1. Йаһоԝа әм бь кʹижан фәрәсәта әʹфьрандьнә?

ЙАҺОԜА мәрьв бь фәрәсәт у һʹӧнӧред баш әʹфьрандийә. Әԝи һʹьш-аԛьл дайә мә сәва кӧ әм бькарьбьн чәтьнайа сафи кьн у нета дайньн пешийа хԝә (Мәтʹлк. 2:11). Әԝи ԛәԝат дайә мә, ԝәки әм бькарьбьн нетед хԝә биньн сери (Фили. 2:13). Әԝи ӧса жи исаф дайә мә, ԝәки әм бькарьбьн тедәрхьн чь рʹаст ә у чь жи на. Исаф ӧса жи али мә дькә хԝә жь кьред нәрʹаст дур бьгьрьн у шашийед хԝә рʹаст кьн (Рʹом. 2:15).

2. Йаһоԝа дьхԝазә кӧ әм фәрәсәтед хԝә ча бьдьнә хәбате?

² Йаһоԝа дьхԝазә кӧ әм ԝан фәрәсәта рʹаст бьдьнә хәбате. Ле гәло чьрʹа? Чьмки әԝ мә һʹьз дькә у занә кӧ һәрге әм ԝан пʹешкʹеша, демәк ԝан фәрәсәта бьдьнә хәбате, әме бәхтәԝар бьн. Мәсәлә, Ньвисаред Ибранида те готьне, кӧ «тʹьвдира мәрьве хирәт әʹсә кʹаре тинә» у «тьште кӧ бона ль сәр хәбат кьрьне тә дитийә һәр чь бә, бь һеза [ԛәԝата] хԝә ль сәр ԝе бьхәбьтә» (Мәтʹлк. 21:5; Ԝаиз 9:10). Ле Ньвисаред Йунанида ньвисар ә: «Һʹәта кӧ ԝәхт дәстед мәда йә, һʹәмуйарʹа ԛәнщийе  бькьн» у «жь ԝә кʹе чь пʹешкʹеш стандийә, бь ԝе жи һәврʹа хьзмәткʹарийе бькьн» (Галт. 6:10; 1 Пәт. 4:10). Әʹйан ә, Йаһоԝа дьхԝазә ԝәки әм чьԛас дькарьн һʹәму тьшти бькьн, ԝәки һьн хԝәрʹа, һьн жи мәрьвед дьнрʹа кʹаре биньн.

3. Ԛәԝата мәрьва нагьһиже кӧ чь бькьн?

³ Рʹаст ә Йаһоԝа дьхԝазә, ԝәки әм фәрәсәтед хԝә бьдьнә хәбате, ле әԝ ӧса жи занә кӧ ԛәԝата мә һаԛас нагьһиже ԝәки бь тʹәмами ԝан фәрәсәта бьдьнә хәбате. Мәсәлә, әм нькарьн нә ԛьсуртийе, нә гӧнә у нә жи мьрьне бьдьнә һьлдане. Әм ӧса жи нькарьн мәрьвед дьн контрол кьн, чьмки азайа бьжартьна һʹәму мәрьва һәйә (1 Пʹадш. 8:46). У фьрԛи тʹӧнә занәбуна мә чьԛас һәйә йан әм чьԛас щерʹьбанди нә, йәкә әм бәр Йаһоԝа тʹьме чаԝа зарʹ бьн (Иша. 55:9).

4. Ве тʹемайеда әме дәрһәԛа чь шеԝьр кьн?

⁴ Әм гәрәке тʹьме рʹе бьдьнә Йаһоԝа ԝәки әԝ рʹебәрийе мә бькә, у итʹбарийа хԝә ԝи биньн кӧ әԝе али мә бькә. Ӧса жи чь кӧ әм нькарьн бькьн, әԝ ԝе бона мә бькә. Ле йәкә Йаһоԝа дьхԝазә, ԝәки әм хԝәха жи бьфькьрьн дәрһәԛа ве йәке, кӧ әм чь дькарьн бькьн, сәва чәтьнайа сафи кьн у али йед дьн бькьн. (Бьхунә Зәбур 37:3.) Әм гәрәке итʹбарийа хԝә Йаһоԝа биньн у ԛәнщийе бькьн, у ӧса жи амьнийа хԝә хԝәй кьн. Ле гәло чь щурʹәйи? Ԝәрен әм шеԝьр кьн мәсәлед Нӧһ, Даԝьд у хьзмәткʹаред дьн, йед кӧ итʹбарийа хԝә Йаһоԝа дьанин. Әме ньһа бьвиньн, ԝәки һәбун тьшт кӧ ԝана нькарьбу бькьрана, ле ӧса жи һәбун тьшт кӧ дькарьбун бькьрана.

