1. Йеговӕ нӕ цӕхуӕн искурдиӕдтӕй исхайгин кодта?

ЙЕГОВӔ адӕймаги исхайгин кодта аллихузи искурдиӕдтӕй. Зӕгъӕн, нӕ бон сагъӕс кӕнун ке ӕй, уой фӕрци нӕ гъуддӕгтӕ идардмӕ испълан кӕнӕн, удта нӕхе берӕ зиндзийнӕдтӕй багъӕуай кӕнӕн (Ӕмб. 2:11). Уомӕй уӕлдай ма нӕ бон ӕй, нӕ рази нисӕнттӕ ӕвӕрун ӕма сӕмӕ турнун (Фил. 2:13). Хуцау ма нин равардта ӕфсарӕ, цӕмӕй нӕ бон уа ӕртасун хуарз ӕма лӕгъуз ци ӕй, уой. Не фсарӕ нин ӕнхус кӕнуй, нӕхе рӕдуд къахдзӕфтӕй хезун кенӕ нӕ рӕдуд исраст кӕнун (Ром. 2:15).

2. Йеговӕ нӕмӕ цӕмӕ ӕнгъӕлмӕ кӕсуй?

² Йегови фӕндуй, цӕмӕй нӕ искурдиӕдтӕй раст пайда кӕнӕн. Цӕмӕн? Уомӕн ӕма нӕ уарзуй ӕма ’й зонуй, раст си ку пайда кӕнӕн, уӕд амондгундӕр ке уодзиан. Ӕ Дзурд нӕ арӕх разӕнгард кӕнуй, цӕмӕй нӕ искурдиӕдтӕй пайда кӕнӕн. Зӕгъӕн, Дзиуиттаг Финстити финст ӕй: «Алцидӕр бӕстон ка кӕнуй, уомӕн ӕ фӕндтӕй ес пайда» ӕма «Цийфӕнди ма кӕнай, кӕнӕ ’й ӕгас  хъауритӕй» (Ӕмб. 21:5; Еккл. 9:10). Киристон Грекъаг Финстити ба кӕсӕн: «Цалинмӕ рӕстӕг ес, уӕдмӕ алкӕмӕндӕр хуарздзийнадӕ кӕнӕн»; «Сумахӕй искурдиӕдтӕй ка куд исхайгин ӕй, уотӕ си пайда кӕнӕд иннӕтӕн балӕггадӕ кӕнунмӕ» (Гал. 6:10; 1 Пет. 4:10). Куд ӕй уинӕн, уотемӕй Йегови фӕндуй, цӕмӕй нӕ бон ци ӕй, уой кӕнӕн нӕхе ӕма иннети хуарзӕн.

3. Адӕнӕн сӕ бон ци нӕй?

³ Иннердиги ба ’й Йеговӕ уинуй, берӕ цидӕртӕ нӕ бон ке нӕй, уой. Зӕгъӕн, тӕрегъӕд ӕма мӕлӕтӕн нӕ бон неци ӕй бакӕнун. Удта нӕ бон нӕй, иннети бӕсти унаффӕ хӕссун, уомӕн ӕма Хуцау алли адӕймагӕн дӕр сӕребарӕдзийнадӕ равардта (1 Пад. 8:46). Ӕма цийфӕнди зундгин ӕма фӕлтӕрдгун ма уӕн, уӕддӕр Йегови рази сувӕллӕнттӕ ан (Ис. 55:9).

4. Аци статьяй цӕмӕ ӕркӕсдзиан?

