1. Ana Yehofa ŵatupanganisye m’litala lyatuli?

YEHOFA ŵatupanganyisye m’litala lyakuti tukomboleje kutenda yindu yakulekanganalekangana. Mwambone, jwalakwe ŵatupele lunda lwakuganicisya lwalukusatukamucisya kumalana ni yakusawusya soni kosecela ya msogolo. (Miy. 2:11) Ŵatupelesoni macili kuti tukomboleje kutenda yatukuganisya soni kuti tukwanilisyeje yakulinga yetu. (Afi. 2:13) Jwalakwe ŵatupelesoni cikumbumtima, cacikusatukamucisya kuti tuŵambaleje kutenda yakulemweceka soni kuti tukawilisyaga kutenda yatwalemwisye.—Alo. 2:15.

2. Ana Yehofa akusasaka kuti tukamulicisyeje masengo catuli lunda lwetu?

² Yehofa akusasaka kuti tukamulicisyeje masengo lunda lwetu mwakuŵajilwa. Ligongo cici? Ligongo lyakuti jwalakwe akusatunonyela soni akusamanyilila kuti naga tukamulicisya masengo cenene mtukawu, tuciŵa ŵakusangalala. Kupitila m’Maloŵe gakwe, Yehofa mwakuwilisyawilisya akusatulimbikasya kuti tukamulicisyeje masengo cenene lunda lwetu. Mwambone, m’Malemba Gacihebeli, tukusaŵalanga kuti, ‘Yakuganisya ya mundu jwamtawu yikusakola yakuyicisya  yambone,’ soni kuti, “Cilicose calipatile ligasa lyenu kuti litende, m’citendeje ni macili genu gosope.” (Miy. 21:5; Mlal. 9:10) M’Malemba Gacigiliki Gaciklistu, tukusaŵalangasoni kuti, ‘Ndaŵi syosope, patupatile lipesa, kwende twatendele wosope yambone,’ soni kuti, ‘Mwakamulana ni mwapocelele mtuka mundu jwalijose, awukamulicisyeje masengo mtukawo pakwatumicila ŵane.’ (Aga. 6:10; 1 Pet. 4:10) Kusala yisyene, Yehofa akusasaka kuti tutendeje yindu yampaka yitukamucisye acimsyewe soni ŵandu ŵane.

3. Ana ŵandu akwete malile gatuli?

³ Pandaŵi jakulandanajo, Yehofa akusamanyilila kuti ŵandu akwete malile. M’weji pajika, nganituŵa tukombwele kutyosya ungali umlama, ulemwa, ni ciwa, soni nganituŵa tukombwele kulamulila nganisyo sya ŵane pakuŵa jwalijose akwete ufulu wakutenda yakusaka. (1 Maf. 8:46) Atamose tuli tukwete lunda lwejinji kapena tukusamanyilila yindu cenene, tucijendelecelape kuŵa mpela ŵanace pakulandanya ni Yehofa.—Yes. 55:9.

4. Ana mungani ajino citutagulilane cici?

⁴ Mu yitendo yetu yosope tukusosekwa kumjegamila Yehofa kuti atulongoleleje, tuli mkulupilila kuti jwalakwe catukamucisyeje soni kututendela yindu yanganituŵa tukombwele kuyitenda acimsyewe. Nambope, Yehofa akusasaka kuti tutendeje yampaka tukombole kuti tumasye yakusawusya yetu soni kuti twakamucisyeje ŵane. (Aŵalanje Salimo 37:3.) Mwakata, tukusosekwa ‘kumkulupilila Yehofa soni kutenda yambone.’ Tukusosekwasoni kuŵa ‘ŵakulupicika mu yitendo yetu.’ Ana mpaka tutende catuli yeleyi? Kwende tulole yampaka tulijiganye kutyocela ku cisyasyo ca Nowa, Daudi, soni ŵakutumicila ŵakulupicika ŵane ŵaŵamjegamilaga Yehofa soni ŵaŵatesile yakuŵajilwa. Patukutagulilana yisyasyoyi, tulole kuti papali yindu yine yangamkanakombola kutenda ni yakakombwele kutenda.

