1, 2. Kungani indvodza lebeyike yatfobeka yase ilahlwa nguNkulunkulu? (Buka sitfombe lesisekucaleni kwalesihloko.)

INKHOSI SAWULA nayicala kubusa ka-Israyeli beyitfobekile futsi ihlonishwa. (1 Sam. 9:1, 2, 21; 10:20-24) Kodvwa ngekushesha nje ngemuva kwekutsi ibe yinkhosi, yase icala kwenta tintfo lebekungakafaneli itente. Kwatsi lapho umphrofethi waNkulunkulu lokunguSamuweli angefiki ngesikhatsi lebekasibekile eGiligali, Sawula wacansuka. EmaFilisti bekalungiselela kuhlasela futsi nema-Israyeli besekamhlamuka Sawula. Kufanele kube Sawula wacabanga kutsi kumelwe ente lokutsite futsi akwente ngekushesha. Ngako, wanikela ngemnikelo wekushiswa kuNkulunkulu, lokuyintfo lebekungakafanele ayente. Jehova akasijabulelanga lesento saSawula.—1 Sam. 13:5-9.

² Samuweli nakefika eGiligali, wamsola Sawula ngalesento sakhe. Kunekutsi Sawula emukele leseluleko, wacala kuniketa tizatfu tekutsi kungani ente njengobe entile, wetama nekusola Samuweli futsi wenta shengatsi bekungasiko kubi kangako loko lakwentile. (1 Sam. 13:10-14) Kwase kulandzela luchungechunge lwetigigaba letaholela ekutseni Sawula alahlekelwe bukhosi bakhe  futsi ngetulu kwaloko walahlekelwa nabuhlobo lobuhle naJehova. (1 Sam. 15:22, 23) Nanobe Sawula acala ayinkhosi leyenta tintfo letinhle, siphetfo sakhe saba sibi kakhulu.—1 Sam. 31:1-6.

3. (a) Bantfu labanyenti banamuphi umbono ngekutfobeka? (b) Ngumiphi imibuto lesitayiphendvula?

³ Bantfu labanyenti kulelive lesiphila kulo banembono wekutsi kufanele bagcame kuze baphumelele. Njengobe batama kwenta njalo, abanendzaba nekutsi batfobekile yini. Sibonelo saloku sikutsi, lomunye umdlali wema-movie lowase ungenela tindzaba tepolitiki wake watsi: “Mine nekutfobeka asihlangani, futsi angicabangi kutsi ngiyoke ngitfobeke.” Kungani-ke kutfobeka kuseyindzaba lebalulekile lamuhla? Kusho kutsini kutfobeka, futsi yini lengashiwo kutfobeka? Singahlala njani sitfobekile nanobe sibhekene netimo letimatima nobe sicindzetelwa ngulabanye? Kulesihloko sitawucoca ngalemibuto lemibili yekucala. Umbuto wesitsatfu sitawucoca ngawo esihlokweni lesilandzelako.

4. Ungamchaza njani umuntfu lowenta tono tangemabomu?

⁴ LiBhayibheli licatsanisa kutfobeka nekutiphakamisa. (Fundza Taga 11:2.) Ngekuhlakanipha, Davide wacela Jehova kutsi ‘amjubele ekwenteni tono ngemabomu.’ (Hla. 19:13) Ngutiphi letono tangemabomu? Natichazwa, tingasho lapho lotsite enta tintfo ngekubhudvutela noma ngekwedzelela, ente tintfo lokungakafanele atente. Ngenca yekutsi sonkhe sinesono, ngaletinye tikhatsi senta tintfo lokungakafanele sitente. Njengenkhosi Sawula, nangabe natsi sitsandza kwenta tintfo lokungakafanele sitente, kungenteka ngekuhamba kwesikhatsi Nkulunkulu angajabuli ngatsi. Tihlabelelo 119:21 titsi ngaJehova: “Uyabatsetsisa labatidlako.” Kungani kunjalo?

5. Kungani tono tangemabomu titimbi kakhulu?

⁵ Tono tangemabomu timbi kakhulu kunemaphutsa lesiwentako. Kwekucala, nangabe senta tento letikhombisa kutsi asikatfobeki, sisuke sikhombisa kutsi asimhloniphi Jehova njengembusi wetfu. Kwesibili, nangabe senta tintfo lesite lilungelo lekutenta, singatikhandza sicabana nalabanye. (Taga 13:10) Kwesitsatfu, nangabe sibona kutsi sente tintfo lesite lilungelo lekutenta, kungenteka sidliwe mahloni nobe size sihlazeke. (Luk. 14:8, 9) Tono tangemabomu atibi nemiphumela lemihle. Kungako imiBhalo ikhombisa kutsi kutfobeka kuyindlela lehlakaniphile yekwenta tintfo.

