1. ¿Imasta ruwananchejpajtaj Jehová ruwawarqanchej?

JEHOVAQA ashkha imasta ruwayta atinanchejpaj ruwawarqanchej. Payqa tanteyayta yachanapaj ruwawarqanchej. Chaytaj yanapawanchej chʼampaykunata allinchanapaj, imastachus qhepaman ruwananchejta yuyaycharikunapaj ima (Pro. 2:11). Yuyaycharikusqanchejman jina ruwanapajtaj, atiyta qowarqanchej. Ajinamanta imatachus ruwayta munasqanchejta juntʼanapaj (Fili. 2:13). Jehovaqa sonqo yuyayniyojta ruwawarqanchej, imachus allin, imatajchus mana allin kasqanta reparanapaj. Chaytaj yanapawanchej juchapi mana urmanapaj, pantasqasninchejta allinchanapaj ima (Rom. 2:15).

2. ¿Imata ruwananchejtataj Jehová munan imastachus ruwayta atisqanchejwan?

² Jehovaqa imastachus ruwayta atisqanchejwan, allin kajta ruwananchejta munan. Payqa munakuwasqanchejrayku,  yachan imastachus qowasqanchejwan yanapachikuspa kusisqa kananchejta. Hebreo Qhelqasqaspeqa nin: “Imatapis ruwanampaj kʼuchi runaj wakichisqanqa allimpuni llojsin”, nispa. Chantá nillantaj: “Imachus ruwanaykipaj tiyan, chayta tukuy kallpaykiwan ruway”, nispa (Pro. 21:5; Ecl. 9:10). Griego Qhelqasqaspitaj nin: “Atikushajtenqa, sapa kuti tukuypaj allinta ruwana”, nispa. Chantá nillantaj: “Sapa ujniykichejman Diosqa ruwanapaj uj atiyta qosorqachej, qankunataj chaywan ujkunata sirviychej”, nispa (Gál. 6:10; 1 Ped. 4:10). Rikunchej jina, Jehovaqa munan tukuy atisqanchejta ruwananchejta allinninchejpaj, wajkunaj allinninkupajpis.

3. ¿Imastataj mana ruwayta atinchejchu?

³ Jehovaqa yachallantaj, mana tukuy imatachu ruwayta atisqanchejta. Noqanchejqa juchasapa kayninchejta, juchata, wañuyta ima, mana chinkachiyta atisunmanchu. Nillataj wajkunaj kausayninkumanta dueñochu kanchej. Imaraykuchus sapa uj imatachus ruwananta ajllanan tiyan (1 Rey. 8:46). Chantá may jinata yachaspapis chayri unaytaña kausaspapis, manapuni jaykʼajpis Jehovaj yachayninta taripasunchu (Isa. 55:9).

4. ¿Imatá kay yachaqanapi yachakusun?

⁴ Jehová yachachinawanchejta saqena, atienekunataj yanapanawanchejpi, mana atisqanchej imastataj ruwapunawanchejpi. Jinapis Jehovaqa munan, chʼampaykunasninchejta allinchanapaj, wajkunata yanapanapaj ima, tukuy atisqanchejta ruwanata (Salmo 37:3 leey). Arí, ‘Diospi atienekuna, allin kajtataj ruwana, kausakunataj payta ni jaykʼaj wasanchaspa’. ¿Imaynatá chayta ruwasunman? Noemanta, Davidmanta, Diospa waj cheqa sonqo kamachisninmanta ima yachakunachej. Paykunaqa Jehovapi atienekorqanku. Wakin imasta mana ruwayta atispataj, imastachus ruwayta atisqankupi tʼukurerqanku.

5. ¿Imaspitaj Noé rikukorqa?

⁵ Noej tiemponpi, mundoqa “imaymana juchawan juntʼa karqa, chejninakuywan ima” (Gén. 6:4, 9-13). Noeqa yacharqa Jehová sajra runasta chinkachinanta. Jinapis paykunaj ruwasqankuta rikuspa, maytachá llakikorqa. Noeqa wakin imasta mana ruwayta atispapis, wakin imastaqa ruwayta aterqapuni. Chaytataj allinta yacharqa.

