1. Jehofa o bopile batho ba na le bokgoni bja go dira eng?

JEHOFA o bopile batho ba na le bokgoni bja go dira dilo. O re neile tlhaologanyo gore re kgone go rarolla mathata le go rulaganya tša ka moso. (Die. 2:11) O re neile matla a go dira dilo tšeo re di rulagantšego, gomme seo se re thuša go fihlelela dipakane tša rena. (Bafil. 2:13) Le gona o re neile letswalo, e lego maikwelo ao a re thušago go tseba seo se nepagetšego le seo se fošagetšego. Letswalo le re thuša go phema go dira bobe le go lokiša diphošo tšeo re di dirago.—Baroma 2:15.

2. Jehofa o letetše gore re diriše bokgoni bja rena bjang?

² Jehofa o letetše gore re diriše bokgoni bja rena gabotse. Ka baka la’ng? Ka gobane o a re rata, e bile o a tseba gore re a thaba ge re diriša bokgoni bja rena. Ka Lentšung la gagwe, Jehofa o re kgothaletša gantši gore re diriše bokgoni bja rena gabotse. Ka mohlala, ka Mangwalong a Seheberu, re bala gore: “Maano a motho yo mafolofolo a a mo hola,” le gore “tšohle tšeo seatla sa gago se kgonago go di dira, di dire ka matla a gago ka moka.” (Die. 21:5; Mmo. 9:10) Ka Mangwalong a Bakriste a Segerika re botšwa gore: “Ge feela re sa  na le sebaka, anke re direleng bohle botse,” le gore “go fihla bokgoleng bjoo ka bjona yo mongwe le yo mongwe a amogetšego mpho, e dirišeng ge le hlankelana.” (Bagal. 6:10; 1 Pet. 4:10) Go molaleng gore Jehofa o nyaka gore re dire sohle se re ka se kgonago gore re holege le go hola ba bangwe.

3. Ke dilo dife tšeo batho ba sa kgonego go di dira?

³ Ka nako e swanago, Jehofa o a tseba gore go na le dilo tšeo re sa kgonego go di dira. Ka mohlala, re ka se kgone go fediša go se phethagale, sebe le lehu; e bile re ka se kgone go laola batho ba bangwe ka ge ka moka ga rena re na le tokologo ya go ikgethela. (1 Dikg. 8:46) Le gona go sa šetšwe gore re na le tsebo goba phihlelo e ntši gakaakaang, re ka se tsoge re swane le Jehofa.—Jes. 55:9.

4. Re tlo ahlaahla’ng sehlogong se?

⁴ Maemong ka moka, re swanetše go ithekga ka Jehofa gore a re hlahle, re tshepe gore o tla re thekga le go re direla dilo tšeo re sa kgonego go di dira. Lega go le bjalo, le rena re swanetše go dira seo re ka se kgonago go rarolla mathata a rena le go thuša ba bangwe. (Bala Psalme 37:3.) Ka boripana, re swanetše ‘go bota Jehofa le go dira botse’; re swanetše ‘go dira dilo ka potego.’ Tabeng ye, anke re ahlaahleng seo re ka ithutago sona go Noa, Dafida le bahlanka ba bangwe ba botegago ba Jehofa bao ba ilego ba ithekga ka yena gomme ba dira dilo tše di lokilego. Ka ge re tlo ithuta, batho ba ba thušitšwe ke go tseba seo ba bego ba sa kgone go se dira le go tseba seo ba bego ba kgona go se dira, gomme ba dira seo se lokilego.

5. Noa o be a phela le batho ba mohuta mang?

⁵ Noa o phetše le batho ba babe bao ba bego ba “tletše bošoro” e bile ba itshwere gampe. (Gen. 6:4, 9-13) O be a tseba gore Jehofa o be a tlo fediša batho bao ba babe. Lega go le bjalo, Noa o swanetše go ba a be a opišwa hlogo ke batho bao ba go se hlomphe Modimo. Le ge maemo a be a le ka tsela yeo, Noa o ile a lemoga gore dilo tše dingwe a ka se kgone go di dira mola tše dingwe a ka kgona go di dira.

6, 7. (a) Ke’ng seo Noa a bego a ka se kgone go se dira? (b) Re swana bjang le Noa?

