1. Jehova ye adamadenw dan ka setigiya kabakoman juman di u ma?

JEHOVA ye adamadenw dan ka setigiya kabakoman di u ma. A ye see d’an ma ka jatiminɛ kɛ walisa ka gwɛlɛyaw ɲɛnabɔ ani ka labɛnw kɛ siniɲasigi koo la (Talenw 2:11). A ye see di an ma fana ka laɲinita ɲumanw latigɛ an yɛrɛ ye ani k’u dafa (Filip. 2:13). A y’an dan walisa an dusukun k’an dɛmɛ ka koo ɲuman ni koo jugu faranfasi ka bɔ ɲɔgɔn na. O be se k’an dɛmɛ k’an yɛrɛ tanga koo jugu ma ani n’an ye jurumu kɛ, an be yafa deli.—Ɔrɔm. 2:15.

2. Jehova b’a fɛ an ka mun lo kɛ n’an ka setigiya ye?

² Jehova b’a fɛ an ka baara ɲuman kɛ n’an ka setigiya ye. Mun na do? Sabu a b’an kanu ani a b’a lɔn ko n’an be baara kɛ n’an ka setigiya ye o b’an ninsɔndiya. Jehova y’a fɔ siɲɛ caaman Bibulu kɔnɔ ko an ka koo ɲuman kɛ n’an ka setigiya ye. Ɲɛyirali fɛ, a fɔra Heburukan sɛbɛriw kɔnɔ ko “baarakɛbaga ka jatiminɛ be na ni nafolo ye” ani ko “i bolo be  se ka koo o koo kɛ, o kɛ n’i yɛrɛ ka fanga ye.” (Talenw 21:5; Waaj. 9:10). Gɛrɛkikan sɛbɛriw b’a fɔ ko: “Ni koɲumankɛ see b’an ye tuma min na, an k’o kɛ mɔgɔ bɛɛ ye” ani ko “aw kelen kelen bɛɛ ye seko min sɔrɔ Ala fɛ, minw be danna danna, aw k’o kɛ ka tɔw mako ɲa.” (Gal. 6:10; 1 Piyɛri 4:10). Siga t’a la, Jehova b’a fɛ an k’an seko kɛ k’an yɛrɛ mako ɲɛ ani ka tɔɔw fana mako ɲɛ.

3. Adamadenw tɛ se ka mun lo kɛ?

³ Jehova b’a lɔn fana ko daan be adamadenw ka setigiya la. An tɛ se ka see sɔrɔ fewu dafabaliya, jurumu ani saya kan an yɛrɛ ma. An fana tɛ se ka koow latigɛ tɔɔw ye sabu Ala ye see di an bɛɛ ma ka koow latigɛ an yɛrɛ ma (1 Mas. 8:46). An mana lɔnniya sɔrɔ cogo o cogo, an be i n’a fɔ denmisɛnw Jehova ɲɛɛ kɔrɔ.—Ezayi 55:9.

4. An bena mun lo lajɛ barokun nin na?

⁴ An ka ɲi k’a ɲini Jehova fɛ a k’an ɲɛminɛ koo bɛɛ la. An ka la a la ko a bena an dɛmɛ ani ko an tɛ se koo minw na, a bena u kɛ an ye. An be se k’an seko kɛ fana walisa k’an ka kunkow ɲɛnabɔ ani ka tɔɔw dɛmɛ (Zaburuw 37:3 kalan). An ka ɲi k’an ‘jigi la’ Jehova kan ani ka ‘koo ɲuman kɛ.’ An ka ɲi fana ka “tilennenya sira taama.” An k’a filɛ an be kalan jumanw lo sɔrɔ Nuhun, Dawuda ani Ala sagokɛla kantigiman wɛrɛw ka koow la. Olu y’u jigi la Jehova kan ani u ye dɔ kɛ dɔ ye. An bena a ye ko u tun ka ɲi k’a lɔn u tun tɛ se ka min kɛ ani u tun be se ka min kɛ walisa ka koow kɛ ka kɛɲɛ n’o ye.

5. Koo jumanw lo tun be kɛ Nuhun ka wagati la?

⁵ Nuhun ka wagati la, “koo farimanw” ani kakalayakow tun be kɛ duniɲa yɔrɔ bɛɛ la (Zɛnɛzi 6:4, 9-13). Nuhun tun b’a lɔn ko Jehova tun bena o duniɲa juguman halaki. O n’a ta bɛɛ, koo jugu minw tun be kɛra, u tun be Nuhun dusu tiɲɛ kosɔbɛ. A y’a faamu o sen fɛ, ko a tun tɛ se ka koo dɔw kɛ, nka a tun be se koo dɔw kɛ.

