1, 2. (a) Aantu mboka haya kwatele komeho mokati koshigwana shaJehova oya yooloka ko ngiini kwaamboka haya kwatele komeho momalongelokalunga galwe? (b) Otatu ka kundathana shike moshitopolwa shika nomwaashoka tashi landula?

“OLYE omuwiliki gweni?” Epulo ndyoka ohali pulwa olundji Oonzapo dhaJehova, molwaashoka momalongelokalunga ogendji omu na omulumentu nenge omukiintu gumwe ngoka e li omuwiliki. Mepingathano naashono, ohatu kala twa nyanyukwa okulombwela aantu kutya omuwiliki gwetu ke shi omuntu inaa gwanenena. Onkee ano, ohatu landula ewiliko lyaKristus omuyumudhwa ngoka ha landula ewiliko lyaHe, Jehova. — Mat. 23:10.

² Nonando ohatu landula ewiliko lyaKristus, otu na ongundu ‘yomumati omwiinekelwa nomunandunge’ nenge omupiya omudhiginini nomunandunge ngoka ta wilike oshigwana shaKalunga kunena. (Mat. 24:45) Otu shi shi ngiini kutya Jehova ohe tu wilike shili okupitila mOmwana ngoka ihaa monika? Moshitopolwa shika nomwaashoka tashi landula, otatu ka konakona nkene Jehova a kala ta wilike aantu yontumba, ya kwatele komeho uule womimvo odhindji. Iitopolwa mbika iyali otayi ka kundathana omatompelo gatatu ngoka tagu ulike shili kutya Jehova oye a li ta wilike oshigwana she nota tsikile oku shi wilika. — Jes. 58:11.

3. Oshike sha li sha kwathele Moses a wilike Aaisraeli?

³ Ombepo ondjapuki oya kwathele aakalelipo yaKalunga. Natu kundathaneni  kombinga yaMoses ngoka a li a langekwa po a ninge omuwiliki gwAaisraeli. Oshike sha li she mu kwathele a gwanithe po oshinakugwanithwa shoka oshidhigu? Jehova ‘okwe mu pe ombepo ondjapuki.’ (Lesha Jesaja 63:11-14.) Mokupa Moses ombepo ondjapuki, Jehova okwa tsikile okuwilika oshigwana she.

4. Aaisraeli oya li ya mono ngiini kutya Moses oku na ombepo yaKalunga? (Tala kethano lyopetameko.)

⁴ Molwaashoka ombepo ondjapuki oyi li oonkondo ihaadhi monika, ongiini mbela Aaisraeli ya li ya mono kutya Moses okwa pewa ombepo ondjapuki? Oya li ya ningitha Moses a longe iikumithalonga nokulombwela Farao edhina lyaKalunga. (Eks. 7:1-3) Oya li wo ya kwathele Moses a kale e na omaukwatya omawanawa ngaashi, ohole, eifupipiko neidhidhimiko. Omaukwatya ngoka oga li ge mu kwathele a wilike Aaisraeli. Okwa li a yooloka ko thiluthilu kaawiliki aakwanyanya noyi ihole yo yene yokiilongo yilwe. (Eks. 5:2, 6-9) Osha li sha yela nawa kutya Jehova okwa hogolola Moses a kale omuwiliki gwoshigwana she.

5. Yelitha nkene Jehova a li a kwathele aalumentu yalwe Aaisraeli ya wilike oshigwana she.

⁵ Konima yethimbo ombepo ondjapuki yaJehova oya li ya kwathele aalumentu yalwe, mboka a langeka po ya wilike oshigwana she. “Josua yaNun okwa li u udha ombepo yuunongo.” (Deut. 34:9) “Ombepo yOmuwa oya yi muGideon.” (Aatok. 6:34) “Ombepo yOmuwa oye ya muDavid.” (1 Sam. 16:13) Aalumentu ayehe mboka oyi inekele ombepo yaKalunga, nombepo oye ya kwathele ya ninge iinima iikumithi mbyoka ya li itaaya vulu okuninga koonkondo dhawo yene. (Jos. 11:16, 17; Aatok. 7:7, 22; 1 Sam. 17:37, 50) Aantu oya li ya tanga Jehova omolwiilonga mbyoka iinene.