⁶ Seo Noa a bego a sa kgone go se dira: Le ge Noa a ile a šoma ka mafolofolo go botša batho  bao ba babe gore Jehofa o tlo ba fediša, o be a ka se ba gapeletše go fetoga, e bile o be a ka se dire gore Meetsefula a tle kapela. Noa o ile a swanelwa ke go bota gore Jehofa o tla phethagatša seo a se boletšego gomme a fediša bobe, le gore o tla dira seo ka nako ya maleba.—Gen. 6:17.

⁷ Le rena re phela le batho ba babe, e bile re a tseba gore Jehofa o re o tlo ba fediša. (1 Joh. 2:17) Eupša re ka se gapeletše batho gore ba amogele ‘ditaba tše dibotse tša Mmušo.’ Le gona re ka se kgone go dira gore “masetlapelo a magolo” a tle ka pela. (Mat. 24:14, 21) Go swana le Noa, re swanetše go ba le tumelo e tiilego, re tshepe gore kgauswinyane Jehofa o tlo tsena ditaba gare. (Ps. 37:10, 11) Re kgodišegile gore Jehofa o tla fediša batho ba babe ka nako yeo a e beilego, a ka se ba dumelele gore ba tšwele pele ba phela.—Habak. 2:3.

8. Noa o ile a swarega ka eng? (Bona seswantšho seo se lego mathomong a sehlogo.)

⁸ Seo Noa a bego a kgona go se dira: Go e na le gore Noa a fetšwe matla ke seo a bego a sa kgone go se dira, o ile a swarega ka seo a bego a kgona go se dira. Ka ge Noa e be e le “mmoledi wa toko,” o ile a bolela ka mafolofolo molaetša wa gore Jehofa o tlo fediša batho ba babe. (2 Pet. 2:5) Ga go pelaelo gore go bolela molaetša woo go ile gwa matlafatša tumelo ya Noa. Go oketša moo, o ile a diriša bokgoni bja gagwe go dira mošomo wo Modimo a bego a mo neile wona wa go aga areka.—Bala Baheberu 11:7.

9. Re ka ekiša Noa bjang?

⁹ Go swana le Noa, re na le “mo gontši mo [re] go dirago modirong wa Morena.” (1 Bakor. 15:58) Modiro o bjalo o akaretša go aga le go hlokomela meago ya rena ya borapedi, go ithaopela go šoma dikopanong tše dikgolo le tše dinyenyane, goba go dira mešomo e itšego ofising ya lekala goba ya bofetoledi. Go feta moo, re dula re swaregile ka go bolela ditaba tše dibotse, re tseba gore modiro wo o re thuša go ba le tumelo e tiilego dikholofetšong tša Jehofa tša nakong e tlago. Kgaetšedi yo mongwe yo a botegago o hlalosa taba ye ka tsela ye: “Ge o botša ba bangwe ka ditšhegofatšo tša Mmušo wa Modimo, ke mo o lemogago gore ruri ga ba na kholofelo ka bokamoso e bile ba bona eka mathata a bona a ka se tsoge a fedile.” Ruri go bolela ditaba tše dibotse go matlafatša tumelo ya rena  dikholofetšong tša Jehofa le go re thuša gore re se ke ra lesa go kitima lebelo la go tlo hwetša bophelo bjo bo sa felego.—1 Bakor. 9:24.

10. Hlalosa seo Dafida a ilego a se dira.

¹⁰ Jehofa o ile a hlalosa Dafida e le “monna yo a kwanago le pelo ya [gagwe].” (Dit. 13:22) Dafida o ile a botega mo e ka bago bophelo bja gagwe ka moka. Lega go le bjalo, nakong e itšego o ile a dira sebe se segolo. O ile a robala le Batseba, yo e bego e le mosadi wa monna yo mongwe. Dafida o ile a senya ditaba le go feta ge a be a leka go uta sebe seo. O ile a dira seo bjang? Ka go rulaganya gore monna wa Batseba e lego Uria a bolawe ntweng. Se sebe le go feta, Dafida o ile a epela Uria lebitla a sa phela ka go mo nea lengwalo leo le bego le na le molaetša wa gore a bolawe. (2 Sam. 11:1-21) Lega go le bjalo, sebe sa Dafida se ile sa utologa. (Mar. 4:22) Ge seo se direga, Dafida o ile a arabela bjang?

