1, 2. (a) Antu anakulombola aYinsahu jaYehova ambuka ñahi nawanlomboli amunsakililu? (b) Yumanyi yitukuhanjeka muchinu chibaaba nichinalondelihu?

“NLOMBOLI yenu hinyi?” A Yinsahu jaYehova ayihulaña nankashi ilu lwihu. Muloñadi? Muloña munsakililu jajivulu iyala hela mumbanda diyi wekalaña nlomboli. Kwambukaku, twakulaña netu Nlomboli yetu himuntu wawanina. Nawa twalondelaña nlomboli yetu Kristu asañwiliwu, walondelaña wunlomboli waTata yindi Yehova.—Mat. 23:10.

² Hela chochu, kudi izanvu dawamayala amwekanaña anakulombola antu jaNzambi makonu, atenañawu nawu “nduñu wamaana nikashinshi.” (Mat. 24:45) Hanu dinu, tuneluki ñahi netu Yehova diyi wunakutulombola kuzatisha Mwanindi wabulaña kumwekana? Muchinu chibaaba nichinalondelihu, tukuhanjeka hadi Yehova chinazatishiyi antu amu hadi yaaka yayivulu kulombola. Yibaaba yejima yiyedi yikuhosha hayuma yisatu yinakumwekesha nawu Yehova diyi wakwashili ana amayala, dikwila nawu diyi wadiña Nlomboli yawantu jindi nawa wuchidi kulombola antu jindi.—Isa. 58:11.

3. Chumanyi chamukwashili Mosi kulombola aIsarela?

³ Spiritu yajila yakwashili antu amwimeneneñaku Nzambi. Toñojokenu  hadi Mosi enkeliwu mudimu wakulombola aIsarela. Chumanyi chamukwashili kuzata iwu mudimu wakala? Yehova ‘washili spiritu Yindi yajila mudi yena.’ (Tañenu Isaya 63:11-14.) Yehova watwalekelihu kulombola antu Jindi kuhitila mukukwasha Mosi naspiritu yindi yijila.

4. A Isarela adi kwiluka ñahi nawu Mosi wadiña naspiritu yaNzambi? (Talenu mwevulu wakutachikilahu.)

⁴ Chineli spiritu yajila yamwekanaña wanyi, aIsarela adikwiluka ñahi nawu yadiña mudi Mosi? Spiritu yajila yamukwashili Mosi kwila yihayamisha nikutiyakesha ijina daNzambi kudi Fwaro. (Kwid. 7:1-3) Spiritu yajila yamukwashili Mosi kwikala nayilwilu yayiwahi yamukwashili kulombola aIsarela yidi neyi, kukeña, kwovwaha nikudiwunjika. Wambukiliku chikupu nawanlomboli amakwawu adiña azuwa nawa abulileña kwakamena antu jawu. (Kwid. 5:2, 6-9) Wunsahu wamwekeni hatooka nawu: Yehova watondeli Mosi kulonda yalomboli antu Jindi.

5. Lumbululenu Yehova chakwashiliyi amayala amakwawu amuIsarela kulombola antu jindi.

⁵ Kuhiñahu, spiritu yaYehova yadiña hadi amayala amakwawu atondeliyi kulombola antu jindi. “Mwana kaNuni Yoshuwa wenzeli spiritu yamaana.” (Kuhit. 34:9) ‘Spiritu yaYehova yenjili hadi Gideyona.’ (Ansomp. 6:34) Nawa ‘spiritu yaYehova yamwinkeli ñovu Davidi.’ (1 Sam. 16:13) Awa amayala ejima ashindameneni hawukwashu waspiritu yaNzambi, nawa spiritu yayikwashili kuzata nyidimu yadi kukañanyawu kuzata nañovu jawu. (Yosh. 11:16, 17; Ansomp. 7:7, 22; 1 Sam. 17:37, 50) Chafuminimu, antu amuhamekeli Yehova nanyidimu yamaneni yazatiliwu.

6. Muloñadi Nzambi chakeñeleñayi aIsarela nindi abuli kudiwula anlomboli?

⁶ A Isarela adi kumwekesha ñahi nawu awantu ayilombweleña naspiritu jajila? Chelili antu atachiki kujinooka wunlomboli waMosi, Yehova wenhwili nindi: “Awa antu saña andiwilawu tahindi?” (Kuch. 14:2, 11) Mwamweni, Yehova watondeli Mosi, Yoshuwa, Gideyona niDavidi kumwimenaku neyi Nlomboli. Chineli awa antu adiña nakwovwahila awa amayala, dikwila nawu adiña nakwovwahila Yehova neyi Nlomboli.