5. Шьровәкьн дәрәща Нӧһ.

⁵ Нӧһ дьнйакә ӧсада дьма, кʹижан кӧ «хьрабийава» тʹьжи бу (Дәстп. 6:4, 9-13). Рʹаст ә әԝи заньбу кӧ Йаһоԝа ԝе әв дьнйа зӧлм кʹӧта кә, ле йәкә әԝ гәләк дьлтәнг дьбу жь бо зӧлмийе кӧ дьԛәԝьми. Нӧһ фәʹм дькьр ԝәки һәбун тьшт кӧ әԝ нькарә бькә, ле һәбун тьшт кӧ әԝи дькарьбу бькьра.

6, 7. а) Нӧһ чь нькарьбу бькьра? б) Чьда дәрәща мә мина дәрәща Нӧһ йә?

⁶ Нӧһ чь нькарьбу бькьра: Рʹаст ә Нӧһ бь амьни дәрһәԛа диԝана Хԝәде гьли дькьр, ле әԝи нькарьбу зоре бькә, ԝәки әԝ мәрьвед зӧлм кӧ дор бәре ԝи бун, гӧһ бьдьнә ве әʹламәтийе. Әԝи нә жи  дькарьбу ӧса бькә ԝәки Селав зу бе. Нӧһ гәрәке итʹбарийа хԝе Йаһоԝа бьанийа кӧ әԝ ԝе зӧлмийе бьдә һьлдане. Öса жи Нӧһ гәрәке баԝәр кьра ԝәки Хԝәде ԝе әԝе йәке ԝәʹдеда бькә. (Дәстп. 6:17).

⁷ Әм жи дьжин дьнйакә зӧлм у хьрабда, у Йаһоԝа ԝе зутьрәке әве дьнйайе кʹӧта кә (1 Йуһʹн. 2:17). У әм жи нькарьн зоре мәрьва бькьн, ԝәки «мьзгинийа Пʹадшатийе» ԛәбул кьн. Әм ӧса жи нькарьн дәстпебуна тәнгасийа мәзьн ләз хьн (Мәт. 24:14, 21). Мина Нӧһ, мәрʹа жи баԝәрийа ԛәԝи лазьм ә, ԝәки итʹбарийа хԝә Йаһоԝа биньн, кӧ әԝе һʹәму хьрабийе кʹӧта кә (Зәб. 37:10, 11). Әм баԝәр ьн ԝәки Йаһоԝа ԝе нәһелә кӧ әԝ дьнйа рʹожәке зедә бькʹьшинә, чьмки әԝи чьԛас ԛьрар кьрийә ԝе һаԛас жи бькʹьшинә (Һәбԛ. 2:3).

8. Нӧһ ча дина хԝә дабу сәр ԝан тьшта, чь кӧ ԛәԝата ԝи дьгьһиште кӧ бькьра? (Бьньһерʹә шькле әʹԝльн.)

⁸ Нӧһ чь дькарьбу бькьра: Нӧһ дәԝса кӧ бәрхԝә кʹәта сәва чь кӧ нькарьбу бькьра, әԝи дина хԝә дьда сәр ԝан тьшта, чь кӧ ԛәԝата ԝи дьгьһиште. Нӧһ «рʹасти даннасин дькьр», у бь амьни дәрһәԛа диԝана Хԝәде әʹлам дькьр (2 Пәт. 2:5). Бешьк, әԝе йәке али Нӧһ дькьр, ԝәки баԝәрийа хԝә ԛәԝи хԝәй кә. Хенщи хьзмәткьрьне, әԝи ӧса жи ԛәԝата хԝә да хәбате, ԝәки бь рʹебәрийа Йаһоԝа гәмийе ава кә. (Бьхунә Ибрани 11:7.)

9. Әм ча дькарьн чʹәʹв бьдьнә мәсәла Нӧһ?