5. Alondesye muyaŵelele yindu mu ndaŵi ja Nowa.

⁵ Nowa ŵatamaga m’cilambo cele ŵandu ŵakwe ŵatendaga “yitendo yakuwulasyana” soni yakusakala yejinji. (Gen. 6:4, 9-13) Jwalakwe ŵamanyililaga kuti kusogolo Yehofa cacijonanga cilambo cakusakalaco. Atamose yaliji m’yoyo, komboleka kuti Nowa ŵatengwice ni ndamo syakusakala syaŵatendaga ŵanduwo. Ni yakutendekwa yeleyi, Nowa ŵamanyililaga kuti pana yindu yine yangamkanakombola kutenda, soni yakakombwele kutenda.

6, 7. (a) Ana yindu yapi yangamkanakombola Nowa kutenda? (b) Ana masiku agano tukulandana ni Nowa m’litala lyapi?

⁶ Yangamkanakombola Nowa kutenda: Atamose  kuti Nowa ŵalalicilaga mwakulupicika utenga wakalamusya wa Yehofa, nambo jwalakwe ŵamanyililaga kuti ngamkaniŵakanganicisya ŵandu ŵakusakalawo kuti apocele utengawo. Nambosoni jwalakwe ngamkanatendekasya kuti cikumba ciyice mwacitema. Nowa ŵasosekwaga kukulupilila kuti Yehofa cacikwanilisya yaŵalagucisye yakuti cacajonanga ŵandu ŵakusakala soni kuti cacitenda yeleyi pandaŵi jakuŵajilwa.—Gen. 6:17.

⁷ M’wejisoni tukutama m’cilambo cacigumbele yakusakala. Nambo tukumanyilila kuti Yehofa alagucisye kuti cacijonanje. (1 Yoh. 2:17) Pandaŵi ajino, nganituŵa twakanganicisye ŵandu kuti apikanileje ‘ngani syambone sya Ucimwene.’ Nganituŵasoni tutesile cilicose cakutendekasya kuti “yisawusyo yekulungwa” yitande mwacitema. (Mat. 24:14, 21) Mpela Nowa, tukusosekwa kola cikulupi cakulimba soni kukulupilila kuti pacangakaŵapa Mlungu camasye yakusakala yosope. (Sal. 37:10, 11) Tuli ŵakusimicisya kuti Yehofa ngasakunda kuti cilambo cakusakalaci cijendelecele kupunda pa lisosa lyakwe atamose ni lisiku limope.—Hab. 2:3.

8. Ana Nowa ŵaŵisile catuli nganisyo syakwe syosope pa yindu yakakombwele kutenda? (Alole ciwulili cacili kundanda kwa nganiji.)

⁸ Yakakombwele Nowa kutenda: M’malo mwakutenguka ligongo lya yindu yangamkanakombola kutenda, Nowa ŵaŵikaga nganisyo syakwe syosope pa yindu yakakombwele kutenda. Mpela “jwakulalicila jwacilungamo,” Nowa mwakulupicika ŵalalicile utenga wakalamusya wa Yehofa. (2 Pet. 2:5) Mwangakayicila, kutenda yeleyi kwamkamucisye Nowa kuti akole cikulupi cakulimba. Konjecesya pelepa, jwalakwe ŵakamulicisye masengo macili soni lunda lwakwe kuti akwanilisye masengo gaŵampele Mlungu gakutaŵa combo.—Aŵalanje Ahebeli 11:7.

