1. Ino ninguzu nzi zigambya Jehova nzyaakabalenga anzizyo bantu?

JEHOVA wakalenga bantu akubapa nguzu zyakucita zintu zinji zigambya. Wakatupa nguzu zyakuyeeya kutegwa katumana mapenzi alimwi akuyeeya nzyotuyoocita kumbele. (Tus. 2:11) Wakatupa nguzu zyakucita zintu nzyotuyeeya kucita, eeci citupa kucikonzya kuzuzikizya mbaakani zyesu. (Flp. 2:13) Alimwi wakatulenga amanjezyeezya—inguzu zyakuzyalwa anzizyo zyakuzyiba cibi acibotu—alo aakonzya kutugwasya kutantamuka kucita zibi alimwi akubambulula zibi zyesu ikuti twalubizya.—Rom. 2:15.

2. Mbuti Jehova mbwayanda kuti katuzibelesya nguzu nzyaakatupa?

² Jehova uyanda kuti katuzibelesya kabotu nguzu nzyaakatupa. Nkaambo nzi? Nkaambo ulatuyanda, alimwi ulizyi kuti citupa kukkutila ikuti naa twazibelesya kabotu zipego eezyi. Kwiinda mu Jwi lyakwe, cakwiinduluka-induluka, Jehova utukulwaizya kubelesya nguzu zyesu kucita zintu zili kabotu. Mucikozyanyo mu Magwalo aa Chihebrayo tubala kuti: “Makanze aabankutwe masimpe apa kuzwidilila”;  alimwi “kufwumbwa mulimo maanza aako ngaajana, koubeleka anguzu zyako zyoonse.” (Tus. 21:5; Muk. 9:10) Mu Magwalo aa Banakristo aa Chigiriki, twaambilwa kuti: “Kufwumbwa leelyo notujisi coolwe, atucitile bantu boonse milimo mibotu”; alimwi “kweelana acipego umwi aumwi ncaakatambula, amucibelesye mukubelekelana.” (Gal. 6:10; 1Pet. 4:10) Cakutadooneka, Jehova uyanda kuti tugwasyigwe alimwi akugwasya bambi.

3. Nkulezya kuli buti bantu nkobajisi?

³ Nokuba boobo, Jehova ulizyi kuti bantu kuli mpobagolela. Swebo lwesu kutugama, tatukonzyi kumana kutalondoka, cibi, alimwi alufwu; nokuba kweendelezya bantu bamwi, nkaambo boonse balijisi lwaanguluko lwakulisalila. (1Bam. 8:46) Kufwumbwa naa tulakonzya kuba aluzyibo luli buti, lyoonse tunooli mbuli bana twakozyanisyigwa a Jehova.—Is. 55:9

4. Ino ncinzi ncotutiilange-lange mucibalo eeci?

⁴ Mubukkale buli boonse, tweelede kusyoma Jehova kuti atusololele, kusyoma mulinguwe kuti atugwasye alimwi akutucitila zintu nzyotutakonzyi kulicitila. Aciindi ncomunya, tweelede kucita nzyotukonzya, nkokuti ikubweza ntaamu zyeelede kutegwa tumane mapenzi alimwi akugwasya bantu bamwi. (Amubale Intembauzyo 37:3.) Mubufwaafwi, tweelede kucita zintu zyoonse zyobilo ‘kusyoma Jehova akucita zintu zibotu’; alimwi tweelede ‘kusyomeka kumilimo yesu.’ Mumbazu eeyi, atulange-lange ncotukonzya kwiiya kuzikozyanyo zya Nowa, Davida alimwi ababelesi ba Jehova bamwi basyomeka ibakasyoma Jehova alimwi akubweza ntaamu zyakali kuyandika. Mbubwenya mbotutiibone, eeci cakali kubikkilizya kuzyiba nzyobakali kukonzya kucita alimwi anzyobatakali kukonzya kucita, mpoonya akubweza ntaamu yeelede.

5. Amupandulule bukkale mbobwakabede muciindi ca Nowa.

⁵ Nowa wakali kukkala munyika ‘yakazwide bubi’ alimwi akutalilemeka. (Matl. 6:4, 9-13) Wakalizyi kuti Jehova mukuya kwaciindi uyakwiinyonyoona nyika mbyaabi eeyo. Nokuba boobo, kweelede kuti Nowa wakalikopene akaambo kabukkale bubyaabi bwakaliko. Mubukkale oobo, Nowa wakalizyi kuti kwakali zintu nzyaatakali kukonzya kucita alimwi anzyaakali kukonzya kucita.

