1. მუ სარკო თვისებეფით გაჭყუ იეჰოვაქ კოჩი?

იეჰოვაქ კოჩი სარკო თვისებეფით გაჭყუ. თიქ ქომჩეს ფიქრიშ უნარი, ნამდა გეგნობჭყვიდათ პრობლემეფ დო დაბგეგმათ მომავალი (იგავ. 2:11). ღორონთიქ ძალა ხოლო ქომჩეს გეგმეფიშ შეიოსრულებელო, ნამდა ქიმვოჭირინუათ სწორ მიზნეფს (ფილ. 2:13). თიქ სინდის ხოლო ქომჩეს — ჯგირ დო ფურიშ გარჩიებაშ უნარი, ნამუთ მოხვარუნა, ვა ვაკეთათ გლახა დო გეგშვასწორათ ჩქინ შეცდომეფი (რომ. 2:15).

2. მუს ელუ იეჰოვა ჩქინდე?

² იეჰოვა ჩქინდე ელუ, ნამდა ჩქინ თვისებეფს სწორას გეგმიბრინუანთ. ჩქი უჸორთ თის დო უჩქ, ნამდა თე ძღვინიშ გიმორინაფა კმაყოფილებას მომღანა. მუშ სიტყვათ იეჰოვა ირიათო მიზუკოლუნა, თე თვისებეფი სწორას გეგმიბრინუათ. მაგალთო, ებრაულ წერილეფს პკითხულენთ: „მოხანდეშ გეგმეფს წიმოძინა უღუ“ დო „ირფელს, მუდგას ხეს მეკიდენქინ, აკეთი მთელ სქან ძალათ“ (იგავ. 21:5; ეკლ. 9:10). ქრისტიანულ ბერძნულ წერილეფს ჭარ: „ონდო დრო ხეს მინწყუნან, ირკოჩის ჯგირ უკეთათ“ დო „თითოულქ მუ ძღვინ მიღითინ, თი ძღვინით ემსახურით ართიანს“ (გალ. 6:10; 1 პეტ.  4:10). თაშ ნამდა, იეჰოვას ოკო მუჭოთ ჩქინო, თეშ შხვაშო ხოლო ჯგირ ვაკეთათ.

3. მუშ კეთება ვეშემლებუნა?

³ თეწკუმა ართო, იეჰოვას თინა ხოლო არჩქილე, ნამდა ბრელ მუთუნიშ კეთება ვეშემლებუნა. ჩქინით დღას ვამმაშორებენა არასრულყოფილება, ცოდა დო ღურა; შხვეფ ხოლო ვა მაკონტროლებენა, მუშენდა არძას ნებაშ თავისუფლება უღუ (1 მეფ. 8:46). მნიშვნელობა ვაუღუ, მუსხი რჩქინა დო გამოცდილება ვემიბღათინ, ირო ბაღანეფცალ იპჸით იეჰოვაშ გინაწონს (ეს. 55:9).

4. მუს გუვარჩიენთ თე სტატიას?

⁴ არძა სიტუაციას მოსაჭირუნა იეჰოვაშ ხემძღვანელობა დო თიშ მენდება, ნამდა ქელამდირთუნა დო მუთ ჩქი ვეშემლებუნან თის, თინა გაკეთენს. მარა თეწკუმა ართო, მუთ შემლებუნა ირფელ ოკო გუვაკეთათ, ნამდა გეგნოპჭყვიდათ პრობლემეფი დო შხვას ხოლო ქიმვეხვარათ (წეკითხით ფსალმუნიშ 37:3). თაშ ნამდა, ოკო „ქიმვენდათ იეჰოვას დო ვაკეთათ ჯგირ“ დო ქოთ „ართგურო მიფქცუათ“. მორთ გუვარჩუათ, მუშ გურაფა შემლებუნა ნოეშ, დავითიშ დო ღორონთიშ შხვა ართგურ მსახურეფიშ მაგალითეფშე, მით იეჰოვაშა რდეს მენდებულ დო მუს ორთუდეს თეშ გურშენ. ჩქი ქობძირუნთ, მუშ კეთება შილებუეს დო მუქ ვეშიალებეს თინეფს დო მუჭო მოქმედენდეს თე დროს.

5. მუ პრობლემეფიშ წოხოლე გერდ ნოე?

