1. Јеһова инсаны јараданда она һансы габилијјәтләри бәхш едиб?

ЈЕҺОВА АЛЛАҺ инсаны јараданда она чохлу ҝөзәл габилијјәтләр бәхш едиб, мәсәлән, дүшүнмәк, проблемләри һәлл етмәк, ҝәләҹәк үчүн план гурмаг, бу планлары јеринә јетирмәк вә мәгсәдә доғру ирәлиләмәк габилијјәти (Мәс. 2:11; Филип. 2:13). Бундан әлавә инсана виҹдан, јәни јахшыны писдән ајырмаг габилијјәти бәхш едиб. Виҹдан инсаны ҝүнаһдан чәкиндирир вә етдији ҝүнаһлардан ибрәт ҝөтүрмәјә көмәк едир (Ром. 2:15).

2. Јеһова баҹарыгларымыздан неҹә истифадә етмәји мәсләһәт ҝөрүр?

² Јараданымыз истәјир ки, биз өз баҹарыгларымыздан сәмәрәли шәкилдә истифадә едәк. Чүнки О, бизи севир вә бунун бизә мәмнунлуг ҝәтирәҹәјини билир. Өз Кәламы васитәсилә Јеһова бизә габилијјәтләримиздән саваб ишләр ҝөрмәк үчүн истифадә етмәји мәсләһәт ҝөрүр. Мисал үчүн, Төвратда дејилир: «Чалышганын нијјәти уғур ҝәтирәр» (Мәс. 21:5). Диҝәр ајәдә дә јазылыб: «Әлиндән нә ҝәлирсә, вар ҝүҹүнлә ет» (Ваиз 9:10). Инҹилдән охујуруг: «Нә гәдәр ки әлимиздә фүрсәт вар, һамыја... јахшылыг  едәк», «һәр кәс алдығы әнама әсасән,.. бир-биринә хидмәт етсин» (Гал. 6:10; 1 Бут. 4:10). Бу ајәләрдән ҝөрүнүр ки, Јеһова һәм өзүмүзә, һәм дә башгаларына фајда ҝәтирән ишләр ҝөрмәјимизи истәјир.

3. Инсанын ҝүҹү һансы мәнада мәһдуддур?

³ Јеһова баҹарыг вә габилијјәтләримиздән ән јахшы шәкилдә истифадә етмәјимизи истәсә дә, баша дүшүр ки, ҝүҹүмүз мәһдуддур. Биз һеч вахт гејри-камиллији, ҝүнаһы вә өлүмү арадан галдыра билмәрик. Һәмчинин инсанлары идарә етмәк игтидарында дејилик, чүнки һәр кәсин ирадә азадлығы вар (1 Пад. 8:46). Бундан әлавә, нә гәдәр билик вә тәҹрүбә топласаг да, Јеһованын јанында көрпә ушаг кими олаҹағыг (Әшј. 55:9).

4. Бу мәгаләдә нәји нәзәрдән кечирәҹәјик?

⁴ Биз Јеһоваја һәр вәзијјәтдә архаланмалыјыг, Онун бизә дәстәк олаҹағына вә баҹармадығымыз шејләри бизим әвәзимизә едәҹәјинә әмин олмалыјыг. Ејни заманда, О истәјир ки, биз әлимиздән ҝәлдији гәдәр проблемләримизи һәлл едәк вә инсанлара јардым ҝөстәрәк. (Зәбур 37:3 ајәсини охујун.) Узун сөзүн гысасы, биз һәм Јеһоваја ҝүвәнмәли вә јахшылыг етмәли, һәм дә сәдагәтлә аддымламалыјыг. Ҝәлин ҝөрәк Јеһоваја ҝүвәнән вә буну әмәлләри илә ҝөстәрән инсанлардан, мәсәлән, Нуһ пејғәмбәрдән, Давуд падшаһдан вә диҝәр мөмин инсанлардан нә өјрәнирик. Онларын нүмунәсини арашдырдыгҹа ҝөрәҹәјик ки, онлар мүәјјән шејләри баҹармасалар да, диггәти баҹардыглары шејләрә јөнәлдирдиләр.