6, 7. (a) Nzintu nzi Nowa nzyaatakali kukonzya kucita? (b) Mbuti mbotuli mubukkale ibukozyenye amubukkale mwaakabede Nowa?

 ⁶ Zintu Nowa nzyaatakali kukonzya kucita: Nokuba kuti cakusyomeka Nowa wakakambauka mulumbe wa Jehova wakucenjezya, tanaakali kukonzya kubasinikizya bantu babi bakamuzingulukide ikutambula mulumbe ooyo, naa kupa kuti Zambangulwe ifwambaane kuboola. Nowa wakeelede buyo kusyoma Jehova kuti uyoocizuzikizya cisyomezyo cakwe cakumana bubi aciindi ceelede.—Matl. 6:17.

⁷ Andiswe mazuba aano tupona munyika iizwide bubi, yalo njasyomezya kuti Jehova uyakwiinyonyoona. (1Joh. 2:17) Kwacecino ciindi, tatukonzyi kubasinikizya bantu kuti baazumine “makani mabotu aa Bwami.” Alimwi taakwe ncotukonzya kucita kutegwa “mapenzi mapati” afwambaane kuboola. (Mt. 24:14, 21) Mbubwenya mbuli Nowa, tweelede kuba alusyomo luyumu, kusyoma kuti Jehova lino-lino ulabweza ntaamu. (Int. 37:10, 11) Tulisinizyide kuti Jehova takaizumizyi nyika eeyi mbyaabi kuti izumanane kubako nobuba buzuba bomwe buyo kwiindilila aciindi ncabikkide kuti azuzikizye makanze aakwe.—Hab. 2:3.

8. Mbuti Nowa mbwaakabikkila buyo maano kuzintu nzyaakali kukonzya kucita? (Amubone cifwanikiso icili kumatalikilo aacibalo.)

⁸ Zintu Nowa nzyaakali kukonzya kucita: Muciindi cakutyompwa akaambo kazintu nzyaatakali kukonzya kucita, Nowa wakabikkila buyo maano kuzintu nzyaakali kukonzya kucita. Mbwaakali “imukambausi wabululami,” Nowa cakusyomeka wakaambilizya mulumbe wakucenjezya ngwaakaambilwa kuti aambilizye. (2Pet. 2:5) Cakutadooneka, kucita boobo kwakamugwasya Nowa kuzumanana kuba alusyomo luyumu. Kunze aamulimo wakukambauka, Nowa wakabelesya nguzu zyakwe alimwi amaano aakwe kutegwa azuzikizye mulimo ngwaakapegwa a Leza iwakuyaka bwato.—Amubale Bahebrayo 11:7.

9. Mbuti mbotukonzya kwiiya cikozyanyo ca Nowa?

⁹ Mbubwenya mbuli Nowa, tulasolekesya kuba “azintu zinji zyakucita mumulimo wa Mwami.” (1Kor. 15:58) Milimo eeyo ilakonzya kubikkilizya kuyaka alimwi akubamba masena aakukombela, kulyaaba kugwasilizya kubeleka kumiswaangano mipati, naa kubelekela kuofesi yamutabi naa kuofesi yabasanduluzi. Kwiinda zyoonse, tulalitakata mumulimo wakukambauka, katuzyi kuti mulimo ooyu uyumya bulangizi bwesu bwakumbele. Mucizyi uumwi uusyomeka  wakaamba kuti: “Ciindi nomwaambila bamwi kujatikizya zilongezyo zya Bwami bwa Leza, muyoobona kuti baswiilizi banu tabajisi bulangizi naaceya alimwi babona mapenzi aabo kuti anooliko lyoonse.” Masimpe, kutola lubazu mumulimo wakukambauka kuyumya bulangizi bwesu bwakumbele alimwi akutaleka kutola lubazu mumuzundano wakubalika wabuumi.—1Kor. 9:24.

10. Amupandulule bukkale mwaakabede Davida.

¹⁰ Jehova wakaamba Mwami Davida kuti, ‘mwaalumi weendelana amoyo wakwe.’ (Mil. 13:22) Buumi bwa Davida boonse bwakali bwabululami. Nokuba boobo, ciindi cimwi wakacita cibi cipati. Wakacita bumambe a Bati-seba. Kuyungizya waawo, wakasola kucisisa cibi eeco kwiinda mukubikka bubambe bwakuti mulumi wa Bati-seba, Uriya, ajaigwe munkondo. Mane buya Davida wakapa Uriya kumugama lugwalo ilwakali kwaamba kuti ajaigwe! (2Sam. 11:1-21) Cakutadooneka, zibi zya Davida zyakayubunuka. (Mk. 4:22) Eeci nocakacitika, ncinzi Davida ncaakacita?