⁵ ნოე ცხოვრენდ ქიანას, ნამუთ „ეფშა რდუ უბადობათ“ დო უზნეობათ (დაბ. 6:4, 9—13). თის უჩქუდ, ნამდა იეჰოვა აუცილებერო ბოლოს მუღენდ თე უბადო ქიანას, მარა ნოეს იშენით უჭირდ თეცალ უღორონთე ქიანაშ გარზება. თე დროს ნოექ ქიმეხვად, ნამდა რდუ თიცალ მუდგარენეფ, ნამუშ კეთება ვეშულებუდ, მარა შხვა მუდგარენეფიშ კეთება შეულებუდ.

6, 7. ა) მუშ კეთება ვეშულებუდ ნოეს? ბ) მუ გაგებათ ვორეთ ამდღა ჩქი ნოე რდუნ თიშნერ სიტუაციას?

⁶ მუშ კეთება ვეშულებუდ ნოეს: თიშ უმკუჯინუო, ნამდა ნოე იეჰოვაშე გუმაფრთხილებელ ამბეს ართგურო ქადაქენდუნ, თის ვეშულებუდ ქუდანძალუკო უღორონთე ხალხის, ქუმურჩქილუაფდესკო თე ამბეშა დო ვართ თინა, ნამდა დიდწყარალას დროშე ადრე ქუმურთუმუდკო. ნოექ მიენდკო ოკო იეჰოვას, ნამდა მუშ განზრახვას ვეგიჭყოლიდუანდ დო უბადობას მუშ დროს ბოლოს მუღენდ (დაბ. 6:17).

 ⁷ ჩქი ხოლო უბადობათ ეფშა ქიანას ფცხოვრენთ დო იეჰოვას გინოჭყვიდილ აფუ თიშ განადგურება (1 იოან. 2:17). ამდღა ჩქი ვეშემლებუნა ხალხის დუვანძალათ, მიღან „სახიოლო ამბე სამეფოშ გურშენ“ დო ვართ „დიდ გასაჭირიშ“ დაჩქარებელო მაკეთებენა მუთუნ (მათ. 24:14, 21). ნოეცალო ჩქი ხოლო ოკო ბწანდან თიშ, ნამდა თე ქიანას მალას ღორონთი ჩერიებუ (ფსალმ. 37:10, 11). ჩქი დარწმუნებულ ვორეთ, იეჰოვა ნებას ვემეჩანს თე უბადო ქიანას, მუს გინოჭყვიდილ აფუნ თიშე ართ დღათ მეტით ქიარსებას (აბაკ. 2:3).

8. მუშა გინუღუდ ნოეს ყურადღება? (ქოძირით სურათ მა-7 გვერდის)

⁸ მუშ კეთება შეულებუდ ნოეს: თიშ მანგიორო, ნამდა მუთ ვეშულებუდუნ თიშე უფიქრებუდკონ, ნოექ ყურადღება გეგნიღ თიშა, მუდგაშ კეთება შეულებუდუნ. მუჭოთ „სიმართლეშ მაქადაქებელ“, ნოე აცხადენდ გუმაფრთხილებელ ამბეს, ნამუთ თიშა რდუ მენდებულ (2 პეტ. 2:5). სინამდვილეს თექ ქიმეხვარ ნოეს, რწმენას მანგარო ქიგედირთუკონ. ქადაქებაშ გარდა, თინა გიმირინუანდ მუშ ფიზიკურ დო გონებრივ უნარს ხოლო, უკეთებუდკო ღორონთშე დავალებულ საქმე, ნამუთ რდუ კიდობანიშ შენება (წეკითხით ებრაელეფიშ 11:7).

9. მუჭო შემლებუნა მივაჸუნათ ნოეშ მაგალითის?

⁹ ნოეცალო ჩქი ხოლო ვოცადუთ, ბრელ იფხანდათ ღორონთიშ საქმეს (1 კორ. 15:58). თეცალ საქმეშა შილებე მიშეშას თაყვანიშცემაშ ადგილეფიშ შენება დო რემონტი, კონგრესეფიშ დროს მოხალისეთ მუშობა დო ბეთელს ვარდა მათარგმნალეფიშ ოფისის შხვადოშხვა დავალებეფიშ შესრულება. თეშ გარდა, დაკავებულ ვორეთ ქადაქებაშ საქმეთ, მუშენდა თენა მიმანგარენა მომავალიშ იმენდის. ართ ართგურ და იჩიებ: „მუჟამსით შხვეფს ღორონთიშ სამეფოშ კურთხევეფიშ გურშენ ურაგადუთინ, ვორწყეთ, ნამდა თინეფს მუთუნნერ იმენდი ვა უღუნა დო ფიქრენა, ნამდა დღას ვეგშართენა პრობლემეფშე“. დასურო, მუჟამსით შხვეფს უქადაქენთინ, უმოსო მემანგარებუნა მომავალიშ იმენდი დო თიშ სურვილ, ნამდა დუდ ვადვანებათ სიცოცხლეშო რულას (1 კორ. 9:24).

