1, 2. Саул Хуцауи хуарзӕнхӕ цӕмӕн фесафта? (Кӕсӕ хузӕмӕ статьяй райдайӕни.)

САУЛ паддзах ку иссӕй, уӕд адтӕй бонзонгӕ адӕймаг, ӕма ’й адӕн нимадтонцӕ (1 Сам. 9:1, 2, 21; 10:20–24). Фал берӕ рӕстӕг нӕ рацудӕй, ӕма ӕхемӕ ӕгӕр берӕ есун райдӕдта. Еухатт мингай филистимӕгтӕ израилӕгти нихмӕ тохунмӕ ку ӕрцӕттӕ ’нцӕ, уӕд пахампар Самуил Саулӕн зӕрдӕ байвардта, ке ӕрбацӕудзӕй ӕма Йеговӕн нивонд ке ӕрхӕсдзӕй. Фал Самуил ку нӕ зиндтӕй, уӕд израилӕгтӕй беретӕ тӕрсун райдӕдтонцӕ, Саули ниууагътонцӕ ӕма ралигъдӕнцӕ. Саул дӕр Самуили нӕбал бахизта, ӕма ин кӕд еци барӕ н’ адтай, уӕддӕр ӕ бӕсти Йеговӕн нивонд ӕрхаста. Ӕма е Йегови зӕрдӕмӕ хъӕбӕр нӕ фӕццудӕй (1 Сам. 13:5–9).

² Самуил ку ӕрбацудӕй, уӕд Саулӕн бауайдзӕф кодта, еци гъуддаг ӕхемӕ ке райста, уой туххӕй. Фал ин Саул ӕ дзурдтӕ нецӕмӕ ӕрдардта. Ӕхе рӕститӕ кӕнун райдӕдта  ӕма ма иннети дӕр фудгин кодта (1 Сам. 13:10–14). Уой фӕсте ма Саул берӕ лӕгъуз гъуддӕгтӕ бакодта, ӕма си уой туххӕй Йеговӕ паддзахи бартӕ байста (1 Сам. 15:22, 23). Саулӕн ӕ хабар хуарз райдӕдта, фал фӕстагмӕ ба ӕгадӕ мард ракодта (1 Сам. 31:1–6).

3. а) Беретӕ бонзонгӕдзийнадӕмӕ цӕхуӕн цӕстӕй кӕсунцӕ? б) Цӕхуӕн фарстатӕмӕ ӕркӕсдзиан?

³ Абони берӕ адӕн бонзонгӕдзийнадӕбӕл сӕ къох исистонцӕ. Уотӕ сӕмӕ кӕсуй, ӕма син еци менеуӕг ӕнтӕстгун цард кӕнунмӕ кенӕ дзӕбӕх ӕхца бакосунмӕ нӕ банхус кӕндзӕй. Еу зундгонд актер ӕма политик загъта: «Бонзонгӕ – еци дзурд мӕнмӕ нӕ хауй, ӕма мӕмӕ некӕд хаудзӕй». Фал бонзонгӕ цӕмӕн гъӕуама уӕн? Бонзонгӕдзийнадӕ ци ӕй ӕма ци нӕй? Нӕ бон куд ӕй бонзонгӕй архайун, ӕнцон ку нӕ уа, уӕддӕр? Аци статьяй ӕркӕсдзиан фиццаг дууӕ фарстаемӕ, иннӕ статьяй ба дзуапп базондзиан ӕртиккаг фарстабӕл.

4. Адӕймаг ӕхецӕй ке исхъал ӕй, е цӕмӕй бӕрӕг фӕууй?

⁴ Библи куд зӕгъуй, уомӕ гӕсгӕ бонзонгӕ адӕймаг, ӕ зӕрдӕ ӕхебӕл ӕгӕр ка даруй, уомӕй хъӕбӕр хецӕн кӕнуй. (Бакӕсӕ Ӕмбесӕндтӕ 11:2.) Давиди фӕндадтӕй зундӕй архайун, ӕма Йеговӕн лигъстӕ кодта: «Дӕ лӕггадгӕнӕги хъал миутӕй багъӕуай кӕнӕ» (Пс. 19:13). Адӕймаг ӕхецӕй ке исхъал ӕй, е цӕмӕй бӕрӕг фӕууй? Зӕгъӕн, фӕккӕнуй ӕнӕргъуди миутӕ, фӕууй ӕгӕр ӕндиуд кенӕ ӕхемӕ райсуй, ка имӕ нӕ хауй, еци гъуддаг. Еугурӕйдӕр ӕнӕнхӕст ке ан, уомӕ гӕсгӕ еуӕй-еухатт бонзонгӕй нӕбал фӕййархайӕн. Саули хабарӕй бӕрӕг ӕй: адӕймаг ӕ зӕрдӕ ӕхебӕл ӕгӕр дарун ку райдайа, уӕд еу афон Хуцауи хуарзӕнхӕй фенӕхай уодзӕй. Псаломи 119:21 Йегови туххӕй финст ес: «Ду бафхуардтай, ӕхебӕл ка фенвӕрстӕй, еци... адӕни». Цума цӕмӕн?

