1. Jeová kria ema ho kbiit furak saida deʼit?

JEOVÁ kria ema ho kbiit furak oioin. Nia fó ita kbiit atu hanoin hodi ajuda ita rezolve problema no halo planu ba ita-nia futuru. (Provérbios [Amsal] 2:11) Nia fó kbiit ba ita hodi bele kumpre ita-nia planu sira. (Filipe 2:13) Nia mós fó ita konxiénsia, kbiit neʼe ajuda ita atu hatene saida mak loos no sala. Liuhusi konxiénsia mak ita bele hasees an husi hahalok sala sira no mós ajuda ita atu hadiʼa ita-nia hahalok.—Roma 2:15.

2. Jeová hakarak ita uza ita-nia kbiit iha dalan saida deʼit?

² Jeová hakarak ita uza kbiit sira-neʼe ho didiʼak. Tanbasá? Tanba nia hadomi ita no nia hatene katak se ita uza kbiit sira-neʼe, sei lori ksolok ba ita-nia moris. Tan neʼe mak liuhusi Bíblia, Jeová husu beibeik ita atu uza ho didiʼak ita-nia kbiit. Porezemplu, Eskritura Lia-Ebraiku sira dehan: “Ema badinas nia planu sira sei hetan susesu duni,” no “buat naran deʼit neʼebé ó-nia liman bele halo, halo ida-neʼe bá ho ó-nia forsa tomak”. (Provérbios [Amsal] 21:5; Eclesiastes [Pengkhotbah] 9:10) Husi  Eskritura Lia-Gregu nian dehan: “Kuandu ita iha oportunidade, mai ita halo buat neʼebé diʼak ba ema hotu”; no “hodi tuir prezente neʼebé ema ida-idak simu, uza ida-neʼe atu serbí malu”. (Galásia 6:10; 1 Pedro 4:10) Loos duni, Jeová hakarak ita atu hakaʼas an hodi halo buat neʼebé diʼak ba ita-nia an no ba ema seluk.

3. Ita iha limitadu saida deʼit?

³ Maski Jeová hakarak ita uza ita-nia kbiit, maibé nia mós hatene katak ita iha limitadu. Porezemplu, ita la bele halakon sala no mate, ka ita la bele kontrola ema seluk nia moris tanba ema ida-idak iha sira rasik nia liberdade. (1 Reis [Raja-Raja] 8:46) No maski ita iha matenek ka hetan esperiénsia barak, maibé se kompara ho Jeová nia matenek no esperiénsia, ita mak hanesan labarik deʼit.—Isaías (Yesaya) 55:9.

4. Ita sei aprende saida husi lisaun neʼe?

⁴ Ita tenkesér sadere ba Jeová atu dirije ita iha tempu hotu no tau fiar katak nia sei apoia ita no ajuda ita halo buat neʼebé ita rasik laiha kbiit atu halo. Maibé, Jeová hakarak nafatin ita atu hanoin kona-ba saida mak ita bele halo atu rezolve problema ruma no fó ajuda ba ema seluk. (Lee Salmo [Mazmur] 37:3. *) Ita presiza “tau fiar ba Jeová no halo buat neʼebé diʼak”, no “hatudu hahalok laran-metin”. Oinsá mak ita bele halo nuneʼe? Ita bele aprende husi Noé, David, no Jeová nia atan sira seluk nia ezemplu kona-ba oinsá atu sadere ba Jeová. Husi sira-nia ezemplu, ita bele haree katak iha buat balu neʼebé sira laiha kbiit atu halo, tan neʼe, sira hili atu tau fokus deʼit ba buat sira neʼebé sira bele halo.

5. Esplika toʼok situasaun neʼebé Noé moris.

⁵ Noé moris iha tempu neʼebé “nakonu ho violénsia” no hahalok la morál. (Gênesis [Kejadian] 6:4, 9-13) Maski Noé hatene katak ikusmai Jeová sei halakon ema aat sira, maibé ita bele fiar katak nia hirus tebes ho ema nia hahalok aat sira-neʼe. Iha situasaun hanesan neʼe, Noé rekoñese katak iha buat balun mak nia laiha kbiit atu halo, maibé iha mós buat balun neʼebé nia bele halo.

