1. Jehova okwa shita aantu nuunkulungu uukumithi wuni?

JEHOVA okwa shita aantu nuunkulungu uukumithi. Okwe tu pa owino, opo tu vule okuungaunga nuupyakadhi wetu nosho wo okwiilongekidhila onakuyiwa. (Omayel. 2:11) Kalunga okwe tu pa oonkondo, opo tu vule okwaadha omalalakano getu ngoka twa hala okugwanitha po. (Fil. 2:13) Okwe tu shita neiyuvo ndyoka hali tu kwathele tu mone kutya oshinima shontumba osha puka nenge oshi li mondjila. Ohali vulu wo oku tu kwathela tu yande shoka oshiwinayi notu opaleke omapuko getu ngoka twa ninga. —  Rom. 2:15.

2. Jehova okwa tegelela tu longithe ngiini uunkulungu wetu?

² Jehova okwa tegelela tu longithe uunkulungu mboka momukalo omwaanawa. Omolwashike mbela? Omolwaashoka oku tu hole noku shi kutya shika otashi ke tu etela enyanyu ngele otwe wu longitha nawa. Jehova ote tu kumagidha lwiikando okupitila mOohapu dhe, tu longithe nawa uunkulungu wetu. Pashiholelwa, momanyolo gOshihebeli otatu adha mo oohapu tadhi ti: “Oompangela dhomunandjungu otadhi mu etele eliko.” Otatu adha mo wo ndhoka tadhi ti: “Longa  ashihe to vulu niikaha yoye, shi longa noonkondo dhoye.” (Omayel. 21:5; Omuuv. 9:10) Momanyolo gopaKriste gOshigreka otatu lombwelwa taku ti: “Onkee ano manga tu na ethimbo, natu ningileni kehe gumwe uuwanawa.” Otatu adha mo wo ndhoka tadhi ti: “Kehe gumwe na longithe omagano ngoka e ga pewa okukwatha yakwawo.” (Gal. 6:10; 1 Pet. 4:10) Osha yela kutya Jehova okwa hala tu ninge ngaashi tatu vulu, opo tu vule okumona mo uuwanawa nosho wo yalwe.

3. Aantu oye na omangambeko geni?

³ Nonando ongawo, Jehova oku shi kutya aantu oye na omangambeko. Itatu vulu nando okuungaunga nokwaagwanenena kwetu, uulunde neso kutse yene; noitatu vulu okutokolela yalwe, molwaashoka atuheni otu na emanguluko lyokuninga omatokolo. (1 Aak. 8:46) Kashi na nduno mbudhi kutya otu na ontseyo nenge iimoniwa yi thike peni, otatu ka kala aluhe twa fa aanona mokwiiyelekanitha naJehova. — Jes. 55:9.

4. Oshike tatu ka kundathana moshitopolwa shika?

⁴ Moonkalo kehe otwa pumbwa ewiliko lyaJehova, nokwiinekela kutya ote ke tu yambidhidha note ke tu ningila shoka itaatu vulu okuninga kutse yene. Ihe nonando ongawo, otwa pumbwa okuninga ngaashi tatu vulu, okukatuka pandunge, opo tu vule okuungaunga nomaupyakadhi getu nokukwathela wo yalwe. (Lesha Episalomi 37:3.) Otwa pumbwa ‘okwiinekela Omuwa e tatu longo uuwanawa nokudhiginina uuyuuki.’ (Yelekanitha OB-1954.) Natu taleni shoka tatu vulu okwiilonga moshiholelwa shaNoa, David nosho wo shaapiya yaKalunga yalwe aadhiginini mboka ya li yi inekela muJehova noya katuka pandunge. Ngaashi tatu ke shi mona, shika osha kwatela mo okutseya kutya oshike itoo vulu okuninga noshike to vulu okuninga, nopo nduno to katuka metsokumwe naashoka to vulu okuninga.

5. Yelitha onkalo moka Noah a li?

⁵ Pethimbo lyaNoa muuyuni omwa li mu udha oluhondelo, “niikolokosha oya li ya taandela shaa mpoka.” (Gen. 6:4, 9-13) Okwa li e shi kutya Jehova ota ka hanagula po aakolokoshi. Ihe nonando ongawo, Noa oku na okukala a li u uvitile nayi uukolokoshi mboka aantu ya li taya longo. Monkalo ndjoka, Noa okwa li a dhimbulula kutya opu na iinima yontumba mbyoka itaa vulu okuninga, ihe yilwe okwa li ta vulu oku yi ninga.