6, 7. Kusho kutsini kutfobeka?

⁶ EBhayibhelini kutfobeka kusho kungatigcabhi nobe kungatiphakamisi. Kungaphindze kusho umuntfu lonemoya lophansi. (Fil. 2:3) Ngalokuvamile umuntfu lotfobekile uyakhona kubona loko langakhona kukwenta naloko lakwentile, avume nemaphutsa akhe bese wemukela imibono yalabanye. Kutfobeka kumjabulisa kakhulu Jehova.

⁷ Kutfobeka kungaphindze kusho kungaticabangi sibakhulu kunaloko lesingiko kanye nekukwati loko lesingeke sikhone kukwenta. Leligama lelitsi kutfobeka nalichazwa kusetjentiswa lulwimi lwekucala, lisho indlela umuntfu lenta ngayo tintfo abe acabanga ngalabanye.

8. Ngutiphi letinye timphawu letingakhombisa kutsi indlela lesenta ngayo nalesicabanga ngayo ayikhombisi kutsi sitfobekile?

⁸ Kunini lapho singabona khona kutsi indlela lesenta ngayo nalesicabanga ngayo ayikhombisi kutsi sitfobekile? Asesicoce ngetimphawu letimbalwa lesingabona ngato. Kungenteka kutsi sitibona sibaluleke kakhulu kunalabanye nobe sikhatsateka kakhulu ngemalungelo lesinawo. (Rom. 12:16)  Kungenteka nekutsi sifuna kutsi labanye bantfu basinake ngekutsi sisebentise tindlela letingakalungi. (1 Thim. 2:9, 10) Ngalesinye sikhatsi, sikhundla lesinaso, bantfu lesibatiko nobe kuhlakanipha kwetfu kungasenta sifune kugcizelela imibono yetfu kulabanye. (1 Khor. 4:6) Esikhatsini lesinyenti nangabe senta ngalendlela, kungenteka singaboni kutsi asisakukhombisi kutfobeka.

9. Yini leyente labanye bantfu kutsi batigcabhe? Niketa sibonelo lesiseBhayibhelini.

⁹ Sonkhe singalahlekelwa kutfobeka nangabe sivumela sifiso senyama silawule indlela lesenta ngayo. Kufuna kutizuzisa tsine, umona kanye nentfukutselo lengalawuleki kuholele labanyenti kutsi bakhombise kutsi abakatfobeki. LiBhayibheli likhuluma nga-Absalomu, Uziya naNebukhadnezari labatfunjwa ‘tifiso tenyama’ futsi batfotjiswa nguJehova ngenca yekutsi bebatigcabha.—2 Sam. 15:1-6; 18:9-17; 2 Khr. 26:16-21; Dan. 5:18-21.

10. Kungani kukuhlakanipha ngatsi kungasheshi sifinyelele esiphetfweni ngendlela labanye labakhetsa kwenta ngayo tintfo? Niketa sibonelo lesiBhayibhelini.

¹⁰ Kodvwa kunaletinye tizatfu letingenta umuntfu angatfobeki. Cabanga ngaloko lokushiwo liBhayibheli kuGenesisi 20:2-7 nakuMatewu 26:31-35. Indlela boPetro na-Abimeleki labenta ngayo beyigcugcutelwa tifiso tabo letimbi yini? Bebangawati onkhe yini emaciniso endzaba nobe letimo labatitfola bakuto tabafikela bangakatigadzi? Ngenca yekutsi asikhoni kubona lokusetinhlitiyweni tebantfu, kukuhlakanipha ngatsi kutsi singasheshi sifinyelele esiphetfweni ngendlela labanye labakhetsa kwenta ngayo tintfo.—Fundza Jakobe 4:12.

11. Kutfobeka kuhlobene njani nekwatisa indzawo yetfu elungiselelweni laNkulunkulu?

¹¹ Kutsi umuntfu utfobekile kubonakala ngekutsi ayatise indzawo yakhe elungiselelweni laNkulunkulu. Njengobe Nkulunkulu ahlelekile, sonkhe usinikete indzawo yetfu ebandleni. Nguloyo naloyo ebandleni ufeza indzima lebalulekile futsi sonkhe siyadzingeka. Ngenca yekutsi Jehova unemusa, usinikete tipho kanye nemakhono langafani. Singawasebentisa kute simdvumise futsi sisite nalabanye. (Rom. 12:4-8) Jehova usinikete umsebenti wekuba njengebaphatsi. Lomsebenti udzinga kutsi sitfobeke, setsembeke futsi sisebente matima.—Fundza 1 Phetro 4:10.