10. მუ სიტუაციას ენოლ დავითიქ?

¹⁰ იეჰოვაქ დავით მეფეშ გურშენ თქუ, ნამდა თინა მუშო მოსაწონ კოჩი რდუ  (საქ. 13:22). მთლიანობას დავით ართგურო ომსახურუდ ღორონთის. მარა თეშ უმკუჯინუო, თინა სერიოზულ შეცდომეფს ხოლო უშვენდ. არჩა თიქ ბათ-შებაწკუმა ქიმრუშ. დავითიქ ხოლო უფრაშ გაკეთ; ცოდაშ ოფორალო თიქ ბათ-შებაშ ქომონჯი ჩხუპის დაჸვილაფუ. დავითიქ ურიას მუშ ხეთ მიდაღალაფუ წერილ, სოდეთ ჭარუდ, ნამდა თინა ოკო დოჸვილესკო ჩხუპის (2 სამ. 11:1—21). მარა დავითიშ ცოდეფქ გეგმიარგამ (მარ. 4:22). მუნერ რეაქცია უღუდ დავითის თე დროს?

11, 12. ა) მუშ კეთება ვეშულებუდ დავითის შეცოდუნ თიშ უკულ? ბ) მუშა შილებე ვორდათ დარწმუნებულ შურ დო გურით მიმნანიენთინ თიშ უკულ?

¹¹ მუშ კეთება ვეშულებუდ დავითის: დავითის ვათირედ თინა, მუთ კეთებულ აფუდ. თის ვართ მუშ შეცდომაშ შედეგეფშე ანტინედ. ფაქტიურო, ცოდაშ ნამთინე შედეგწკუმა მთელ მუშ ცხოვრებას აჸიდ ობრძოლებელ (2 სამ. 12:10—12, 14). თაშ ნამდა, თის რწმენა ოსაჭირუდ. შურდოგურით მინანიენდუნ თიშ უკულ, თიქ მიენდკო ოკო იეჰოვას, ნამდა თინა ქაპატიენდ დო ქიმეჩანდ ძალას, ქებრძოლუკო მუშ საქციელიშ შედეგეფს.

¹² ჩქი სრულყოფილეფ ვა ვორეთ, ათეშგურშენ არძას მუმალენა შეცდომეფი. ნამთინეშა სერიოზულ შეცდომეფს ხოლო უშვენთ. მინშა დაშვებულ შეცდომეფიშ გიმოსწორება შეიოლებერ ვა რე, ათეშგურშენ დუდ ვემაჩილითენა ჩქინ საქციელიშ შედეგეფშა დო შილებე სიცოცხლეშ ბოლოშა მაჸუან თინეფშა გარზებელქ (გალ. 6:7). მარა ბჯერა ღორონთიშ სიტყვაშ დო ვონდუთ თის, ნამდა თინა ქიმმეხვარებუნა თი შემთხვევას ხოლო, მუჟამსით რთულ მდგომარეობას ჩქინ შეცდომეფიშ გურშენ ვორეთ (წეკითხით ესაიაშ 1:18, 19; საქმეეფიშ 3:19).

13. მუჭო გემანგარ დავითიქ სულიერო?

¹³ მუშ კეთება შეულებუდ დავითის: დავითიქ იეჰოვას ქიმეჩ საშვალება, ქუმუხვარებუდკო თიშა დო სულიერო გუმანგარებუდკო. თიქ ქუმურჩქილუ იეჰოვაშ წარმომადგენელს, წინასწარმეტყველ ნათანს დო მიღუ შეგონება (2 სამ. 12:13). დავითიქ ლოცვათ ხოლო მიმართ იეჰოვას, აღიარ ცოდეფი დო მთელ გურით ქოთხუ, ნამდა კინ მიღუკო თიშ ჭყოლოფა (ფსალმ. 51:1—17). დავითიქ მუშ შეცდომეფშე ბრელ მუთუნ ქიდიგურუ დო ვადუშვ, ნამდა დანაშაულიშ გრძნობას თიშა გურ გუტახუდკო. თეშ უკულ თის დღას ვადუშვებ თეცალ სერიოზულ შეცდომეფი. თინა ღურაშახ ართგურ რდუ დო იეჰოვაშ მეხსიერებას ხოლო თეცალო ქუდოსკიდ (ებრ. 11:32—34).