7. Añelu amukwashili ñahi Mosi?

⁷ Añelu akwashileña antu amwimeneneñaku Nzambi. (Tañenu Aheberu 1:7, 14.) Yehova wenkeli añelu mudimu wakumuleja, kumukwasha nikumulombola Mosi. Nzambi wamutumini Mosi “kwikala nyuuli ninkuuli kuhitila mudi kañelu wamwekeni kudi Mosi muchiputa chanyiña.” (Yil. 7:35) Yehova wahanini Nshimbi “kuhitila mudi añelu,” yazatishiliyi Mosi hakuleja aIsarela. (Ñal. 3:19) Nawa Yehova wamulejeli nindi: “Yaku wakayilomboli awa antu ayi kunakuleja dehi. Nikañelu kami wakatwaminaña kumbidi kuwukuyeyi.” (Kwid. 32:34) Bayibolu yashimuna wanyi nawu aIsarela amweni kañelu nakuzata yina nyidimu. Hela chochu, njila mwayilejeleleñamu nikuyilombola aIsarela yamwekesheleña nawu amukwashili kudi añelu.

8. Añelu akwashili ñahi Yoshuwa niHezekiya?

⁸ Chelili Mosi yafwi, amuswanini kudi Yoshuwa, amukolesheli kudi “mukulumpi wanjita yaYehova” kulonda yalomboli antu jaNzambi hakuzuña njita nawaKenani nawa aIsarela ashindili. (Yosh. 5:13-15; 6:2, 21) Kuhiñahu, Mwanta Hezekiya wamweni kukala nawamashidika awaAsiriya akeñeleña kujilumuna Yerusalema. Muwufuku wumu hohu, “kañelu kaYehova hakwidika, hakutapa antu makombakaji nkulakaji, namakombakaji makumi atanu nasatu namakombakaji atanu.”—2 Anya. 19:35.

9. Komana kubula kuwanina kwawantu amwimeneneñaku Nzambi, kwaletesheli aIsarela kubula kulondela wunlomboli wawu? Lumbululenu.

 ⁹ Hela chakwila añelu adiña awanina, antu akwashileñawu adiña awanina wanyi. Mpinji yimu, Mosi wakañenyi kujilika ijina daYehova. (Kuch. 20:12) Yoshuwa wakwatili chitiyañenu naweni Gibeyoni henohu kanda yamwihuli Nzambi. (Yosh. 9:14, 15) Hakapinji kantesha, Hezekiya, “wadinkeli wanta mumuchima windi.” (2 Kushi. 32:25, 26) Hela chakwila awa amayala adiña awanina wanyi, aIsarela ateleleli kulondela wunlomboli wawu. Yehova wadiña nakukwasha awa amayala kuzatisha añelu. Mwamweni, Yehova walombweleña antu jindi.

10. Mosi amulombweli ñahi kudi Nshimbi Nzambi?

¹⁰ Izu daNzambi dalombweleña antu adiña nakumwimenaku. Bayibolu yatena Nshimbi yayinkeliwu aIsarela nawu “Nshimbi jaMosi.” (1 Anya. 2:3) Hela chochu, Nsona yamutena Yehova nawu Mukwakuhana Nshimbi, nawa Mosi yomweni wadiña nakulondela Nshimbi. (2 Kushi. 34:14) Kuhiñahu, Yehova wamulejeli chakutuña tabanaka, Mosi welili “mwejima mwamulejeluwu kudi Yehova.”—Kwid. 40:1-16.

11, 12. (a) Indi Yoshuwa nianyanta amakwawu alombweleña antu amakwawu ateleleli kwiladi? (b) Izu daNzambi dakwashili ñahi antu alombweleña antu jaNzambi?

¹¹ Yoshuwa wadiña Nezu daNzambi dakusoneka kufuma tuhu hampinji yatachikiliyi kulombola. Amulejeli nawu ‘wakawutañeña mwaana niwufuku, kulonda wakashuku muchima wakwila mwejima mwanasonekuwu.’ (Yosh. 1:8) Kuhiñahu, anyanta alombweli antu jaNzambi niwena elileña chochimu. Ayilejeli kutañaña Nshimbi hefuku-hefuku, kujisoneka ‘nikuhemba mazu ejima aNshimbi niyidika kulonda eleñamu.’—Tañenu Kuhituluka 17:18-20.

¹² Izu daNzambi dayikwashili ñahi antu alombweleña? Toñojokenu hadi Mwanta Yosiya. Chiwamwekeni mukanda waNshimbi yaMosi, nsoneki waYosiya watachikili kuwutaña. * Mwanta welilidi? “Chatiyiliyi mwanta mazu akumukanda waNshimbi hakutabola mahinindi.” Ilaña kudi yuma yikwawu yeliliyi. Yosiya amulombweli kudi Izu daNzambi, dichi watachikili kampeni kakuhumuna ankishi nikutachika kwanakana chidika chaChipandakenu. (2 Anya. 22:11; 23:1-23) Chineli Yosiya nianlomboli amakwawu ashinshika ayilombweli kudi Izu daNzambi, afwilileña kuwahisha nikuhimpa nshimbi jenkeliwu antu jaNzambi. Iku kuhimpa kwakwashili antu jaNzambi kwila yuma kwesekeja nankeñelu yindi.