5. Адӕймаг ӕхебӕл ӕгӕр ку ’нвӕрса, уӕд ӕй е цӕмӕ ӕркӕндзӕй?

⁵ Адӕймаг ӕхебӕл ӕгӕр ку фенвӕрсуй, уӕд кадӕ Йеговӕ Хуцауӕн нӕбал фӕххӕссуй. Уомӕй уӕлдай ма уӕхӕн адӕймаг ӕхемӕ ӕгӕр берӕ фӕййесуй ӕма иннети хӕццӕ нӕбал фӕффедауй (Ӕмб. 13:10). Иннетӕ ин ӕ миутӕ ку ’рлӕдӕрунцӕ, уӕдта ӕ кадӕ сӕ цӕсти ӕрхауй (Лук. 14:8, 9). Адӕймаг ӕхебӕл ӕгӕр ку ’нвӕрса, уӕд ӕй е хуарзӕй нецӕмӕ ӕркӕндзӕй. Бонзонгӕдзийнадӕ ба Библи куд зӕгъуй, уомӕ гӕсгӕ хуарз гъуддӕгтӕмӕ кӕнуй.

6, 7. Сӕрниллӕгдзийнадӕ ӕма бонзонгӕдзийнадӕ куд баст ӕнцӕ?

⁶ Бонзонгӕдзийнадӕ ӕма сӕрниллӕгдзийнадӕ кӕрӕдзей хӕццӕ баст ӕнцӕ. Библи куд зӕгъуй, уомӕ гӕсгӕ сӕрниллӕг адӕймаг сӕрбӕрзонд некӕд фӕууй, фал иннети ӕхецӕй уӕлдӕр нимайуй (Фил. 2:3). Мадта сӕрниллӕг адӕймаг хуарз фӕллӕдӕруй, ӕ бон ци ӕй ӕма ци нӕй, уой, иннети гъудимӕ лӕмбунӕг фегъосуй, удта ӕ рӕдудбӕл дӕр басӕттуй. Йеговӕ уӕхӕн адӕнӕн устур аргъ кӕнуй.

⁷ Библи куд зӕгъуй, уомӕ гӕсгӕ бонзонгӕ адӕймаг дӕр ӕй фӕллӕдӕруй, ӕ бон цӕйбӕрцӕ ӕй, уой. Уӕхӕн зундахаст имӕ ке ес, уой фӕрци иннетӕмӕ фӕууй хӕларзӕрдӕ ӕма сӕ нимайуй.

8. Бонзонгӕ ке нӕбал ан, е цӕмӕй бӕрӕг уодзӕй?

⁸ Ӕркӕсӕн, бонзонгӕ ке нӕбал ан, е  цӕмӕй бӕрӕг уодзӕй, уомӕ. Зӕгъӕн, ӕмбурди нӕбӕл ци ихӕстӕ ес, уони туххӕй нӕхемӕ ку ниууӕн (Ром. 12:16). Кенӕ адӕни ’ргом нӕхемӕ ку ӕздахӕн (1 Тим. 2:9, 10). Удта иннетӕн амонун ку райдайӕн, ци син кӕнгӕ ’й, ци ба нӕ, уой (1 Кор. 4:6). Нӕхе уотӕ ку дарӕн, уӕд ӕй лӕдӕргӕ дӕр нӕ бакӕндзиан, нӕ зӕрдӕ нӕхебӕл дарун куд райдӕдтан, уой.

9. Еуӕй-еуетӕ бонзонгӕ цӕмӕн нӕбал фӕуунцӕ? Ӕрхӕссӕ цӕветтон Библийӕй.

⁹ Адӕймаг бонзонгӕ ке нӕбал ӕй, е ма бӕрӕг фӕууй, ӕ тӕрегъӕдгун фӕндти фӕдбӕл цӕун ке райдайуй, уомӕй. Зӕгъӕн, исуй кадӕуарзагӕ, соцъагӕнагӕ, удта ӕ маст уорамун нӕ фӕззонуй. Авессалом, Ози ӕма Навуходоносор уӕхӕн адӕн адтӕнцӕ, фал сӕ Йеговӕ ӕрниллӕг кодта (2 Сам. 15:1–6; 18:9–17; 2 Анз. 26:16–21; Дан. 5:18–21).

