1. Ne a mea fakaofoofogia e mafai o fai ne tino i te taimi ne faite ei latou ne Ieova?

NE FAITE ne Ieova a tino mo mea fakaofoofogia e mafai o fai ne latou. Ne tuku mai ne ia te atamai o te mafaufau ke faka‵lei aka ei a fakalavelave kae ke fai foki a palani mō aso mai mua. (Faata. 2:11) Ne tuku mai ne ia te malosi ke fakataunu ne tatou a ‵tou palani, kae ke mafai o ga‵lue ki fakamoemoega aoga. (Fili. 2:13) Ne faite foki ne ia tatou fakatasi mo ‵tou loto lagona —se lagonaga i loto i a tatou ke iloa te ‵lei mo te masei—e fesoasoani mai te mea tenā ke ‵kalo keatea tatou mai mea ‵se kae ke faka‵tonu aka a ‵tou mea ‵se māfai ko vāi‵vai tatou.—Loma 2:15.

2. Se a te fakamoemoega o Ieova ki te auala e fakaaoga ne tatou a ‵tou atamai?

² E fakamoemoe a Ieova ke fakaaoga ne tatou a ‵tou atamai i se auala ‵lei. Kaia? Ona ko ia e alofa ki a tatou, kae iloa ne ia me ka maua ne tatou te lotomalie māfai e fakaaoga faka‵lei ne tatou a meaalofa konei. E auala i tena Muna, ne fakamalosi mai faeloa a Ieova ke fakaaoga  faka‵lei ‵tou atamai. E pelā me se fakaakoakoga, i Tusitusiga Epelu, e fai mai penei: “Fai faka‵lei au aofaga kae ka uke au mea”; kae “galue malosi ki tau mea e fai.” (Faata. 21:5; Fai. 9:10) I Tusitusiga Eleni, e fai mai penei: “Tela la, a koi maua ne tatou te avanoaga, ke na ga‵lue tatou o fai a mea ‵lei mō tino katoa”; kae “ke fakaaoga a meaalofa kolā e maua ne tino taki tokotasi ke tavini atu ei te suā tino ki te suā tino.” (Kala. 6:10; 1 Pe. 4:10) E manino ‵lei i ei, me e manako a Ieova ke fai ne tatou a te mea e mafai o fai ke aoga ki a tatou mo nisi tino.

3. Ne a tapulā e maua ne tino?

³ E iloa ‵lei foki ne Ieova i tino e isi ne olotou tapulā. E se mafai lele ne tatou o fakaseai te tulaga sē ‵lei katoatoa, te agasala mo te mate i a tatou eiloa; e se mafai foki ne tatou o pule katoatoa ki nisi tino, me e isi eiloa se saolotoga o tatou katoa. (1 Tupu 8:46) Kae faitalia me pefea te lasi o te ‵tou atamai io me ko te ‵tou iloa, e ‵pau eiloa tatou me ne tamaliki māfai e faka‵tusa ki a Ieova.—Isa. 55:9.

4. Ne a mea ka sau‵tala ki ei tatou i te mataupu tenei?

⁴ I so se fakanofonofoga, e manakogina ke fakalago‵lago tatou ki a Ieova mō tena takitakiga, kae tali‵tonu tatou ki te ‵lago mai o ia ke mafai ne tatou o fai a mea kolā e se mafai ne tatou o fai. Kae e ‵tau foki mo tatou o fai a te mea e mafai ne tatou o fai, mai te fakaasi atu o faifaiga kolā e faka‵lei i ei a fakalavelave kae fesoasoani atu ki nisi tino. (Faitau te Salamo 37:3.) Ke fakatoetoe aka te manatu tenā, e ‵tau mo tatou o ‘tali‵tonu ki a Ieova kae ke fai te mea ‵lei’; e ‵tau foki mo tatou o ‘fakamaoni i ‵tou mea e fai.’ Ona ko te pogai tenei, ke na sau‵tala tatou ki mea e mafai o tauloto mai i te fakaakoakoga a Noa, Tavita, mo nisi tavini fakamaoni a te Atua kolā ne fakalago‵lago ki a Ieova kae fai ne latou a faifaiga ‵lei. Ka lavea ei ne tatou, me aofia i te mea nei a te ‵kesega i mea kolā e se mafai o fai mo mea kolā e mafai o fai ne latou, mo te auala ne gasue‵sue ei latou.