⁴ Цийфӕнди уавӕрти дӕр гъӕуама нӕ зӕрдӕ Йеговӕбӕл дарӕн ӕма нӕ ке бафедар кӕндзӕй, уобӕл ма дузӕрдуг кӕнӕн. Кӕбӕл не ’схъаурӕ кӕнӕн, еци гъуддӕгтӕ ба нин нӕ бӕсти искӕндзӕй. Фал уӕддӕр гъӕуама махӕй кӕнгӕ ци ӕй, уой кӕнӕн, цӕмӕй зиндзийнӕдти сӕрти хезӕн ӕма иннетӕн ӕнхус кӕнӕн. (Бакӕсӕ Псалом 37:3.) Гъома гъӕуама нӕ зӕрдӕ дарӕн Йеговӕбӕл ӕма иннетӕн хуарздзийнадӕ кӕнӕн. Удта ма гъӕуама еузӕрдонӕй архайӕн. Гъӕйдӕ мадта ӕркӕсӕн, Ноййи, Давиди ӕма ӕндӕр еузӕрдон лӕггадгӕнгути цӕветтонтӕмӕ. Етӕ сӕ зӕрдӕ Йеговӕбӕл дардтонцӕ ӕма ’й лӕдӕрдтӕнцӕ, сӕ бон ци ӕй ӕма ци нӕй, уой ӕма уомӕ гӕсгӕ архайдтонцӕ.

5. Радзорӕ, Ной цӕхуӕн рӕстӕги цардӕй, уой.

⁵ Ной ци рӕстӕги цардӕй, еци рӕстӕги дуйне хъӕбӕр ихӕлд ӕма ӕнӕхатир адтӕй (Райд. 6:4, 9–13). Ной зудта, Йеговӕ еци дуйнейӕн кӕрон ке искӕндзӕй, фал уӕддӕр ӕ бон н ’адтӕй сабур кӕсун, ӕ алливарс цитӕ цудӕй, уомӕ. Лӕдӕрдтӕй ӕй, ӕ барӕ берӕ цӕбӕлдӕрти ке нӕ цӕуй, фал уӕддӕр цидӕр ба ӕ бон адтӕй.

6, 7. а) Ноййи бон ци н’ адтӕй? б) Мах рӕстӕг Ноййи рӕстӕги хузӕн цӕмӕй ӕй?

⁶ Ноййи бон ци н ’адтӕй? Ной адӕни фӕдзахста, тагъд сӕбӕл Хуцау бӕллӕх ке ӕруадздзӕй, фал цӕмӕй еци фӕдзӕхстмӕ байгъустайуонцӕ, уой туххӕй ба син тухӕ кӕнун ӕ бон н’ адтӕй. Дони хъиамӕти бон фӕххӕстӕгдӕр  кӕнун дӕр ӕ бон н ’адтӕй. Ноййӕн гъудӕй Йеговӕбӕл ӕ зӕрдӕ дарун ӕма федарӕй ӕууӕндун, ӕ фӕндон ке исӕнхӕст кӕндзӕй ӕма зӕнхӕй фуддзийнадӕ ке фесафдзӕй, ци рӕстӕг ин иснисан кодта, еци рӕстӕг (Райд. 6:17).

⁷ Мах дӕр абони хъӕбӕр ихӕлд дуйней цӕрӕн, ӕма ’й зонӕн, Йеговӕ ’й ке фесафдзӕй (1 Иоан. 2:17). Лӕдӕрӕн ӕй, адӕнӕн рӕстдзийнадӕ тухӕй ке нӕ бауарзун кӕндзиан. Удта «устур бӕллӕхи» бон фӕрраздӕр кӕнун дӕр нӕ бон нӕй (Матф. 24:14, 21). Мадта мах дӕр гъӕуама Ноййи хузӕн Хуцаубӕл федарӕй ӕууӕндӕн, нӕ зӕрдӕ ибӕл дарӕн ӕма ӕнгъӕлмӕ кӕсӕн, архайун кӕд райдайдзӕй, уомӕ (Пс. 37:10, 11). Мах федарӕй ӕууӕндӕн: Йеговӕ аци дуйнейӕн ци рӕстӕг равардта, уобӕл еунӕг бон дӕр нӕ бафтуйдзӕй (Ав. 2:3).

8. Ной е ’ргом цӕмӕ раздахта? (Кӕсӕ хузӕмӕ статьяй райдайӕни.)