9. Ana mpaka tumsyasye catuli Nowa?

⁹ Mpela Nowa, m’wejisoni tukusalingalinga kola “yakutenda yejinji m’masengo ga Ambuje.” (1 Akoli. 15:58) Masengoga mpaka gapwaticepo kutaŵa ni kulinganya yayijonasice pa malo gakutendela misongano jekulungwakulungwa, pa Nyumba ja Ucimwene kapena kutumicila pa ofesi ja nyambi soni pa ofesi jagopolela mabuku. Nambo cakupunda pa yosopeyi, tukusakamulicisya masengo ndaŵi jetu jekulungwa pa masengo gakulalicila, gagakusalimbisya cembeceyo cetu ca msogolo. Mlongo jwine jwakulupicika, jwaŵecete kuti, “Pawukuŵecetana ni ŵandu ya majali ga Ucimwene wa Mlungu, ni pawukusamanyilila kuti ŵakukupikanilawo ŵangali kose cembeceyo soni akusayiwona yakusawusya yawo kuti ngaŵa mkumala mpaka kalakala.” Kusala yisyene, kamula masengo gakulalicila kukusalimbisya cembeceyo cetu cakwamba ya  msogolo. Cembeceyoci cikusatukamucisya kwendelecela kuŵa pa mpikisano wa ku umi.—1 Akoli. 9:24.

10. Alondesye muyaŵelele yindu ni Daudi.

¹⁰ Mwenye Daudi ŵaliji mundu jwakulupicika, soni Yehofa ŵamnonyelaga mnope. (Mase. 13:22). Atamose yaliji m’yoyo, pandaŵi jine jwalakwe ŵatesile cikululu ni Batiseba. Cakusakala mnope caliji cakuti, jwalakwe ŵalinjile kusisa cakulemwaco mwakulinganya yakuti Uliya, jwaŵaliji ŵamkwakwe Batiseba awulajidwe pangondo. Daudi ŵayikene pakumpela cikalata Uliya msyenejo cacasalaga kuti am’ŵice kusogolo kwa asilikali kuti awulajidwe. (2 Sam. 11:1-21) Pambesi pakwe, yakulemwa yaŵatesile Daudi yamanyice. (Maliko 4:22) Ana Daudi ŵatesile cici payamanyice yeleyi?

11, 12. (a) Ana Daudi ngamkanakombola kutenda cici panyuma pakuti alemwisye? (b) Naga tupitikwice mtima panyuma pakutenda cakulemwa cekulungwa, ana tukusosekwa kulupilila kuti Yehofa catutendele cici?

¹¹ Yangamkanakombola Daudi kutenda: Daudi ngamkanakombola kusimasya yakulemwa yaŵatesile. Ngamkanakombolasoni kutila yakuyicisya yakusakala yakwika ligongo lya yakulemwa yakwe. Sonitu, yakuyicisya yine yaŵelepe ni Daudi kwa umi wakwe wosope. (2 Sam. 12:10-12, 14) M’yoyo, Daudi ŵasosekwaga kola cikulupi. Jwalakwe ŵasosekwaga kukulupilila kuti naga akupitikuka mtima, Yehofa mpaka amkululucile soni kumkamucisya kupilila yakuyicisya yakusakala yakwika ligongo lya yakulemwa yakwe.

¹² Ligongo lyakuti tuli ŵangali umlama, wosopewe tukusalemwa. Yakulemwa yine mpaka yiŵe yekulungwa mnope kupunda yine. Ndaŵi sine nganituŵa tukombwele kusimasya yakulemwa yatutesile. Mpaka tusosekwe kulagasika ligongo lya yakulemwa yatutesileyo. (Aga. 6:7) Nambo tukusakulupilila yaŵalagucisye Mlungu kuti naga tukupitikuka mtima, jwalakwe cacitukamucisya pandaŵi ja yakusawusya yetu atamose yili yakuti tutendekasisye acimsyewe.—Aŵalanje Yesaya 1:18, 19; Masengo 3:19.