6, 7. a) Nuhun tun tɛ se ka mun lo kɛ? b) An ka wagati bɔnin be Nuhun ka wagati ma cogo di?

⁶ Nuhun tun tɛ se ka min kɛ: Nuhun tun  be Jehova ka lasɔmini kumaw fɔ mɔgɔw ye ni kantigiya ye. Nka, a tun tɛ se ka mɔgɔ juguw waajibiya u ka sɔn a ka kumaw na. A tun tɛ se fana k’a kɛ sanjiba ka na joona. Jehova tun ye layidu ta ko a bena mɔgɔ juguw halaki. Nuhun tun ka ɲi ka la a la ko Jehova bena o layidu dafa ani ko a bena o kɛ wagati latigɛnin na.—Zɛnɛzi 6:17.

⁷ Bi fana, koo juguw ka ca duniɲa kɔnɔ. An b’a lɔn ko Jehova y’a daa di ko a bena dan sigi o la (1 Zan 2:17). Nka, sanni o cɛ, an tɛ se ka mɔgɔw waajibiya u ka sɔn Masaya “kibaru diman” na. An tɛ se fana ka foyi kɛ walisa “tɔɔrɔba” wagati ka se joona (Mat. 24:14, 21). I n’a fɔ Nuhun, an mako be limaniya barikaman na walisa ka la a la ko yanni dɔɔni, Ala bena mɔgɔ juguw halaki (Zab. 37:10, 11). An lanin b’a la ko ni duniɲa nin halaki loon sera i ko Jehova y’a latigɛ cogo min na, a tɛna a to hali loon kelen ka fara o kan.—Abak. 2:3.

8. Nuhun tun be se ka min kɛ, a sinsinna o kan cogo di? ( Jaa lajɛ, barokun daminɛ na.)

⁸ Nuhun tun be se ka min kɛ: Nuhun m’a to a fari ka faga sabu a tun tɛ se ka koo dɔw kɛ. Nka, a tun be se ka min kɛ, a sinsinna o lo kan. Nuhun tun be “tilenninyako fɔ.” Ala ko a ka lasɔmini kuma minw lase mɔgɔw ma, a y’o weleweleda ni kantigiya ye (2 Piyɛri 2:5). Siga t’a la, o y’a dɛmɛ k’a ka limaniya sabati. Ka fara waajuli baara kan, Ala tun ko a ka kurun lɔ. A y’a ka fanga n’a ka hakilitigiya kɛ k’o baara dafa.—Eburuw 11:7 kalan.

9. An be se ka Nuhun ladegi cogo di?

⁹ I n’a fɔ Nuhun, an b’an jija ka “taga ɲa Matigi ka baara la.” (1 Kor. 15:58). O baara dɔw ye ka batoli kɛyɔrɔw lɔ ani k’u ladon, k’an yɛrɛ di ka dɛmɛ don lajɛnbaw la, wala ka baara dɔw kɛ Betɛli wala an ka sɛbɛw bayɛlɛma birow la. Min yɛrɛ kɔrɔtanin lo kosɔbɛ, o ye ko an be waajuli kɛ sabu an b’a lɔn k’o b’an ka jigiya sabati siniɲasigi koo la. Balimamuso kantigiman dɔ ko: “Ala ka Masaya bena dugaw lase adamadenw ma. N’i b’o kofɔ mɔgɔw ye, i b’a faamu ko u tɛ ni jigiya si ye ani ko olu fɛ, u ka kunkow tɛ se ka ban abada.” Tiɲɛn na,  n’an be waajuli kɛ, o b’an ka jigiya sabati siniɲasigi koo la. An be jijaliba minw kɛra ɲɛnamaya banbali kama, o b’an dɛmɛ an kana an fari faga.—1 Kor. 9:24.

10. A lakali koo min ye Dawuda sɔrɔ.

¹⁰ Jehova y’a fɔ ko masacɛ Dawuda ‘koo diyara ale ye.’ (Kɛw. 13:22). Dawuda ka ɲɛnamaya fanba la, a ye kantigiya kɛ Ala ye. O n’a ta bɛɛ, a ye jurumuba kɛ tuma dɔw la. A ye ɲamɔgɔya kɛ ni Batiseba ye. Min yɛrɛ ka jugu, a y’a ɲini k’o koo dogo. Cogo di do? A ye labɛn kɛ walisa u ka Batiseba cɛɛ Uri faga kɛlɛkɛyɔrɔ la. A ye lɛtɛrɛ dɔ sɛbɛ ko kɛlɛ ka fari yɔrɔ min na, u ka Uri bila yen walisa u k’a faga. A ye Uri yɛrɛ ci n’o lɛtɛrɛ ye! (2 Sam. 11:1-21). A laban, Dawuda ka jurumuw bɔra kɛnɛ kan (Mariki 4:22). O wagati la, Dawuda ye mun lo kɛ do?