⁸ Ноййи бон ци адтӕй? Ноййи бон алци н’ адтӕй, фал уобӕл тухсуни бӕсти е ’ргом раздахта, ӕ бон ци адтӕй кӕнун, уомӕ. Ной адтӕй «рӕстдзийнадӕ игъосунгӕнӕг» ӕма Хуцауи тӕрхони хабар еузӕрдонӕй игъосун кодта (2 Пет. 2:5). Уой фӕрци е ’ууӕндундзийнадӕ нӕ лӕмӕгъ кодта. Уомӕй уӕлдай ма Ной зӕрдиагӕй хъиамӕт кодта ӕма Хуцауи амундтӕмӕ гӕсгӕ науӕ аразта. (Бакӕсӕ Дзиуиттӕгтӕмӕ 11:7.)

9. Нӕ бон куд ӕй Ноййи фӕнзун?

⁹ Ноййи хузӕн мах дӕр Хуцауи гъуддаги берӕ хъиамӕт кӕнӕн (1 Кор. 15:58). Зӕгъӕн, аразӕн Хуцауӕн кӕми фӕкковӕн, еци бунӕттӕ кенӕ сӕмӕ зелӕн, ӕнхус кӕнӕн конгрессти гъуддӕгти, лӕггадӕ кӕнӕн филиали кенӕ тӕлмацгӕнгути офиси. Фал фиццагидӕр ба зингзӕрдӕй архайӕн игъосун кӕнуни гъуддаги, ӕма уой фӕрци нӕ нифс федар кӕнӕн. Еу еузӕрдон хуӕрӕ загъта: «Адӕни хӕццӕ Хуцауи Паддзахади арфӕдзийнӕдтӕбӕл ку фӕдздзорӕн, уӕд ӕй фӕууинӕн, ӕппундӕр син нифс ке нӕййес ӕма сӕ зиндзийнӕдтӕн кӕрон дӕр ке нӕ уинунцӕ». Хуарз хабар ку фегъосун кӕнӕн, уӕд нӕ нифс федардӕр фӕккӕнуй ӕма царди надбӕл ледзгӕй нӕ къохтӕ нӕ уадзӕн (1 Кор. 9:24).

10. Радзорӕ, Давид цӕхуӕн уавӕри бахаудтӕй, уой.

¹⁰ Йеговӕ паддзах Давидӕй загъта: «Ӕз иссирдтон, мӕ зӕрдӕн адгин ка ӕй... уӕхӕн адӕймаги» (Гъуд. 13:22). Кӕд Давид рӕстгӕнӕг  адтӕй, уӕддӕр ӕ царди уӕззау тӕрегъӕдтӕ искодта. Сӕ еу адтӕй, Вирсавий хӕццӕ ке фӕррӕдудӕй, е. Фал уомӕй фуддӕр ба е адтӕй, ӕма ӕ тӕрегъӕд баримӕхсуни туххӕй, уотӕ бакодта, цӕмӕй Вирсавий лӕг Ури тугъди фӕммардайдӕ. Еци гъуддаги фӕдбӕл Давид ӕфсади сӕргълӕууӕг Иоавмӕ финстӕг ниффинста ӕма ’й Урийӕн ӕхе хӕццӕ рарвиста (2 Сам. 11:1–21). Фал Давидӕн ӕ тӕрегъӕд раргом ӕй (Мар. 4:22). Цума ӕхе куд бадардта?

11, 12. а) Давидӕн ӕ бон ци н’ адтӕй раййевун? б) Кӕд уӕззау тӕрегъӕд искодтан, уӕддӕр нӕ бон цӕбӕл ӕй федарӕй ӕууӕндун?

¹¹ Давидӕн ӕ бон ци н’ адтӕй? Давиди бон н’ адтӕй, ци бакодта, уой исраст кӕнун, удта ӕ рӕдудтити фӕстеугутӕй дӕр ӕхе бахезун. Кӕцидӕртӕбӕл си суӕнгӕ ӕ царди кӕронмӕ дӕр ӕмбалдӕй (2 Сам. 12:10–12, 14). Уомӕ гӕсгӕ Давид гъӕуама федарӕй ӕууӕндтайдӕ, зӕрдӕй ку ’рфӕсмон кӕна, уӕд ин Йеговӕ ке ниххатир кӕндзӕй, ӕма ин ке банхус кӕндзӕй, ӕ рӕдудтитӕ ’й ци зиндзийнӕдтӕмӕ ӕркодтонцӕ, уони сӕрти рахезун.