10. Иннетӕн тӕрхон кӕнун цӕмӕннӕ гъӕуй? Ӕрхӕссӕ цӕветтон Библийӕй.

¹⁰ Адӕймаг ма бонзонгӕ нӕбал фӕууй, ӕндӕр гъуддӕгти туххӕй дӕр. Расагъӕс кӕнӕн Петури ӕма Авимелехи хабарбӕл (Райд. 20:2–7; Матф. 26:31–35). Цума сӕхе куд бадардтонцӕ, е уобӕл дзорӕг адтӕй, ӕма бонзонгӕ нӕбал адтӕнцӕ? Ӕви си сӕ еу алци нӕ зудта, иннӕ ба дзӕбӕх нӕ расагъӕс кодта? Нӕ бон нӕй адӕймаги зӕрди ци ес, уой фӕууинун, ӕма уомӕ гӕсгӕ тӕрхон некӕмӕн кӕнӕн. (Бакӕсӕ Иакови 4:12.)

11. Бонзонгӕ адӕймаг, Хуцауи организаций ин ци бунат ес, уомӕн цӕмӕн аргъ кӕнуй?

¹¹ Кӕд нӕ фӕндуй, цӕмӕй бонзонгӕ уӕн, уӕд гъӕуама аргъ кӕнӕн, Йегови организаций нин ци бунат ес, уомӕн. Йеговӕмӕ алцидӕр уагӕ ӕма ӕгъдаубӕл ке ӕй, уомӕ гӕсгӕ ӕмбурди алкӕмӕндӕр ӕхе бунат ес, удта алке хъиамӕт дӕр хъазар ӕй. Хуцау нӕ е ’стур хуарзӕнхи фӕрци исхайгин кодта цӕхуӕндӕр искурдиӕдтӕй ӕма менеугутӕй. Бонзонгӕ ку уӕн, уӕд си Йегови куд фӕндуй, уотӕ пайда кӕндзиан (Ром. 12:4–8). Йегови ба фӕндуй, цӕмӕй ин кадӕ хӕссӕн ӕма иннетӕн хуарз кӕнӕн. (Бакӕсӕ 1 Петури 4:10.)

12, 13. Нӕ лӕггадӕбӕл ка рабӕрӕг уй, уӕхӕн ӕййивддзийнӕдтӕ ке ӕрцӕуй, е дессаг цӕмӕннӕ ’й?

¹² Еуӕй-еухатт, Хуцауи организаций нӕ ихӕстӕ раййевунцӕ. Ӕркӕсӕн Киристей цӕветтонмӕ. Тӕккӕ фиццаг Йеговӕ сфӕлдиста Йесой (Ӕмб. 8:22). Уой фӕсте изӕдти, Дун-дуйне ӕма адӕни ку кодта, уӕд Йесо адтӕй е ’нхусгӕнӕг (Кол. 1:16). Фӕстӕдӕр Йесо зӕнхӕмӕ ӕрвист ӕрцудӕй, адӕймагӕй райгурдӕй ӕма исгъомбӕл ӕй (Фил. 2:7). Уой фӕсте ӕ цард адӕни туххӕй равардта, фӕстӕмӕ изӕди бауӕри райгас ӕй ӕма уӕлӕрвтӕмӕ раздахтӕй. 1914-аг анзи ба иссӕй Хуцауи Паддзахади Паддзах (Дзиуит. 2:9). Ӕ минанзон хецаудзийнади фӕсте ба Йесо бартӕ фӕстӕмӕ ӕ Фиди къохтӕмӕ ратдзӕй, цӕмӕй «алкӕмӕндӕр Хуцау уа ӕ еунӕг Хецау» (1 Кор. 15:28).

