1. O ā tomai ofoofogia na faia e Ieova tagata ma tuu i ai?

NA FAIA e Ieova tagata ma tuu i ai tomai ofoofogia, ma le mafaufau lelei ina ia foʻia ai faafitauli ma faia fuafuaga mo le lumanaʻi. (Faata. 2:11) Na ia tuuina mai le malosi ina ia faataunuu ai a tatou fuafuaga, ma mafai ai ona tatou ausia sini talafeagai. (Fili. 2:13) Na ia faia foʻi i tatou ma se lotofuatiaifo, o se lagona i totonu o i tatou e iloa ai le mea saʻo ma le mea sesē, lea e fesoasoani iā i tatou e ʻalofia ai gaoioiga sesē ma faasaʻo a tatou mea sesē.—Roma 2:15.

2. O ā auala e finagalo Ieova ia faaaogā ai o tatou tomai?

² E finagalo Ieova ia faaaogā lelei o tatou tomai, ona e alofa iā i tatou ma e na te silafia o le a faamalieina i tatou pe a faaaogā tatau nei meaalofa. E tele ina apoapoaʻi mai Ieova i lana Afioga ia faaaogā lelei o tatou tomai. O se faaaʻoaʻoga, ua taʻua i Tusitusiga Paia Eperu: “O fuafuaga a le tagata toʻaga e manuia ai o ia,” ma “o mea uma ua e iloa e faia e ou lima, inā faia ia ma lou  malosi.” (Faata. 21:5; Fai. 9:10) Ua faapea mai Tusitusiga Paia Eleni: “Seʻi o tatou faia mea lelei i tagata uma manū o talafeagai le taimi e fai ai,” ma “e pei ona maua e tagata taʻitoʻatasi se meaalofa, ia faaaogā e auauna ai le tasi i le isi.” (Kala. 6:10; 1 Pete. 4:10) E manino mai, e finagalo Ieova ia tatou faia mea e aogā iā i tatou ma isi.

3. O ā mea e lē oo i ai tomai o tagata?

³ Peitaʻi, e silafia foʻi e Ieova e iai le mea e gata mai ai o tatou tomai. E lē mafai ona tatou aveesea le tulaga lē lelei atoatoa, agasala, ma le oti. E lē mafai foʻi ona tatou pulea faaiʻuga ma gaoioiga a isi, auā o i tatou uma e iai le saʻolotoga e filifili ai. (1 Tu. 8:46) E tusa foʻi po o le ā le tele o lo tatou poto ma tomai, ae e itiiti mea e tatou te iloa pe a faatusatusa atu iā Ieova.—Isa. 55:9.

4. O le ā o le a tatou iloiloina i lenei mataupu?

⁴ E manaʻomia ona tatou faalagolago i le taʻitaʻiga a Ieova i so o se tulaga, ma talitonu e fesoasoani mai o ia ma faia mea e lē mafai ona tatou faia. Ae i le taimi e tasi, e tatau ona faia le mea e tatou te mafaia, ma faia ni gaoioiga talafeagai ina ia foʻia ai faafitauli ma fesoasoani i isi. (Faitau le Salamo 37:3.) O lona uiga, e ao ona tatou “faatuatua iā Ieova ma faia mea lelei,” ma “ia faamaoni i [a tatou] mea e fai.” O lea, seʻi o tatou iloilo lesona e tatou te aʻoaʻoina mai i faaaʻoaʻoga a Noa, Tavita, ma isi auauna faamaoni a Ieova na faalagolago atu iā te ia ma faia gaoioiga talafeagai. O le a tatou talanoaina ai mea e leʻi mafai ona latou faia ma mea na mafai ona latou faia, ona gaoioi lea e tusa ma na mea.

5. Faamatala tulaga na fesagaʻia e Noa.

⁵ Sa ola Noa i se lalolagi e ʻtumu i faiga sauā’ ma amioga lē mamā. (Kene. 6:4, 9-13) Sa ia iloa o le a faaumatia e Ieova lenā lalolagi amioleaga. E lē taumatea na matuā lē fiafia Noa i na tulaga leaga. Peitaʻi, na iloa e Noa e iai mea e lē mafai ona ia faia ae e iai foʻi mea e mafai ona ia faia.

6, 7. (a) O ā mea e leʻi mafai ona faia e Noa? (e) O ā itu e tutusa ai o tatou tulaga ma Noa?