11, 12. a) Dawuda tun tɛ se ka mun lo kɛ a ka jurumuw kɛnin kɔ? b) N’an ye jurumuba dɔ kɛ ani ka nimisa, an be se ka la a la ko Jehova bena mun lo kɛ?

¹¹ Dawuda tun tɛ se ka min kɛ: Dawuda tun tɛ se k’a ka jurumu jɔsi ka bɔ yen. A tun tɛ se k’a yɛrɛ tanga a ka jurumuw nɔfɛkow ma fana. U dɔw tun bena nɔɔ to a kan, a sii tɔɔ bɛɛ la (2 Sam. 12:10-12, 14). O kama, a tun ka ɲi ka limaniya. A tun ka ɲi ka la a la ko n’a nimisara sɔbɛ la, Jehova bena yafa a ma ani k’a dɛmɛ k’a ka kɛwalew nɔfɛkow muɲu.

¹² Komi an ye dafabaliw ye, an bɛɛ be jurumu kɛ. Jurumu dɔw ka jugu ka tɛmɛ dɔw kan. Tuma dɔw la, n’a sɔrɔ an tɛ se k’an ka jurumuw jɔsi ka bɔ yen. An ka kan k’u nɔfɛkow muɲu (Gal. 6:7). Nka, Jehova ko n’an nimisara an ka jurumuw na, a bena an dɛmɛ gwɛlɛyaw wagati la, hali n’o gwɛlɛyaw y’an yɛrɛ nɔɔ lo ye. An lanin b’o kumaw na.—Ezayi 1:18, 19; Kɛwaliw 3:19 kalan.

13. Dawuda ye mun lo kɛ walisa ka jɛnɲɔgɔnya ɲuman kɛ ni Jehova ye kokura?

¹³ Dawuda tun be se ka min kɛ: Dawuda y’a to Jehova y’a dɛmɛ ka jɛnɲɔgɔnya ɲuman kɛ n’ale ye kokura. Ɲɛyirali fɛ, Dawuda sɔnna kira Natan ka kololi ma. Natan tun ye Jehova ka lasigiden lo ye (2 Sam. 12:13). Dawuda ye Jehova deli, k’a ka jurumuw fɔ a ye ani k’a yira ko a b’a fɛ k’a yɛrɛ koo diya Jehova ye tugun (Zab. 51:3-19). Sanni Dawuda ka to k’a yɛrɛ jalaki kojugu, a y’a to a ka filiw y’a kolo. Tiɲɛn na, a m’o jurumubaw kɛ tugun. Saan caaman o kɔ, a tora kantigiya la fɔɔ ka taga se saya ma. Jehova tɛna ɲinɛ a ka kantigiya kɔ abada.—Eburuw 11:32-34.

14. Dawuda ka koo be mun lo yira an na?

¹⁴ Dawuda ka koo be mun lo yira an na? N’an ye jurumuba kɛ, an ka ɲi ka nimisa sɔbɛ la ani ka yafa deli Jehova fɛ. An k’an ka jurumuw fɔ a ye (1 Zan 1:9). An k’an magwɛrɛ diinan mɔgɔkɔrɔw la fana sabu u be se k’an dɛmɛ Alako ta fan fɛ (Zaki 5:14-16 kalan). Jehova y’a daa di ko a bena yafa an ma. N’an sɔnna a ka dɛmɛ na, an b’a yira ko an lanin b’o kumaw na. Ka fara o kan, an ka ɲi k’a to an ka filiw k’an kolo. An ka to ka baara kɛ Jehova ye ani an kana siran siniɲasigi koo la.—Eburuw 12:12, 13.

15. Anɛ ka koo be mun lo yira an na?

¹⁵ Galen, Jehova sagokɛla kantigiman wɛrɛw y’u jigi la a kan ani u ye dɔ kɛ dɔ ye. I be se ka miiri olu koo la fana. Ɲɛyirali fɛ, Anɛ tun tɛ se ka deen sɔrɔ ani a tun tɛ se k’o koo muɲu a yɛrɛ ma. Nka, a tun lanin b’a la ko Jehova bena a dusu saalo. O kosɔn, a tora ka  taga Jehova bato fanibugu kɔnɔ ani k’a ka dusukunnakow bɛɛ fɔ a ye delili la (1 Sam. 1:9-11). O ye ɲɛyirali ɲuman ye an fɛ. N’an man kɛnɛ wala ni gwɛlɛya dɔw b’an kan, an tɛ se ka minw ɲɛnabɔ, an k’an ka haminankow bɛɛ to Jehova bolo ani an ka la a la ko a b’a janto an na (1 Piyɛri 5:6, 7). Ka fara o kan, an k’an seko kɛ walisa ka nafa sɔrɔ lajɛnw na ani Jehova ka labɛn wɛrɛw la.—Eburuw 10:24, 25.