6, 7. 1) ¿Imatataj Noé mana ruwayta aterqachu? 2) ¿Imapitaj Noej tiempon kay tiempoman rijchʼakun?

 ⁶ ¿Imatá Noé mana ruwayta aterqachu? Noeqa Jehovaj nisqasninta tukuy sonqo willarqa. Jinapis mana runasta kasukunankupaj tanqayta aterqachu, nillataj Jatun Parata ñaupajta chayachimuyta aterqachu. Noeqa Jehová sajra kajta tukuchinanta nisqanpi atienekunan karqa, jinallataj chayta maychus tiemponpi ruwananpipis (Gén. 6:17).

⁷ Kunanpis kay mundoqa sajra ruwaykunawan juntʼa kashan. Jehovataj kay sajra mundota tukuchinanta ninña (1 Juan 2:17). Chay tukukuy chayamunankamaqa, mana runasta tanqayta atisunmanchu “reinomanta evangelio[ta]” japʼikunankupaj, nillataj “manchay ñakʼariy” tiempota ñauparichimusunmanchu (Mat. 24:14, 21). Noé jina sinchʼi creeyniyoj kananchej tiyan, atienekunataj tiyan Jehová kay sajra mundota maychus tiemponpi chinkachinanpi (Sal. 37:10, 11). Payqa yachan maykʼajchus kay mundota chinkachinanta. Chaytataj maychus tiemponpipuni ruwanqa (Hab. 2:3).

8. ¿Imastataj Noé ruwarqa? (7 paginapi dibujota qhawariy).

⁸ ¿Imatá Noé ruwayta aterqa? Payqa imatachus mana ruwayta atisqanmanta llakikunanmantaqa, imastachus ruwayta atisqanpi yuyarqa. Chayrayku mana saykʼuspa Jehovaj nisqanta willarqa (2 Ped. 2:5). Chay ruwasqanqa, maytachá yanaparqa sinchʼi creeyniyoj kananpaj. Chantapis Noeqa Diospa kamachisqanman jina arcata ruwarqa (Hebreos 11:7 leey).

9. ¿Imatá Noemanta yachakusunman?

⁹ Noqanchejpis, Noé jinallataj “Señorpa ruwaynimpi” mayta llankʼashanchej (1 Cor. 15:58). Tantakuna Wasista, Jatun Tantakuna Wasista ima ruwaysikusunman chayri allinchaysikusunman. Jatun tantakuykunapitaj imallapipis yanapakusunman. Chantapis Betelpi chayri waj parlayman tijrachinapaj oficinaspi yanapakusunman. Jinapis astawanqa runasman Diosmanta willamunchej. Chaytaj yanapawanchej, imatachus suyakushanchej chayta japʼinanchejpi atienekunapaj. Uj hermana nin: “Diospa Gobiernonmanta willamuspa, runaqa ni ima suyakuyniyoj kasqanta yachani. Paykunaqa yuyanku llakiykunasninku ni jaykʼaj tukukunanta”, nispa. Chay hermana nin jina, noqanchejqa sumaj suyakuyniyoj kanchej. Chay suyakuymanta  wajkunaman willarejtinchejtaj, imatachus suyakusqanchejta japʼinanchejmanta mana iskayrayanchejchu. Chaytaj wiñay kausayta japʼinapaj kallpachakunallapajpuni yanapawanchej (1 Cor. 9:24).

10. ¿Imaspitaj David rikukorqa?

¹⁰ Rey Davidqa Diosta mana wasancharqachu, Jehovataj payta mayta munakoj (Hech. 13:22). Jinapis Davidqa Betsabewan qhenchachakuspa mayta juchallikorqa. Mana chayllachu, juchanta pakananpajqa Betsabej qosan Uriasta maqanakupi wañuchicherqa. Chaypajtaj uj cartata qhelqarqa, kikin Uriaswantaj chay cartata apacherqa (2 Sam. 11:1-21). Aswan qhepaman Davidpa juchanqa sutʼiman llojserqa (Mar. 4:22). ¿Imatá David ruwarqa?