11, 12. (a) Ciindi naakabisya Davida, zintu nzi nzyaatakali kukonzya kucita? (b) Ikuti naa tweempwa ciindi notwacita cibi cipati, ncinzi ncotweelede kusyoma kuti Jehova uyootucitila?

¹¹ Zintu Davida nzyaatakali kukonzya kucita: Davida tanaakali kukonzya kuzijokolola zintu nzyaakacita. Alimwi tanaakali kukonzya kwaatija mapenzi akali kuyooboola akaambo kakulubizya kwakwe. Mubwini, mapenzi aamwi akali kuyoozumanana kumulwana Davida mubuumi bwakwe boonse. (2Sam. 12:10-12, 14) Aboobo, wakali kuyandika lusyomo. Wakeelede kusyoma kuti ikuti naa weempwa ncobeni, Jehova wakali kuyoomulekelela akumugwasya kuti aliyumye mumapenzi aakali kuyooboola akaambo kamicito yakwe.

¹² Akaambo kakuti tatulondokede, toonse buyo tulabisya. Zibi zimwi zipati kwiinda zimbi. Mubukkale bumwi, inga tiitwacikonzya kujokolola kulubizya nkotwakacita. Tulakonzya kupona amapenzi aboola akaambo kakubisya. (Gal. 6:7) Pele tusyoma majwi aa Leza, kusyoma kuti ikuti naa tweempwa, Jehova uyootugwasya muziindi zyamapenzi—nokuba kuti mapenzi aayo ndiswe twakaaleta.—Amubale Isaya 1:18, 19; Milimo 3:19.

13. Ino mbuti Davida mbwaakacibambulula cilongwe cakwe a Jehova?

¹³ Zintu nzyaakali kukonzya kucita Davida: Davida wakazumizya Jehova kuti amugwasye kupona kumuuya. Nzila iimwi mbwaakacita oobo nkwiinda mukuzumina lulayo kuzwa kumwiiminizi wa Jehova, musinsimi Natani. (2Sam. 12:13) Alimwi Davida wakapaila kuli Jehova, kulyaambilila zibi zyakwe alimwi akutondezya kuti wakali kuyandisisya kubukulusya cilongwe cakwe a Jehova. (Int. 51:1-17) Muciindi cakuti atyompwe akaambo kakulipa mulandu, Davida wakaiya kuzibi zyakwe. Masimpe, tanaakainduluka kucita zibi zipati eezyo. Mukuya kwaciindi, wakafwa kasyomeka, kusyomeka kwakwe kwakazumanana kuyeeyegwa a Jehova.—Heb. 11:32-34.

14. Ncinzi ncotukonzya kwiiya kucikozyanyo ca Davida?

¹⁴ Ncinzi ncotukonzya kwiiya kuzwa kucikozyanyo ca Davida? Ikuti naa twacita cibi cipati, tweelede kweempwa kuzwa ansi aamoyo akulomba Jehova kuti atulekelele. Tweelede kulyaambilila zibi zyesu kulinguwe. (1Joh. 1:9) Alimwi tweelede kubona baalu, balo bakonzya kutugwasya kumuuya. (Amubale Jakobo 5:14-16.) Kwiinda mukutobela bubambe bwa Jehova, tutondezya kuti tulasyoma mucisyomezyo cakwe cakutuponya alimwi akutulekelela. Kuyungizya waawo, tweelede kwiiya kuzwa kuzibi zyesu, tweelede kuzumanana mumulimo wa Jehova, alimwi akulangila izili kumbele katujisi lusyomo.—Heb. 12:12, 13.

15. Ino ncinzi ncotwiiya kucikozyanyo ca Hana?

¹⁵ Ambweni mulakonzya kuyeeya kujatikizya babelesi basyomeka bakaindi bambi ibakasyoma muli Jehova akubweza ntaamu ziyandika. Mucikozyanyo, Hana tanaakali kukonzya kulimana  penzi lyakutazyala munguzu zyakwe mwini. Pele wakasyoma Jehova kuti ulamuumbulizya, aboobo wakazumanana kukomba kutempele alimwi akupaila camoyo woonse. (1Sam. 1:9-11) Sena eeci tacili cikozyanyo cibotu kulindiswe? Ikuti naa katujisi penzi lyakuciswa-ciswa naa buyumuyumu bumwi buyo mbotutakonzyi kumana, tweelede kuwaala makatazyo eesu oonse kuli Jehova, katusyomede kuti ulatubikkila maano. (1Pet. 5:6, 7) Alimwi tweelede kucita zintu nzyotukonzya kutegwa katugwasyigwa amiswaangano ya Bunakristo alimwi azyakulya zimwi zyakumuuya.—Heb. 10:24, 25.

