1, 2. Kay ano nga iginsalikway han Dios an usa nga tawo nga mapainubsanon hadto? (Kitaa an retrato ha tinikangan hini nga artikulo.)

HAN nagtikang pagmando hi Hadi Saul ha kadaan nga Israel, mapainubsanon hiya ngan gintatahod han mga tawo. (1 Sam. 9:1, 2, 21; 10:20-24) Kondi waray pag-iha, nagin paragbuot hiya. Han an propeta han Dios nga hi Samuel waray umabot ha Gilgal ha itinanda nga oras, waray na makaghulat hi Saul. Hito nga takna, an mga Pilisteohanon nangangandam na para ha girra, ngan ginbabayaan na hi Saul han mga Israelita. Posible nga naghunahuna hi Saul, ‘Kinahanglan ko gud gumios dayon.’ Salit naghalad hiya ha Dios bisan kon waray hiya katungod ha pagbuhat hito. Pero waray malipay hito hi Jehova.—1 Sam. 13:5-9.

² Han inabot hi Samuel ha Gilgal, ginsaway niya hi Saul. Imbes nga karawaton ni Saul an pagsaway, nagbiling hiya hin pasangil, ginbasol an iba, ngan naghunahuna nga gutiay la nga butang an iya ginhimo. (1 Sam. 13:10-14) Ito an tinikangan han iya mga buhat nga nagpapakita hin pagin paragbuot nga nagin hinungdan nga nawara an iya  pagkahadi, ngan labaw ha ngatanan, an pag-uyon ni Jehova. (1 Sam. 15:22, 23) Bisan kon ha tinikangan maopay nga tawo hi Saul, ha urhi nagin paragbuot hiya nga nagresulta han iya makasurubo nga kamatayon.—1 Sam. 31:1-6.

3. (a) Ano an panhunahuna han damu nga tawo mahitungod ha pagin mapainubsanon? (b) Ano nga mga pakiana an aton hihisgotan?

³ Ha kalibotan nga kalyap an kompetisyon, damu an naghuhunahuna nga kinahanglan nira ipakita nga labaw hira ha iba basi magin malampuson, salit bangin diri gud hira magpaubos. Pananglitan, usa nga sikat nga artista nga nagin politiko an nagsiring: “Diri gud aplikado ha akon an pagin mapainubsanon—ngan diri unta ako magin sugad hito bisan san-o.” Kondi kay ano nga importante pa gihapon an pagin mapainubsanon? Ano an pagin mapainubsanon, ngan ano an diri iginpapasabot hito? Ngan paonan-o kita makakapabilin nga mapainubsanon bisan pa ha magkuri nga kahimtang o maraot nga pagtratar ha aton han iba? Hini nga artikulo, babatunon naton an siyahan ngan an ikaduha nga pakiana, ngan an ikatulo hihisgotan ha sunod nga artikulo.

4. Ano an pagin paragbuot?

⁴ Iginpapakita han Biblia nga an ‘pagpalabilabi,’ o pagin paragbuot kabaliktaran han pagpaubos. (Basaha an Proberbios 11:2.) Hi Hadi David maaramon nga naghangyo kan Jehova nga buligan hiya nga diri magin paragbuot. (Sal. 19:13) Ano an pagin paragbuot? Amo ito an pagdesisyon la dayon o waray pagtahod nga pagbuhat han mga butang nga waray katungod an usa ha paghimo hito. Tungod han aton napanunod nga sala, usahay nagigin paragbuot kita. Pero sugad han iginpapakita han ehemplo ni Hadi Saul, kon nahiara na kita nga magin paragbuot, diri mag-iiha, madadaot an aton relasyon ha Dios. An Salmos 119:21 nasiring mahitungod kan Jehova: ‘Imo ginsasaway an mapalabilabihon.’ Kay ano nga ginbubuhat Niya ito?

5. Kay ano nga peligroso gud an pagin paragbuot?

⁵ An pagin paragbuot mas peligroso kay han pakabuhat hin diri tinuyo nga sayop. Kay ano? Siyahan, kon nagigin paragbuot kita, diri naton napapasidunggan hi Jehova sugad nga aton Soberano. Ikaduha, kon ginbubuhat naton an mga butang nga waray kita katungod, posible nga madaot an aton relasyon ha iba. (Prob. 13:10) Ngan ikatulo, kon nagigin paragbuot kita ngan masabtan ito han iba, bangin mapaawod o maalohan kita. (Luc. 14:8, 9) Matin-aw, waray maopay nga epekto an pagin paragbuot. Salit sugad han iginpapakita han Kasuratan, importante nga padayon kita nga magin mapainubsanon.