6. Omolwashike Kalunga a li a hala oshigwana she shi simaneke aawiliki yomuIsraeli?

⁶ Aaisraeli oya li yi inyenge ngiini kuuyelele wa yela nawa tawu ulike kutya aalumentu mbono oya li taya kwathelwa kombepo ondjapuki? Aantu sho ya li taya tamaneke Moses, Jehova okwa pula a ti: ‘Sigo uunake aantu mbaka taa kala nokudhina ndje?’ (Num. 14:2, 11) Osha yela kutya Jehova okwa li a hogolola Moses, Josua, Gideon naDavid ye mu kalele po e li omuwiliki. Paushili wo wene, ando oshigwana osha vulikile kaalumentu mboka, ando osha landula Jehova e li omuwiliki gwasho.

7. Aayengeli oya li ya kwathele ngiini Moses?

⁷ Aayengeli oya li ya kwathele aakalelipo yaKalunga. (Lesha Aahebeli 1:7, 14.) Jehova okwa li a pe aayengeli oshilonga shokukwathela nokuwilika Moses. Kalunga okwa tumine Aaisraeli Moses “a kale omupangeli nomuhupithi gwawo okekwatho lyomuyengeli ngoka e mu ihololele moshihwa sha hwama omulilo.” (Iil. 7:35) Jehova okwa li a pe Moses ompango ‘okupitila maayengeli’ ndjoka a li a wilike nayo Aaisraeli. (Gal. 3:19) Jehova okwa lombwele Moses a ti: “Inda u ka fale aantu kehala ndyoka nde ku lombwele. Tala, omuyengeli gwandje ote ku kwatele komeho.” (Eks. 32:34) Ombiimbeli inayi popya nando kutya Aaisraeli oya mono omuyengeli e li molupe lwomuntu ta wilike aantu. Onkee ano, omukalo moka Moses a li a wilike oshigwana otagu ulike kutya okwa li e na oonkondo dhi vule dhopantu.

8. Aayengeli oya li ya kwathele ngiini Josua naHiskia?

⁸ Ethimbo lyaMoses lyokuwilika sho lya puko, Josua ngoka e mu landula okwa li a nkondopalekwa ‘kondjayi yiita yOmuwa’ a kwatele komeho oshigwana shaKalunga molugodhi lwokukondjitha Aakaanana; nAaisraeli oya sindana molugodhi ndoka. (Jos. 5:13-15; 6:2, 21) Konima, omukwaniilwa Hiskia okwa li a taalelwa ketangakwiita lyAayassur ndyoka lya li lya hala okuponokela Jerusalem. Muusiku wumwe awuke, “omuyengeli gwOmuwa okwa yi kontanda yAayassur e ta dhipagele ko aakwiita 185 000.” — 2 Aak. 19:35.

9. Mbela okwaagwanenena kwaakalelipo yaKalunga okwa li kwi imbi Aaisraeli kaaya landule ewiliko lyawo? Shi yelitha.

 ⁹ Aayengeli oya gwanenena, ihe aantu mboka ya li ya kwathele inaya gwanenena. Oshikando shimwe Moses okwa li a ndopa okusimanekitha Jehova. (Num. 20:12) Josua okwa li ipwililikile ewiliko lyaKalunga e ta ningi euvaneno lyombili nAagibeon. (Jos. 9:14, 15) Oshikando shimwe, Hiskia ‘okwa li i inenepeke.’ (2 Ondjal. 32:25, 26) Nonando aalumentu mboka oya li ya yi pombambo omolwokwaagwanenena kwawo, Aaisraeli oya li ye na okulandula ewiliko lyawo. Jehova okwa li ta kwathele aalumentu mboka ta longitha aayengeli, naashono osha li shu ulike kutya Jehova ota wilike aantu ye.

