INIỌVO eya buebun re je rọvwọ-ọn, hẹ usun rẹ Iseri rẹ Jihova re ga vẹ oruru vwẹ asan ra da ma guọnọ ukẹcha. Evo ga vwẹ ẹkuotọ efa vwẹ ikpe buebun re. Die yen chọn ayen uko vwọ jowọ nana? Die yen ayen yono nẹ iruo ẹga nana rhire? Mavọ yen o djobọte akpeyeren rayen wan? Avwanre riẹnmie iniọvo eya evo re ga krẹre. Wọ da dia oniọvo aye rọ je rọvwọ-ọn ro vwo owenvwe ro vwo vwobọ vwẹ iruo ẹga na rọ vọnre vẹ omavwerhovwẹn, imuẹro herọ nẹ wọ cha mrẹ erere vwo nẹ eta rayen rhe. Vwọrẹ uyota, udje rayen sa dia erere kẹ idibo rẹ Ọghẹnẹ ejobi.

Wo vwo ẹwẹn ivivẹ sẹ wọ sa ghene ga vwẹ ẹkuotọ ọfa jẹ wọ je rọvwọ-ọn? Anita, rọhẹ ẹgbukpe 75 ji vwo ẹwẹn ivivẹ kpahen ẹgba rọyen. England yen ọ dia ghwanre, ọ ton iruo ọkobaro phiyọ ọke rọ vwọ hẹ ẹgbukpe 18. Ọ da ta: “Oma vwerhen ovwẹ siẹrẹ mi de yono ihwo kpahen Jihova, jẹ me nama roro nẹ mi se kpo ẹkuotọ ọfa-a. Mi yono ejajẹ ọfa-a, o ji muvwẹro nẹ me cha sa tobọ riẹ-ẹn. Ọtiọyena, ọke re vwo durhie uvwe kpo Isikuru rẹ Gilead, o de gbevwunu mamọ. Me nama roro nẹ ohwo kerẹ omẹvwẹ ro fiemu na-a che se vwo oka rẹ edurhie tiọye-en. Ẹkẹvuọvo, me da vuẹ oma mẹ nẹ, ‘Jihova da tanẹ mi se ruo, me cha davwọn.’ Ọ vrẹ ẹgbukpe 50 re. Vwo nẹ ọke yena rhe, me ga kerẹ imishọnare vwẹ ẹkuotọ rẹ Japan.” Ọ da je ta: “Mi jiro kẹ iniọvo eya re je dia ighene nẹ ayen vwomakpahotọ kẹ iruo ọkobaro vwẹ ẹkuotọ ọfa. Oma vwerhen ovwẹ nẹ buebun ghini ru ọtiọyen.”

Iniọvo eya re ga vwẹ ẹkuotọ oshesheri mrẹrẹ bẹnbẹn ayen vwo brorhiẹn na ẹsosuọ. Die yen kẹ ayen uduefiogbere?

Maureen, rọhẹ ẹgbukpe 64 tare nẹ, “Nẹ ọkiemọ rhe, ọyen me vwọ guọnọ yerin omamọ akpọ, me sa vwọ vwẹ ukẹcha kẹ ihwo efa.” Ọke ro vwo te ẹgbukpe 20, ọ da kua kpo Quebec rọhẹ Canada, asan ra da guọnọ ukẹcha rẹ ekobaro mamọ. Ọ da ta: “Ọke vwọ yanran na, e de durhie uvwe kpo Isikuru rẹ Gilead, oshọ me vwọ yanjẹ igbeyan mẹ vwo kpo asan ọrhorha, mu uvwe. Oshọ me vwọ yanjẹ oni mẹ vwo mu uvwe kidie ọyen ọvo yen cha vwẹrote ọsẹ mẹ rọ muọga. Me nẹrhovwo kẹ Jihova kpahen ẹdia nana ason buebun vẹ oviẹ. Me  vwọ vuẹ ọsẹ vẹ oni mẹ kpahen obo ri kpokpo uvwe ẹwẹn, ayen da vuẹ vwẹ nẹ mi rhiabọreyọ edurhie na. Ukoko na ji bicha ọsẹ vẹ oni mẹ. Ukẹcha rẹ Jihova re me mrẹre kẹ vwẹ imuẹro nẹ ọ je cha vwẹrote vwe. Mi de muegbe me vwọ yanran!” Vwo nẹ 1979, Maureen gare kerẹ imishọnare vwẹ West Africa vrẹ ẹgbukpe 30. Nonẹna, Maureen vwẹrote oni rọyen vwẹ Canada, ọ je ga kerẹ ọkobaro oghẹresan. O vwo roro kpo obuko, ọ da ta: “Ọkieje Jihova vwọ kẹ vwẹ obo me ghwa guọnọ vwẹ ọke me ghwa vwọ guọnọ.”