⁶ Mea e leʻi mafai ona faia e Noa: E ui lava sa talaʻia ma le faamaoni e Noa le feʻau lapataʻi a Ieova, ae e leʻi mafai ona ia faamalosia tagata amioleaga ia talia le feʻau,  pe faavave ona faaoo mai le Lolo. Sa talitonu Noa o le a faataunuu e Ieova lana folafolaga e faaumatia tagata amioleaga, ma o le a faia e Ieova i lana taimi atofaina.—Kene. 6:17.

⁷ Ua tatou ola foʻi i se lalolagi e tumu i le amioleaga, lea ua folafola mai e Ieova o le a ia faaumatia. (1 Ioa. 2:17) E lē mafai ona tatou faamalosia tagata ia talia le “tala lelei o le malo.” E lē mafai foʻi ona tatou faatelevaveina le oo mai o le “puapuaga tele.” (Mata. 24:14, 21) I le pei o Noa, e manaʻomia ona malosi lo tatou faatuatua ma talitonu ua lē o toe umi ona faalaa mai lea o le Atua. (Sala. 37:10, 11) E tatou te mautinoa o le a faaumatia e Ieova lenei lalolagi amioleaga i le taimi tonu ua ia atofaina.—Sapa. 2:3.

8. Na faapefea ona taulaʻi atu Noa i mea na mafai ona ia faia? (Tagaʻi i le ata i luga aʻe o le matua.)

⁸ Mea na mafai ona faia e Noa: E leʻi fiu Noa ona o mea e leʻi mafai ona ia faia, peitaʻi na taulaʻi atu i mea na mafai ona ia faia. I le avea ai ma “lē e talaʻi le amiotonu,” na folafola atu ma le faamaoni e Noa le feʻau lapataʻi na tuu atu iā te ia. (2 Pete. 2:5) E mautinoa o le faia faapea na fesoasoani e faamalosia ai pea lona faatuatua. E lē gata na ia talaʻi, ae sa ia faaaogā foʻi ona tomai faaletino ma faalemafaufau, ina ia faataunuu ai le faatonuga a le Atua ia fau se vaa.—Faitau le Eperu 11:7.

9. E faapefea ona tatou faaaʻoaʻo iā Noa?

⁹ I le pei o Noa, o loo tatou taumafai ia “tele pea mea e fai i le galuega a le Alii.” (1 Kori. 15:58) Atonu e aofia ai le fausia ma le toe faaleleia o maota mo le tapuaʻiga, tauofo e fesoasoani i fonotaga ma tauaofiaga, pe galulue i se ofisa o le lālā po o se ofisa faaliliu. Ae sili ai, o loo tatou pisi i le galuega talaʻi ma le iloaina o lenei galuega e faamalosia ai lo tatou faamoemoe mo le lumanaʻi. Na faapea mai se tuafafine faamaoni: “Pe a e talanoa i isi e faatatau i faamanuiaga o le Malo o le Atua, e te iloa ai e matuā leai se faamoemoe o tagata, ma e vaai i o latou faafitauli o ni mea e tumau.” O lea, o le faia o se sao i le galuega talaʻi e faamalosia ai la tatou vaaiga mautinoa e faatatau i le lumanaʻi, ma tatou maumauaʻi ai ia tumau i le taufetuliga i le ola.—1 Kori. 9:24.

10. Faamatala le tulaga na feagai ma Tavita.

¹⁰ Na faamatala e Ieova le tupu o Tavita “o se tagata ua malie i ai [lona] loto.” (Galu. 13:22) O Tavita o se auauna faamaoni, peitaʻi sa iai taimi na ia faia ai ni agasala matuiā. Sa la faia le mulilua ma Patesepa. E faaopoopo atu i lenā, sa ia taumafai e nanā lenā agasala e ala i se faufauga ina ia fasiotia Uria le tane a Patesepa i le taua. Na faaaogā foʻi e Tavita Uria e alu ma ave le tusi lea sa faatonuina ai le fasiotia o Uria! (2 Samu. 11:1-21) Mulimuli ane na iloa agasala a Tavita. (Mare. 4:22) Ina ua tupu lenā mea, na faapefea ona tali atu Tavita?

11, 12. (a) O ā mea e leʻi mafai ona faia e Tavita ina ua agasala? (e) Pe a tatou salamō mai i mea sesē matuiā na tatou faia, o le ā e tatou te talitonu o le a faia e Ieova iā i tatou?