13. Ana Daudi ŵatesile yatuli kuti yindu yitandesoni kumjendela cenene mwausimu?

¹³ Yakakombwele Daudi kutenda: Daudi ŵakundile kuti Yehofa amkamucisye kuti yindu yitandesoni kumjendela cenene mwausimu. Litala limo lyaŵatendele yeleyi lyaliji kunda camuko cakutyocela kwa jwakulocesya jwa Yehofa, Natani. (2 Sam. 12:13) Daudi ŵapopesilesoni kwa Yehofa soni kumsalila yakulemwa yakwe, yayalosisye kuti jwalakwe ŵasacililaga kuti aŵesoni pa unasi ni Yehofa. (Sal. 51:1-17) M’malo mwakutenguka ligongo lyakuliwona kuŵa jwakusakala mnope, Daudi ŵalijiganyisye kutyocela pa yakulemwa yakweyo. Kusala yisyene, jwalakwe nganawilisyasoni kutenda yakulemwayi. Pali pamasile yaka, Daudi ŵawile ali jwakulupicika. Ngani josope jakusala ya kulupicika kwakwe Yehofa akusajikumbucila.—Ahe. 11:32-34.

14. Ana tukulijiganya cici kutyocela pa cisyasyo ca Daudi?

¹⁴ Ana tukulijiganya cici pa cisyasyo ca Daudi? Naga tutesile cakulemwa cekulungwa, tukusosekwa kupitikuka mtima yisyesyene, soni kum’ŵenda Yehofa kuti atukululucile. Tukusosekwa kumsalila jwalakwe yakulemwa yetu. (1 Yoh. 1:9) Tukusosekwa kwasalilasoni acakulungwa ŵa mumpingo, ŵampaka atukamucisye mwausimu. (Aŵalanje Yakobo 5:14-16.) Patukukunda kuti Yehofa atukamucisye, tukusalosya kuti tukusakulupilila yaŵalagucisye Mlungu yakuti cacitukululucila yakulemwa yetu. Tukusosekwasoni kulijiganya kutyocela pa yakulemwa yetu ni kwendelecela kutumicila Yehofa tuli tukwete cikulupi cakulimba.—Ahe. 12:12, 13.

15. Ana tukulijiganya cici kutyocela pa cisyasyo ca Hana?

¹⁵ Kwende tuganicisyesoni ya ŵakutumicila ŵane ŵakulupicika ŵakala ŵaŵamkulupililaga Mlungu aku ali mkutenda yakomboleka kuti amasye yakusawusya yaŵasimanaga nayo. Mwambone, Hana ŵaliji jwangaŵeleka. Jwalakwe ngamkanakombola kumasya cakusawusya celeci mwajika. Nambo ŵakulupililaga kuti Mlungu camtondoye, m’yoyo ŵajendelecele kulambila pa nyumba ja Mlungu soni  kupopela kwa jwalakwe ni kumsalilaga muŵapikanilaga mumtima. (1 Sam. 1:9-11) Ana celeci nganiciŵa cisyasyo cambone kwetuwe? Naga tukulepela kumalana ni ulwele wine wakwe kapena tukusimana ni yakusawusya yine yanganituŵa tuyikombwele kuyimasya, tukusosekwa kumtulila Yehofa yayikutulagasya nganisyo, tuli tukwete cikulupi cakuti jwalakwe akusatuganicisyaga. (1 Pet. 5:6, 7) Tukusosekwasoni kutenda yampaka tukombole kuti tupinduleje ni misongano ja Ciklistu soni yindu yine yausimu yalikusapeleka likuga lya Yehofa.—Ahe. 10:24, 25.

16. Ana Acinangolo mpaka alijiganye cici kutyocela pa cisyasyo ca Samueli?

¹⁶ Nambi wuli acinangolo ŵakulupicika ŵele ŵanace ŵawo alesile kutumicila Yehofa? Ngamkaniyikomboleka kuti jwakulocesya Samueli, ŵakanganicisye ŵanace ŵakwe ŵacakulungwa kuti ajendelecele kuŵa ŵakulupicika kwa Yehofa. (1 Sam. 8:1-3) Jwalakwe ŵasosekwaga kujileka nganijo m’miyala mwa Yehofa. Atamose yaliji m’yoyo, Samueli ŵatesile yiliyose yakomboleka kuti aŵe jwakulupicika soni kwasangalasya Atati ŵakwe ŵakwinani. (Miy. 27:11) Acinangolo ŵaciklistu ŵajinji masiku agano, akusimana ni yakutendekwa yakulandana ni yaŵasimene nayo Samueli. Mwakulandana ni mtati jwa m’citagu ca mwanace jwamsokonecele, jemanjaji akusakola cikulupi cakuti Yehofa ali jwakoseka kwapocela wosope ŵakulemwa nambo ŵapitikwice mtima. (Luk. 15:20) Pandaŵi jijojo, acinangolowo, akusatenda yampaka akombole kuti ajendelecele kuŵa ŵakulupicika kwa Yehofa, ali akwete cikulupi cakuti ligongo lya cisyasyo cawo cambone, ŵanace ŵawo mpaka awujile kwa jwalakwe.