5. Нуһ пејғәмбәрин үзләшдији вәзијјәти тәсвир един.

⁵ Нуһ пејғәмбәрин јашадығы дөврдә јер үзү зоракылыгла вә әхлагсызлыгла долу иди (Јар. 6:4, 9—13). Пејғәмбәр Јеһова Аллаһын бир ҝүн пислијә сон гојаҹағына әмин иди. Амма чох еһтимал ки, о, аллаһсыз инсанларын арасында јашадығы үчүн мәнәви ҹәһәтдән әзаб чәкирди. Ејни заманда баша дүшүрдү ки, мүәјјән шејләр ондан асылы дејил, амма елә шејләр вар ки, ондан асылыдыр.

6, 7. а) Нәләр Нуһ пејғәмбәрдән асылы иди? б) Бизим вәзијјәтимизлә Нуһ пејғәмбәрин вәзијјәти арасында һансы охшарлыг вар?

⁶ Нуһ пејғәмбәрдән асылы олмајан шејләр. Нуһ Аллаһын һөкм хәбәрини инсанлара  усанмадан чатдырырды, амма онлары нә бу хәбәрә һај вермәјә мәҹбур едә, нә дә дашгынын вахтыны тезләшдирә биләрди. Нуһ Јеһоваја ҝүвәнмәли вә әмин олмалы иди ки, дашгын Аллаһын тәјин етдији вахтда олаҹаг (Јар. 6:17).

⁷ Нуһ пејғәмбәр кими, биз дә писликлә долу дүнјада јашајырыг. Јеһова бу дүнјаны да мәһв едәҹәјини вәд едиб (1 Јәһ. 2:17). Биз инсанлара «Падшаһлыг һаггындакы... мүждә»ни зорла гәбул етдирә билмәрик. Бөјүк мүсибәтин вахтыны тезләшдирмәк дә бизим әлимиздә дејил (Мәт. 24:14, 21). Биз дә Нуһ пејғәмбәр кими Аллаһын бүтүн писликләрә тезликлә сон гојаҹағына әмин олмалыјыг (Зәб. 37:10, 11). Јеһова писликлә долу бу дүнјанын һөкм ҝүнүнү артыг тәјин едиб вә әминик ки, бу һөкмү бир ҝүн белә ҝеҹикдирмәјәҹәк (Һәб. 2:3).

8. Нуһ пејғәмбәр диггәтини нәјә ҹәмләмишди? (Мәгаләнин әввәлиндәки шәклә бахын.)

⁸ Нуһ пејғәмбәрдән асылы олан шејләр. Нуһ пејғәмбәр диггәтини ҝүҹү чатмајан шејләрә јох, ҝүҹү чатан шејләрә јөнәлдирди. «Салеһлик ҹарчысы» олан Нуһ она верилән тапшырығы иҹра едирди, инсанлара һөкм хәбәрини чатдырырды (2 Бут. 2:5). Сөзсүз ки, бу, Нуһа иманда мөһкәм галмаға көмәк етмишди. О, тәблиғ етмәклә јанашы, физики вә әгли баҹарығыны ишә салараг Аллаһын бујруғу илә ҝәми тикмишди. (Ибраниләрә 11:7 ајәсини охујун.)

9. Нуһ пејғәмбәрдән нүмунә ҝөтүрәрәк нә етмәлијик?