¹² Еугурӕйдӕр ӕнӕнхӕст ан ӕма рӕдуйӕн. Фал нӕ кӕцидӕр тӕрегъӕдтӕ иннетӕй уӕззаудӕр фӕуунцӕ. Хатгай еци рӕдудӕн исраст кӕнӕн нӕбал фӕууй ӕма нӕ фӕгъгъӕуй, ӕ фӕстеугути хӕццӕ цӕрун (Гал. 6:7). Фал нӕ бон ӕй, нӕ зӕрдӕ Йеговӕбӕл дарун ӕма ӕууӕндун, ку ’рфӕсмон кӕнӕн, уӕд нин ке ниххатир кӕндзӕй ӕма нӕ нӕ зиндзийнӕдти ке нӕ ниууаддзӕй, кӕд нӕбӕл нӕхе фудӕй цӕунцӕ, уӕддӕр. (Бакӕсӕ Исаййи 1:18, 19; Гъуддӕгтӕ 3:19.)

13. Давид Хуцауи хуарзӕнхӕ нӕуӕгӕй куд иссирдта?

¹³ Давиди бон ци адтӕй? Давид байархайдта, цӕмӕй нӕуӕгӕй Йегови хуарзӕнхӕй исхайгин адтайдӕ. Зӕгъӕн, пахампар Нафан ин Йегови номӕй ку бауайдзӕф кодта, уӕд имӕ байгъуста (2 Сам. 12:13). Давид ма Йеговӕмӕ кувта ӕма ин ӕ тӕрегъӕдтӕ ӕргом кодта, ӕма уомӕй бӕрӕг адтӕй, нӕуӕгӕй ӕй Йегови хуарзӕнхӕ иссерун ке фӕндадтӕй (Пс. 51:1–17). Е нӕ бауагъта, цӕмӕй ӕ тӕрегъӕдти туххӕй ӕхемӕ нийгъустайдӕ, фал ӕ рӕдудтитӕй ахур кодта, ӕма уой фӕсте уӕхӕн тӕрегъӕдтӕ ӕцӕгӕйдӕр некӕдбал искодта. Давид ӕ мӕлӕти уӕнгӕ дӕр Йеговӕбӕл ӕновуд адтӕй, ӕма ’й Йеговӕ абони дӕр нимайуй ӕ еузӕрдон лӕггадгӕнӕгбӕл (Дзиуит. 11:32–34).

14. Давиди цӕветтонӕй цӕбӕл ахур кӕнӕн?

¹⁴ Давиди цӕветтонӕй цӕбӕл ахур кӕнӕн? Кӕд ести уӕззау тӕрегъӕд искодтан, уӕд ибӕл гъӕуама ӕрфӕсмон кӕнӕн ӕма Йеговӕй хатир корӕн (1 Иоан. 1:9). Уой фӕсте ба гъӕуама нӕ хабар хестӕр нӕлгоймӕгтӕн радзорӕн, цӕмӕй нин нӕуӕгӕй Йегови хуарзӕнхӕ иссерунмӕ банхус кӕнонцӕ. (Бакӕсӕ Иакови 5:14–16.) Аци къахдзӕфтӕ ку искӕнӕн, уӕд уомӕй бавдесдзиан, Йеговӕ нин ке ниххатир кӕндзӕй, уобӕл ке ӕууӕндӕн. Удта ма гъӕуама нӕ рӕдудтитӕбӕл ахур кӕнӕн ӕма федар нифси хӕццӕ идарддӕр Йеговӕн лӕггадӕ кӕнӕн (Дзиуит. 12:12, 13).

15. Анни цӕветтонӕй цӕбӕл ахур кӕнӕн?