Wendy, rọhẹ ẹgbukpe 65, ton iruo ọkobaro phiyọ ọke rọ vwọ hẹ ẹgbukpe 14. Ọ da ta: “Oma vo vwẹ mamọ, me sa ta ota kẹ ọrhorha-a. Ẹkẹvuọvo, iruo ọkobaro yono uvwe oborẹ me sa vwọ ta ota kẹ kohwo kohwo, mi de rhi vwo uduefiogbere. Ọke vwọ yanran na, oshọ rhe mu uvwe-e. Iruo ọkobaro yono uvwe nẹ me vwẹroso Jihova, ki mi rhi vwo ẹwẹn me vwọ ga vwẹ ẹkuotọ ọfa. Vwọba, oniọvo aye ọvo rọ gare kerẹ imishọnare vwẹ Japan vrẹ ẹgbukpe 30 re, de se vwe nene oma kpo iruo aghwoghwo na vwẹ Japan rọ cha reyọ emeranvwe erha. Oyan nana nẹrhẹ owenvwe mẹ rhoma ganphiyọ, mi vwo kpo ẹkuotọ ọfa ra ga.” Vwẹ 1986, Wendy da kua kpo Vanuatu, orere rẹ ame riariẹ phiyọ, omarẹ iroko 1,770 vwẹ ẹbẹre ọnre vanẹcha rẹ Australia.

Wendy jehẹ Vanuatu, ọ ga vwẹ asan re de ruiruo rẹ efanfan. Ọ da ta: “Ọ kẹ vwẹ aghọghọ rode me da mrẹ ẹko vẹ ikoko sansan re vwo muẹ vwẹ asan ri sherabọ. Ọyena uphẹn rode mi vwo vwobọ vwẹ iruo rẹ Jihova vwẹ ekogho nana rẹ ame riariẹ phiyọ na.”

Kumiko, rọhẹ ẹgbukpe 65 ga kerẹ ọkobaro ọkieje vwẹ Japan, tavwen oniọvo aye rọ dia ọrivẹ rọyen ke vuẹ nẹ ayen kua kpo Nepal. Kumiko da ta: “Ọkieje yen ọ vwọ vuẹ vwẹ, jẹ me rhọnvwa-an. Oshọ mi vwo yono ejajẹ kpokpọ je dia asan kpokpọ mu uvwe. Igho ra je vwọ kua kpo ẹkuotọ ọfa jẹ ebẹnbẹn ọvo. A ta ọyena obọ, me da rha mrẹ oma mẹ vwẹ họspito fikirẹ asidẹnti rẹ imotosaikoro. Ki mi roro: ‘Die yen cha vwọ kpahen ọnana? Mi se shero ọga ọgangan rọ da nẹrhẹ mi je iruo rẹ ọkobaro mẹ eruo vwẹ ẹkuotọ ọfa. Me sa ga vwẹ ẹkuotọ ọfa, ọ da tobọ dia ẹgbukpe ọvo?’ Me nẹrhovwo gangan vwọ kẹ ukẹcha rẹ Jihova.” O vwo nẹ họspito na nu, Kumiko de kpo Nepal, ọke vwọ yanran na ọ vẹ ọrivẹ rọyen na da kua kpo oboyin.

Ọ joma te ẹgbukpe ihwe rẹ Kumiko vwọ ga vwẹ ẹkuotọ rẹ Nepal re, ọ da ta: “Ebẹnbẹn me ro  ẹnwan kpahan jovwo na da rhe dia kerẹ Abadi Ọvwavware rọ ghare kpo ẹkẹn ivẹ. Oma vwerhen ovwẹ nẹ me ra ga vwẹ asan ra da ma guọnọ ukẹcha. Ọke buebun mi de ghwoghwo ota kẹ orua ọvo, ihwo iyorin yẹrẹ esan re dia kẹrẹ ayen se kuomaba avwanre. Imitete dede tobọ vuẹ vwẹ nẹ me kẹ ayen itrati. Omavwerhovwẹn herọ siẹrẹ e de ghwoghwo ota kẹ ihwo re nabọ kerhọ tiọyena.”