¹¹ Mea e leʻi mafai ona faia e Tavita: E leʻi mafai e Tavita ona toe suia mea na tutupu, ma ʻalofia āuga leaga o ana mea sesē. Sa faaauau ona tofo Tavita i nisi o na āuga i lona olaga atoa. (2 Samu. 12:10-12, 14) O lea, sa manaʻomia ona ia faatuatua ma talitonu o le a faamagalo o ia e Ieova ona o lea ua salamō moni, ma o le a fesoasoani mai Ieova iā te ia e onosaia āuga o ana gaoioiga.

¹² O i tatou uma lava e agasala ona e lē lelei atoatoa. O nisi o mea sesē e tatou te faia e matuiā. I nisi taimi e lē mafai ona tatou toe suia se mea sesē na tupu. E tatou te selesele mea na tatou lūlūina. (Kala. 6:7) Peitaʻi, e tatou te faatuatuaina fetalaiga a le Atua ma talitonu afai e tatou te salamō, o le a fesoasoani mai Ieova i taimi faigatā e oo lava i tulaga faigatā e māfua ona o i tatou lava.—Faitau le Isaia 1:18, 19; Galuega 3:19.

13. Na faapefea ona toe malosi faaleagaga Tavita?

¹³ Mea na mafai ona faia e Tavita: Sa talia e Tavita le fesoasoani a Ieova ina ia toe malosi ai faaleagaga. O se tasi o mea na ia faia o le talia lea o faasaʻoga mai i lē na fai ma sui o Ieova, o le perofeta o Natano. (2 Samu. 12:13) Sa tatalo atu foʻi Tavita iā Ieova, taʻutino atu ana agasala, ma faailoa atu lona naunau moni ia toe maua le finagalo malie o Ieova. (Sala. 51:1-17) E leʻi faavaivaia Tavita i lagona nofosala, ae na ia aʻoaʻoina ni lesona mai i ana mea sesē. E na te leʻi toe faia na agasala matuiā. Mulimuli ane, na maliu o ia a o faamaoni pea, ma o loo manatua pea e Ieova lona talaaga faamaoni.—Epe. 11:32-34.

14. O le ā e tatou te aʻoaʻoina mai i le faaaʻoaʻoga a Tavita?

¹⁴ O le ā e tatou te aʻoaʻoina mai i le faaaʻoaʻoga a Tavita? Pe a tatou faia se agasala matuiā, e ao ona tatou salamō moni ma saʻili mo le faamagaloga a Ieova. Ia taʻutino atu iā te ia a tatou agasala. (1 Ioa. 1:9) E ao foʻi ona tatou talanoa atu i toeaina, o ē e mafai ona aumaia se fesoasoani faaleagaga mo i tatou. (Faitau le Iakopo 5:14-16.) O le talia o faatulagaga a Ieova, e faaalia atu ai e tatou te maufaatuatuaina lana folafolaga e na te faamālōlōina ma faamagalo i tatou. O lea, ia aʻoaʻo ni lesona mai i a tatou mea sesē, ia faaauau i la tatou auaunaga iā Ieova, ma ia taulaʻi atu ma le mautinoa i le lumanaʻi.—Epe. 12:12, 13.

15. O le ā e tatou te aʻoaʻoina mai i le faaaʻoaʻoga a Hana?

¹⁵ Ia mafaufau i isi auauna faamaoni i taimi ua mavae, o ē na maufaatuatuaina Ieova ma faia ni gaoioiga talafeagai. O se faaaʻoaʻoga, e leʻi mafai e Hana ona foʻia lona faafitauli o le lē fanau. Peitaʻi, sa ia talitonu o le a faamāfanafanaina o ia e Ieova, ma na faaauau ai ona ia tapuaʻi atu i le faleʻie paia ma sasaa atu lona loto i le  tatalo. (1 Samu. 1:9-11) O se faaaʻoaʻoga lelei lea mo i tatou. Pe a tatou feagai ma faafitauli tau i le soifua mālōlōina po o isi faafitauli e lē mafai ona tatou suia, ia tuu atu o tatou popolega iā Ieova ma talitonu e na te tausia i tatou. (1 Pete. 5:6, 7) E tatou te taumafai malosi foʻi ia maua aogā mai i sauniga ma isi sauniuniga faaleagaga.—Epe. 10:24, 25.

