1. Yehova mwatangele vanu, wavanene chashu cha kulinga vyuma muka vya kulitila?

YEHOVA mwatangele vanu, wavanene chashu cha kulinga vyuma vya kulithethzathethza. Watwana chashu cha kuthinganyeka mwakulifwitila na vukalu na kuyongola vyuma vya kulinga kulutwe. (Vithi. 2:11) Watwana ndthzili ya kulinga vitunayongola na kupangela ha vilengo vyavivwa vitunalyakela. (Fili. 2:13) Watutanga lalo na chitakutaku chije chikatukwatha kuthzivuka vuvi na vuvwa, cho lalo chikatukwatha kwechela vilinga vyavivi na kupangela ha vuthzeye vwetu, nga tunathevuka.—Loma 2:15.

2. Yehova ashaka ngwendi tupangethe vati chashu chetu?

² Yehova ashaka ngwendi tupangethe mwamuvwa chashu chetu. Mwafwa vika? Mwafwa watuthzema, cho athzivuka ngwendi nga tupangetha mwamuvwa ovu vwana, cho tukala mwamuvwa. Yehova natunangula lwalwingi mu Lijwi lyendi ngwendi tupangethe mwamuvwa chashu chetu. Chakumwenako, mu Vithoneka vya Chihevelu,  vathonekamo ngwavo: “Matumbe a munu uje apanga na ndthzili, amunenela vyuma vyavingi”; cho lalo ngwavo: “Panga na ndthzili mu vyuma vyoshe vije viwulinga.” (Vithi. 21:5; Kwambu. 9:10) Mu Vithoneka vya Chingiliki vya vaka-Kilisitu vatuleka ngwavo: “Ngwe omo tuli na thimbu, tunapande kulingila vuvwa kuli munu na munu”; cho lalo ngwavo: “Umo na umo . . . napande kupangetha vwana vwendi vwanatambula kuli Njambi mu kukwatha vakwavo veka.” (Ngala. 6:10; 1 Petu. 4:10) Yehova ashaka ngwendi tupange na ndthzili mangana tuwane vyakulikwatha navyo na kukwatha vakwetu.

3. Vyuma muka vije kuvatha kulinga vanu?

³ Yehova athzivuka lalo ngwendi kuli vyuma vimo vije kuvatha kulinga vanu. Kutwatha kumanetha kujeneka kuthungama na vuvi na kuthsa, nambe kutwamenena vakwetu vanu, mwafwa navo vali na ndthzili ya kulyangwila vivashaka. (1 Vimye. 8:46) Cho nameme tukale vati na mana, nambe kuthzivuka vyuma vyavingi, oloni hanga kutwatha kulyetheka na Yehova.—Isaya 55:9.

4. Vika vitulilongetha muno mu chilongetha?

⁴ Tunapande kukulahela Yehova mu vyuma vyoshe mangana atutwamenene na kutukwatha na kutulingila vyuma vije kutwatha kulilingila yetu vavenya. Cho tunapande lalo kupanga na ndthzili mangana twathe kumanetha vukalu na kukwatha vakwetu. (Tandeni Myatho 37:3.) Mu kavatu, tunapande ‘kukulahela kuli Yehova na kulinga mwamuvwa,’ cho tunapande ‘kuyoya mwamuvwa.’ Tumoneni vitulilongetha kuli Nowa na Ndaviti na vangamba va Njambi vakwavo va kulongwa vaje vakulahelele Yehova na kulinga vyavivwa. Ngechi lika mutumwenamo, ava vanu vathzivukile vyuma vivathele kulinga na vije kuvathele kulinga, cho valingile vivathele.

5. Lumbununeni vukalu vwaliwanene navwo Nowa.

⁵ Nowa wayoyele mu thimbu ije vuvi “vwashulile hano hathi hoshe.” (Kusha. 6:4, 9-13) Wathzivukile ngwendi Yehova tangwa amanetha ovu vuvi. Oloni nameme ngocho, evi vilinga vyathzivithile Nowa kuvavala ku mbunge. Nowa wathzivukile ngwendi kuli vyuma vije kathele kulinga ha vukalu ovu, oloni vimo wathele kuvilinga.

6, 7. (a) Vyuma muka vije kathele kulinga Nowa? (b) Vukalu vwetu vunalifu vati novu vwa Nowa?