⁹ Биз дә Нуһ пејғәмбәр кими «Рәббин ишиндә чох» чалышмалыјыг (1 Кор. 15:58). «Рәббин ишинә» ибадәт евләринин тикинтиси вә тәмири, топлантыда көнүллү кими хидмәт етмәк, Бејтелдә ја да тәрҹүмә офисиндә хидмәт етмәк кими ишләр дахилдир. Ән үмдә ишимиз исә тәблиғ ишидир, чүнки мәһз тәблиғ иши бизим ҝәләҹәклә бағлы үмидимизи мөһкәмләндирир. Бир баҹы тәблиғ хидмәти һаггында нөвбәти сөзләри демишди: «Инсанлара Падшаһлығын ҝәтирәҹәји немәтләр барәдә данышанда ҝөрүрәм ки, онларын ҝәләҹәјә һеч бир үмиди јохдур вә проблемләрин нә вахтса битәҹәјинә инанмырлар». Амма тәблиғ иши бизә ҝәләҹәјә мүсбәт бахмаға көмәк едир вә һәјат уғрунда ҝедән јарышда галиб ҝәлмәк гәтијјәтимизи артырыр (1 Кор. 9:24).

10. Давуд пејғәмбәр һансы ҹидди ҝүнаһлара јол вермишди?

¹⁰ Јеһова Аллаһ Давуд падшаһ демишди ки, о, Онун үрәјинҹә олан бир инсандыр (Һәв. 13:22). Давуд өләнә кими Јеһоваја сәдагәтини горумушду, амма онун да ҹидди ҝүнаһлары олуб. О, Бадсәба илә әхлагсызлыг етмишди. Ҝүнаһыны өрт-басдыр етмәк үчүн Бадсәбанын әри Урјаја суи-гәсд гурмушду; онун дөјүш мејданында өлдүрүлмәси үчүн план һазырламышды. Һәтта Урјајын өлүм планынын јазылдығы мәктубу онун өз әлинә вериб ҝөндәрмишди (2 Ишм. 11:1—21). Тәбии ки, ҝеҹ-тез Давудун ҝүнаһынын үстү ачылды (Марк 4:22). Бу заман о, неҹә давранды?

11, 12. а) Нәләр Давуд падшаһдан асылы дејилди? б) Ҝүнаһларымыздан төвбә етсәк, Јеһова бизә неҹә көмәк едәҹәк?

¹¹ Давуд падшаһдан асылы олмајан шејләр. Давуд нә заманы ҝери гајтарыб сәһвини дүзәлдә, нә дә ҝүнаһларынын нәтиҹәсиндән јахасыны гуртара биләрди. Ҝүнаһларынын нәтиҹәсиндә бичдији бәзи аҹылары өмрүнүн ахырына кими јашајаҹагды (2 Ишм. 12:10—12, 14). Буна ҝөрә дә о иман етмәли иди ки, үрәкдән төвбә етсә, Јеһова ону бағышлајаҹаг вә әмәлләринин ағыр нәтиҹәләринә дөзмәјә ҝүҹ верәҹәк.

¹² Гејри-камил олдуғу үчүн бүтүн инсанлар ҝүнаһ ишләдир. Бәзи ҝүнаһлар диҝәрләриндән даһа ҹидди олур. Тәәссүф ки, мүәјјән сәһвләри дүзәлтмәк мүмкүн дејил, инсан онун нәтиҹәләринә дөзмәјә мәҹбурдур (Гал. 6:7). Анҹаг биз әминик ки, сәмими-гәлбдән төвбә етсәк, һәтта проблемләр өз ҝүнаһларымыз уҹбатындан олса белә, Јеһова онлара дөзмәјә көмәк едәҹәк. (Әшија 1:18, 19; Һәвариләрин ишләри 3:19 ајәләрини охујун.)

13. Давуд падшаһ Јеһова илә мүнасибәтләрини неҹә бәрпа етди?

