AN ASOY ha Biblia nga mababasa ha Genesis 22:6 nasiring nga, basi magin andam ha paghalad ha hirayo nga lugar, hi Abraham “kinuha han sungo [para] hin halad nga sinunug, ngan ipinapagpas-an ito kan Isaak nga iya anak; ngan hiya nagdara ha iya kamot hin kalayo ngan sundang; ngan nagkalakat hira nga duha.”

An Kasuratan waray mag-unabi kon paonan-o an pagharing ha kadaan nga panahon. May kalabotan hini nga ginruruhaduhaan nga asoy, usa nga komentarista an nagsiring nga an kalayo nga dara nira Abraham ngan Isaac “imposible nga diri maparong tungod han hirayo nga pagbiyahe.” Salit posible nga an gintutudlok hini nga teksto amo an garamiton nga ginkikinahanglan ha pagharing.

Pero an iba naghuhunahuna nga diri masayon an pagharing ha kadaan nga panahon. Mas masayon para ha mga tawo hadto nga umaro na la hin baga ha ira mga amyaw, kon posible, imbes nga hira mismo an magharing. Salit may mga eskolar nga naghuhunahuna nga an gindara ni Abraham usa nga surudlan—bangin usa nga daba nga nakabitay ha kadena—nga may sulod nga mga baga tikang ha ira pagharing han naglabay nga gab-i. (Isa. 30:14) An mga baga nga gindadara ha sugad nga paagi magagamit ha pagharing gamit an magnipis nga sungo ha anoman nga higayon durante han pagbiyahe.