16. Ncinzi bazyali ncobakonzya kwiiya kumudaala Samuele?

¹⁶ Ino mbuti kujatikizya bazyali basyomeka ibajisi bana bakazanga? Mudaala Samuele tanaakali kukonzya kubasinikizya bana bakwe basankwa bapati kuti bazumanane kusyomeka kuzyeelelo ziluleme nzyaakabayiisya. (1Sam. 8:1-3) Makani wakeelede kwaasiya mumaanza aa Jehova. Nokuba boobo, Samuele wakali kukonzya kuzumanana kusyomeka alimwi akukkomanisya Jehova, Usyi wakwe wakujulu. (Tus. 27:11) Mazuba aano, bazyali banji Banakristo balijana mubukkale bukonzyenye aboobu. Basyoma kuti mbubwenya mbuli usyi wamucikozyanyo camwana mutaka, Jehova lyoonse ulabikkila maano kubatambula basizibi ibeempwa. (Lk. 15:20) Aciindi ncomunya eeci, bazyali bali boobo balabeleka canguzu kuzumanana kusyomeka kuli Jehova, kabalombozya kuti cikozyanyo cabo cibotu inga capa kuti bana babo bapiluke kubutanga.

17. Nkaambo nzi cikozyanyo camukamufwu mucete ncocikulwaizya?

¹⁷ Alimwi, amuyeeye buyo kujatikizya mukamufwu mucete wamuciindi ca Jesu. (Amubale Luka 21:1-4.) Tanaakali kukonzya kucita cintu cili coonse kujatikizya zintu zibi zyakali kucitwa kutempele. (Mt. 21:12, 13) Alimwi kweelede kuti zisyoonto zintu nzyaakali kukonzya kucita kutegwa alwane penzi lyakubula mali. Pele cakuliyandila wakasanga “tukkobili tobilo,” twalo ‘ntwaakali kuponena.’ Mukaintu ooyu uusyomeka wakatondezya lusyomo muli Jehova cakumaninina kazyi kuti, ikuti naa wabikka zintu zyakumuuya mubusena bwakusaanguna, Jehova ulakonzya kumupa zintu nzyayandika. Lusyomo lwamukamufwu lwakamupa kuti atobele bubambe bwakaliko bwabukombi bwakasimpe. Mbubwenya buyo, andiswe tulasyoma kuti, ikuti naa twasaanguna kuyandaula Bwami, Jehova uyoobona masimpe kuti tulijisi zintu nzyotuyandika.—Mt. 6:33.

18. Amupe cikozyanyo camazuba aano camubelesi wakali kuzilanga kabotu zintu.

¹⁸ Bunji bwabasyomima mazuba aano abalo batondezya lusyomo muli Jehova alimwi akubweza ntaamu ziyandika. Atulange-lange mukwesu wazina lyakuti Malcolm, walo iwakazumanana kusyomeka kusikila naakafwa mu 2015. Kwamyaka minji walo alimwi abakaintu bakwe njobakabelekela Jehova, zimwi ziindi bakali kujana buyumuyumu. Mukwesu ooyu wakaamba kuti: “Mazuba ngunamasandu, alimwi zintu mubuumi zilakatazya. Pele Jehova ulabalongezya aabo bamusyoma.” Ino ncinzi mukwesu Malcolm ncaakakulwaizya? Wakati: “Kamupaila kulomba kuti mube basungu mumulimo wa Jehova kusikila mpomugolela. Amubikkile maano kuzintu nzyomukonzya kucita ikutali nzyomutakonzyi kucita.” *

19. (a) Nkaambo nzi lugwalo lwesu lwamwaka wa 2017 ncolweelela? (b) Ino muyoolubelesya buti lugwalo lwamwaka wa 2017 mubuumi bwanu?

¹⁹ Bweende bwazintu obuno ‘mbobuyaabubijila limwi,’ tulakonzya kulangila mapenzi aakatazya kapati. (2Tim. 3:1, 13) Aboobo cilayandika kapati kutazumizya mapenzi aayo kuti atutyompye. Muciindi caboobo, tweelede kuba alusyomo luyumu muli Jehova akubweza ntaamu ziyandika zili zyoonse nzyotukonzya. Eelo kaka luleelela lugwalo lwesu lwamwaka wa 2017 lwakuti: “Kosyoma Jehova akucita zintu zibotu”!—Int. 37:3.