¹³ Давуд падшаһдан асылы олан шејләр. Давуд падшаһ Јеһова Аллаһла мүнасибәтләрини дүзәлтмәк истәјирди. Буна ҝөрә дә Јеһованын Натан пејғәмбәр васитәсилә вердији төһмәти гәбул етди (2 Ишм. 12:13). Давуд һәмчинин Јеһоваја дуа едәрәк ҝүнаһыны бојнуна алды вә јенидән Онун рәғбәтини газанмаг истәдијини билдирди (Зәб. 51:1—17). Давуд пејғәмбәр јол вермәди ки, етдији ҝүнаһлар ону мәнәви ҹәһәтдән јыхсын. О, сәһвләриндән ибрәт ҝөтүрдү. Буну онун һәјатындан ҝөрмәк олар: Давуд бир даһа һәмин ҝүнаһлары тәкрарламады. О, өмрүнүн ахырына кими Аллаһа садиг галды вә Аллаһын јаддашында мәһз садиг инсан кими галыб (Ибр. 11:32—34).

14. Давуд пејғәмбәрдән нә өјрәнирик?

¹⁴ Давуд пејғәмбәрдән нә өјрәнирик? Әҝәр ҹидди ҝүнаһа јол вермишиксә, сәмими-гәлбдән төвбә етмәли, дуада ҝүнаһларымызы Јеһоваја етираф етмәли вә Ондан әфв диләмәлијик (1 Јәһ. 1:9). Бундан әлавә, ағсаггаллардан көмәк истәмәлијик. (Јагуб 5:14—16 ајәләрини охујун.) Белә етмәклә ҝөстәрәрик ки, Јеһованын бизә көмәк едәҹәјинә вә бизи бағышлајаҹағына даир вердији сөзә инанырыг. Үстәлик, сәһвләримиздән ибрәт ҝөтүрмәли, хидмәтимиздә ирәли ҝетмәли вә ҝәләҹәјә әминликлә бахмалыјыг (Ибр. 12:12, 13).

15. Һәннә һансы саһәдә бизим үчүн ҝөзәл өрнәкдир?

¹⁵ Мүгәддәс Китабда Аллаһа ҝүвәнән вә буну әмәлләри илә сүбут едән диҝәр инсанларын да ады чәкилир. Онлардан бири Һәннәдир. О, сонсуз иди вә дәрдинин чарәси ондан асылы дејилди. Лакин Һәннә әмин иди ки, Јеһова она бу дәрдә дөзмәјә ҝүҹ верәҹәк, буна ҝөрә дә ибадәтиндән галмыр, мүнтәзәм олараг мүгәддәс чадыра ҝәлир вә дәрдини дуада Аллаһа данышырды  (1 Ишм. 1:9—11). Һәннә бизим үчүн ҝөзәл өрнәкдир. Әлаҹы биздән асылы олмајан чәтинликләрлә үзләшәндә, мәсәлән, хәстәлијә тутуланда гајғыларымызы Јеһованын үзәринә гојмалыјыг вә әмин олмалыјыг ки, О, бизим гајғымыза галаҹаг (1 Бут. 5:6, 7). Вар ҝүҹүмүзлә чалышмалыјыг ки, јығынҹаг ҝөрүшләриндән галмајаг вә Јеһованын тәгдим етдији диҝәр васитәләрдән там фајдаланаг (Ибр. 10:24, 25).

16. Валидејнләр Ишмуил пејғәмбәрдән нә өјрәнә биләрләр?

¹⁶ Бәс ушаглары Јеһовадан узаглашан валидејнләр нә етсин? Ҝәлин ҝөрәк Ишмуил пејғәмбәр нә етмишди. Оғуллары јеткин јашда олдуғу үчүн Ишмуил онлары Јеһованын гајда-ганунлары илә јашамаға мәҹбур едә билмәзди (1 Ишм. 8:1—3). О, проблеми Јеһованын өһдәсинә бурахды. Бу вәзијјәтдә о, өһдәсинә дүшәни етди, Јеһова Аллаһа садиг галды вә Онун гәлбини севиндирди (Мәс. 27:11). Бу ҝүн бир чох мәсиһи валидејнләрин вәзијјәти Ишмуилин вәзијјәтинә охшајыр. Онлар зәррә гәдәр дә шүбһә етмирләр ки, Јеһова Аллаһ итмиш оғул мәсәлиндәки ата кими, төвбә едән хидмәтчисини бағышламаға һәмишә һазырдыр (Лука 15:20). Ејни заманда, бу валидејнләр Аллаһа бағлы галмаг үчүн чох чалышырлар вә үмид едирләр ки, онларын нүмунәси өвладларыны Јеһоваја дөнмәјә тәшвиг едәҹәк.