6, 7. (a) Oshike Noa a li itaa vulu okuninga? (b) Ongiini natse tu li monkalo ya faathana noyaNoa?

⁶ Shoka Noa a li itaa vulu okuninga: Nonando Noa okwa li u uvitha nuulaadhi etumwalaka lyaJehova  lyelondodho, ka li ta vulu okuthiminika aantu ya taambe ko etumwalaka ndyoka, noka li ta vulu okuningitha eyelu li ye mbalambala. Noa okwa li e na okwiinekela kutya Jehova ota ka gwanitha po euvaneko lye li na ko nasha nokuhanagula po uukolokoshi nokukala i itaala kutya Kalunga ote ke shi ninga pethimbo lyo opala. —  Gen. 6:17.

⁷ Natse otu li muuyuni wu udha uukolokoshi, notu shi kutya Jehova oku uvaneka oku wu hanagula po. (1 Joh. 2:17) Nonando ongawo, itatu vulu okuthiminika aantu ya taambe ko ‘elaka etoye lyoshilongo.’ Itatu vulu wo okweendelelitha “uudhigu uunene.” (Mat. 24:14, 21) Ngaashi Noa, otwa pumbwa okukala tu na eitaalo lya kola nokwiinekela kutya Jehova masiku ota ka katuka onkatu. (Eps. 37:10, 11) Otwa tompwa kutya Jehova ite ke etha onkalelo yuuyuni mbuka wa kolokosha yi tsikile okukala po sigo aluhe. —  Hab. 2:3.

8. Noah okwa li a gandja eitulomo kushike shoka a li ta vulu okuninga? (Tala kethano lyopetameko.)

⁸ Shoka Noa a li ta vulu okuninga: Pehala lyokuteka omukumo omolwiinima mbyoka a li itaa vulu okuninga, Noa okwa li a gandja eitulomo kwaashoka a li ta vulu okuninga. E li “omuuvithi guuyuuki,” okwa li u uvitha nuulaadhi etumwalaka lyelondodho ndyoka a li a pewa kuJehova. (2 Pet. 2:5) Osha yela kutya shika osha li she mu kwathele a kale e na eitaalo lya kola. Kakele kokuuvitha, okwa li wo a longitha oonkondo dhe adhihe dhopalutu nomadhiladhilo ge agehe a gwanithe po iilongo ye mbyoka a pewa kuKalunga yokutunga onguluwato. —  Lesha Aahebeli 11:7.

9. Ongiini tatu vulu okuholela oshiholelwa shaNoa?

⁹ Ngaashi Noa, natse otwa pumbwa okuninga oonkambadhala tu ‘kale twi ipyakidhila aluhe niilonga yOmuwa.’ (1 Kor. 15:58) Iilonga mbyoka otashi vulika ya kwatela mo iilonga yokutunga nokwoopaleka omahala getu gokugongalela, okukwathela piigongi iinene niishona, okulonga koshitayimbelewa nenge kombelewa yokutoloka. Komeho gaayihe, ohatu kala twi ipyakidhila niilonga yokuuvitha, molwaashoka otu shi kutya otayi koleke etegameno lyetu lyonakuyiwa. Omumwameme gumwe omudhiginini okwa ti: “Uuna to popi naayalwe kombinga yuuwanawa mboka Uukwaniilwa waKalunga tawu ke eta, oho shi dhimbulula kutya aapulakeni yoye kaye na nando etegameno lya sha, noye wete kutya uupyakadhi wawo kawu na siku wu hule po.” Okukutha ombinga miilonga yokuuvitha ohaku koleke etegameno lyetu lyonakuyiwa nohaku tu  kwathele kaatu teke omukumo methigathano lyoku ka mona omwenyo gwaaluhe. —  1 Kor. 9:24.

10. Hokolola onkalo moka David a li?

¹⁰ Jehova okwa popi omukwaniilwa David kutya oye ‘omulumentu ngoka a hokwa.’ (Iil. 13:22) David okwa li omulumentu omudhiginini. Ihe nonando ongawo, oshikando shimwe okwa li a yono eyono lya kwata miiti. Okwa li a yi moluhondelo naBatseba. Onkalo okwe yi nayipike sho a kambadhala okuholeka eyono lye, mokulongekidha Uria, omusamane gwaBatseba, a dhipagelwe kolugodhi. David okwa li nokuli a tumu Uria a fale kuJoab ontumwafo ndjoka ya li tayi popi kombinga yedhipago lye. (2 Sam. 11:1-21) Mupyamunene, eyono lyaDavid osho lye ya puyelele. (Mark. 4:22) Sho lye ya puuyelele David okwa li i inyenge ngiini?

