Bokin Jenesis 22:6 ej kwal̦o̦k bwe ke Ebream ear kõpooji men ko m̦weien bwe en katok ilo juon jikin ettol̦o̦k, ear “bõk kane in katok kijeek, im likũti ioon Aisak nejin, im ear bõk kijeek eo ilo pein, kab juon bakbõk,” innem erro Aisak kar jim̦or etal ilo ial̦ eo aerro.

Ejjel̦o̦k eoon ilo Baibõl̦ ej kwal̦o̦k kõn wãween eo rekõn kõjo̦jo kijeek ilo iien ko etto. Juon rijeje ej ba bwe ejjab tõmak bwe kijeek eo Ebream im Aisak rar bõke ippãerro l̦o̦k ear urur wõt ke erro ear ilo̦k ilo ial̦ eo aerro me elukkuun kar aetok. Kõn men in, bõlen kijeek eo erro ear bõke ippãerro l̦o̦k emaroñ jitõñl̦o̦k ñan aolep men ko rekõn aikuji ñan kõjo̦jo kijeek.

Bõtab, elõñ rej ba bwe ejjab juon men epidodo ñan an ro ilo iien ko etto kar kõjo̦jo kijeek. Emaroñ kar pidodol̦o̦k ñan aer kõjo̦jo kijeek ilo aer ebbõk mãlle ko rebwil jãn kijeek ko me em̦õj an ro jet kar kõjo̦i ijello̦kun aer make pukot kilen ñan kõjo̦i. Kõn men in, elõñ rũmmãlõtlõt ro rej tõmak bwe kijeek eo Ebream ear bõke ippãn l̦o̦k ej jitõñl̦o̦k ñan juon jãpe me ej toto jãn juon jeen im ewõr mãlle ko rebwil ilowaan me kar bũki jãn juon kijeek m̦okta jãn an kar ilo̦k ilo ial̦ eo an l̦o̦k. (Aiseia 30:14, UBS) Innem emaroñ kar kõjerbale mãlle kein ippãn jet kane ñan an kõjo̦jo kijeek jabdewõt iien ekõn̦aan ilo ial̦ eo an.