6, 7. (a) Noé laiha kbiit atu halo saida? (b) Oinsá mak ita-nia situasaun mós hanesan ho Noé nian?

⁶ Noé laiha kbiit atu halo saida? Maski  Noé haklaken ho laran-metin kona-ba Jeová nia avizu, maibé nia laiha kbiit atu obriga ema aat sira rona, ka nia laiha kbiit atu halo Rai-Nabeen toʼo lalais. Nia presiza tau fiar deʼit katak Jeová sei kumpre ninia promesa atu halakon ema aat sira tuir tempu neʼebé nia hili ona.—Gênesis (Kejadian) 6:17.

⁷ Ita mós moris daudauk iha mundu neʼebé nakonu ho buat aat, no ita hatene katak Jeová sei halakon buat sira-neʼe. (1 João 2:17) Maski nuneʼe, ita laiha kbiit atu obriga ema simu mensajen neʼebé ita hatoʼo ba sira, no ita mós la bele halo buat ida atu “terus boot” toʼo lalais. (Mateus 24:14, 21) Ita presiza deʼit fiar metin hanesan Noé katak, lakleur tan Maromak sei halakon buat aat hotu husi mundu neʼe. (Salmo [Mazmur] 37:10, 11) Ita bele fiar katak Jeová sei halo nuneʼe tuir tempu neʼebé nia hili ona, tarde ba loron ida deʼit mós lae.—Habacuque (Habakuk) 2:3.

8. Noé tau fokus ba saida? (Haree dezeñu iha pájina 7.)

⁸ Saida mak Noé bele halo? Noé tau fokus ba buat neʼebé nia bele halo, duké rende an deʼit tanba nia laiha kbiit atu halo buat neʼebé nia hakarak. Nia haklaken ho laran-metin kona-ba Jeová nia avizu. (2 Pedro 2:5) Ita bele fiar katak serbisu neʼe ajuda nia atu iha fiar neʼebé metin. Noé mós halo buat seluk tan, neʼe mak halo tuir Jeová nia matadalan hodi harii ró boot ida.—Lee Ebreu 11:7.

9. Oinsá mak ita bele banati-tuir Noé nia ezemplu?

⁹ Ita hakarak hanesan Noé atu halo nafatin “Naʼi nia serbisu” ho badinas. (1 Korinto 15:58) Porezemplu, karik ita bele ajuda iha serbisu konstrusaun, tau matan didiʼak ba fatin adorasaun sira, halo serbisu voluntáriu atu ajuda iha reuniaun boot, ka ajuda serbisu iha sukursál ka iha eskritóriu tradusaun. Maibé importante liu mak atu badinas nafatin haklaken hodi hametin ita-nia esperansa kona-ba futuru. Irmán ida dehan: “Bainhira ita koʼalia ba ema kona-ba bensaun sira neʼebé Maromak nia Ukun sei lori mai, ita bele haree katak ema sira-neʼe laiha esperansa no sira sente katak sira-nia problema laiha rohan.” Loos duni, ita iha esperansa, no bainhira ita koʼalia ba ema, neʼe hametin liután ita-nia esperansa. Esperansa neʼe mak ajuda ita atu halai toʼo rohan.—1 Korinto 9:24.

10. Esplika toʼok David nia situasaun.

¹⁰ David mak ema neʼebé laran-metin no Jeová hadomi tebes nia. (Apóstolu 13:22) Maski nuneʼe, nia monu ba sala boot hodi halo sala-foʼer ho Batseba. Aat liután mak nia mós halo planu atu oho Batseba nia laʼen Urias liuhusi funu hodi subar ninia sala neʼe. Laʼós neʼe deʼit, nia mós haruka Urias lori rasik karta neʼebé fó instrusaun kona-ba oinsá atu halo Urias mate. (2 Samuel 11:1-21) Ikusmai ema hatene kona-ba David nia sala sira-neʼe. (Marcos 4:22) Bainhira ida-neʼe akontese, David halo saida?