5. Fakamatala mai a te tulaga ne fepaki mo Noa.

⁵ Ne ola a Noa i se lalolagi telā ne “‵fonu . . . i amioga fakasaua” mo amioga fakatauavaga sē ‵tau. (Kene. 6:4, 9-13) Ne iloa ne ia me ka aumai ne Ieova te fakagataga ki te lalolagi matagā tenā. Kae ne mafai eiloa o tigaina a Noa i tulaga ma‵sei penā. Tela la, ne iloa ne Noa me e isi ne mea e se mafai ne ia o fai kae e isi ne mea e mafai ne ia o fai.

6, 7. (a) Se a te mea ne seki mafai ne Noa o fai? (e) I te auala fea e mafai ei o fakatusa ‵tou tulaga ki a Noa?

⁶ A mea ne seki mafai ne Noa o fai: E tiga eiloa  ne talai atu ne Noa mo te fakamaoni a te fekau a Ieova ke fakaeteete i ei a tino, ne seki mafai ne ia o faimālō a tino i ana tafa ke talia ne latou te fekau tenā, kae ne seki mafai foki o fai ne ia te lolo ke oko fakavave mai. Ne ‵tau o loto talitonu a Noa me ka tausi a Ieova ki Tena tautoga ke fakagata a amioga ma‵sei, kae talitonu i te Atua ka fai eiloa ne ia penā i te taimi tonu.—Kene. 6:17.

⁷ E ola foki tatou i se olaga telā e ‵fonu i amioga ma‵sei, telā e iloa ne tatou me ko oti foki ne tauto mai a Ieova me ka fakaseai. (1 Ioa. 2:17) Kae i te taimi nei, e se mafai ne tatou o faimālō a tino ke talia a te “tala ‵lei o te Malo.” E sē mafai foki o fai ne tatou ke oko fakavave mai te kamataga o te “fakalavelave lasi.” (Mata. 24:14, 21) E pelā mo Noa, e manakogina ne tatou se fakatuanaki malosi, kae loto tali‵tonu me ko pili fua o saga mai te Atua. (Sala. 37:10, 11) E tali‵tonu tatou me se talia ne Ieova a te lalolagi masei tenei ke tumau io me silia malie fua ki se aso e tasi mai te taimi telā ko oti ne fuafua ne ia.—Sapa. 2:3.

8. Ne saga tonu atu pefea a Noa ki mea ne mafai ne ia o fai? (Ke onoono ki te ata i te kamataga.)

⁸ A mea ne mafai ne Noa o fai: I lō te ‵tuka o tena loto i mea kolā e se mafai ne ia o fai, ne saga tonu atu loa a Noa ki mea kolā e mafai ne ia o fai. E pelā me se “tino talai o te amiotonu,” ne folafola atu ne Noa mo te fakamaoni a te fekau telā ne tuku atu ki a ia. (2 Pe. 2:5) E seai se fakalotolotolua, me ne fesoasoani atu a te mea tenā ki a Noa ke fakatumau te malosi o tena fakatuanaki. E se gata i te talaiatuga, ne fakaaoga foki ne ia a tena malosi mo te atamai o tena mafaufau ke fakaoti te galuega ne tuku atu ne te Atua ki te faitega o te vaka.—Faitau te Epelu 11:7.