⁹ Әм жи мина Нӧһ дькарьн ӧса бькьн, ԝәки «шьхӧле Хӧданда пешда һәрʹьн» (1 Корн. 15:58). Мәсәлә, әм дькарьн аликʹарийе бьдьн бона авакьрьн у хԝәйкьрьна Одед Щьвата у Одед Щьвата мәзьн. Ӧса жи бь рʹәзәдьли сәр щьвата мәзьн кʹомәке бьдьн, йан Бәйтʹәледа хьзмәт кьн, йан жи офисед ԝәлгәрʹандьнеда кӧ нә филиалада ньн. Ле йа лапә фәрз әԝ ә, ԝәки әм хирәт бьн бәлакьрьна мьзгинийеда, у әм заньн ԝәки ӧса әм баԝәрийа хԝә һьндава ахьрийе ԛәԝи хԝәй дькьн. Хушкәкә мә дьбежә кӧ чахе әԝ тʹәви мәрьва хәбәрдьдә дәрһәԛа кʹәрәмед Пʹадшатийа Хԝәде, әԝ дьвинә ԝәки баԝәрийа ԝан һьндава ахьрийе ԛәт тʹӧнә йә, у әԝана дьфькьрьн кӧ чәтьнайед ԝан ԝе хьлаз нәбьн. Бәле, хьзмәткьрьн али мә дькә, ԝәки баԝәрийа хԝә сәр ахьрийе ӧнда нәкьн у бәрдәԝам  кьн ләщмәйданеда бьрʹәвьн ԝәки жийине бьстиньн (1 Корн. 9:24).

10. Гьли кьн кӧ Даԝьд рʹасти чь дәрәща һат.

¹⁰ Йаһоԝа гот кӧ әԝи «мәрик дьле хԝәрʹа дит», у әԝ мәрик Даԝьд бу (Кʹар. Шанд. 13:22). Даԝьд мәрьвәки амьн бу, ле һәла һе әԝи жи щарәке гӧне гьран кьр. Әԝи тʹәви Бат-Шәбайе бенамуси кьр. Хьраб әԝ ә, ԝәки әԝи дьхԝәст гӧне хԝә вәшерә бь ве йәке, кӧ мере ԝе Урийа шәрʹда бе кӧштьне. Дәрһәԛа ве йәке Даԝьд нәʹмәкеда фәрман да, у әԝ нәʹмәк бь дәсте Урийа шанд (2 Сам. 11:1-21). Ахьрийа-ахьрийе гӧнед Даԝьд әʹйан бун (Марԛ. 4:22). Ле гәло Даԝьд һьнге ча хԝә да кʹьфше?

11, 12. а) Паши ԝе йәке ча Даԝьд гӧнә кьр, әԝи ида чь нькарьбу бькьра? б) Әм чьда дькарьн баԝәр бьн чахе әм гӧне хԝә тиньн рʹуйе хԝә?

¹¹ Даԝьд чь нькарьбу бькьра: Даԝьд чь кӧ кьрьбу, ида нькарьбу шашийа хԝә рʹаст кьра. Әԝи ӧса жи нькарьбу хԝә хьлаз кьра жь бәред шашийед хԝә. Жь бо шашийед хԝә, Даԝьд тʹәмамийа әʹмьре хԝәда щәфа дькʹьшанд (2 Сам. 12:10-12, 14). Ләма Даԝьдрʹа гәләк лазьм бу баԝәри. Әԝи гәрәке итʹбарийа хԝә Йаһоԝа бьанийа, ԝәки әԝ ԝе бьбахшинә ԝи, һәрге әԝ гӧне хԝә бинә рʹуйе хԝә. Ӧса жи әԝи гәрәке баԝәр кьра кӧ Хԝәде ԝе али ԝи бькә сәва әԝ тәйах кә бәр ԝан тәнгасийа, кӧ жь бо гӧнед ԝи пешда һатьн.

¹² Әм гьшк гӧнәкʹар ьн ләма жи гӧна дькьн. Һьнә шашийед мә мәзьн ьн, һьнә жи бьчʹук ьн. Щара әм нькарьн шашийед хԝә рʹаст кьн, у бона ве йәке кӧл-дәрда дькʹьшиньн (Галт. 6:7). Ле әм итʹбарийа хԝә созе Хԝәде тиньн, кӧ һәрге әм бь дьл у щан гӧне хԝә биньн рʹуйе хԝә, Йаһоԝа ԝе ԝәʹде чәтьнайа али мә бькә. Әԝ һәла һе ԝан чәтьнайада жи ԝе али мә бькә, кʹижанада әм хԝәха нәһәԛ ьн. (Бьхунә Ишайа 1:18, 19; Кʹаред Шандийа 3:19.)

13. Ча һәләԛәтийа Даԝьд тʹәви Йаһоԝа диса ԛәԝи бу?