Aphro herọ-ọ, iniọvo eya nana re je rọvwọn na-a rhiẹromrẹ egbabọse. Die yen ayen ru kpahen ẹdia nana?

Diane, ro nẹ Canada rhe tare nẹ, “Ẹsosuọ, ọ bẹnre mi vwo kpo asan oshesheri ọtiọyen jẹ orua mẹ vwo.” Ọ hẹ ẹgbukpe 60 re, ọ gare kerẹ imishọnare vwẹ Ivory Coast (ra rhe riẹn phiyọ Côte d’Ivoire) ẹgbukpe 20. Ọ da je ta: “Me rẹ Jihova nẹ ọ chọn vwẹ uko vwo vwo ẹguọnọ kpahen ihwo mi ghwoghwo ota kẹ. Oniọvo Jack Redford, rọ dia ọvo usun rẹ iyono mẹ vwẹ Isikuru rẹ Gilead, vuẹ avwanre nẹ ẹsosuọ avwanre se hirharoku ebẹnbẹn sansan vwẹ asan re ji avwanre ra na, ma rho uweren ọgangan. Ẹkẹvuọvo, ọ da je ta: ‘Wo nẹ uweren na-a. Ni ihwo na, ni opharo vẹ ẹro rayen. Ni oborẹ ovuẹ rẹ Baibol na djobọte ayen wan.’ Ọtiọyen mi ghini ru, ọ ghene kẹ vwẹ ebruba gbidiki! Mi de ghwoghwo ovuẹ rẹ Uvie na kẹ ihwo, ke me mrẹ omavwerhovwẹn vwẹ opharo rayen.” Orọnvwọn ọfa vọ yen vwẹ ukẹcha kẹ oniọvo Diane vwọ ga vwẹ ẹkuotọ oshesheri? Ọ da ta: “Mi siẹkẹrẹ ihwo me vwẹ Baibol na yono, ọ je kẹ vwẹ aghọghọ rode siẹrẹ ayen da rhe dia idibo rẹ Jihova. Me vwẹ asan me da ga na vwo ru uwevwin mẹ. Mi de rhi vwo esẹ vẹ ini, iniọvo eshare vẹ eya vwẹ ukoko na, kirobo rẹ Jesu tare.”—Mak 10:29, 30.

Anne, rọhẹ ẹgbukpe 46, ga vwẹ ẹkuotọ ọvo ra da dobọ rẹ owian na ji vwẹ Asia. Ọ tare nẹ, “Ikpe buebun me ga vwẹ asan sansan re na, mi nene iniọvo eya buebun dia, asan ayen nurhe vẹ uruemu rayen fẹnẹ ọmẹ shesheri. Ọtiọyena, ẹghwọ sa vwomaphia ọkiọvo. Vwẹ ẹdia tiọyena, ke me davwẹngba vwọ nabọ vughe ihwo me vẹ ayen gba dia na, mi se vwo vwo ẹruọ rẹ ẹkuruemu rayen. Me je davwẹngba mi vwo dje ẹguọnọ vẹ erorokẹ kẹ ayen vwọ vrẹ obo ri jovwo. Oma vwerhen ovwẹ nẹ ẹgbaẹdavwọn mẹ nẹrhẹ mi vwo emamọ igbeyan rhi te nonẹna, ọnana chọn vwẹ uko vwọ riavwerhen rẹ iruo mẹ.”