12, 13. Kungani kungakafanele simangale nangabe indzawo yetfu ishintja elungiselelweni laNkulunkulu?

¹² Nanobe kunjalo, indzawo yetfu elungiselelweni laNkulunkulu iyashintja. Cabanga ngaloko lokwenteka kuJesu. Ekucaleni, bekunguye naJehova lebebakhona. (Taga 8:22) Kodvwa ngekuhamba kwesikhatsi, Jesu wasita ekudalweni kwaletinye tidalwa temoya, umhlaba kanye nebantfu. (Khol. 1:16) Ngemuva kwesikhatsi, Jesu waniketwa lomunye umsebenti emhlabeni, wacale waba luswane wase uba yindvodza. (Fil. 2:7) Ngemuva kwekunikela ngemphefumulo wakhe ube sihlengo, Jesu wabuyela ezulwini njengesidalwa semoya kuze ayoba yinkhosi eMbusweni waNkulunkulu nga-1914. (Heb. 2:9) Kodvwa loko bekungasho kutsi indzima labekanayo elungiselelweni laNkulunkulu beyingeke isashintja. Ngemuva kwekubusa Iminyaka Leyinkhulungwane, Jesu utawuniketa Jehova umbuso kuze “Nkulunkulu abe nguko konkhe kubo bonkhe.”—1 Khor. 15:28.

¹³ Ngenca yetincumo lesitentako, natsi kufanele sikulindzele kutsi tabelo tetfu tingashintja nobe nini. Asesitsi, bewungakashadi kodvwa nyalo sewushadile. Kungenteka nyalo sewunebantfwana. Kungenteka nekutsi kuleminyaka leyendlulile wente kuphila kwakho kwaba melula kuze ube lihlahlandlela lasikhatsi sonkhe. Tonkhe letincumo  tihambisana nemalungelo latsite kanye nemtfwalo. Ngako timo tetfu letishintjako tingasenta sibe nalokunyenti nobe sibe nalokuncane kwekukwenta elungiselelweni laNkulunkulu. Usemncane yini nobe sewukhulile? Uphilile yini emtimbeni nobe ubutsakatsaka? Jehova uhlale acabanga ngendlela langasisebentisa ngayo emsebentini wakhe kuye ngetimo tetfu. Ulindzele kitsi loko lesingakhona kukwenta futsi ujabulela nobe ngabe yini lesiyentako.—Heb. 6:10.

14. Kutfobeka kungasisita njani kutsi sitijabulele tabelo lesiniketwe tona?

¹⁴ Jesu bekatijabulela tonkhe tabelo lebekatenta, ngako natsi singayitfola injabulo kuleto tabelo lesitentako. (Taga 8:30, 31) Umuntfu lotfobekile akeva shengatsi tabelo nome emalungelo lanawo ebandleni mancane. Akakhatsateki ngekufuna emalungelo lengetiwe nobe akhatsateke ngemalungelo labanye labanawo. Kunaloko, unaka kakhulu lokungamenta ajabule kuleso sabelo laniketwe sona ngaleso sikhatsi ngobe usuke asibheka njengaleso lesivela kuJehova. Ngesikhatsi lesifanako, uyatihlonipha tabelo labanye labatentako labatiniketwe nguJehova. Nangabe sitfobekile, labanye sitabahlonipha futsi sibasekele.—Rom. 12:10.

15. Yini lesingayifundza endleleni Gideyoni lebekatfobeke ngayo?

¹⁵ Gideyoni usibonelo lesihle semuntfu lobekatfobekile. Ngesikhatsi ingelosi ibonakala kuye kwekucala, wavuma kutsi bekabuya emndenini lophansi nekutsi bekangakahlakaniphi. (Khu. 6:15) Kodvwa ngemuva kwekwemukela sabelo lebesivela kuJehova,  Gideyoni waciniseka kutsi uyakuva loko Jehova bekafuna kutsi akwente futsi wetsembela kuye kuze amcondzise njengoba enta lesabelo. (Khu. 6:36-40) Nanobe Gideyoni bekanesibindzi, wenta tintfo ngekuhlakanipha. (Khu. 6:11, 27) Akazange abuke lesabelo lebekaniketwe sona njengelitfuba lekutitfolela ludvumo. Kunaloko, ngekushesha nje ngemuva kwekwenta lesabelo, wabuyela ekhaya.—Khu. 8:22, 23, 29.

