EDWƐKƐ mɔɔ wɔ Mɔlebɛbo 22:6 la ka kɛ mɔɔ Ebileham siezie ɔ nwo yeahɔbɔ afɔle wɔ ɛleka moamoa bie la, Ebileham “vale ɛyɛne ne zoale ɔ ra Ayezeke na ɔdaye ɔvale senle ne nee dadeɛ ne. Na bɛ mu nwiɔ bɛzile nu kɛ bɛkɔ.”

Ngɛlɛlera ne ɛnga kɛzi ɛnee bɛwuda senle wɔ tete ne la. Awie bie mɔɔ ɔkilehile edwɛkɛ nu la hanle ye wɔ edwɛkɛ ɛhye anwo kɛ, “ɔnla aze kɛ awie bava senle adu adenle tendenle ɛhye,” adenle ne mɔɔ Ebileham nee Ayezeke dule la. Yemɔti, ɔzɔho kɛ debie mɔɔ bɛfa bɛwuda senle la a ɛnee bɛlɛka nwolɛ edwɛkɛ a.

Noko bie mɔ ka kɛ, ɛnee ɔnla aze fee kɛ bɛbawuda senle wɔ tete ne. Kɛ anrɛɛ bɛdabɛ mumua ne bɛbawuda bɛ senle la, saa ɔbayɛ boɛ a, bɛfa senle mɔɔ bɛ gɔnwo ɛwuda ye dɛba la samɛnlakɛ ne bie. Ɛhye ati, mbɔlɔba bie mɔ die di kɛ buakɛ a ɛnee Ebileham lɛ ye ɔ sa nu a—ɔbayɛ kɛ buakɛ mɔɔ kyeenyi zɔ ye—mɔɔ senle mɔɔ bɛzɔle ye nɔsolɛ ne la samɛnlakɛ ne bie a wɔ nu a. (Aye. 30:14) Saa bɛnyia ɛyɛne a, bɛkola bɛfa samɛnlakɛ mɔɔ bɛdua adenle zɛhae azo bɛfa bɛtu adenle la bɛwuda senle ndɛndɛ wɔ ɛleka biala wɔ adendulɛ nu.