10. Moses okwa li a wilikwa ngiini kOmpango yaKalunga?

¹⁰ Oohapu dhaKalunga odha li dha wilike aakalelipo ye. Ombiimbeli otayi popi ompango ndjoka ya li ya pewa Aaisraeli yi li “Ompango yaMoses.” (1 Aak. 2:3) Nonando ongawo, Omanyolo otaga popi Jehova e li lela Omugandjimpango, na Moses okwa li ha vulika kOmpango. (2 Ondjal. 34:14) Konima sho Jehova e mu pe omalombwelo gokutunga etsalihangano, “Moses okwa gwanitha ayihe, ngaashi Omuwa a popi.” —  Eks. 40:1-16.

11, 12. (a) Josua naakwaniilwa mboka ya li taya wilike oshigwana shaKalunga, oya li ya tegelelwa ya ninge shike? (b) Oohapu dhaKalunga odha li dha gumu ngiini aawiliki yoshigwana shaKalunga?

¹¹ Josua sho a ningi omuwiliki, okwa li e na ondjokonona ya nyolwa yOohapu dhaKalunga, moka a lombwelwa taku ti: ‘Embo ndika lyompango kala aluhe to li lesha omutenya nuusiku.’ Okwa li wo a lombelwa ‘a vulike kwaayihe ya nyolelwa mo.’ (Jos. 1:8) Konima aakwaniilwa mboka ya landula ko mokuwilika oshigwana shaKalunga nayo oya landula shoka shi li mOmanyolo. Oya li haya nyanyukilwa okulesha ompango esiku kehe ndjoka ya nyolwa membo lyompango “nokudhiginina oohapu adhihe dhompango ndjika nomautho ngaka.” — Lesha Deuteronomium 17:18-20.

¹² Oohapu dhaKalunga odha li dha gumu ngiini aalumentu mboka taya kwatele komeho? Natu taleni koshiholelwa shomukwaniilwa Josia. Konima sho oondhingambo ndhoka dhi na Ompango yaMoses dha monika, amushanga okwe dhi leshele omukwaniilwa Josia. * Mbela omukwaniilwa okwa li i inyenge ngiini? “Omukwaniilwa sho u uvu embo tali leshwa, okwa tuula oonguwo dhe moluhodhi.” Ihe okwa li a ningi oshindji shi vulithe mpoka. Josia sho a wilikwa kOohapu dhaKalunga, okwa ningi oshikonga shokuhalakanitha po iikalunga ayihe, e ta lombwele aantu ya dhane oshituthi shOpaasa. (2 Aak. 22:11; 23:1-23) Molwashoka Josia naawiliki yalwe aadhiginini oya li taya wilikwa kOohapu dhaKalunga, oya li ye na ehalo lyokuninga omalunduluko nokuyelitha nawa omalombwelo ngoka taya pe oshigwana shaKalunga. Omalunduluko ngoka oga li ge shi kwathele shi kale metsokumwe nehalo lye.

13. Eyooloko lini lya li pokati kaawiliki yoshigwana shaKalunga naamboka yiigwana yaapagani?

¹³ Aakwaniilwa mboka aadhiginini oya li ya yooloka ko kaawiliki yiigwana yilwe mboka ya li taya wilikwa kuunongo wopantu. Omuwiliki gwAakaanana noshigwana she, oya li ya ningi iinima iitondithi mbyoka ya kwatela mo okuya momilalo nomukwanezimo, uushenge, okulala noshimuna, okuyamba aanona omafikilondjambo nokulongela iimenka. (Lev. 18:6, 21-25) Aawiliki yaBabilonia noyAaegipiti, inaya landula naanaa omilandu dhuuyogoki ndhoka dha li dha pewa Aaisraeli. (Num. 19:13) Mepingathano naashono, aapiya yaKalunga yonale oya li ya mono nkene aawiliki yawo aadhiginini taya humitha komeho uuyogoki wopambepo, wopamikalo nowopalutu. Osha yela kutya Jehova okwa li ta wilike oshigwana she.