17. Ligongo cici cisyasyo ca jwamkongwe jwamasije juŵaliji jwakulaga cili cakulimbikasya?

¹⁷ Kwende tuganicisyesoni ya cisyasyo ca jwamkongwe jwamasije jwa mundaŵi ja Yesu. (Aŵalanje Luka 21:1-4.) Pangali yakatesile jwalakwe ni yacinyengo yayatendekwaga pa nyumba ja Mlungu. (Mat. 21:12, 13) Pangali cakatesilesoni kuti amasye kulaga kwakwe. Nambo ligongo lyakuti ŵamkulupililaga Yehofa, jwalakwe ŵatesile yakomboleka kuti akamucisye kulambila kusyesyene. Jwamkongwejo waliji jwakoloŵa magasa mwati ŵapelece “tukobili tuŵili,” twatwaliji tukobili tosope twaŵakwete. Jwamkongwe jwakulupicikaju ŵamkulupilile Yehofa ni mtima wosope, pakumanyilila kuti naga akuŵika yindu yausimu pa malo gandanda, Yehofa cacilolecesya kuti akwete yakusosecela ya pa umi wakwe. Mwakulandanamo, tukusakulupilila kuti naga tukusosasosa Ucimwene candanda, Yehofa cacilolecesya kuti tukwete yosope yatukusosecela pa umi wetu.—Mat. 6:33.

18. Asale cisyasyo ca m’bale jwaŵakwete nganisyo syambone.

¹⁸ Masiku aganosoni, abale ni alongo ŵetu ŵajinji akusalosya kuti akusamkulupilila Yehofa mwakutenda yampaka akombole m’malo mwakuŵika nganisyo pa yindu yanganaŵa ayikombwele. Kwende tuganicisye ya M’bale jwine lina lyakwe Malcolm, jwaŵajendelecele kuŵa jwakulupicika mpaka paŵawile mu 2015. Kwa yaka yejinji yaŵele ali mkutumicila Yehofa yalumo ni ŵamkwakwe, ŵasimanaga ni yindu yambone soni yakusawusya. Jwalakwe ŵasasile kuti, “Yindu yikusacenga mwangajembeceya pa umi wetu, soni ndaŵi sine yikusaŵa yakusawusya kumalana nayo. Nambo Yehofa akusiŵajaliwa wosope ŵakumjegamila jwalakwe.” M’bale Malcolm ŵasasilesoni kuti, “Tupopeleje kuti tujendelecele kuŵa ŵakudalilicika patukutumicila Yehofa. Tuganicisyeje yindu yampaka tukombole kuyitenda ngaŵa yanganituŵa tuyikombwele.” *

19. (a) Ligongo cici lilemba lya caka ca 2017 lili lyakuŵajilwa mnope? (b) Ana cakamulicisye masengo catuli lilembali pa umi wawo?

¹⁹ Cilamboci pacikusakalilasakalilape,’ tukwembeceya kuti citusimaneje ni yakusakala yejinji. (2 Tim. 3:1, 13) M’yoyo yili yakusosekwa mnope kupunda ni kala kose, kuti tukakunda kutenguka ligongo lya yakusawusya yetu. M’malo mwakwe tukusosekwa kwendelecela kumkulupilila mnope Yehofa soni kutenda yampaka tuyikombole. Ni ligongo lyakwe lilemba lya caka ca 2017 lili lyakuŵajilwa mnope. Lilembali likuti, “Mkulupilile Yehofa Soni Mtende Yambone.”—Sal. 37:3.