16. O ā lesona e aʻoaʻoina e mātua mai i le tamā matua o Samuelu?

¹⁶ Ae faapefea mātua faamaoni ua lē toe auauna a latou fanau iā Ieova? E leʻi mafai ona faamalosia e le tamā matua o Samuelu ona atalii matutua, ia tumau i taʻiala amiotonu sa ia aʻoaʻoina ai i latou. (1 Samu. 8:1-3) Sa ia tuu atu le mataupu i aao o Ieova. E ui i lea, sa tausisi pea Samuelu i lona faamaoni ma faafiafia lona Tamā i le lagi, o Ieova. (Faata. 27:11) E toʻatele foʻi mātua Kerisiano i aso nei o loo feagai ma tulaga faapea. I le pei o le tamā i le tala i le uii faamaumauʻoa, ua latou talitonu e nofosauni Ieova e talia tagata agasala ua salamō. (Luka 15:20) I le taimi e tasi, o loo taumafai malosi nei mātua ia tumau faamaoni iā Ieova, ma faamoemoe o le a avea a latou faaaʻoaʻoga ma itu e uunaʻia ai a latou fanau ia toe foʻi mai i le upu moni.

17. Aiseā o se faalaeiauga ai le faaaʻoaʻoga a le fafine mativa ua oti lana tane?

¹⁷ Ia mafaufau foʻi i le fafine mativa ua oti lana tane i taimi o Iesu. (Faitau le Luka 21:1-4.) E leai se mea na mafai ona ia faia e faatatau i faiga piʻopiʻo sa faia i le malumalu. (Mata. 21:12, 13) Sa itiiti foʻi se mea na mafai ona ia faia ina ia faaleleia ai lona tulaga tau tupe. Peitaʻi, sa ia foaʻi ma le lotomalie ni “tupe iti se lua,” o “tupe uma ua iā te ia e ola ai.” Sa faatuatua atoatoa lenei fafine faamaoni iā Ieova, ma sa ia iloa afai e na te faamuamua mea faaleagaga, o le a tausia e Ieova ona manaʻoga faaletino. O le faatuatua o lenei fafine na uunaʻia ai o ia e lagolagoina le faatulagaga mo le tapuaʻiga moni. Pe afai foʻi e tatou te saʻili muamua le Malo, o le a faamautinoa e Ieova ua tatou maua mea e manaʻomia.—Mata. 6:33.

18. Aumai se faaaʻoaʻoga o se auauna a Ieova i aso nei sa iai se vaaiga saʻo.

¹⁸ E toʻatele o tatou uso ma tuafāfine i aso nei o loo faaalia foʻi le faatuatua iā Ieova ma faia gaoioiga talafeagai. Seʻi manatu i se uso e igoa iā Malcolm, o lē na tumau faamaoni seʻia oo ina maliu i le 2015. A o faagasolo le tele o tausaga na la auauna ai ma lana avā iā Ieova, sa iai taimi na sologa lelei ai ma taimi foʻi e faalētonu ai. Na faapea mai Malcolm: “E ui e lē mailoa mea e tutupu i le olaga ma e ono faigatā ona taulima, peitaʻi e faamanuia e Ieova i latou e faalagolago iā te ia.” Na fautua mai o ia: “Ia tatalo iā Ieova ina ia e fua tele mai ma agaʻigaʻi i luma i lau auaunaga i le mea e gata ai lou mafai. Ia taulaʻi i mea e mafai ona e faia, ae lē o mea e lē mafai ona e faia.” *

19. (a) Aiseā ua talafeagai lelei ai la tatou mau o le tausaga mo le 2017? (e) E faapefea ona e faatatauina i lou olaga le mau o le tausaga mo le 2017?

¹⁹ A o ʻfaateteleina pea le leaga’ o lenei faiga o mea, e tatou te faatalitalia o le a faateteleina foʻi faafitauli e tatou te fesagaʻia. (2 Timo. 3:1, 13) O lea, e tāua tele i le taimi lenei ona lē faavaivaia i tatou i na faafitauli. Nai lo o lea, ia atiaʻe le faatuatua malosi iā Ieova ma faia so o se gaoioiga talafeagai e tatou te mafaia. Ua talafeagai lelei ai la tatou mau o le tausaga mo le 2017: “Ia e faatuatua iā Ieova ma faia mea lelei”!—Sala. 37:3.