11, 12. (a) Oshike David a li itaa vulu okuninga konima sho a yono? (b) Ngele otwi iyele ombedhi uuna twa ninga omayono ga kwata miiti, otatu vulu okwiinekela kutya Jehova ote ke tu ningila shike?

¹¹ Shoka David a li itaa vulu okuninga: David ka li ta vulu okuninga po sha shi na ko nasha naashoka a ninga, noka li ta vulu okuyanda iilanduliko mbyoka a mono okuza momapuko ge. Osha yela kutya iilanduliko yimwe oya li tayi ke mu etela uupyakadhi monkalamwenyo ye ayihe. (2 Sam. 12:10-12, 14) Onkee ano, okwa li a pumbwa eitaalo. Okwa li e na okwiinekela kutya ngele okwi iyele ombedhi shili, Jehova ote ke mu dhimina po note ke mu kwathela a vule okuungaunga niilanduliko yomapuko ge.

¹² Molwaashoka inatu gwanenena, atuheni ohatu yono. Omayono gamwe ohaga kala ga kwata miiti ge vulithe galwe. Poompito dhimwe, ihatu vulu okuninga po sha nago. Otashi vulika iilanduliko yago tu kale nayo onkalamwenyo yetu ayihe. (Gal. 6:7) Ihe otwi inekela meuvaneko lyaKalunga kutya ngele otwi iyele ombedhi, Jehova ote ke tu yambidhidha pethimbo lyuudhigu wetu, nonando uupyakadhi mboka otse yene twe wu iyetela. —  Lesha Jesaja 1:18, 19; Iilonga 3:19.

13. Oshike sha li sha kwathele David a aluke pambepo?

¹³ Shoka David a li ta vulu okuninga: David okwa li a pitike Jehova e mu kwathele a aluke pambepo. Omukalo gumwe David a li e shi ningi, omokutaamba ko epukululo ndyoka a li a pewa komupolofeti Natan ngoka a li omukalelipo gwaJehova. (2 Sam. 12:13) David okwa li wo a galikana kuJehova, ta hempulula oondjo dhe note mu tseyithile kutya okwa hala lela a dhiminwe po. (Eps. 51:1-17) Pehala lyokugwililwa po keyono, David okwa li i ilongo komapuko ge. Ano ine endulula we omayono ngoka ga kwata miiti. Konima yomimvo, okwa si omudhiginini, na Jehova ina dhimbwa nando uudhiginini we. —  Heb. 11:32-34.

14. Oshike tatu vulu okwiilonga koshiholelwa shaDavid?

¹⁴ Oshike tatu vulu okwiilonga koshiholelwa shaDavid? Ngele otwa gwile meyono lya kwata miiti otwa pumbwa okwiiyela ombedhi e tatu pula Jehova e tu dhimine po. Otu na oku mu hempululila oondjo dhetu. (1 Joh. 1:9) Otatu vulu wo okuya kaakuluntugongalo mboka taya vulu oku tu kwathela pambepo. (Lesha Jakob 5:14-16.) Uuna tatu taamba ko eputudho lyaJehova otatu ulike kutya otwi inekela meuvaneko lye lyoku tu aludha pambepo noku tu dhimina po. Onkee ano, otwa pumbwa okwiilonga komapuko getu, okuhuma komeho miilonga yaJehova nokukala twa tala konakuyiwa tu na omukumo. —  Heb. 12:12, 13.

15. Oshike tatu vulu okwiilonga koshiholelwa shaHanna?

¹⁵ Oto vulu wo okudhiladhila kombinga yaapiya yaJehova yamwe yonale mboka ya li yi inekela muJehova sho taya katuka oonkatu dhu uka. Pashiholelwa, Hanna ka li ta vulu okukondjitha kuye mwene uupyakadhi wokwaamona aanona. Ihe okwa li i inekela kutya Jehova ote ke mu hekeleka, onkee ano, okwa tsikile oku ka galikana  ketsalihangano nokwa li a mbumbulile Jehova omutima gwe megalikano. (1 Sam. 1:9-11) Mbela shika kashi shi oshiholelwa oshiwanawa kutse? Uuna tatu ungaunga nuupyakadhi wu na ko nasha nuukolele wetu nenge nuupyakadhi wulwe wu vule oonkondo dhetu, natu tsike Jehova iimpwiyu yetu, tu na einekelo kutya ote tu sile oshimpwiyu. (1 Pet. 5:6, 7) Otatu ka ninga ngaashi tatu vulu tu mone uuwanawa mokugongala kwopaKriste nomomasiloshimpwiyu galwe gopambepo. —  Heb. 10:24, 25.