¹³ Даԝьд чь дькарьбу бькьра. Даԝьд дьхԝәст ԝәки Йаһоԝа али ԝи бькә кӧ рʹӧһʹанида ԛәнщ бә. Ле әԝи ча әв йәк да кʹьфше? Йа пешьн, әԝи ширәткьрьна Натʹан пʹехәмбәр ԛәбул кьр (2 Сам. 12:13). Даԝьд гӧнед хԝә дьани рʹуйе хԝә у Йаһоԝарʹа дӧа дькьр, ԝәки бьбахшинә ԝи. Әԝи бь дьл у щан дьхԝәст диса ԛәбулкьрьна Йаһоԝа бьстинә (Зәб. 51:1-17). Даԝьд дәԝса кӧ дьлтәнг буйа жь бо гӧнед хԝә, дәрсәкә баш хԝәрʹа һин бу. Әԝи ида тʹӧ щар гӧне ӧса гьран нәдькьр. Әԝ һʹәта мьрьне амьн ма, у әԝ бира Йаһоԝада нә ча мәрьве амьн у дьлсах (Ибрн. 11:32-34).

14. Әм чь дькарьн һин бьн жь мәсәла Даԝьд?

¹⁴ Әм чь дькарьн һин бьн жь мәсәла Даԝьд? Һәрге әм гӧнәки гьран бькьн, әм гәрәке жь Йаһоԝа бахшандьне һиви кьн. Әм гәрәке бәр ԝи «гӧнед хԝә бьдьнә рʹуйе хԝә» (1 Йуһʹн. 1:9). Ӧса жи әм гәрәке һәрʹьнә щәм рʹуспийа, сәва кӧ әԝана рʹӧһʹанида али мә бькьн. (Бьхунә Аԛуб 5:14-16.) Чахе әм аликʹарийа Йаһоԝа ԛәбул дькьн, бь ве йәке әм нишан дькьн ԝәки әм итʹбарийа хԝә созе ԝи тиньн, кӧ әԝ ԝе мә ԛәнщ кә у бьбахшинә. Паши ве йәке әм гәрәке жь шашийед хԝә дәрсе хԝәрʹа һьлдьн, бәрдәԝам кьн Йаһоԝарʹа хьзмәт кьн, у бь баԝәрийе һивийа ахьрийе бьн (Ибрн. 12:12, 13).

15. Әм чь һин дьбьн жь мәсәла Һаннайе?

¹⁵ Дьбәкә һун щара дьфькьрьн дәрһәԛа хьзмәткʹаред бәре, йед кӧ тәнгасийада итʹбарийа хԝә Йаһоԝа дьанин, у ӧса жи алийе хԝәда тьштәк дькьрьн, сәва чәтьнайед хԝә сафи кьн. Мәсәлә, Һанна безӧрʹәт бу, у нькарьбу әве дәрәща  хԝә бьгӧһезә. Ле әԝе баԝәр дькьр, ԝәки Йаһоԝа ԝе бәр дьле ԝеда бе, у әԝе бәрдәԝам дькьр пʹарьстгәһеда хьзмәт кә. Хенщи ве йәке, әԝе дӧада дьле хԝә Хԝәдерʹа вәдькьр (1 Сам. 1:9-11). Чьԛас мәсәләкә баш ә сәва мә! Чахе сьһʹәт-ԛәԝата мә нәбаш ә йан жи чәтьнайед дьн һәнә кӧ әм нькарьн бьгӧһезьн, әм хәмед хԝә давежьн сәр Йаһоԝа, чьмки заньн ԝәки әԝ мә һʹьз дькә у али мә бькә (1 Пәт. 5:6, 7). Ӧса жи әм чьԛас дькарьн һʹәму тьшти дькьн, ԝәки кʹаре бьстиньн жь щьвата у жь хԝарьна рʹӧһʹани, кӧ тʹәшкиләта Йаһоԝа дьдә мә (Ибрн. 10:24, 25).

16. Де-бав чь дәрсе дькарьн һин бьн жь Самуйел кӧ әʹмьрда мәзьн бу?

¹⁶ Чь дькарьн бькьн әԝ де-бав, зарʹед кʹе жи жь рʹийа рʹаст дәркʹәтьнә? Мәсәлә, Самуйел нькарьбу зоре зарʹед хԝәйи мәзьн бькә, ԝәки Хԝәдерʹа амьн бьминьн (1 Сам. 8:1-3). Әԝи әԝ чәтьнайи да дәсте Йаһоԝа. Ле һәла ԝи чахи жи Самуйел амьнийа хԝә хԝәй дькьр, у дьле Баве хԝәйи әʹзмана ша дькьр (Мәтʹлк. 27:11). Иро дәрәща һьнә де-бавед Мәсиһи жи мина йа Самуйел ә. У әԝана жи баԝәр дькьн, ԝәки Йаһоԝа мина ԝи бави кӧ мәтʹәлока Исада нә, тʹьме һазьр ә ԛәбул кә ԝан гӧнәкʹара кӧ гӧнед хԝә дьдьнә рʹуйе хԝә (Луԛа 15:20). Әԝ де-бав һʹәму тьшти дькьн сәва амьн бьминьн Йаһоԝарʹа у баԝәр дькьн, ԝәки зарʹ ԝе чʹәʹв бьдьнә ԝан у вәгәрʹьн щәм Хԝәде.