17. Касыб дул гадынын нүмунәси бизи нәјә тәшвиг едир?

¹⁷ Ҝәлин бир аз да Иса Мәсиһин ҝүнләриндә јашајан касыб дул гадын барәдә данышаг. (Лука 21:1—4 ајәләрини охујун.) Бу гадын о дөврдә мәбәддә едилән мурдар ишләрин гаршысыны ала билмәзди (Мәт. 21:12, 13). Мадди вәзијјәтини дүзәлтмәк үчүн дә әлиндән һеч нә ҝәлмирди. Буна бахмајараг, о, әлиндә олан ики хырда пулу, «доланмаг үчүн нәји вардыса» ианә етди. Бу һәрәкәти илә дул гадын Јеһоваја ҝүвәндијини ҝөстәрди. О әмин иди ки, Аллаһа ибадәти һәр шејдән үстүн тутса, Аллаһ онун гајғысына галаҹаг. Јеһоваја етибары ону о дөврдә пак ибадәт үчүн едилән ишләри дәстәкләмәјә тәшвиг етди. Биз дә әмин ола биләрик ки, Падшаһлығы һәр шејдән үстүн тутсаг, Јеһова бизим тәләбатымызы өдәјәҹәк (Мәт. 6:33).

18. Проблемләрә дүзҝүн нөгтеји-нәзәри олан гардашын нүмунәсини чәкин.

¹⁸ Бу ҝүн дә Јеһоваја етибар едән вә буну әмәлдә ҝөстәрән диндашларымызын сајы аз дејил. Ҝәлин һәјат јолуну 2015-ҹи илдә сәдагәтлә баша вуран Малком гардашын нүмунәсинә нәзәр јетирәк. О вә һәјат јолдашы Аллаһа узун илләр хидмәт едибләр. Бу илләр әрзиндә онлар һәм јахшы, һәм пис ҝүнләр ҝөрүбләр. Малком гардаш демишди: «Һәрдән һәјатдан баш ачмаг олмур, һәтта бәзән дөзүлмәз олур. Лакин Јеһова өз ағлы илә һәрәкәт едәнләрә јох, Она бел бағлајанлара хејир-дуа верир». Гардаш бу ҹүр вәзијјәтлә үзләшәнләрә нөвбәти мәсләһәти вермишди: «Јеһоваја хидмәтдә мүмкүн гәдәр сәмәрәли вә фәал олмаг үчүн дуа ет. Диггәтини баҹармадығын шејләрә јох, баҹардығын шејләрә ҹәмлә» *.

19. а) Нәјә ҝөрә 2017-ҹи илин ајәси јериндәдир? б) Бу ајәнин сөзләрини неҹә тәтбиг етмәји дүшүнүрсүнүз?

¹⁹ Јашадығымыз бу дүнјада вәзијјәт «ҝет-ҝедә даһа бетәр» олур. Биз бундан сонра даһа бөјүк чәтинликләрлә үзләшәҹәјик (2 Тим. 3:1, 13). Буна ҝөрә дә инди әввәлкиндән даһа чох чалышмалыјыг ки, бу дүнјанын проблемләри әл-голумузу бағламасын. Үстәлик, биз Јеһоваја ҝүвәнмәли вә диггәтимизи баҹардығымыз шејләрә ҹәмләмәлијик. 2017-ҹи илин ајәси неҹә дә јеринә дүшүр: «Сән Јеһоваја ҝүвән, јахшылыг ет» (Зәб. 37:3).