6, 7. Ano an nahiuupod ha pagin mapainubsanon?

⁶ Ha Biblia, an pagin mapainubsanon nagtutudlok ha diri pagpaimportante ha kalugaringon o diri pagin hambog. (Fil. 2:3) An usa nga mapainubsanon may-ada timbang nga panhunahuna han iya mga abilidad ngan nahihimo, nakarawat han iya mga sayop, ngan andam mamati ha mga suhestyon ngan ideya han iba. Nalilipay gud hi Jehova ha mga mapainubsanon.

⁷ Iginpapakita han Biblia nga an pagin mapainubsanon nagtutudlok liwat ha pagkaada timbang nga panhunahuna ha aton kalugaringon ngan pagkilala han aton mga limitasyon. Ha orihinal nga linggwahe para hini nga pulong, baga hin aada an pagpabug-at ha kon paonan-o an pagkilala ha aton mga limitasyon sadang makaapekto ha aton pagtratar ha iba.

8. Ano an pipira nga pangirilal-an nga nagigin diri na kita mapainubsanon?

⁸ Ano an posible nga mga pangirilal-an nga nagigin diri na kita mapainubsanon? Tagda an pipira hini. Bangin ginhuhunahuna naton an aton kalugaringon o an aton pribilehiyo nga mas labaw  kay han iba. (Roma 12:16) Bangin sobra nga ginpapabilhan naton an aton kalugaringon. (1 Tim. 2:9, 10) O bangin iginpipirit naton ha iba an aton mga opinyon tungod han aton katungdanan, impluwensya, o kalugaringon nga panhunahuna. (1 Cor. 4:6) Kasagaran nga kon sugad na hini an aton ginbubuhat, diri kita maaram nga nagigin diri na kita mapainubsanon.

9. Kay ano nga an pipira nagin paragbuot? Paghatag hin ehemplo tikang ha Biblia.

⁹ Bisan hin-o mahimo magin diri mapainubsanon kon magpapadaog hiya ha makasasala nga mga hingyap. Damu an nagin paragbuot tungod han ira hakugnon nga mga hingyap, kaawa, ngan duro nga kasina. Nahitabo ito ha pipira nga tawohan ha Biblia sugad kanda Absalon, Usiya, ngan Nabukodonosor salit iginbutang hira ni Jehova ha kaalohan.—2 Sam. 15:1-6; 18:9-17; 2 Kron. 26:16-21; Dan. 5:18-21.

10. Kay ano nga diri naton sadang hukman an motibo han iba? Paghatag hin ehemplo tikang ha Biblia.

¹⁰ Kondi may iba pa nga hinungdan kon kay ano nga an usa bangin diri magin mapainubsanon. Pananglitan, tagda an asoy ha Genesis 20:2-7 ngan ha Mateo 26:31-35. An ginbuhat ba nira Abimelek ngan Pedro nga baga hin nagin paragbuot hira resulta han ira makasasala nga mga hingyap? O diri la hira maaram han bug-os nga detalye, o waray anay nira hunahunaa an ira desisyon? Tungod kay diri kita nakakabasa han kasingkasing, maaramon ngan mahigugmaon kon diri dayon naton huhukman an motibo han iba.—Basaha an Santiago 4:12.

11. Ano an kalabotan han pagin mapainubsanon ha pagkilala han aton papel ha kahikayan han Dios?

¹¹ Makikita an pagin mapainubsanon han usa kon ginkikilala niya an iya papel ha kahikayan han Dios. Sugad nga organisado nga Dios, gintatagan ni Jehova an tagsa ha aton hin toka ha iya organisasyon. An tagsa ha aton may iba-iba nga papel ha kongregasyon, pero kita ngatanan kinahanglanon. Tungod han diri matupngan nga pagkabuotan ni Jehova, gintatagan niya an tagsa ha aton hin partikular nga regalo, abilidad, o talento. Magagamit naton ito ha pagdayaw ha iya ngan ha pagbulig ha iba. (Roma 12:4-8) An aton pagin tinaporan nagpapakita nga ginpapasidunggan kita ni Jehova, nasarig hiya ha aton, ngan gintatagan kita niya hin responsabilidad.—Basaha an 1 Pedro 4:10.