13. Chambwinyi chadiña hakachi kawanlomboli jaNzambi nanyuza yawasenji?

¹³ Awa anyanta ashinshika ambukiliku chikupu nawanlomboli amakwawu adiña nakulombola nyuza yikwawu, amayala adiña nakulondela maana niyitoñojoka awantu. MuKenani, antu adiña nakukoña yuma yatama yidi neyi yishimashima, wuvumbi weyala neyala, kukama atunyama, kulambula anyana nikupesha. (Lev. 18:6, 21-25) Kubombelahu, anyuuli awaBabiloni niawaEjipitu alondeleli wanyi nshimbi jayinkeliyi Nzambi aIsarela kutalisha hawunyonji. (Kuch. 19:13) Kwambukaku, antu jaNzambi akunyima amweni anlomboli ashinshika chakwashiliwu antu kwikala akadi majilu kuspiritu, muyitoñojoka nikumujimba. Mwamweni, Yehova wadiña nakuyilombola.

14. Muloñadi Yehova chababesheleleñayi anlomboli amakwawu adiña nakulombola antu jindi?

 ¹⁴ Bayi neyi anyanta ejima alombweli antu jaNzambi alondeleli. Ana abulileña kumwovwahila Yehova akaanineña kuyilombola kudi spiritu yajila, añelu niIzu dindi. Mpinji yikwawu, Yehova wayibabesheleña hela kuyifumisha hawunlomboli. (1 Sam. 13:13, 14) Hampinji yindi yatelela, watondeli muntu wabadika ana anlomboli ejima.

15. (a) Atuprofwetu amwekesheli ñahi nawu kunakwinza nlomboli watelela? (b) Nlombolinyi wuyashimwineñahu dehi nawu wukenza?

¹⁵ Yehova washimwineñahu dehi kunyima nindi wakatonda nlomboli watelela nawa wadimena wakalombolaña antu jindi. Mosi wayilejeli aIsarela nindi: “Yehova Nzambi yeyi wakakumwekeshela mukachi keyi mudi ana kweyi kaprofwetu wudi neyi ami; mwakatiyilila yena.” (Kuhit. 18:15) Isaya washimwineñahu dehi nindi Wakekala ‘nlomboli yawantu nimukwakuyileja.’ (Isa. 55:4) Nawa Danyeli amoneneni kusoneka kutalisha hakwinza ‘kwaMesiya Kalamba.’ (Dan. 9:25) Nkumininaku, Yesu waditeneni yomweni nindi diyi “Nlomboli” yawantu jaNzambi. (Tañenu Matewu 23:10.) Atumbanji twaYesu amulondeleli chakudikeñela nawa elukili nawu amutondeli kudi Yehova. (Yow. 6:68, 69) Chumanyi chaletesheli akuhweleli nawu Yesu Kristu diyi adiña nakuzatishawu kudi Yehova kulombola antu jindi?

16. Yumanyi yamwekeshaña nawu Yesu amukwashili kudi spiritu yajila?

¹⁶ Spiritu yajila yamukwashili Yesu. Hamupapatishileñawu Yesu, Yowanu Mupapatishi wamweni “iwulu dinakwenzunuka nawa spiritu yajila yamwekeneña neyi kapompa yenjileña nakuwila hadi yena.” Kuhiñahu, “spiritu yamutwalili mwisaña.” (Maku 1:10-12) Yesu chazatileñayi mudimu windi hamaseki, spiritu yaNzambi yamukwashili Yesu kwila yihayamisha nikuhosha kuzatisha wuswa wamwinkeliwu kudi Nzambi. (Yil. 10:38) Kubombelahu, spiritu yajila yamukwashili Yesu kwikala nanyikabu yakuspiritu yidi neyi kukeña, muzañalu nichikuhwelelu chakola. (Yow. 15:9; Heb. 12:2) Kwosi nlomboli wadiña neyi yena. Yesu amutondeli kudi Yehova.

17. Añelu amukwashileña ñahi Yesu?

¹⁷ Añelu amukwashili Yesu. Hanyima yakwila Yesu anamupapatishi dehi, “añelu enjili nawa atachikili kumukalakela.” (Mat. 4:11) Chikwashalili maora antesha nakufwa kwindi, “kañelu wenjili kudi yena kufuma mwiwulu, nawa wamukolesheli.” (Luka 22:43) Yesu welukili chikupu nindi Yehova wukutuma kañelu kulonda yamukwashi kushikija nkeñelu yaNzambi.—Mat. 26:53.