9. E mafai pefea o fakaakoako tatou ki a Noa?

⁹ E pelā mo Noa, e taumafai tatou ke fai faeloa ke uke a “galuega e fai i te galuega a te Aliki.” (1 Koli. 15:58) E mafai o aofia i ei a vaegā galuega e pelā mo te fakatu‵tu mo te faka‵leiga o koga tapuaki, te volenitia ke fesoasoani i fono o fenua mo fono o atufenua, io me ko te tausi atu ki galuega i ofisa lagolago io me ko ofisa ‵fulitusi. Kae e sili i mea katoa, ke fakalave‵lave faeloa tatou i te galuega talai, me iloa ne tatou i te galuega tenei e fakamalosi aka ne ia te ‵tou fakamoemoega mō aso mai mua. Ne fai mai penei se tuagane fakamaoni e tokotasi: “Kafai e faipati koe ki nisi tino e uiga ki fakamanuiaga o te Malo o te Atua, ka iloa aka ei ne koe i au tino fakalogo‵logo e seai loa se olotou fakamoemoega kae ‵kilo atu loa ki olotou fakalavelave konei e pelā me ne mea tumau.” E tonu, a te kau atu ki te galuega talai e fakamalosi ei te ‵tou kilokiloga  ‵lei ki aso mai mua mo te ‵tou fakaikuga ke mo a eiloa e ‵tuka i te fakatau‵telega ki te ola.—1 Koli. 9:24.

10. Fakamatala mai te tulaga ne fepaki mo Tavita.

¹⁰ Ne fakamatala mai ne Ieova a te tupu ko Tavita e pelā me “se tagata e malie a [tena] loto ki ei.” (Galu. 13:22) I tenā olaga kātoa, ne ola a Tavita i se olaga fakamaoni. Kae i se taimi e tasi, ne tō atu a ia ki se agasala matagā. Ne mulilua lāua mo Patisepa. Ne fai foki ne ia se mea e masei atu, ne taumafai a ia o ‵funa a te agasala tenā mai i te faiga o se aofaga ke tamate te avaga a Patisepa, ko Ulia, i te taua. Ne ave foki ne ia se tusi telā e tamate ei a Ulia e auala loa i lima o Ulia! (2 Samu. 11:1-21) Kae ne seki mafai o ‵funa aka te mea tenā, ne fakaasi mai eiloa ki tua te agasala a Tavita. (Male. 4:22) I te taimi ne tupu ei te mea tenā, ne saga atu pefea a Tavita ki ei?

11, 12. (a) Mai tua o te taimi ne agasala i ei, ne a mea ne seki mafai ne Tavita o fai? (e) Kafai tatou e sala‵mo mai tua o te faiga o se agasala matagā, se a te mea e mafai o tali‵tonu tatou me ka fai ne Ieova mō tatou?

¹¹ A mea ne seki mafai ne Tavita o fai: Ne seki mafai ne Tavita o faka‵tonu a mea ko oti ne fai ne ia. Ne seki mafai foki ne ia o fakaseke mai i ikuga o ana mea ‵se ne fai. Ne pokotia eiloa a ia i nisi ikuga o tena agasala ki te taimi ne mate ei a ia. (2 Samu. 12:10-12, 14) Tela la, ne manakogina ke fakatuanaki a ia. Ne ‵tau o loto talitonu me kafai e salamō tonu a ia, ka fakamagalo a ia ne Ieova kae ka fesoasoani atu foki ki a ia ke kufaki i ikuga o ana faifaiga.

¹² Ona ko te tulaga sē ‵lei katoatoa, a tatou katoa e agasala. E matagā atu a nisi mea ‵se i lō nisi mea ‵se. I nisi taimi, e se mafai ne tatou o faka‵tonu a ‵tou mea ‵se ne fai. E ‵tau eiloa o fakafesagai atu tatou ki ikuga o ‵tou mea ‵se. (Kala. 6:7) Kae tiga i ei, ke tali‵tonu tatou ki pati a Ieova me kafai e sala‵mo tatou, ka fesoasoani mai eiloa a ia i taimi faiga‵ta—faitalia foki loa i o tatou eiloa te ‵se.—Faitau te Isaia 1:18, 19; Galuega 3:19.

13. Ne toe faka‵lei aka pefea a Tavita i te feitu faka-te-agaga?

¹³ A mea ne mafai ne Tavita o fai: Ne talia ne Tavita a Ieova ke fesoasoani atu ke toe faka‵lei aka a tena feitu faka-te-agaga. E tasi te auala ne fai a ia penā mai i te taliaga o pati fakatonutonu mai i te sui o Ieova, ko te pelofeta ko Natano. (2 Samu. 12:13) Ne ‵talo foki a Tavita ki a Ieova, fakaasi atu ana agasala kae fakaasi atu foki a tena manakoga tonu ke toe maua ne ia te taliaga a Ieova. (Sala. 51:1-17) I lō te nofo mo ana lagonaga sē ‵lei me ko se aoga a ia, ne tauloto a Tavita mai i ana mea ‵se. Ne seki toe fai eiloa ne ia a agasala matagā konā. I tausaga fakamuli ifo, ne mate a ia mo te fakamaoni; a tena olaga fakamaoni ne mautakitaki i te mafaufau o Ieova.—Epe. 11:32-34.