11, 12. (a) Ke’ng seo Dafida a bego a ka se kgone go se dira ka morago ga gore a dire sebe? (b) Ge e ba re itshola ka morago ga go dira sebe, Jehofa o tla dira’ng?

¹¹ Seo Dafida a bego a sa kgone go se dira: Dafida o be a ka se kgone go butšetša dilo morago. E bile o be a ka se kgone go tšhabela ditlamorago tša dibe tša gagwe. Ge e le gabotse, tše dingwe tša ditlamorago tšeo di ile tša mo tlaiša bophelo bja gagwe ka moka. (2 Sam. 12:10-12, 14) Ka gona o be a swanetše go ba le tumelo. O be a swanetše go kgodišega gore ge a ka itshola go tšwa pelong, Jehofa o be a tla mo lebalela le go mo thuša go kgotlelela ditlamorago tša dibe tša gagwe.

¹² Ka ge re sa phethagala, ka moka ga rena re dira dibe. Diphošo tše dingwe ke tše dikgolo go feta tše dingwe. Diphošo tše dingwe di ka no se lokišege. Re ka swanelwa ke go no lebeletšana le ditlamorago tša tšona. (Bagal. 6:7) Eupša re tshepa seo Modimo a se boletšego, gore ge e ba re itshola, o tla re thekga dinakong tše thata, le ge re ipaketše mathata ao.—Bala Jesaya 1:18, 19; Ditiro 3:19.

13. Dafida o thušitšwe ke’ng go lokiša tswalano ya gagwe le Jehofa?

¹³ Seo Dafida a bego a kgona go se dira: Dafida o ile a dumelela Jehofa gore a mo thuše go lokiša tswalano ya gagwe le yena. Tsela e nngwe yeo a ilego a dira seo ka yona ke ka go amogela tayo yeo Jehofa a mo neilego yona a diriša moporofeta Nathane. (2 Sam. 12:13) Le gona Dafida o ile a rapela Jehofa, a ipobola dibe tša gagwe gomme a botša Jehofa gore a mo gaugele. (Ps. 51:1-17) Go e na le gore Dafida a fetšwe matla ke go ipona molato, o ile a ithuta diphošong tša gagwe. Dafida ga se a ka a bušeletša dibe tšeo tše dikgolo. O hwile a botega, e bile Jehofa a ka se tsoge a mo lebetše.—Baheb. 11:32-34.

14. Re ithuta’ng mohlaleng wa Dafida?

¹⁴ Re ithuta’ng mohlaleng wa Dafida? Re ithuta gore ge re dirile sebe se segolo, re itshole go tšwa pelong gomme re kgopele Jehofa gore a re lebalele. Re swanetše go ipobola dibe tša rena go yena. (1 Joh. 1:9) E bile re swanetše go botša bagolo, ka gobane ba tla re thuša go lokiša tswalano ya rena le Jehofa. (Bala Jakobo 5:14-16.) Ge re dumelela Jehofa gore a re thuše, re bontšha gore re na le tumelo ya gore o tla re lebalela le go re thuša go boela go yena. Ka morago ga moo, re swanetše go ithuta diphošong tša rena, re tšwele pele re hlankela Jehofa gomme re lebelele pele dikholofetšong tša gagwe tša nakong e tlago.—Baheb. 12:12, 13.

15. Re ithuta’ng mohlaleng wa Hanna?

¹⁵ Ga go pelaelo gore o tseba bahlanka ba bangwe ba botegago ba bogologolo bao ba ilego ba bota Jehofa maphelong a bona gomme ba dira dilo tše di lokilego. Ka mohlala, Hanna o be a ka se kgone go fetoša taba ya gore ke moopa.  Eupša o ile a bota Jehofa gore o tla mo thuša, ka gona a tšwela pele a mo rapela taberenakeleng le go mmotša seo se bego se le pelong ya gagwe. (1 Sam. 1:9-11) Ruri Hanna o re beetše mohlala o mobotse. Ge re babja goba re na le mathata ao re sa kgonego go a laola, re swanetše go lahlela dipelaelo tša rena go Jehofa, re kgodišegile gore o a re hlokomela. (1 Pet. 5:6, 7) E bile re swanetše go dira sohle se re ka se kgonago gore re holwe ke diboka tša Bokriste le ditokišetšo tše dingwe tša Jehofa.—Baheb. 10:24, 25.