11, 12. (a) Bainhira David halo tiha sala, nia laiha kbiit atu halo saida? (b) Se ita mak arrepende an ho laran bainhira monu tiha ba sala, ita bele fiar katak Jeová sei halo saida?

¹¹ David laiha kbiit atu halo saida? David la bele halai sees husi sala nia konsekuénsia. (2 Samuel 12:10-12, 14) Buat neʼebé nia presiza halo mak fiar. Nia tenke fiar katak, se nia mak arrepende an husi laran, Jeová sei fó perdua nia no ajuda nia atu tahan hasoru konsekuénsia husi ninia hahalok sira.

¹² Ita hotu la perfeitu, ita hotu halo sala. Balu sala kiʼik no balu boot. No dala ruma ita mós tenke simu deʼit konsekuénsia husi ita-nia hahalok sira. (Galásia 6:7) Maibé ita bele tau fiar ba Maromak nia liafuan. Nia promete katak, se ita mak arrepende an ho laran, nia sei fó perdua ba ita no ajuda ita atu tahan hasoru konsekuénsia husi ita-nia sala, maski sala neʼe ita rasik mak halo.—Lee Isaías (Yesaya) 1:18, 19; * Apóstolu 3:19.

13. David halo saida hodi hadiʼa ninia relasaun ho Jeová?

¹³ Saida mak David bele halo? Nia hadiʼa fali ninia relasaun ho Jeová. Oinsá? Nia simu Jeová nia ajuda liuhusi profeta Natan. (2 Samuel 12:13) David mós halo orasaun hodi fó sai ninia sala ba Jeová atu hatudu katak nia hakarak tebes atu hadiʼa fali ninia relasaun diʼak ho Jeová. (Salmo [Mazmur] 51:1-17) Duké husik ninia laran fó sala ba nia, nia hadiʼa ninia hahalok sira atu la monu fali ba sala neʼebé uluk nia halo. Ikusmai David mate, maibé Jeová hanoin-hetan nafatin katak nia mak ema neʼebé laran-metin.—Ebreu 11:32-34.

14. Ita bele aprende saida husi David nia ezemplu?

¹⁴ Ita bele aprende saida husi David nia ezemplu? Se ita mak monu ba sala neʼebé boot, ita tenke arrepende an ho laran hodi fó sai ita-nia sala ba Jeová no husu nia atu fó perdua ba ita. (1 João 1:9) Ita mós presiza buka ajuda husi katuas sira tanba sira bele ajuda ita atu hadiʼa fali ita-nia relasaun ho Jeová. (Lee Tiago 5:14-16.) Se ita husik Jeová atu ajuda ita, neʼe hatudu katak ita tau fiar ba ninia promesa atu fó perdua ba ita. Ita mós presiza hadiʼa ita-nia hahalok hodi la monu fali ba sala no kontinua serbí Jeová ba nafatin.—Ebreu 12:12, 13.

15. Saida mak ita aprende husi Ana nia ezemplu?

¹⁵ Karik ita bele hanoin-hetan ezemplu seluk tan husi Jeová nia atan sira iha tempu antigu. Sira mós tau fiar ba Jeová hodi halo deʼit buat neʼebé sira bele halo iha situasaun susar balu. Ezemplu ida mak kona-ba Ana, nia la bele iha oan no laiha kbiit atu troka ninia situasaun neʼe. Maibé nia iha fiar katak Jeová sei fó kmaan ba nia, tan neʼe mak nia bá beibeik tabernákulu hodi adora Jeová no halo orasaun hodi  fó sai ninia sentimentu sira. (1 Samuel 1:9-11) Neʼe mak ezemplu neʼebé diʼak tebes ba ita, loos ka lae? Bainhira ita hasoru problema saúde nian ka susar seluk neʼebé ita la bele kontrola, ita entrega ita-nia laran-susar hotu ba Jeová. (1 Pedro 5:6, 7) Ita mós hakaʼas an atu tuir reuniaun sira no aproveita buat seluk neʼebé Maromak nia organizasaun fó ba ita.—Ebreu 10:24, 25.