14. Se a te mea e tauloto ne tatou mai i te fakaakoakoga a Tavita?

¹⁴ Se a te mea e tauloto ne tatou mai i te fakaakoakoga a Tavita? Kafai e fai ne tatou se agasala matagā, e manakogina ke salamō ‵tonu tatou kae ‵sala atu ki a Ieova mō tena fakamagaloga. E ‵tau mo tatou o fakaasi atu a ‵tou agasala ki a ia. (1 Ioa. 1:9) E ‵tau foki mo tatou o olo atu ki toeaina, kolā e mafai o tuku mai ne latou a te fesoasoani i te feitu faka-te-agaga. (Faitau te Iakopo 5:14-16.) Kafai e talia ne tatou a fakatokaga a Ieova, e fakaasi atu ei ne tatou te tali‵tonu ki tena tautoga ke toe faka‵lei kae fakamagalo ne ia tatou. Fakamuli ifo ka mafai o aoga ki a tatou a te tauloto mai i ‵tou mea ‵se ne fai, ga‵solo ki mua i te ‵tou taviniga ki a Ieova, kae ‵kilo atu mo te loto talitonu ki aso mai mua.—Epe. 12:12, 13.

15. Se a te mea e tauloto ne tatou mai i te fakaakoakoga a Hana?

¹⁵ E mafai foki o mafau‵fau tatou ki nisi tavini fakamaoni i aso mua kolā ne tali‵tonu ki a Ieova i te taimi ne fai ei ne latou a fakaikuga ‵lei. E pelā mo Hana, ne seki mafai ne ia o faka‵lei aka a tena fakalavelave ki te seai o sena tama, i a ia eiloa. Kae ne loto talitonu tou fafine me ka  fakamafanafana ne Ieova a ia, telā ne tumau faeloa a ia i te tapuaki atu i te faleie tapu kae fakaasi atu a mea i tena loto e auala i ‵talo. (1 Samu. 1:9-11) E mata, te mea tenā se fakaakoakoga gali mō tatou? Kafai ko fe‵paki tatou mo ma‵saki io me ko nisi fakalavelave kolā ko sē mafai ne tatou o fakafesagai atu ki ei, ke ‵pei atu katoa ki luga i a Ieova a mea e manava‵se tatou i ei, mo te loto talitonu me atafai mai eiloa a ia ki a tatou. (1 Pe. 5:6, 7) Kae e fai eiloa ne tatou a mea kolā e mafai ne ‵tou malosi o fai ke maua ne tatou a mea aoga i fakatasiga Kelisiano mo nisi fakatokaga faka-te-agaga.—Epe. 10:24, 25.

16. Ne a mea e mafai ne mātua o tauloto mai i te toeaina ko Samuelu?

¹⁶ Kae pefea a mātua fakamaoni kolā ko tiaki ne olotou tama‵liki a te munatonu? A te toeaina ko Samuelu ne seki mafai ne ia o faimālō a ana tama ta‵gata ke tumau i te fakamaoni ki tulaga amio‵tonu kolā ne akoako ne ia ki a latou. (1 Samu. 8:1-3) Ne tuku atu ne ia te fakalavelave tenā ki lima o Ieova. Tela la, ne mafai eiloa o tumau a Samuelu i tena fakamaoni kae fakafiafia atu ki tena Tamana faka-te-lagi ko Ieova. (Faata. 27:11) I aso nei, e isi foki ne mātua Kelisiano e fakafesagai atu foki ki tulaga tai ‵pau penā. E tali‵tonu latou me pelā mo te tamana i te ‵tala o te tamaliki fakamaumau mea, e tumau faeloa a Ieova i te kilokilo ke lavea ne ia kae talia mai foki se tino agasala telā ko salamō. (Luka 15:20) Kae i te tulaga foki eiloa tenā, e ga‵lue malosi a vaegā mātua penā, ke tumau latou i te fakamaoni ki a Ieova, mo te fakamoemoega me ka fai ne olotou fakaakoakoga ‵lei ke toe ‵foki mai olotou tama‵liki ki Ia.