11, 12. 1) ¿Imatá David juchallikuytawan mana ruwayta aterqachu? 2) ¿Imatataj Jehová ruwanqa pesachikojtinchej?

¹¹ ¿Imatá David mana ruwayta aterqachu? Davidqa juchallikorqaña, niñataj imatapis ruwayta aterqachu. Juchanraykutaj llakiykunaqa wañupunankama qhatirinan karqa (2 Sam. 12:10-12, 14). Chayrayku sinchʼi creeyniyoj kanan karqa. Davidqa tukuy sonqo pesachikojtin, Jehová perdonananpi atienekunan karqa. Chantá atienekunallantaj karqa, juchallikusqanrayku ñakʼarisqanta aguantananpaj Dios yanapananpi.

¹² Juchasapas kasqanchejrayku, tukuy pantanchej. Wakin juchasqa aswan sinchʼi kanku. Wakin kutistaj pantasqanchejta allinchanapaj, niña imatapis ruwayta atisunchu. Pantasqanchejraykutaj ichá ñakʼarinanchej kanqa (Gál. 6:7). Jinapis imatachus Jehová niwasqanchejpi atienekuna. Payqa pesachikojtinchej yanapanawanchejta nin, juchanchejrayku ñakʼarishajtinchejpis (Isaías 1:18, 19; Hechos 3:19, 20 leey).

13. ¿Imaynatá David Jehovawan allinyakorqa?

¹³ ¿Imatá David ruwayta aterqa? Davidqa Jehovawan allinyakuyta munarqa. ¿Imaynatá chayta ruwarqa? Jehová yanapananta saqerqa. Chayrayku Jehovaj profetan Natán juchanta reparachejtin, Davidqa kasukorqa (2 Sam. 12:13). Tukuy juchasnintataj Jehovaman willakorqa, paymanta mañakuspa. Ajinamanta rikucherqa, Jehovaj ñaupaqenpi allinpaj qhawasqa kayta munasqanta (Sal. 51:1-17). Davidqa juchasnillanpi yuyananmantaqa, pantasqasninmanta yachakorqa. Payqa niña ujtawan chay millay juchaspi urmarqachu. Wañupunankamataj Jehovaman cheqa sonqo karqa, Jehovataj chayta mana qonqapunchu (Heb. 11:32-34).

14. ¿Imatá Davidpa kausayninmanta yachakusunman?

¹⁴ ¿Imatá Davidpa kausayninmanta yachakusunman? Juchallikunchej chayqa, sonqomantapacha pesachikuna tiyan. Chantá Jehovaman juchanchejta willakuna, perdonanawanchejtataj mañakuna (1 Juan 1:9). Ancianospa yanapayninkutapis maskʼana tiyan. Paykunaqa Jehovaj qayllallanpipuni kanapaj yanapawasun (Santiago 5:14-16 leey). Jehovaj yanapayninta japʼikuspaqa, perdonanawanchejta niwasqanchejpi atienekunchej. Chantapis pantasqasninchejmanta yachakuna tiyan. Jehovatataj sirvinallapuni paypi atienekuspa (Heb. 12:12, 13).

15. ¿Imatá Anamanta yachakusunman?

¹⁵ Diospa waj kamachisninpis, chʼampaykunasninkuta allinchanankupaj tukuy atisqankuta ruwaytawan, Jehovapi atienekorqanku. Ichapis wakinmanta yuyarikunki. Anamanta parlarina. Payqa uj tiempota mana wawayoj kayta aterqachu, nitaj imatapis wawayoj kananpaj ruwayta aterqachu.  Jinapis Jehová sonqochananpi atienekorqa. Chayrayku Dioswan tinkukuna toldoman rillarqapuni, tukuy llakiynintataj Jehovaman willakorqa (1 Sam. 1:9-11). Paymantaqa mayta yachakusunman. Ichá onqosqa kashanchej chayri waj llakiyniyoj kanchej, chaytataj mana chinkachiyta atinchejchu. ¿Imatá ruwasunman? Tukuy phutiyninchejta Jehovaman saqena, yanapanawanchejpitaj atienekuna (1 Ped. 5:6, 7). Tantakuykunawan yanapachikunapaj kallpachakuna, jinallataj ima yanapastachus Diospa llajtan qowasqanchejwanpis (Heb. 10:24, 25).