16. Samuyɛli ka koo be mun lo yira bangebagaw la?

¹⁶ Bangebaga minw ka deenw ye tiɲɛn sira bila, an be se ka mun lo fɔ olu koo la? Cɛkɔrɔba Samuyɛli tun y’a dencɛw kalan Jehova ka sariya tilenninw koo la. Nka, a tun tɛ se k’u waajibiya ka kantigiya kɛ Jehova ye (1 Sam. 8:1-3). A tun ka kan ka koow to Jehova bolo. O n’a ta bɛɛ, Samuyɛli sera ka to kantigiya la ani k’a koo diya a sankolola Faa Jehova ye (Talenw 27:11). O gwɛlɛya ɲɔgɔn lo be bangebaga caaman kan bi. Yezu ye ntalen dɔ fɔ deen tununin dɔ koo la, ani a y’a yira k’o deen faa yafara a ma. O cogo kelen na, bangebagaw lanin b’a la ko n’u deenw nimisara, Jehova bena yafa u ma (Luka 15:20). O bangebagaw b’u jija fana ka to kantigiya la. U jigi b’a la k’u ka ɲɛyirali bena u deenw lasun ka segi ka na tiɲɛn sira kan.

17. Mun na firiyamuso ka ɲɛyirali b’an jija?

¹⁷ Yezu ka wagati la, firiyamuso dɛsɛbagatɔ dɔ tun be yen. Miiri ale koo la fana (Luka 21:1-4 kalan). Nanbarako minw tun be kɛ Alabatoso kɔnɔ, a tun tɛ se ka foyi kɛ u koo la (Mat. 21:12, 13). A tun tɛ se fana ka bɛrɛ kɛ k’a ka fantanya nɔgɔya. Nka, “tama fila . . . min tun b’a kun ka kɛ dumunisɔngɔ ye,” a sɔnna k’o bɛɛ don nili kɛsu kɔnɔ. O muso kantigiman tun y’a yira ko a jigi lanin be Jehova kan kosɔbɛ. A tun y’a lɔn ko n’a ye Alakow kɛ a ɲɛnako fɔlɔ ye, Ala tun bena a mako wasa. Labɛn min tun bilara sen kan tiɲɛn batoli kama, o muso ka limaniya y’a lasun ka dɛmɛ don o la. An fana lanin b’a la ko n’an ye Ala ka Masaya ɲini fɔlɔ, Jehova bena koo bɛɛ kɛ walisa an k’an makoɲɛfɛnw sɔrɔ.—Mat. 6:33.

18. Balimacɛ dɔ kofɔ min ye koow filɛ ni ɲɛɛ ɲuman ye.

¹⁸ An kerecɛnɲɔgɔn caaman fana y’a yira k’u jigi lanin be Jehova kan ani u ye dɔ kɛ dɔ ye. An ka Malcolm ka koo lajɛ. A tora kantigiya la fɔɔ ka taga se saya ma, saan 2015 la. Saan caaman minw na ale n’a muso ye baara kɛ Jehova ye, u ye ninsɔndiya ni gwɛlɛyaw sɔrɔ. A ko: “Barinankow be mɔgɔ sɔrɔ tuma dɔw la. A man nɔgɔ k’o koow muɲu. Nka, minw b’u jigi la Jehova kan, a b’olu duga.” Malcolm ye ladili di an ma ko: “Jehova deli a k’i dɛmɛ i k’i jija walisa ka kisɛya a ka baara la. I be se ka min kɛ, sinsin o kan. Nka, i tɛ se ka min kɛ, kana sinsin o kan.” *

19. a) Mun na saan 2017 ka kalankun bɛnnin lo kosɔbɛ? b) I be se k’o kalankun ka ladili sira tagama cogo di?

¹⁹ Komi duniɲa ka koow be ‘juguyara ka taga ɲɛ,’ an k’a lɔn ko an bena gwɛlɛya caaman sɔrɔ (2 Tim. 3:1, 13). O kosɔn, a kɔrɔtanin lo kosɔbɛ, an kana a to o gwɛlɛyaw k’an fari faga. Nka, an k’an jigi bɛɛ la Jehova kan ani an k’an seko kɛ. O kama, saan 2017 ka kalankun bɛnnin lo kosɔbɛ. A kuun ko: I jigi la Jehova kan ani koo ɲuman kɛ.—Zab. 37:3.