17. Kaia e fai ei te fafine mativa ko mate tena avaga e pelā me se fakaakoakoga ‵lei ki a tatou?

¹⁷ Mafau‵fau foki ki te fafine mativa ko mate tena avaga i aso o Iesu. (Faitau te Luka 21:1-4.) Ne seki mafai ne ia o fai se mea ki faifaiga sē fakamaoni kolā ne fai i te faletapu. (Mata. 21:12, 13) Ne seki lasi foki a tena mea e mafai o fai ke faka‵lei aka a tena olaga i mea tau tupe. Kae ne lafo atu eiloa ne ia mo te lotomalie “a tupe fo‵liki e lua,” kolā “ko ana mea katoa e ola ei a ia.” Ne fakaasi mai ne te fafine fakamaoni tenei a tena talitonu ki a Ieova mo te loto kātoa, me iloa ne ia me kafai e fakamuamua ne ia a mea faka-te-agaga, ka tausi atu eiloa a Ieova ki ana manakoga faka-te-foitino. Ne fai ne te loto talitonu o te fafine tenei ke ‵lago atu a ia ki fakatokaga mō te tapuakiga tonu. E penā foki tatou, e tali‵tonu tatou me kafai e ‵sala muamua ne tatou te Malo, e fakamautinoa aka ne Ieova me maua eiloa ne tatou a mea e ma‵nako tatou ki ei.—Mata. 6:33.

18. Tuku mai se fakaakoakoga o se tavini fakamaoni i aso nei telā ne maua ne ia se kilokiloga tonu ki te olaga.

¹⁸ E tokouke a ‵tou taina tali‵tonu i aso nei ne fakaasi atu foki ne latou se loto talitonu tai ‵pau penā ki a Ieova, kae ne ga‵sue foki latou o fai olotou fakaikuga konā. Mafaufau ki se taina e igoa ki a Malcolm, telā ne tumau i te fakamaoni ke oko loa ki tena mate i te 2015. E silia atu mo te fia sefulu tausaga ne tavini atu ei lāua mo tena avaga ki a Ieova, ne fakafesagai atu foki lāua ki mea fakafia‵fia penā foki mo mea faiga‵ta. “A te olaga e mafulifuli, e se mautinoa, kae faigata foki o fakafesagai ki ei i nisi taimi,” ko ana pati. “Kae fakamanuia eiloa ne Ieova a latou kolā e fakalago‵lago ki a ia.” Se a te fesoasoani mai i a Malcolm? “‵Talo ke ‵fua malosi kae toaga malosi koe i te galuega a Ieova. Saga tonu ki mea kolā e mafai ne koe o fai, kae e se ko mea e se mafai ne koe o fai.” *

19. (a) Kaia e fetaui ‵lei ki a tatou a te ‵tou tusi siki fakavae mō te 2017? (e) E fakagalue aka pefea ne koe te tusi siki fakavae mō te 2017 i tou olaga?

¹⁹ I taimi e gasolo ei a te olaga tenei “mai te masei o na ma‵sei atu eiloa,” e fakamoe‵moe tatou ke fe‵paki mo fakalavelave faiga‵ta e uke atu. (2 Timo. 3:1, 13) Tela la, ko oko eiloa i te tāua ke mo a eiloa e talia ne tatou ke fakaseaoga tatou ne vaegā fakalavelave penei. I lō te fai penā, e manakogina ke ati aka ne tatou se loto talitonu malosi ki a Ieova i te taimi e fai ei ne tatou so se fakaikuga telā e mafai ne tatou o fai. E fetaui ‵lei eiloa te mea tenei mo te ‵tou tusi siki fakavae mō te 2017: ‘Fakatuanaki ki a Ieova kae fai te mea ‵lei’!—Sala. 37:3.