16. Aavali otaya vulu okwiilonga ko shike komupolofeti Samuel?

¹⁶ Ongiini kombinga yaavali aadhiginini mboka aanona yawo ya falwafalwa? Omupolofeti omukokele, Samuel ka li ta vulu okuthiminika aanona ye yaamati aakuluntu ya dhiginine omithikampango dhaKalunga dhuuyuuki ndhoka e ya longa. (1 Sam. 8:1-3) Okwa li e ethele iinima momake gaJehova. Nonando ongawo, okwa kala omudhiginini nokwa li a nyanyudha He gwomegulu, Jehova. (Omayel. 27:11) Kunena, aavali oyendji Aakriste ohayi iyadha monkalo ya fa ndjoka. Oye na einekelo kutya ngaashi naanaa omusamane omuvali gwomeyele lyaJesus ndyoka tali popi kombinga yomumati a kanene, Jehova ote ke shi nyanyukilwa okutaamba ko aalunde mboka tayi iyela ombedhi. (Luk. 15:20) Momukokomoko gwethimbo aavali ya tya ngaka ohaya longo nuudhiginini, opo ya kale aadhiginini kuJehova noye na etegameno kutya oshiholelwa shawo otashi ki inyengitha oyana ya galukile kuJehova.

17. Omolwashike oshiholelwa shomuselekadhi ohepele tashi tu tsu omukumo?

¹⁷ Dhiladhila wo kombinga yomuselekadhi gumwe ohepele ngoka a li ko pethimbo lyaJesus. (Lesha Lukas 21:1-4.) Ka li nando ta vulu okuninga po sha shi na ko nasha niilonga iiwinayi mbyoka ya li tayi longwa motempeli. (Mat. 21:12, 13) Ka li wo ta vulu okuninga po sha shi na ko nasha noluhepo lwe. Ihe “uupeni uyali” mboka owo owala wa li “iipalutha ye,” okwe wu gandja po omayambidhidho. Omukiintu ngoka omudhiginini okwa li u ulike lela kutya okwiinekela muJehova nomutima gwe aguhe. Okwa li e shi kutya ngele okwa pititha komeho iinima yopambepo, Jehova ote ke mu kwathela moompumbwe dhe dhopalutu. Einekelo ndyoka olya li lye mu inyengitha a yambidhidhe elongekidho lyelongelokalunga lyashili. Sha faathana, natse otwi inekela kutya ngele otwa pititha komeho Uukwaniilwa, Jehova ote ke tu pa shoka twa pumbwa. —  Mat. 6:33.

18. Gandja oshiholelwa shomumwatate ngoka a li e na etaloko li li mondjila?

¹⁸ Ooitaali ooyakwetu oyendji oyu ulika wo einekelo muJehova noya katuka onkatu yu uka. Natu tale komumwatate gwedhina Malcolm, ngoka a kala omudhiginini sigo omeso lye, mo 2015. Ye nomukadhi oya kala ye na omathimbo omawinayi nomawanawa, muule womimvo odhindji ndhoka ya kala taya longele Jehova. Malcolm okwa ti: “Omathimbo gamwe onkalamwenyo kayi shi okwiinekelwa, nohayi kala nokuli ondhigu okuungaungiwa nayo. Ihe Jehova oha yambeke mboka haye mu inekele.” Malcolm okwa gandja omayele geni? Okwa ti: “Galikana opo wu kale wu na oonkondo dhokulonga nuudhiginini miilonga yaJehova ngaashi to vulu. Gandja eitulomo kwaashoka to vulu okuninga, ihe hakwaashoka itoo vulu okuninga.” *

19. (a) Omolwashike enyolo lyetu lyomumvo 2017 tali opalele? (b) Ongiini to vulu okutula miilonga enyolo lyomumvo 2017 monkalamwenyo yoye?

¹⁹ Sho onkalelo yuuyuni mbuka tayi zi “muuwanawa yu uka muuwinayi,” otwa tegelela tu iyadhe moonkalo oondhigu shi vulithe nale. (2 Tim. 3:1, 13) Onkee ano, osha simanenena kaatu ethe nando tu gwililwe po kuupyakadhi. Pehala lyaashono otwa pumbwa okukala tu na eitaalo lya kola muJehova sho tatu kambadhala okulonga shoka shu uka. Enyolo lyetu lyomumvo 2017 itali opalele tuu ndyoka tali ti: “Inekela Omuwa e to longo uuwanawa”! — Eps. 37:3.