucuchishcamanda ashtaca huatacuna jipa, Jesús cai Alpapi cashcamanda ashtaca huatacuna jipami Navidadmanda parlai callarirca. Chaimandami, Cyclopedia de McClintock y Strong nishcaca nin: “Navidadta yarichunga Taita Diosca na mandashcachu. Mushuj Testamentopipash Navidadta yarinami can nishcaca na tiajunllu” nishpa. *

Jesusca alimi yachachirca, paipa catijcuna imata rurachun munashcata. Chai mandashcacunaca Bibliapimi tiajun. Shinapash, Navidadta yarinami canguichi nishpaca nunca na mandarcachu. Imashinami profesorcunaca paicunapa yachajujcuna cazuchun munan, Jesuspash paipa catijcuna paipa yachachishcacunatalla catichunmi munan (2 Juan 9).

Shinapash Jesusta punda catijcunaca, Jesús huañushca punllata yarinatami yaria can carca. Jesusllatami paipa catijcunataca pai huañushcata ima hora yarinata, imashina yarinatapash ricuchishpa saquirca. Jesús ima punllapipacha huañushcata, chai punllata ima hora, imashina yarina cashcataca Bibliapimi escribishca tiajun (Lucas 22:7, 19).

Imashinami ricupashcanchi, Navidadta yarishpaca, Jesuspa cumpleañostami ruranajun. Shinapash Jesuspa callari catijcunaca, Taita Diosta na adoraj gentecunami cumpleañoscunataca ruran yashpami, Navidadtaca na yarin carca. Bibliapica Jesuspash o shujcunapash Navidadta yarishcataca na imatapash ninllu. Chaimandami mundo enteropi ashtaca millón Jesusta catijcunaca Navidadta na yaringapaj munan.