16. Inan-aman bele aprende saida husi profeta Samuel?

¹⁶ Oinsá ho inan-aman sira neʼebé oan lakohi tan atu serbí Jeová? Sira bele aprende husi profeta Samuel nia ezemplu. Samuel iha oan-mane boot naʼin-rua, maibé nia laiha kbiit atu obriga sira hatudu laran-metin ba Jeová. (1 Samuel 8:1-3) Nia entrega deʼit susar neʼe ba Jeová. Nia halo buat neʼebé nia bele halo hodi kontinua hatudu laran-metin ba Jeová no halo buat neʼebé Jeová simu. (Provérbios [Amsal] 27:11) Ohin loron, inan-aman balu mós hasoru situasaun hanesan neʼe. Maibé sira fiar katak Jeová mak hanesan aman neʼebé Jesus temi iha ninia ai-knanoik. Nia sempre hein hodi simu fali ema neʼebé arrepende an. (Lucas 15:20) Buat neʼebé inan-aman bele halo mak hatudu nafatin laran-metin ba Jeová hodi hein katak sira-nia ezemplu diʼak bele book sira-nia oan atu fila fali ba Jeová.

17. Tanbasá mak feto-faluk hatudu ezemplu neʼebé diʼak mai ita?

¹⁷ Ezemplu diʼak seluk tan mak kona-ba feto-faluk kiak iha Jesus nia tempu. (Lee Lucas 21:1-4.) Maski nia haree korrupsaun akontese daudauk iha templu, maibé nia laiha kbiit atu halo buat ida, no nia mós laiha kbiit atu troka ninia situasaun kiak neʼe. (Mateus 21:12, 13) Maibé tanba nia fiar ba Jeová, neʼe book nia atu kontinua fó apoiu ba adorasaun neʼebé loos. Ho laran-luak, nia “tau osan kiʼik rua” nuʼudar ninia kontribuisaun, no osan neʼe mak husi “buat hotu neʼebé nia iha”. Feto-faluk neʼe tau fiar tomak ba Jeová. Nia hatene katak, se nia mak tau uluk Jeová iha ninia moris, Jeová sei tau matan ba ninia presiza sira. Hanesan neʼe mós ohin loron, se ita buka uluk Maromak nia Ukun, nia sei tau matan ba ita-nia presiza loroloron nian.—Mateus 6:33.

18. Fó toʼok ezemplu oinsá atu iha hanoin neʼebé loos.

¹⁸ Ohin loron, iha irmaun-irmán barak neʼebé hatudu fiar hanesan neʼe ba Jeová hodi tau fokus ba buat neʼebé sira bele halo. Ezemplu ida mak kona-ba irmaun Malcolm, nia hatudu laran-metin ba Jeová toʼo nia mate iha tinan 2015. Nia ho ninia feen serbí Jeová hamutuk ba tempu kleur. Sira mós hasoru susar oioin. Nia dehan: “Dala ruma ita la hatene saida mak sei akontese ba ita-nia moris, no ita mós hasoru susar oioin. Maibé Jeová fó bensaun ba sira neʼebé sadere ba nia.” Irmaun Malcolm fó sujestaun katak: “Halo orasaun atu ita bele badinas nafatin iha Jeová nia serbisu. Hanoin kona-ba buat neʼebé ita bele halo, laʼós buat neʼebé ita la bele halo.” *

19. (a) Tanbasá mak eskritura husi Salmo 37:3 diʼak ba tinan 2017? (b) Oinsá mak Ita hakarak halo tuir eskritura ba tinan 2017 iha ita-nia moris?

¹⁹ Mundu aat neʼe sei “laʼo husi aat ba aat liután”, tan neʼe ita bele fiar katak ita sei hasoru susar barak liután iha futuru. (2 Timóteo 3:1, 13) Maibé, importante mak la bele husik susar sira-neʼe halo ita mout. Ita tenkesér iha fiar neʼebé metin ba Jeová no tau fokus atu halo buat neʼebé ita bele halo. Tan neʼe Salmo 37:3 diʼak tebes ba tinan 2017, neʼebé dehan: “Tau fiar ba Jeová no halo buat neʼebé diʼak”!