 ⁶ Vyuma vije kathele kulinga Nowa: Nameme Nowa wambulwile mu kulongwa vyuma vyamulekele Njambi, oloni kathele kuthindiya vanu vavavavi vatambule owo muthzimbu nambe kuthzambwitha livathzi. Nowa wapandele lika kukulahela ngwendi Yehova anyunga chikulahetho chendi cha kumanetha vuvi na kukulahela ngwendi akachishulithilila ha thimbu inapande.—Kusha. 6:17.

⁷ Netu tuli na kuyoya mu kaye muje munashulu vuvi, cho tuthzivuka ngwetu Yehova na kulahetha ngwendi akakanyongetha. (1 Yowa. 2:17) Ha thimbu ino, kutwatha kuthindiya vanu vatambule “viñanda vyavivwa vya Vumwene.” Cho kutwatha kuthzambwitha “ñavava” yakama. (Mateo 24:14, 21) Netu tunapande kukala na likulahelo lya kukanyama ngwe Nowa na kukulahela ngwetu Yehova ololo alingako vimo. (Myatho 37:10, 11) Twakulahela ngwetu Yehova kakatava ngwendi kano kaye kakavi katwaleleleho na kujomboka thimbu yanemika.—Hamba. 2:3.

8. Nowa wakelele vati mana ku vyuma vije wathele kulinga? (Kengeni chikupulo ha liputa 7.)

⁸ Vyuma vije wathele kulinga Nowa: Nowa kathzeyele mwafwa ya vyuma vije kathele kulinga, oloni wakelele mana ku vyuma vije vyathele kulinga. Ha kupwa ‘muka-kwambulula vuthunga,’ wambulwile mu kulongwa muthzimbu uvamwanene wa kunangula vanu. (2 Petu. 2:5) Kulinga ngocho kwakanyamethele likulahelo lya Nowa. Kutundoho lalo, wapangethele mana na ndthzili yendi mu kupanga chipangi chamwanene Njambi cha kushonga vwato.—Tandeni Vahevelu 11:7.

9. Twatha kutembwinina vati mwanja wa Nowa?

⁹ Netu tuketheka ‘kupanga na ndthzili mu vipangi vyetu kuli Mwene’ ngwe Nowa. (1 Koli. 15:58) Echi chipangi chambatethelela na kutunga na kuvwahetha myela ya kulemethela na kulyana mu kukwatha ha viwano vya mutambela na viwano vikwavo nambe kupangela ha ofisi ya munango nambe ha ofisi ya kunungulwila mavulu. Kutundoho lalo, tukathzethzama mu chipangi cha kwambulula mwafwa tuthzivuka ngwetu chikakanyametha lilavelelo lyetu lya vyuma vya kulutwe. Ndokathzi umo wa kulongwa ngwendi: “Omwo uthimutwiya na vakweni ha vivethzikitho vivukanena Vumwene vwa Njambi, unanguka ngwove kuvethi na lilavelelo, cho vathinganyeka ngwavo vukalu vwavo kuvukahu.”  Kupanga chipangi cha kwambulula kukakanyametha lilavelelo lyetu lya vyuma vya kulutwe, cho kukatukwatha tutwaleleho kukanyama mu kulwila mwonyo.—1 Koli. 9:24.

10. Lumbununeni vyuma vyaliwanene navyo Ndaviti.

¹⁰ Yehova wendekele ngwendi Mwene Ndaviti ikeye ‘munalume yathzemene.’ (Vili. 13:22) Ndaviti wapwile umo wa vanu vaje vayoyele mu kulongwa. Oloni thimbu imo nendi walingile vuvi vwakama. Walingile vupangala na Mbateshemba. Oloni chaluvinda, washwekele vuvi vwendi mu kushika ngwendi Uliya, munalume wa Mbateshemba vamuthsiye mu ndthzita. Ndaviti watumine Uliya atwale mukanda uje umwetha ngwavo Uliya vamuthsiye. (2 Samwe. 11:1-21) Vuvi vwa Ndaviti vwajombolokele. (Mako 4:22) Vika vyalingile Ndaviti ha thimbu oyo?