¹³ Мах дӕр гъӕуама цӕттӕ уӕн, нӕ царди ци ӕййивддзийнӕдтӕ ӕрцӕуй, уонӕмӕ. Еци ӕййивддзийнӕдтӕ арӕхдӕр ӕрцӕунцӕ, ци унаффитӕ рахӕссӕн, уомӕ гӕсгӕ. Зӕгъӕн, исфӕндӕ кодтай бийнонтӕ искӕнун. Кенӕ базудтай, сувӕллон дин ке уодзӕй. Кенӕ ба исфӕндӕ кодтай дӕ цард фӕххумӕтӕгдӕр кӕнун, цӕмӕй дӕ бон уа Йеговӕн фулдӕр лӕггадӕ кӕнун. Фӕууй ма  ӕндӕр ӕййивддзийнӕдтӕ дӕр, зӕгъӕн, нӕ уавӕртӕ раййевунцӕ ӕма е нӕ лӕггадӕбӕл рабӕрӕг уй. Ӕригон дӕ ӕви каргун, де ’нӕнездзийнадӕй тухсис ӕви нӕ, уӕддӕр ди иронх ма уӕд: Йеговӕ ’й зонуй, фулдӕр пайда ин кӕми ӕрхӕсдзӕнӕ, уой. Йеговӕ нин нӕ хъиамӕтӕн аргъ кӕнуй ӕма нӕ бон ци нӕй, уой ни некӕд фӕййагоруй (Дзиуит. 6:10).

14. Бонзонгӕдзийнадӕ куд ӕнхус кӕнуй, цӕмӕй нӕ цийнӕдзийнадӕ ма исафӕн ӕма нин ци ихӕстӕ ес, уонӕй боз уӕн?

¹⁴ Йесойӕн ӕ алли ихӕслӕвӕрд дӕр цийнӕдзийнадӕ хаста ӕма ’й мах бон дӕр ӕй фӕнзун (Ӕмб. 8:30, 31). Бонзонгӕ адӕймаг аргъ кӕнуй, ӕмбурди ин ци ихӕстӕ ес, уонӕн. Е некӕд фӕттухсуй, ести кадгин ихӕстӕ ин баихӕс кӕндзӕнцӕ ӕви нӕ, уобӕл. Ӕндӕр ескӕмӕн сӕ ку раттунцӕ, уӕддӕр ин е гъулӕг нӕ фӕууй. Уӕхӕн адӕймаг боз ӕй, ци ихӕстӕ ин ес, уомӕй, уомӕн ӕма ’й лӕдӕруй, Йеговӕй лӕвӕрд ин ке ӕй. Удта ма цийнӕ кӕнуй, Йеговӕ цӕхуӕндӕр ихӕстӕ ке барӕ бакодта, уонӕбӕл дӕр. Бонзонгӕ ку уӕн, уӕд иннети нимайдзиан ӕма син ӕнхус кӕндзиан (Ром. 12:10).

15. Гедеони цӕветтонӕй цӕбӕл ахур кӕнӕн?

¹⁵ Бонзонгӕ адӕймаг цӕхуӕн гъӕуама уа, е хуарз рабӕрӕг ӕй Гедеони цӕветтонӕй. Йеговӕ ин ку баихӕс кодта, израилӕгти мадиамӕгтӕй исуӕгъдӕ  кӕнун, уӕд Гедеон загъта: «Манассий муггаги астӕу мӕ хӕдзарвӕндаг зингӕ дӕр ку нӕ кӕнуй, ӕма ӕз дӕр мӕ фиди хӕдзари ку неке дӕн» (Тӕрх. 6:15). Фал Гедеон ӕ зӕрдӕ Йеговӕбӕл дардта ӕма еци ихӕс ӕхемӕ райста. Йеговӕ имӕ цӕмӕ ӕнгъӕлмӕ кӕсуй, уой дзӕбӕх ку балӕдӕрдтӕй, уӕд имӕ искувта ӕма си разамунд ракурдта (Тӕрх. 6:36–40). Гедеон адтӕй нифсгун ӕма федар адӕймаг, фал уӕддӕр лӕдӕргӕй архайдта (Тӕрх. 6:11, 27). Удта ӕхецӕн ном искӕнунбӕл дӕр нӕ сагъӕс кодта. Йеговӕ ин ци загъта, уой ку исӕнхӕст кодта, уӕд фӕстӕмӕ ӕ хӕдзарӕмӕ раздахтӕй (Тӕрх. 8:22, 23, 29).

16, 17. Бонзонгӕ адӕймаг нӕуӕг ихӕстӕмӕ цӕхуӕн цӕстӕй кӕсуй?