 Vwẹ 1993, e de ji oniọvo Ute, rohẹ Germany kpo Madagascar, ra ga kerẹ imishọnare; asaọkiephana, ọ hẹ ẹgbukpe 53 re. Ọ da ta: “Ẹsosuọ, mi nene erọnvwọn buebun muabọ; ejajẹ na, aruọke na, ọga rẹ odo, edjan sansan re so ọga kẹ ohwo. Ẹkẹvuọvo, me mrẹ ukẹcha mamọ. Ihwo me vwẹ Baibol yono, iniọvo eya rehẹ asan na, vẹ emọ rayen, vwẹ odirin yono uvwe ejajẹ na. Ọrivẹ mẹ nabọ vwẹrote vwe ọke me vwọ muọga. Jẹ ọ rọ ma rho, Jihova chọn vwẹ uko. Me ta ọdavwẹ mẹ kẹ ọkieje womarẹ ẹrhovwo. Ke me hẹrhẹ, ọkiọvo ẹdẹ ibro yẹrẹ emeranvwe evo wan tavwẹn me ke mrẹ ẹkpahọnphiyọ rẹ ẹrhovwo mẹ. Jihova yen rhuẹrẹ ebẹnbẹn mẹ eje phiyọ.” Oniọvo Ute ga vwẹ Madagascar omarẹ ẹgbukpe 23 re.

Kerẹ iniọvo efa re ga vwẹ asan efa, ọkieje yen iniọvo eya re je rọvwọ-ọn re ga vwẹ ẹkuotọ efa vwo gbikun rẹ erere ayen mrẹre. Erhọ yen ebruba evo ayen rhiẹromrẹ?

Heidi, ro nẹ Germany rhe, ga kerẹ imishọnare vwẹ Ivory Coast (ra rhe riẹn phiyọ Côte d’Ivoire) rhavwẹn ukpe rẹ 1968, asaọkiephana ọ hẹ ẹgbukpe 73 re. Ọ tare nẹ, “Orọnvwọn rọ ma kẹ vwẹ aghọghọ yen me vwọ mrẹ emọ mi vwori vwevunrẹ ukoko na re yan ‘nene uyota na.’ Ihwo evo me vwẹ Baibol yono, ga kerẹ ekobaro vẹ ekpako enẹna. Buebun rayen se vwe Mama. Ọvo usun rẹ ekpako na vẹ aye rọyen kugbe emọ rayen reyọ ovwẹ kerẹ ẹbẹre ọvo rẹ orua rayen. Kọyen Jihova kẹ vwẹ ọmọshare vẹ aye, kugbe ivwrọmọ erha.”—3 Jọn 4.

Karen, ro nẹ Canada rhe, gare vwẹ West Africa, vrẹ ikpe 20, enẹna ọ hẹ ẹgbukpe 72 re. Ọ da ta: “Iruo rẹ imishọnare yono uvwe uruemu rẹ omaevwoze, ẹguọnọ, vẹ odirin. Vwọba, kidie nẹ mi nene ihwo ri nẹ ẹkuotọ sansan rhe wian kuẹgbe, ẹro mi vwo nẹ ihwo de rhi wene. Me rhe mrẹvughe nẹ idjerhe sansan yen herọ re vwo ruẹ orọnvwọn. A mrẹ vwo dje omavwerhovwẹn rọye-en, mi vwo emamọ igbeyan vwẹ kasan kasan! Dede nẹ akpeyeren vẹ asan avwanre da ga fẹnẹre asaọkiephana, oyerinkugbe avwanre je nabọ gan.”

Margaret, ro nẹ England rhe, te ẹgbukpe 79 re. Ọ gare kerẹ imishọnare vwẹ Laos. Ọ tare nẹ, “Ra vwọ ga vwẹ ẹkuotọ ọfa chọn vwẹ uko vwọ mrẹ oborẹ Jihova si ihwo rẹ ẹkuotọ eje vwọ ro ukoko rọyen. Ọnana bọn esegbuyota mẹ gan mamọ. Ọ kẹ vwẹ imuẹro kokoroko nẹ Jihova yen suẹn ukoko rọyen na, ọhọre rọyen ji che rugba.”

Aphro herọ-ọ, iniọvo eya re je rọvwọ-ọn re ga vwẹ ẹkuotọ efa, nabọ vwobọ vwẹ iruo aghwoghwo na vọnvọn. Ayen fo ihwo ra nabọ jiri. (Iguẹ. 11:40) Ayen ji buẹnphiyọ ọkeneje. (Une 68:11) Wọ sa rhuẹrẹ ẹdia wẹn phiyọ rere wo nene udje rẹ iniọvo eya nana re vọnre vẹ oruru na? Wo de ru ọtiọyen, ku wọ sa “davwe re wọ mrẹ nẹ Ọrovwohwo yoma!”—Une 34:8.