12, 13. Kay ano nga diri kita sadang mahipausa kon an aton papel ha kahikayan han Dios nagbabag-o ha panapanahon?

¹² Tigamni nga diri permanente an aton papel ha kahikayan han Dios; mahimo ito magbag-o paglabay han panahon. Tagda an ehemplo ni Jesus. Ha tinikangan, hiya la an kaupod ni Jehova. (Prob. 8:22) Katapos, bumulig hiya kan Jehova ha paglarang ha mga anghel, ha uniberso, ngan ha tawo. (Col. 1:16) Ha urhi, nagkaada hiya bag-o nga toka; ginsugo hiya nganhi ha tuna. Natawo hiya sugad nga waray mahihimo nga minasus-an ngan nagin adulto. (Fil. 2:7) Katapos ighalad ni Jesus an iya kinabuhi, bumalik hiya ha langit sugad nga espiritu basi magin Hadi ha Ginhadian han Dios han 1914. (Heb. 2:9) Kondi diri ito an kataposan nga pagbag-o han iya toka. Katapos han Usa ka Yukot ka Tuig nga Pagmando ni Jesus, iya igbabalik an Ginhadian kan Jehova basi an “Dios gud la an magmando han ngatanan.”—1 Cor. 15:28.

¹³ Makakalaom liwat kita nga magbabag-o an aton mga toka ha panapanahon bangin tungod han aton ginhihimo nga mga desisyon. Pananglitan, solo ka ba hadto pero yana may asawa na? May-ada ka na ba mga anak? Ginpasimple mo ba yana an imo kinabuhi basi makag-alagad hin bug-os-panahon? An tagsa hito nga desisyon nag-uupod hin pribilehiyo ngan responsabilidad. An aton nagbabag-o nga kahimtang mahimo makaapekto ha aton papel ha kahikayan han Dios—mahimo ito makadugang o makaiban han aton  toka. Batan-on ka man o edaran, mahimsog o maluya, maaram hi Jehova kon paonan-o an tagsa ha aton makakag-alagad ha iya ha pinakamaopay nga paagi. Diri hiya naglalaom han diri naton mahihimo; lugod, gin-aapresyar gud niya an ngatanan nga aton ginbubuhat para ha iya.—Heb. 6:10.

14. Paonan-o an pagin mapainubsanon makakabulig ha aton nga magin kontento ngan malipayon ha bisan ano nga kahimtang?

¹⁴ Nalipay gud hi Jesus ha tagsa niya nga toka, salit kita liwat mahimo magin malipayon ha aton toka. (Prob. 8:30, 31) An mapainubsanon nga tawo kontento han iya presente nga toka o responsabilidad ha kongregasyon. Diri hiya sobra nga naghihinunahuna mahitungod ha mga pribilehiyo ha tidaraon o ha mga nahihimo han iba. Lugod, nangangalimbasog hiya nga magpokus ngan magin malipayon ha iya presente nga toka kay gintatagad niya ito nga tikang kan Jehova. Ginrirespeto liwat niya an toka nga iginhatag ni Jehova ha iba. An pagin mapainubsanon nabulig ha aton nga magin malipayon ha pagpasidungog ngan pagsuporta ha iba.—Roma 12:10.

15. Ano an aton mahibabaroan ha pagin mapainubsanon ni Gideon?

¹⁵ Hi Gideon maopay gud nga ehemplo ha pagin mapainubsanon. Han nagpakita ha iya an anghel ni Jehova ha siyahan nga higayon, ginsumat dayon niya ha anghel an iya ubos nga gintikangan ngan mga kwalipikasyon. (Huk. 6:15) Han ginkarawat ni Gideon an toka ni Jehova ha iya, ginsiguro ni Gideon nga nasasabtan niya kon ano an nahiuupod hito nga toka, ngan sinarig  hiya ha giya ni Jehova. (Huk. 6:36-40) Marig-on ngan maisugon hi Gideon; pero maaramon liwat hiya. (Huk. 6:11, 27) Waray niya gamita an iya toka basi magin prominente. Lugod, han natuman na niya an iya toka, malipayon nga inuli hiya ha ira lugar.—Huk. 8:22, 23, 29.