17. Ча сәрһатийа жьнәбийа кʹәсиб мә дьлгәрм дькә?

¹⁷ Бьфькьрьн сәр сәрһатийа жьнәбикә бәләнгаз, кӧ ԝәʹде Исада дьжит. (Бьхунә Луԛа 21:1-4.) Әԝе заньбу кӧ пʹарьстгәһеда чьԛас хьраби у нәрʹастийе дькьн, у әԝе нькарьбу әԝ дәрәщә бьгӧһаста (Мәт. 21:12, 13). Һьн жи әԝе хԝәха нькарьбу пʹәре зедә хԝәрʹа ԛазанч кьра. Йәкә әԝе бь рʹәзәдьли «дӧ пол» ԛӧрбан кьр. Әԝе «һʹәму тьште кӧ пе әʹбура хԝә бькьра» ԛӧрбан кьр. Әԝ кʹӧлфәта амьн нишан кьр, ԝәки бь дьл итʹбарийа хԝә Йаһоԝа тинә. Әԝе заньбу, ԝәки һәрге әԝ тьштед рʹӧһʹани дайнә щийе пешьн, Йаһоԝа ԝе бона һʹәԝще ԝе хәм бькә. Әԝе итʹбарийа хԝә Йаһоԝа дьани, ләма жи пьштгьрийа һʹәбандьна рʹаст дькьр. Әм жи итʹбарийа хԝә Йаһоԝа тиньн кӧ әԝ ԝе бона мә хәм бькә, һәрге әм шьхӧле ԝи дайньн щийе пешьн (Мәт. 6:33).

18. Мәсәла бьра гьли кьн, кʹижан кӧ рʹаст дьньһерʹи сәр чәтьнайа.

¹⁸ Иро гәләк хушк-бьред мә жи бь шьхӧлед хԝә дьдьн кʹьфше, кӧ итʹбарийа хԝә Йаһоԝа тиньн. Ԝәрә бьньһерʹьн мәсәла бьраки мә бь наве Малкам, кʹижан кӧ сала 2015-да мьрийә. Әԝ һʹәта мьрьне Хԝәдерʹа амьн ма. Нава гәләк салед хьзмәткьрьна ԝи у жьна ԝида, ԝана чәтьнайи жи дитьнә у шабун жи. Әԝи гот: «Жийина мә щара дәрберʹа дькарә бе гӧһастьне, ӧса бә кӧ әм ньзаньбьн сәр чь нә-бәр чь нә, у һәла һе гәләк чәтьн жи. Ле Йаһоԝа ԝана кʹәрәм дькә йед кӧ хԝә ль ԝи дьгьрьн». У әԝ бьра ширәт да: «Дӧа бькьн ԝәки шьхӧле Йаһоԝада хирәт бьн у пешда һәрʹьн. Һʹьш-аԛьле хԝә бьдьнә сәр ве йәке чь кӧ һун дькарьн бькьн, нә кӧ чь нькарьн бькьн». *

19. а) Чьрʹа бона сала 2017, рʹеза сале лайиԛ һатийә бьжартьне? б) Һуне жийина хԝәда ча бьдьнә хәбате рʹеза сала 2017?

¹⁹ Әԝ дьнйа «хьрабийеда» пешда дьчә, у әм гәрәке һазьр бьн ԝәки әме һе зедә рʹасти чәтьнайа бен (2 Тимтʹ. 3:1, 13). У әм ида ньһа гәрәке һин бьн кӧ нәкʹәвьн һʹәйра чәтьнайед хԝә. Дәԝсе әм гәрәке ԛайим итʹбарийа хԝә Йаһоԝа биньн у чь дәсте мә те бькьн. Бь рʹастийе жи рʹеза сала 2017, рʹезәкә гәләк баш ә: «Итʹбарийа хԝә Йаһоԝа бинә у ԛәнщийе бькә»! (Зәб. 37:3, ДТʹ).