16, 17. Yini umuntfu lotfobekile lokufanele acabange ngayo ngaphambi kwekwemukela sabelo lesisha?

¹⁶ Kutfobeka akusho kutsi kufanele singawemukeli emalungelo lengetiwe ebandleni. ImiBhalo isikhutsata kutsi sichubeke sitfutfuka. (1 Thim. 4:13-15) Loku kusho kutsi kufanele sishintjashintje tabelo yini? Cha. Jehova angasibusisa ngekutsi sichubeke sitfutfuka kunobe ngabe ngusiphi sabelo lesisentako manje. Singawasebentisa kahle emakhono Nkulunkulu lasiphe wona futsi sichubeke nekwenta imisebenti lemihle.

¹⁷ Ngaphambi kwekutsi emukele sabelo lesisha, umuntfu lotfobekile ucale afune kwati kutsi yini lokufanele ayente kuze asente kahle lesabelo. Ngemva kwaloko ubese ubuka timo takhe kuze abone kutsi utawukhona yini kusenta. Sibonelo saloko sikutsi, uyatibuta kutsi utawukhona yini kuwenta kahle lomsebenti, abe analeminye imisebenti lebalulekile lokufanele ayente? Leminye imisebenti layentako manje angayiniketa yini labanye bazalwane kuze akhone kusenta kahle lesabelo lesisha? Nangabe imphendvulo yamunye nobe yomibili lemibuto ingu-cha, anganiketa lomunye longakhona kusenta kahle lesabelo. Kuthantaza kanye nekubuka timo tetfu kungasisita kutsi singalweli kwenta lokunyenti kunaloko lesingakhona kukwenta. Nangabe sitfobekile kutawuba melula ngatsi kungasemukeli lesabelo lesingeke sikhone kusenta.

18. (a) Nangabe sitfobekile, yini lesitayenta nangabe sitfola sabelo lesisha? (b) Roma 12:3 usebenta njani kumuntfu lotfobekile?

¹⁸ Nangabe semukela sabelo lesisha, sibonelo saGideyoni sisifundzisa kutsi kufanele setsembele esicondzisweni saJehova kanye nasesibusweni sakhe kuze sisente kahle lesabelo. Ngetulu kwako konkhe, simenywa kutsi “siphilele Nkulunkulu ngentfobeko.” (Mik. 6:8) Ngako, nobe nini lapho sivuma kwenta sabelo lesisha, kufanele sithantaze sicele Jehova kutsi asicondzise asebentisa liVi lakhe nenhlangano yakhe. Indlela lesenta ngayo kufanele ihambisane nendlela Jehova lafuna kutsi tintfo tenteke ngayo. Kufanele sikhumbule kutsi kutfobeka kwaJehova ‘lokusiphakamisako,’ hhayi emakhono etfu. (Hla. 18:35) Nangabe sikhetsa kuphilela Nkulunkulu ngentfobeko, loko kutasisita kutsi singatiboni sibakhulu kunaloko lesingiko nobe sitibone singesilutfo.—Fundza Roma 12:3.

19. Ngutiphi tizatfu lesinato tekutfobeka?

¹⁹ Umuntfu lotfobekile uyamhlonipha Jehova, ikakhulukati ngoba unguMdali wetfu neMbusi Wendalo Yonkhe. (Semb. 4:11) Kutfobeka kusenta senetiseke ngesabelo lesinaso elungiselelweni laNkulunkulu futsi siyati indzawo yetfu ebandleni. Kuphindze kusente setsembeke futsi kukhutsate nebunye emkhatsini webantfu baJehova. Kutfobeka kwenta sibone labanye njengalabakhulu kunatsi futsi kusikhutsata kutsi sihlale sicaphile kuze singawenti emaphutsa lamakhulu. Ngenca yaletizatfu, siyabona kutsi kutfobeka kuseyintfo lebaluleke kakhulu kubantfu baNkulunkulu futsi Jehova ubatsandza kakhulu labo labatfobekile. Kodvwa kutsiwani nangabe sibhekene netimo letimatima? Sihloko lesilandzelako sitasikhombisa kutsi singahlala njani sitfobekile nangabe sibhekene netimo letimatima.