¹⁶ Адӕймаги ӕмбурди нӕуӕг ихӕстӕ ӕнхӕст кӕнун ке фӕндуй, е уобӕл дзорӕг нӕй, ӕма бонзонгӕ нӕбал ӕй. Библи Йегови лӕггадгӕнгути разӕнгард кӕнуй, цӕмӕй Хуцауи гъуддӕгти ӕнтӕстгундӕр кӕнонцӕ (1 Тим. 4:13–15). Фал цума ӕнтӕстгун ке ан, е ӕрмӕстдӕр нӕ нӕуӕг ихӕстӕй бӕрӕг фӕууй? Нӕ. Не ’гасӕй дӕр гъӕуама архайӕн, цӕмӕй нӕ уодигъӕдӕ хуӕздӕр кӕнӕн, удта нӕ Йеговӕ ци искурдиӕдтӕй исхайгин кодта, уонӕй нӕ лӕггади пайда кӕнӕн ӕма иннетӕн ӕнхус кӕнӕн.

¹⁷ Бонзонгӕ адӕймаг нӕуӕг ихӕстӕ райсуни разӕй бал фиццагидӕр расагъӕс кӕндзӕй, ӕ ихӕстӕмӕ ци хаудзӕй, уобӕл. Уой фӕсте Хуцаумӕ исковдзӕй ӕма лӕмбунӕг расагъӕс кӕндзӕй, еци ихӕс ӕнхӕст кӕнун бафӕраздзӕй ӕви нӕ, уобӕл. Цума ин ӕндӕр ӕхсидзгӕ гъуддӕгтӕн фагӕ хъаурӕ ӕма рӕстӕг байзайдзӕй? Кӕд нӕ, уӕд ӕ бон н’ адтайдӕ ӕ ихӕстӕй кӕцидӕртӕ иннети барӕ бакӕнун? Бонзонгӕ адӕймаг еци гъуддӕгтӕбӕл ку расагъӕс кӕна, уӕд, ка ’й зонуй, балӕдӕра, ӕ ихӕслӕвӕрдтӕ куд ӕмбӕлуй, уотӕ ӕнхӕст кӕнун ӕ бон ке не ’суодзӕй, ӕма уӕд нӕуӕг ихӕстӕбӕл нӕ исарази уодзӕй.

18. а) Бонзонгӕ адӕймагӕн нӕуӕг ихӕстӕ ку раттунцӕ, уӕд ци бакӕнуй? б) Ромӕгтӕмӕ 12:3 финст дзурдтӕ нин куд банхус кӕндзӕнцӕ, цӕмӕй бонзонгӕ уӕн?

¹⁸ Йегови фӕндуй, цӕмӕй ӕ хӕццӕ «бонзонгӕй цӕуӕн» (Мих. 6:8). Уомӕ гӕсгӕ нин нӕуӕг ихӕслӕвӕрд ку раттунцӕ, уӕд гъӕуама мах дӕр Гедеони хузӕн Хуцауӕй разамунд агорӕн ӕма си ӕнхус корӕн. Гъӕуама лӕмбунӕг расагъӕс кӕнӕн, Йеговӕ нин Библий ӕма ӕ организаций фӕрци ци зӕгъуй, уобӕл. Мадта уой ма иронх кӕнӕн, ӕма нӕ лӕггади ӕнтӕстгун ке ан, е Йегови фӕрци ӕй, сӕрӕн ке ан, уой фӕрци нӕ, фал (Пс. 18:35). Бонзонгӕ адӕймаг ци ӕй, «ӕхецӕй уомӕй фулдӕр ӕнгъӕл» нӕй. (Бакӕсӕ Ромӕгтӕмӕ 12:3.)

19. Бонзонгӕ цӕмӕн гъӕуама уӕн?

¹⁹ Бонзонгӕ адӕймаг зонуй, кади аккаг ӕрмӕстдӕр Йеговӕ ке ӕй, уомӕн ӕма е ӕй Сфӕлдесӕг ӕма Дун-дуйней Хецау (Рарг. 4:11). Бонзонгӕ ку уӕн, уӕд нин Хуцау нӕ барӕ ци ихӕстӕ бакодта, уонӕй боз уодзиан. Нӕ хуӕртӕ ӕма не ’нсувӕрти гъудийӕн аргъ кӕндзиан, ӕма уой фӕрци нӕ астӕу уодзӕй еудзийнадӕ. Ести гъуддаг бакӕнуни размӕ расагъӕс кӕндзиан, ӕма уой фӕрци нӕхе уӕззау тӕрегъӕдтӕй гъӕуай кӕндзиан. Уотӕ ку архайӕн, уӕд Йегови зӕрдӕ рохс кӕндзиан. Мадта бонзонгӕдзийнадӕ Хуцауи адӕнӕн хъӕбӕр ӕхсидзгӕ менеуӕг ӕй. Иннӕ статьяй ба базондзиан, нӕ бон куд ӕй бонзонгӕй архайун, ӕнцон нин ку нӕ уа, уӕддӕр.