14. Omolwashike Jehova a li a pukulula yamwe yomaawiliki mboka ya li taya wilike oshigwana she?

 ¹⁴ Haakwaniilwa ayehe mboka ya li ya lele oshigwana shaKalunga shonale ya landula omalombwelo gaKalunga. Mboka inaaya hala okuvulika kuJehova oya tindi okutaamba ko ewiliko lyaKalunga lyombepo ondjapuki, lyaayengeli ye nolyOohapu dhe. Poompito dhimwe, Jehova okwa li e ya pukulula nenge e ya pingene po nayalwe. (1 Sam. 13:13, 14) Pethimbo lye lyo opala, okwa li a langeke po gumwe ngoka e vule kokule aalumentu ayehe mboka a li ta longitha.

15. (a) Aapolofeti oya li ye shi ulike ngiini kutya oku na omuwiliki i ikalekelwa te ke ya? (b) Olye a li omuwiliki a hunganekwa?

¹⁵ Uule womimvo omathele, Jehova okwa kala a hunganeka kutya ota ka langeka po omuwiliki i ikalekelwa gwoshigwana she. Moses okwa li a lombwele Aaisraeli a ti: ‘Jehova ote ke mu tumina omuhunganeki a fa ndje ta zi mokati kooyakweni; oye mu na oku mu pulakena.’ (Deut. 18:15) Jesaja okwa li a hunganeka kutya Nguka oye ta ka ninga “omuwiliki nondjayi.” (Jes. 55:4) Daniel okwa li a nwethwa mo a nyole kombinga ‘yomuwiliki omuhogololwa.’ (Dan. 9:25) Hugunina Jesus Kristus okwa li i iholola e li “omuwiliki” gwoshigwana shaKalunga. (Lesha Mateus 23:10.) Aalongwa ye oya li ye mu landula nehalo ewanawa noya li yi itaala kutya oye a hogololwa kuJehova. (Joh. 6:68, 69) Oshike sha li she ya tompa kutya Jesus Kristus oye a li ta longithwa kuJehova a wilike oshigwana she?

16. Oshike tashi ulike kutya Jesus okwa li a kwathelwa kombepo ondjapuki?

¹⁶ Ombepo ondjapuki oya li ya kwathele Jesus. Jesus sho a ninginithwa kuJohannes, Johannes okwa mono ‘egulu lye eguluka, nombepo ya fa onguti oye mu lambele.’ Konima yethimbo, ‘ombepo oya fala Jesus kombuga.’ (Mark. 1:10-12) Jesus pethimbo lyuukalele we kombanda yevi, ombepo ondjapuki yaKalunga oye mu kwathele a longe iikumithalonga noku popye a manguluka. (Iil. 10:38) Oshikwawo, ombepo ondjapuki oye mu kwathele a kokeke iiyimati yombepo ngaashi, ohole, enyanyu neitaalo lya kola. (Joh. 15:9; Heb. 12:2) Kapu na nando omuwiliki gumwe u ulika kutya okwa li e na ombepo yaJehova a fa Jesus. Jesus okwa li shili a hogololwa kuJehova.

17. Aayengeli oya li ya ningi po shike ya kwathele Jesus?

¹⁷ Ayengeli oya li ya kwathele Jesus. Konima yethimbo sho a ninginithwa, ‘aayengeli oye ya e taye mu yakula.’ (Mat. 4:11) Manga Jesus inaa sa, “omuyengeli gwomegulu okwe ya kuye nokwe mu tsu omukumo.” (Luk. 22:43) Jesus okwa li e na einekelo kutya Jehova ota ka tuma aayengeli ye mu kwathele a gwanithe po ehalo lyaKalunga. — Mat. 26:53.

18, 19. Oohapu dhaKalunga odha li dha wilike ngiini onkalamwenyo yaJesus nelongo lye?

¹⁸ Oohapu dhaKalunga odha li dha wilike Jesus.  Petameko lyuukalele we, Jesus okwe etha Oohapu dhaKalunga dhi mu wilike. (Mat. 4:4) Oshikwawo, okwa kala omuvuliki kOohapu dhaKalunga sigo omeso lye komuti gwomahepeko. Nokuli nomoohapu dhe dhahugunina manga inaa sa, okwa li a kwatele mo omanyolo ngoka ga hunganeka kombinga yaMesiasa. (Mat. 27:46; Luk. 23:46) Mepingathano naashono, aawiliki yomalongelokalunga yopethimbo mpono oyi ipwililikile Oohapu dhaKalunga noye dhi pingene po nomithigululwakalo dhawo. Jesus okwa totha mOohapu dhaJehova ndhoka dha hunganekwa komupolofeti Jesaja a ti: “Aantu mbaka ohaa simaneke ndje owala noohapu dhomokana, ihe omitima dhawo odhi li kokule nangame. Okulongela ndje kwawo osima yowala, oshoka otaa longo omalongo gopaipango yaantu.” (Mat. 15:7-9) Mbela Jehova okwa li ngaa ta vulu shili okuhogolola yamwe yomaalumentu mbono ya wilike oshigwana she?