18, 19. Yesu wazatishileña ñahi Izu daNzambi muchihandilu nimuntañishilu yindi?

 ¹⁸ Izu daNzambi damukwashili Yesu. Kufuma hatachikiliyi kuzata mudimu windi, Yesu wadiña nakuzatisha Nsona. (Mat. 4:4) Watwalekelihu kwovwahila Izu daNzambi kushika nimpinji yafwiliyi hamutondu wakuyandishila. Nimazu akukumishaku ahosheliyi henohu kanda yafwi afumini muwuprofwetu wahosheli hadi Mesiya. (Mat. 27:46; Luka 23:46) Kwambukaku, akulumpi jansakililu adiñaku hayina mpinji alondeleleña wanyi Izu daNzambi neyi dinashimuni yuma yambuka nayakuhwelelawu. Yesu wahosheli hadi wena kuzatisha mazu aYehova ekala muwuprofwetu waIsaya nindi: “Awa antu anlemeshaña hohu nanyivumbu yawu, ilaña nyichima yawu yidi kwakulehi nanami. Kudifukula kwadifukulañawu kudi ami kwamukunkulwayi, muloña ntañishilu yawu yashindamena hanshimbi jawantu.” (Mat. 15:7-9) Komana Yehova wadi kutonda antu amuchidiwu kulombola antu jindi?

¹⁹ Yesu wetejeli Izu daNzambi kulonda dimulomboli muyilwilu nimuntañishilu yindi. Hampinji yadiña nakumwihujolawu kudi akulumpi jansakililu wakwileña wanyi kuzatisha maanindi hela yuma yelukiliyi. Ilaña, wazatishileña Nsona hakwakula. (Mat. 22:33-40) Nawa chatela yalejeña antiyilili jindi chadiña chihandilu chindi mwiwulu hela chaleñeleñawu yuma yejima, “wenzunwini yitoñojoka yawu chikupu kulonda atiyishi mwalumbulukila Nsona.” (Luka 24:32, 45) Yesu wakeñeli Izu daNzambi nawa walejeleñaku amakwawu.

20. (a) Yesu wamwekesheli ñahi nindi wamwovwahilileña Nzambi? (b) Chaambu chadiña hakachi kaYesu niHerodi Agiripa I chatudizishañadi hadi Yehova chatondañayi anlomboli?

²⁰ Hela chakwila Yesu wahayamishili antiyilili jindi “namazu amawahi,” ilaña mpuhu yejima yayili kudi Ntañishi yindi, Yehova. (Luka 4:22) Chelili mukwamaheta yamulemeshi Yesu nankumbu jakwila nawu “Ntañishi Muwahi,” Yesu wakwili mukuwunda nindi: Muloñadi chiwunanteneni neyi muwahi? Kwosi muntu muwahiku, chiña Nzambi hohu.” (Maku 10:17, 18) Yesu wambukili chikupu naHerodi Agiripa I, wadiña mwanta hela netu nlomboli wawaYudeya chimwahitili yaaka 8. Hachidika hadiña antu alema, Herodi wavwalili “yakuvwala yawanta.” Izaza dawantu adiñaku dahosheli nawu: “Idi hiizu danzambi, bayi neyi damuntuku!” Herodi watiyili kuwaha nankashi nachamuhamekeliwu. Chumanyi chafuminimu? “Wamulemesheli Nzambi wanyi, kuhiñahu amudiili kudi mavunyi nawa wafwili.” (Yil. 12:21-23) Chakadi nikujina, kwosi wunsahu wunakumwekesha nawu Herodi amutondeli kudi Yehova kwikala nlomboli. Kwambukaku, Yesu wamwekesheli nawu amutondeli kudi Nzambi, nawa watwalekelihu kumulemesha Yehova hamu neyi Nlomboli Wabadika wawantu jindi.

21. Tukahanjekadi muchibaaba chinalondelihu?

²¹ Chiyuulu chaYesu bayi neyi chateleleli kushakama hohu yaaka yantesha. Hanyima yakumusañula Yesu wahosheli nindi, “Wanyinka wuswa wejima wakutala yuma yamwiwulu niyahamaseki.” Nawa wahosheli cheñi nindi “Tiyenu! Ami nukwikalaña nanenu mafuku ejima kushika nikukukuma kwanshakaminu yamakonu.” (Mat. 28:18-20) Yesu nakulombola ñahi antu jaNzambi hamaseki henohu wekala chileñaleña wamwiwulu wabulaña kumwekana? Yehova nakuzatishanyi muchiyuulu chaKristu kulombola antu Jindi? Nawa akwaKristu anateli kwiluka ñahi añimenu jaNzambi? Chibaaba chinalondelihu chikakula awa malwihu.