16. ¿Imatá tatas yachakunkuman Samuelmanta?

¹⁶ Wakin wawasqa Jehovamanta karunchakunku. ¿Imatá tatasninkumanta nisunman? Profeta Samuelpa wawasnenqa, Diosta yupaychayta saqeporqanku. Paytaj niña imatapis ruwayta aterqachu Diosta yupaychanallankupajpuni (1 Sam. 8:1-3). Samuelqa chay chʼampayninta Jehovaj makinpi saqenan karqa. Chayrayku Jehovaman cheqa sonqo kananpaj, payta kusichinanpaj ima, tukuy atisqanta ruwarqa (Pro. 27:11). Kay tiempopipis, ashkha cristiano tatasqa Samuel jinallataj chʼampaykunapi rikukunku. Paykunaqa yachanku, Jehovaqa chinkaj waynaj tatan jina kasqanta. Imaraykuchus payqa tukuy sonqo pesachikuspa kutinpojkunata watejmanta japʼikapun (Luc. 15:20). Chayrayku cristiano tatasqa, cheqa sonqo kanankupaj kallpachakunku, wawasninku Jehovaman kutinpunankutataj suyanku.

17. ¿Imaraykú wajcha viudaj ruwasqan mayta kallpachawanchej?

¹⁷ Jesuspa tiemponmanta wajcha viudapipis tʼukurillasunmantaj (Lucas 21:1-4 leey). Payqa templopi sajra ruwaykunata allinchananpaj mana imatapis ruwayta aterqachu, nillataj wajcha kausaynintapis tukuchiyta aterqachu (Mat. 21:12, 13). Jinapis Jehovapi atienekusqanrayku, cheqa yupaychay ñaupajman rinanpaj yanapakorqa. Wajcha viudaqa tukuy sonqo iskay phatasta churaykorqa, “kawsanampaj chay kʼatalla kapusqanta”. Payqa Jehovapi atienekorqa. Chay viudaqa yacharqa, Diosta yupaychayta ñaupajman churajtin, Jehová ni imata pisichinanta. Noqanchejpis Diospa Gobiernonta ñaupajman churasun chayqa, Jehovaqa ni imata pisichiwasunchu (Mat. 6:33).

18. ¿Imatá uj hermano ruwarqa? Sutʼinchay.

¹⁸ Kay tiempopis, ashkha hermanosninchej Jehovapi tukuy sonqo atienekullankutaj. Imatachus mana ruwayta atisqankupi yuyanankumantaqa, imatachus ruwayta atisqankupi yuyanku. Hermano Malcolmpi tʼukurina. Payqa 2015 watapi wañupunankama Jehovaman cheqa sonqo karqa. Señoranwan khuska Jehovata unayta sirvispa kusikorqanku, wakin kutis llakiypi kajtinkupis. Hermano Malcolm nerqa: “Imachus kausayninchejwan kanantaqa mana yachayta atisunmanchu. Jinapis Jehovaqa paypi atienekojkunata bendecinpuni”, nispa. Chantataj nerqa: “Tukuy atisqanchejta willanapaj Diosmanta yanapata mañakuna. Imatachus ruwayta atisqallanchejta ruwana, manataj mana atisqanchejtaqa”, nispa. *

19. 1) ¿Imaraykutaj 2017 watapaj ajllakusqan texto may sumaj? 2) ¿Imaynatá 2017 watapaj ajllasqa textowan yanapachikusunman?

¹⁹ Kay sajra mundoqa ‘sajra kasqanmanta aswan sajraman’ tukushan. Chayrayku astawan llakiykunasniyoj kasunchej (2 Tim. 3:1, 13). Jinapis mana chay llakiykunawan atipachikunachu tiyan. Astawanpis Jehovapi atienekuna, imastachus ruwayta atisqanchejtataj ruwana. Chayrayku 2017 watapaj ajllasqa textoqa nin: Jehová “Diospi atienekuy, allin kajtataj ruway” (Sal. 37:3).