16. Batswadi ba ka ithuta’ng go Samuele yo a bego a tšofetše?

¹⁶ Go thwe’ng ka batswadi ba botegago bao bana ba bona ba tlogetšego go hlankela Jehofa? Samuele yo a bego a tšofetše o be a ka se gapeletše bana ba gagwe bao ba godilego gore ba dule ba phela ka melao ya Modimo yeo a ba rutilego yona. (1 Sam. 8:1-3) O ile a dumelela Jehofa gore e be yena a swaraganago le taba yeo. Lega go le bjalo, Samuele o be a ka kgona go dula a botega le go kgahliša Tatagwe wa legodimong e lego Jehofa. (Die. 27:11) Lehono, batswadi ba bantši ba Bakriste ba boemong bja go swana le bja Samuele. Go swana le tate wa papišong ya mabapi le morwa wa lehlaswa, ba kgodišegile gore Jehofa o dula a letetše go amogela badiradibe bao ba itsholago go tšwa pelong. (Luka 15:20) Lega go le bjalo, batswadi ba bjalo ba šoma ka thata go dula ba botegela Jehofa, ba holofela gore mohlala wa bona o tla thuša bana ba bona go boela ka phuthegong.

17. Ke ka baka la’ng mohlala wa mohlologadi wa modiidi o kgothatša?

¹⁷ Nagana le ka mohlologadi wa modiidi yo a phetšego mehleng ya Jesu. (Bala Luka 21:1-4.) Go be go se na seo a bego a ka se dira ka boradia bjo bo bego bo dirwa ka tempeleng. (Mat. 21:12, 13) Le gona o be a ka se dire selo gore a be le tšhelete. Lega go le bjalo, o ile a neela ka “ditšheletiana tša tšhipi tše pedi,” e lego “sohle seo a bego a iphediša ka sona.” Mosadi yoo yo a botegago o ile a bontšha gore o bota Jehofa ka pelo ka moka, a tseba gore ge a ka etiša dilo tša Modimo pele, Modimo o tla mo hlokomela. Ka ge mohlologadi yo a be a botile Jehofa, o ile a thekga borapedi bja therešo. Ka mo go swanago, le rena re kgodišegile gore Jehofa o tla re nea dilo tšeo re di hlokago ge e ba re tsoma Mmušo pele.—Mat. 6:33.

18. Hlalosa seo Mokriste yo mongwe a ilego a se dira gore a tšwele pele a hlankela Jehofa.

¹⁸ Lehono, Bakristegotee le rena ba bantši le bona ba bontšhitše gore ba bota Jehofa gomme ba dira dilo tše di lokilego. Nagana ka ngwanabo rena yo a bitšwago Malcolm, yo a ilego a botegela Jehofa go fihlela a hlokofala ka 2015. Mengwageng e mentši yeo yena le mosadi wa gagwe ba hlanketšego Jehofa, ba ile ba ba le mathata. O ile a re: “Ditlalemeso ga di tsebje, e bile bophelo bo boima. Eupša Jehofa o šegofatša bao ba ithekgago ka yena.” Ke’ng seo Malcolm a re eletšago go se dira? O itše: “Kgopela Jehofa gore a go thuše go dira sohle se o ka se kgonago tirelong ya gagwe. Swarega ka seo o ka se kgonago, e sego seo o sa se kgonego.” *

19. (a) Ke ka baka la’ng temana ya rena ya ngwaga ya 2017 e le e swanetšego? (b) O tlo diriša bjang temana ya ngwaga ya 2017 bophelong bja gago?

¹⁹ Ge batho ba tshepedišo ye ya dilo ba dutše ba “fetelela ka bobe,” re tlo welwa ke mathata a magolo. (2 Tim. 3:1, 13) Ka gona go bohlokwa kudu gore re se ke ra dumelela mathata ao a re fetša matla. Go e na le moo, re swanetše go bota Jehofa ka mo go feletšego gomme re dire sohle seo re se kgonago go dira dilo tše di lokilego. Ke ka baka leo temana ya rena ya ngwaga ya 2017 e rego: “Bota Jehofa, o dire tše dibotse”!—Ps. 37:3.