11, 12. (a) Vyuma muka vije kathele kulinga Ndaviti omwo waviyithile? (b) Tunapande kukulahela ngwetu Yehova atulinga vati nga tutenguluka mu vuthunga ku vuvi vwetu vwakama?

¹¹ Vyuma vije kathele kulinga Ndaviti: Ndaviti kathele kuthzimangana vyuma vyalingile. Cho kathele kwonowetha vukalu vwatundile mu vyuma vyalingile. Vukalu vumo vwatwaleleho mu kuyoya kwa Ndaviti kwoshe. (2 Samwe. 12:10-12, 14) Mukemwo wapandele kukala na likulahelo. Wapandele kukulahela ngwendi nga atenguluka mu vuthunga, cho Yehova amuthambetha, na kumukwatha kukanyamena vukalu vwatundile mu vilinga vyendi.

¹² Tuvavoshe tukaviyitha mwafwa kutwalumbunukile. Kuthevuka kumo kukapu kwakama manene kutuvakana kukwavo. Thimbu imo kutwatha kuthzimangana kuthevuka kwetu. Tunatha kutwalelelaho kukala mu vukalu vutunda mu kuthevuka kwetu. (Ngala. 6:7) Oloni tukakulahela Njambi ngwetu nga tutenguluka mu vuthunga, cho Yehova atukwatha mu vukalu vwetu vwoshe, nameme vukalu vwa kulishakethela.—Tandeni Isaya 1:18, 19; Vilinga 3:19.

13. Ndaviti wakanyamene vati lalo ku sipilitu?

¹³ Vyuma vije wathele kulinga Ndaviti: Ndaviti watavethele Yehova amukwathe kukanyama ku sipilitu. Ngila imo yalingile ngocho, yapwile kutambula kunangula kwa kapolofweto Natane, uje wapwile muka-kwimanenako Yehova. (2 Samwe. 12:13) Ndaviti walombele lalo kuli Yehova na kulitavela vuvi vwendi na kumwetha lishungu lya kwiluka kuli Yehova. (Myatho 51:1-17) Ndaviti kathzeyele omwo ya kulithziva kukala na mulonga, oloni walilongethele ku vuvi vwendi. Kelukilile kulinga ovwo vuvi vwakama lalo. Mu kwita kwa myaka, wathsile oku napu wa kulongwa, cho Yehova kevalele vilinga vyendi vyavivwa.—Heve. 11:32-34.

14. Vika vitulilongetha ku mwanja wa Ndaviti?

¹⁴ Vika vitulilongetha ku mwanja wa Ndaviti? Nga tulinga vuvi vwakama, tunapande kutenguluka mu vuthunga na kulombela Yehova atuthambethe. Tunapande kulitavela vuvi vwetu kuli ikeye. (1 Yowa. 1:9) Tunapande lalo kuthimutwiya na vakulunu vaje vatha kutukwatha ku sipilitu. (Tandeni Yakomba 5:14-16.) Nga tukavangeya kutwamenena kwa Yehova, cho tumwetha ngwetu twakulahela chikulahetho chendi cha kutukwatha na kututhambetha. Kutundoho, tunapande kulilongetha vimo ha vuvi vwetu na kupanga na ndthzili mu chipangi cha Yehova na kukala na lilavelelo lya vyuma vya kulutwe.—Heve. 12:12, 13.

15. Vika vitulilongetha ku mwanja wa Hana?

¹⁵ Neni mpamo mwanukako vangamba va Yehova vakwavo va kuthañulu va kulongwa, vaje vamukulahelele omwo valingile vyuma vimo vya theho. Chakumwenako, Hana kathele kumanetha vukalu vwendi vwa kujeneka kukita. Oloni wakulahelele ngwendi Yehova amuthzembeleka, ngechi wakele na kuyayaya ku mbalaka na  kulemetha na kulombela kuli Njambi. (1 Samwe. 1:9-11) Ou unapu mwanja wauvwa kuli yetu. Nga tulifwita na mushongo umo nambe vukalu vumo, vuje kutwatha kumanetha, cho tunapande kwaka vukalu vwetu kuli Yehova na kukulahela ngwetu atukwatha. (1 Petu. 5:6, 7) Cho tunapande kulingako vitwatha vya kufwa ngwe kuya ku viwano vya vaka-Kilisitu na kulinga vyuma vikwavo vya ku sipilitu mangana vitutakamethe.—Heve. 10:24, 25.