14. მუშ გურაფა შემლებუნა დავითიშ მაგალითშე?

¹⁴ მუშ გურაფა შემლებუნა დავითიშ მაგალითშე? სერიოზულ ცოდა ჩებდინით-და, მთელ გურით ოკო მიმნანუათ დო ქოფთხუათ იეჰოვას პატიება. ჩქი ვაღიარათ ოკო ცოდეფი ღორონთიშ წოხოლე (1 იოან. 1:9). თეშ გარდა, უხუცესეფშა ოკო ქიმეფრთათ, მუშენდა თინეფს შეულებუნა ჩქინ სულიერ მოხვარა (წეკითხით იაკობიშ 5:14—16). მუჟამსით გეგმიბრინუანთ არძა საშვალებას, ნამუსით იეჰოვა მარზენა, თეთ ვოძირანთ თიშ რწმენას, ნამდა თინა სულიერო გეგშმაცოცხლენა დო ქუმაპატიენა ცოდეფს. თეშ გარდა, ქიდიბგურუათ ოკო ჩქინ შეცდომეფშე, გავაგრძელათ იეჰოვაშ მსახურება დო იმენდით უჯინათ მომავალს (ებრ. 12:12, 13).

15. მუ მაგალით დომტუეს ხანაქ?

¹⁵ შილებე ქუგგაშინან ჯვეშ დროს ცხოვრენდესინ ფერ შხვა ართგურ მსახურეფქ ხოლო, მით ონდუდეს იეჰოვას დო ორთუდეს თის, მუდგაშ კეთება შეულებუდეს. მაგალთო, ხანას სქუა ვაშიდ დო თის მუშ ძალეფით ვეშულებუდ თე პრობლემაშ მოგვარება. მარა ხანას ჯერდ, ნამდა იეჰოვას შეულებუდ თიშა გურიშ ელაკინა, ათეშგურშენ აგრძელენდ კარავს ღორონთიშ თაყვანიშცემას დო ლოცვას გურს გინუფაჩუნდ თის (1 სამ. 1:9—11). ხანაქ მართალო  ჯგირ მაგალით დომტუეს! მუჟამსით მაწუხენა ჯამრთელობა ვარდა შხვა პრობლემეფი, ნამუშ მოგვარება ჩქი ვეშემლებუნა, ღორონთის მივანდათ ოკო ჩქინ ოწუხებელ დო ბჯერდან, ნამდა თინა ქიზრუნენს ჩქინო (1 პეტ. 5:6, 7). თეშ გარდა ირფელ ოკო გავაკეთათ, მუთ ჩქინ ძალეფს რე, ნამდა გემამგარათ ქრისტიანულ შეხვალამეფს დო შხვა სულიერ ღონისძიებეფს (ებრ. 10:24, 25).

16. მუშ გურაფა შეულებუნა მშობლეფს სამუელიშ მაგალითშე?

¹⁶ მუშ კეთება შეულებუნა მშობლეფს, მიდგაშ სქუალეფქ ეურთეს სწორ შარას? მოხუცებულ სამუელს ვეშულებუდ დანძალუკო მუშ ძინათებულ სქუალეფს, დეცვესკო ღორონთიშ სამართლიან კანონეფ, ნამუთ მუქ დაგურუ (1 სამ. 8:1—3). სამუელქ თე პრობლემა ღორონთის ოკო მიანდუკო. თის შეულებუდ კინ ართგურო ემსახურუკო იეჰოვას დო გახარუკო ზეციერ მუმაშ გურ (იგავ. 27:11). ამდღა ხოლო ბრელ ქრისტიან მშობელ რე თეცალ სიტუაციას. თინეფს ჯერა, ნამდა შარას ეჩილათირ სქუაშ იგავს მოშინაფილ მუმაცალო, იეჰოვა ირო მზათ რე, მიღას თინეფ, მიდგა ინანიენს (ლუკ. 15:20). თეცალ მშობლეფი ირნერო ოცადუნა, ქუდოსკიდან იეჰოვაშ ართგურეფქ დო ვადინუანა იმენდის, ნამდა მუნეფიშ მაგალითით, სქუალეფ კინ დართუნა ღორონთის.