¹⁵ Ӕвӕдзи ма гъуди кӕнӕн, Йеговӕбӕл ӕ зӕрдӕ ка дардта, ӕндӕр уӕхӕн лӕггадгӕнгути нӕмттӕ дӕр. Зӕгъӕн, Аннӕн зӕнӕг н’ адтӕй ӕма уомӕн ӕ бон неци адтӕй бакӕнун. Фал ӕ зӕрдӕ Йеговӕбӕл дардта ӕма нӕ дузӕрдуг кодта, уодӕнцойнӕ ин ке ратдзӕй. Уомӕ гӕсгӕ идарддӕр Хуцауи цатурмӕ цудӕй ӕма ӕ зӕрди ци адтӕй, уой Йеговӕн кувди дзурдта (1 Сам. 1:9–11). Анни цӕветтон нин фӕнзуйнаг ӕй. Нӕ бон кӕмӕн неци уа, уӕхӕн уавӕри ку бахауӕн, зӕгъӕн, не ’нӕнездзийнади хӕццӕ баст гъуддӕгти кенӕ ӕндӕр ести тухст уавӕри, уӕд гъӕуама не ’гас сагъӕстӕ дӕр Йегови барӕ бакӕнӕн ӕма нин ке банхус кӕндзӕй, уобӕл ӕппундӕр ма дузӕрдуг кӕнӕн (1 Пет. 5:6, 7).  Махӕй кӕнгӕ ци ӕй, уой гъӕуама кӕнӕн ӕма нин Йеговӕ ӕ организаций фӕрци не ’ууӕндундзийнадӕ федар кӕнунмӕ цидӕриддӕр дӕттуй, уонӕй пайда кӕнӕн (Дзиуит. 10:24, 25).

16. Ниййергутӕ каргун Самуили цӕветтонӕй цӕбӕл ахур кӕнунцӕ?

¹⁶ Фал кӕд дӕхуӕдӕг Хуцауӕн еузӕрдонӕй лӕггадӕ кӕнис дӕ сувӕллон ба еци надӕй райеуварс ӕй, уӕд куд кӕнгӕ ’й? Каргун Самуили бон н’ адтӕй ӕ фурттӕн тухӕ кӕнун, цӕмӕй Хуцауи уагӕвӕрдтӕмӕ гӕсгӕ цардайуонцӕ (1 Сам. 8:1–3). Ӕ бон ци адтӕй, е ӕрмӕстдӕр гъуддаг Хуцауи барӕ бакӕнун. Ӕхуӕдӕг ба гъӕуама идарддӕр дӕр архайдтайдӕ, цӕмӕй ӕ уӕларвон Фидӕ Йеговӕбӕл еузӕрдонӕй байзадайдӕ ӕма ин ӕ зӕрдӕ рохс кодтайдӕ (Ӕмб. 27:11). Самуилбӕл ци хабар ӕрцудӕй, уой еуӕй-еу ниййергутӕ сӕхебӕл бавзурстонцӕ. Фал ӕй етӕ зонунцӕ, Йесой ӕмбесонди, исӕфт фуртмӕ ӕ фидӕ куд ӕнгъӕлмӕ кастӕй, уотӕ Йеговӕ дӕр ӕнгъӕлмӕ кӕсуй, тӕрегъӕд ка искодта, еци адӕймаг кӕд ӕрфӕсмон кӕндзӕй ӕма имӕ фӕстӕмӕ кӕд раздӕхдзӕй, уомӕ (Лук. 15:20). Фал еци ниййергутӕ архайунцӕ, цӕмӕй Йеговӕбӕл идарддӕр дӕр еузӕрдон уонцӕ ӕма сӕ зӕрдӕ дарунцӕ, уонӕмӕ кӕсгӕй сӕ сувӕллӕнттӕ дӕр фӕстӕмӕ ӕмбурдмӕ ке раздӕхдзӕнцӕ.

17. Мӕгур идӕдзӕ силгоймаги хабар нӕ цӕбӕл ахур кӕнуй?