16. Vithemi vatha kulilongetha vika kuli Samwele wa kakulukathzi?

¹⁶ Vithemi va kulongwa vaje vali na vana vanatundu mu vuthunga vatha kulinga vati? Omwo Samwele wakuluvalele, kathele kuthindiya vana vendi va kukola vononoke mashiko a Njambi avalongethele. (1 Samwe. 8:1-3) Wapandele kuthethza vyuma vyoshe mu mavoko a Yehova. Nameme ngocho, Samwele ikeye wathele kutwalelelaho kulongwa kuli Ishe wa mwilu, Yehova na kumuthzivitha kuvwaha ku mbunge. (Vithi. 27:11) Na matangwa ano, vithemi vavangi vaka-Kilisitu vali na kuliwana mu vukalu vwa chifwa echi. Vakulahela ngwavo Yehova nalivwahethela kutambula vaka-vuvi vaje vatenguluka, ngwe uje chithemi wa mu chithimo cha mwana wa kuthzimbala. (Luka 15:20) Cho ava vithemi, vakapanga na ndthzili na kutwalelelaho kulongwa kuli Yehova, mwafwa vakulahela ngwavo mwanja wavo ushongangeya vana vavo kwiluka mu vuthunga.

17. Mwafwa vika mwanja wa fwile wa kahutu unapu wauvwa?

¹⁷ Anukeni lalo fwile wa kahutu, wa mu thimbu ya Yesu. (Tandeni Luka 21:1-4.) Kathele kumanetha vyuma vyavivi vije vyakele na kulingiwa mu Njuvo ya Shukulu Kalunga. (Mateo 21:12, 13) Cho lalo, kathele kumanetha vuhutu vwendi. Oloni walambwile “tumbongo tuvali twatundondo twa vunengu” tuje ‘twakele natwo twakulikwatha natwo.’ Uje munakathzi wa kulongwa wakulahelele kuli Yehova na mbunge yendi yoshe, wathzivukile ngwendi nga atwameka vya ku sipilitu kulutwe, cho Njambi amwana vyuma vya kulikwatha navyo mu kuyoya. Kukulahela kwa uje fwile, kwa mu shongangeyeye akundwiye kulemetha kwa vuthunga ha thimbu oyo. Netu twakulahela ngwetu nga tushakethzeka tahi vya Vumwene, cho Yehova atwana vitushaka.—Mateo 6:33.

18. Endekeni mwanja wa muka-kukulahela wa matangwa ano uje wakele na vithinganyeka vyavivwa.

¹⁸ Vaka-kukulahela vavangi matangwa ano vanamwetha likulahelo lyavo kuli Yehova na kulingako vimo, ngwe mwalingile uje fwile. Achithinganyekeni ha mwanja wa ndolome Malcolm, uje watwaleleleho kulongwa noho kuthsa kwendi mu 2015. Mu myaka yaingi yanapangela Yehova na munakathzi wendi, vakele na kuliwana na vukalu vwa kulithethzathethza. Wendekele ngwendi: “Vyuma vikatenguluka mu kuyoya, thimbu imo vikakaluwa manene, oloni Yehova akavethzikitha vaje vamukulahela.” Malcolm wanangwile ngwendi: “Lombeleni kuli Yehova amyane ndthzili ya kupanga chipangi chendi mumwathela mwoshe. Akeleni mana ku vyuma vije vimwatha kulinga, kethi vije kumwatha kulinga.” *

19. (a) Mwafwa vika chithoneka chetu cha mwaka wa 2017 chinapande? (b) Mupangetha vati chithoneka cha mwaka wa 2017 mu kuyoya kweni?

¹⁹ Omwo futithi ya kano kaye ili na kuvihya “manene,” twatha kuliwana mu vukalu vwakama manene. (2 Tima. 3:1, 13) Ngechi, ino kethi thimbu ya kwechelela ovwo vukalu kututhzeyetha. Oloni inapu thimbu ya kukulahela manene Yehova na kulinga vyoshe vije vitwatha kulinga. Mukemwo chithoneka chetu cha mwaka wa 2017 chinapande, chije chendeka ngwavo: “Kulahela kuli Shukulu Kalunga, cho linga mwamuvwa”.—Myatho 37:3.