17. მუშენ ელამკინანა გურშა გაჭირებულ ქომონჯ ღურელ ოსურიშ მაგალითი?

¹⁷ დეფიქრით თი გაჭირებულ ქომონჯ ღურელ ოსურიშ მაგალითშენ ხოლო, ნამუთ იესოშ დროს ცხოვრენდ (წეკითხით ლუკაშ 21:1—4). თის ვეშულებუდ გაგმასწორუკო თი უსამართლობა, ნამუთ ტაძარს არსებენდ (მათ. 21:12, 13). თის ვართ მუშ ფინანსურ მდგომარეობაშ გაუჯგუშება შეულებუდ. თეშ უმკუჯინუო, თიქ ნებაყოფლობით შეწირ „ჟირ ჭიჭე მონეტა“, ნამუთ „დუდიშ ეიოჯუმაფალო უღუდ“. თე ართგურ ოსურქ დამტკიც, ნამდა თინა მთელ გურით რდუ მენდებულ იეჰოვაშა. თის ჯერდ, ნამდა იეჰოვა ქიზრუნენდ თიშ ფიზიკურ მოთხოვნილებეფშენ, მუჟამსით პირველ ადგილს სულიერ საქმეეფს ქიგიორინუანდ. ღორონთიშ მენდებაქ ქიმეხვარ თე ოსურს, ხუჯი ქუდუკინებუდკო წმინდა თაყვანიშცემაშა. თეგვარო, ჩქი ხოლო დარწმუნებულ ვორეთ, ნამდა იეჰოვა ქომჩანა ირფელს, მუთ მოსაჭირუნა, მუჟამსით პირველ ადგილს სამეფოშ საქმეს ქიგვორინუანთ (მათ. 6:33).

18. ქიმიჸონ თანამედროვე მსახურიშ მაგალით, ნამუსით სწორ თოლწონუა უღუდ.

¹⁸ ამდღა ხოლო ჩქინ თანამორწმუნეეფშე ბრელ რე მენდებულ იეჰოვაშა დო ირფელს ორთუნა, მუთ თინეფიშ ძალეფს რე. დეფიფქრათ ართ ჯიმაშენ, მალკოლმშენ, ნამუთ სიცოცხლეშ ბოლოშა, 2015 წანაშა ართგურო ომსახურუდ ღორონთის. ჯიმა მალკოლმი დო მუშ მეუღლე წანობით ომსახურუდეს იეჰოვას დო თინეფს ბრელ ჯგირ დო გლახა პერიოდ უღუდეს. „ცხოვრება ველუქინ ფერ მუდგარენეფით რე ეფშა; მინშა თიცალ პრობლემეფ გემკორჩქინდუ, ვაიჩქ, მუჭო მერუე თინეფს. მარა იეჰოვა აკურთხენს თინეფს, მით მენდებულ რენა თიშა“, — იჩიებ მალკოლმი. თინა მირჩიენა: „ილოცი, ნამდა აქტიურო დო ნაყოფიერო ემსახურე ღორონთის, მუჭო შეილებუნ თეშ. ყურადღება მიაქცი თის, მუდგაშ კეთება შეილებუნ, დო ვართ ხოლო თის, მუდგაშ კეთება ვეშეილებ“. *

19. ა) მუშენ რე 2017 წანაშ მუხლი დროულ? ბ) მუჭო გიმირინუანქ ცხოვრებას 2017 წანაშ მუხლის?

¹⁹ ამდღარ ქიანას მდგომარეობა უმოსო იუფრაშებ, ათეშგურშენ ოკო მიველუდათ, ნამდა უმოს სირთულეეფს ქეშეფხვადუთ (2 ტიმ. 3:1, 13). ამდღა არძაშ უმოს მნიშვნელოვან რე, ვემეფჩათ საშვალება თე სირთულეეფს ქუდმორაგუან სულიერო. საჭირო რე, გუვავითარათ იეჰოვაშა მენდება დო ვაკეთათ თინა, მუთ შემლებუნა. 2017 წანაშ მუხლი მართალო დროულ რე: „ქიმიენდ იეჰოვას დო ჯგირ აკეთი“ (ფსალმ. 37:3).