16, 17. Ano an ginkukonsiderar han usa nga mapainubsanon kon naghuhunahuna hiya nga pauswagon an iya espirituwalidad?

¹⁶ An pagin mapainubsanon diri nangangahulogan nga diri na kita magkakab-ot o makarawat hin dugang nga pribilehiyo ha pag-alagad. Kita ngatanan gin-aaghat han Kasuratan nga mag-uswag. (1 Tim. 4:13-15) Kondi nagpapasabot ba ini nga kinahanglan kita magkaada bag-o nga toka? Diri man. Pinaagi han bulig ni Jehova, mahimo kita mag-uswag ha espirituwal anoman an aton toka yana. Padayon liwat naton nga makukultibar an mga abilidad nga iginhatag ha aton ni Jehova basi mas makag-alagad ha iya ngan makabulig ha iba.

¹⁷ Antes kumarawat hin bag-o nga toka an mapainubsanon nga tawo, nangangalimbasog anay hiya nga masabtan kon ano an nahiuupod hito nga toka. Katapos, tangkod nga gin-uusisa niya an iya kahimtang. Pananglitan, kon karawaton niya an dugang nga responsabilidad, maaasikaso ba niya ito nga diri napapabay-an an iba nga importante nga mga butang? Mahimo ba niya itapod ha iba an iya presente nga toka basi makarawat niya an bag-o nga pribilehiyo? Kon diri an baton ha bisan usa hini nga mga pakiana, bangin mas maopay nga ihatag ha iba an bag-o nga toka. An pag-ampo ngan sinsero nga pag-usisa han aton kalugaringon mabulig ha aton nga malikyan an pagbuhat hin labaw ha aton mga abilidad ngan limitasyon. An pagin mapainubsanon bangin magpagios ha aton nga diri karawaton an toka.

18. (a) Ano an hihimoon han usa nga mapainubsanon kon ginkarawat niya an bag-o nga toka? (b) Paonan-o an Roma 12:3 mabulig ha aton nga magin mapainubsanon?

¹⁸ Kon ginkarawat naton an bag-o nga toka, an ehemplo ni Gideon nagpapahinumdom ha aton nga kinahanglan naton sumarig ha giya ngan bulig ni Jehova basi maglampos. Ngani, kita ngatanan gin-aaghat nga ‘maglakat ha mapainubsanon kaupud han aton Dios.’ (Mika 6:8) Salit kon nakakarawat kita hin bag-o nga responsabilidad, kinahanglan kita mag-ampo ngan mamalandong kon ano an ginsisiring ni Jehova ha aton pinaagi han iya Pulong ngan organisasyon. Kinahanglan naton ipahiuyon an aton mga pitad ha paggiya ni Jehova. Hinumdumi nga diri an aton abilidad an ‘nakakapabantog’ ha aton, kondi an pagin mapainubsanon ni Jehova. (Sal. 18:35) Salit an mapainubsanon nga paglakat kaupod han Dios mabulig ha aton nga diri maghunahuna nga labaw kita ha iba o sobra nga minuson an aton kalugaringon.—Basaha an Roma 12:3.

19. Kay ano nga sadang naton kultibaron an pagin mapainubsanon?

¹⁹ An mapainubsanon nga tawo nagpapasidungog kan Jehova kay Hiya an aton Maglalarang ngan an Soberano ha Uniberso. (Pah. 4:11) An pagin mapainubsanon nabulig ha aton nga magin malipayon ngan kontento ha aton papel ha kahikayan han Dios. Nabulig liwat ito ha aton nga respetuhon an pagbati ngan opinyon han aton kabugtoan salit natitipigan an pagkaurosa han katawohan ni Jehova. An pagin mapainubsanon nag-aaghat ha aton nga hunahunaon an iba nga mas labaw ha aton, ngan nabulig ito ha aton nga magin maaramon nga tungod hito nalilikyan an pakabuhat hin seryoso nga mga sala. Salit an pagin mapainubsanon importante pa gihapon ha ngatanan nga katawohan han Dios, ngan ginpapabilhan ni Jehova an mga nagkukultibar hito. Kondi ano man kon nasasarihan an aton pagin mapainubsanon? Ipapakita han sunod nga artikulo kon paonan-o kita mahimo makapabilin nga mapainubsanon bisan pa ha magkuri nga kahimtang.