¹⁷ Нӕ зӕрдӕбӕл ма ӕрлӕуун кӕнӕн, Йесой рӕстӕги ка цардӕй, еци мӕгур идӕдзӕ силгоймаги хабар дӕр. (Бакӕсӕ Лукай 21:1–4.) Ковӕндони ци хӕран гъуддӕгтӕ кодтонцӕ, уонӕн ӕ бон неци адтӕй бакӕнун (Матф. 21:12, 13). Удта ӕ мӕгур уавӕр фӕххуӕздӕр кӕнун дӕр, ӕвӕдзи, ӕ бон н’ адтӕй. Фал уӕддӕр нисайнагдони зӕрдӕй дууӕ листӕг ӕхцай ниггӕлста, «цидӕриддӕр имӕ адтӕй, уой, ӕ фӕстаг ӕхцатӕ». Еци еузӕрдон силгоймаг бавдиста, е ’гас зӕрдӕ дӕр Йеговӕбӕл ке дардта, уой. Е ӕппундӕр нӕ дузӕрдуг кодта, Хуцауи гъуддӕгтӕ ӕ царди фиццаг бунати ку уонцӕ, уӕд ӕй Йеговӕ ке нӕ ниууадздзӕй. Мах дӕр федарӕй ӕууӕндӕн, нӕ царди фиццаг бунати Хуцауи Паддзахади гъуддӕгтӕ ку уонцӕ, уӕд нӕбӕл Йеговӕ ке батухсдзӕй (Матф. 6:33).

18. Радзорӕ, еу ӕнсувӕр цӕхуӕн зундбӕл хуӕст адтӕй, уой.

¹⁸ Мах рӕстӕги дӕр берӕ хуӕртӕ ӕма ӕнсувӕртӕ сӕ гъуддӕгтӕй ӕвдесунцӕ, сӕ зӕрдӕ Йеговӕбӕл ке дарунцӕ, уой. Сӕ еу адтӕй ӕнсувӕр Малколм. Малколм ӕ мӕлӕти уӕнгӕ дӕр (рамардӕй 2015-аг анзи) Йеговӕн еузӕрдонӕй лӕггадӕ кодта. Ӕ уоси хӕццӕ дӕсгай ӕнзти дӕргъи Йеговӕн лӕггадӕ кодтонцӕ ӕма сӕ царди цийнӕ дӕр ӕма маст дӕр бавзурстонцӕ. Малколм загъта: «Исон нӕбӕл ци ’рцӕудзӕй, уой нӕ фӕззонӕн, удта зин уавӕрти дӕр бахауӕн. Фал Йеговӕ арфӕ кӕнуй, ӕхе зундӕй нифсгун ка фӕууй, уонӕн нӕ, фал ибӕл ӕ зӕрдӕ ка даруй, уонӕн». Аци ӕнсувӕр цӕхуӕн унаффӕ равардта? Малколм зӕгъта: «Ковӕ, цӕмӕй Хуцауӕн лӕггадӕ кӕнай, дӕ бон цӕйбӕрцӕ ӕй, уойбӕрцӕ. Сагъӕс кӕнӕ, дӕ бон искӕнун ци нӕй, уобӕл нӕ, фал дӕ бон ци ӕй, уобӕл» *.

19. а) 2017-аг анзи стихбӕл сагъӕс кӕнун цӕмӕн гъӕуй? б) 2017-аг анзи стихӕй дӕ царди куд испайда кӕндзӕнӕ?

¹⁹ Абони дуйней уавӕр фуддӕрӕй-фуддӕр кӕнуй. Е ба уобӕл дзорӕг ӕй, ӕма ма берӕ зиндзийнӕдтӕбӕл ӕмбӕлдзиан (2 Тим. 3:1, 13). Мадта аци рӕстӕги гъӕуама хъӕбӕр лӕмбунӕг уӕн, цӕмӕй зиндзийнӕдти рӕстӕг нӕ нифс ма басӕтта. Гъӕйдӕ мадта не ’гас зӕрдӕ дӕр Йеговӕбӕл дарӕн ӕма нӕхецӕй кӕнгӕ ци ӕй, уой кӕнӕн. Еци гъуддаги нин устур ӕнхус уодзӕй 2017-аг анзи стих: «Дӕ зӕрдӕ дарӕ Йеговӕбӕл ӕма кӕнӕ хуарздзийнадӕ» (Пс. 37:3).