¹⁹ Jesus ka li owala e etha Oohapu dhaKalunga dhi mu wilike moonkatu dhe, ihe okwa li wo edhi etha dhi mu wilike melongo lye. Jesus sho a li ta patanekwa kaawiliki yomalongelokalunga, ina longitha uunongo we nenge owino ye mwene. Pehala lyaashono, okwa longitha Omanyolo. (Mat. 22:33-40) Pehala lyokunyanyudha aapulakeni ye nomahokololo kombinga yonkalamwenyo ye nenge kombinga yokushitwa kwewangandjo, “okwa patulula omadhiladhilo gawo, yu uve ko Omanyolo.” (Luk. 24:32, 45) Jesus okwa li e hole Oohapu dhaKalunga nokwa li e na ehalo oku dhi longa yalwe.

20. (a) Jesus okwa li u ulike ngiini kutya esimano oli na okupewa Jehova? (b) Eyooloko ndyoka li li pokati kaJesus naHerodes Agrippa I otali tu longo shike kombinga yokuhogolola kwaJehova omuwiliki?

²⁰ Nonando Jesus okwa li a kumitha aalongwa ye ‘noohapu oombwanawa,’ okwa li ha simanekitha Omulongi gwe, Jehova. (Luk. 4:22) Omulumentu gumwe omuyamba sho a li ithana Jesus “muhongi omwaanawa,” Jesus okwa yamukula neifupiko a ti: “Omolwashike to ti ndje omwaanawa? Kaku na nando omuntu omwaanawa, oKalunga awike.” (Mark. 10:17, 18) Kapu na tuu eyooloko enene pokati kaJesus nomukwaniilwa Herodes Agrippa I, ngoka a ningi omukwaniilwa gwaJuda konima yomimvo hetatu lwaampono! Poshigongi shi ikalekelwa, Herodes okwa li a zala “onguwo ye yuukwaniilwa.” Aantu ye oyi igidha ya ti: “Ewi ndyoka tali popi, kali shi lyomuntu, ihe olyaKalunga.” Herodes “okwa zimine, aantu ye mu pe esimano li thike pesimano lyaKalunga. Oshike sha ningwa po konima yaashono? “Mbalambala omuyengeli gwOmuwa okwa dhenge Herodes nuuvu uudhigu, oshoka oye okwa zimine, aantu ye mu pe esimano li thike pesimano lyaKalunga. Oye okwa tukwa komazinyo e ta si.” (Iil. 12:21-23) Eihumbato lye olya li lya ningitha aantu ya thike pehulithodhiladhilo kutya Herodes ina hogololwa kuJehova a kale omuwiliki. Jesus okwa li a gandja uunzapo wa yela nawa kutya ye okwa langekwa po kuKalunga, nokwa li aluhe ha simanekitha Jehova e li Omuwiliki omunene gwoshigwana she.

21. Otatu ka kundathana shike moshitopolwa tashi landula?

²¹ Jesus ka li owala omuwiliki gwopakathimbo. Konima yeyumuko lye okwa li a lombwele aalongwa ye a ti: “Ongame nda pewa epangelo alihe megulu nokombanda yevi.” Okwa gwedha ko a ti: “Ihe ngame otandi kala pamwe nane omasiku agehe sigo ehulilo lyuuyuni.” (Mat. 28:18-20) E li oshishitwa shopambepo megulu, ongiini ta vulu okuwilika oshigwana shaKalunga kombanda yevi? Oolye mbono Jehova ta longitha kohi yewiliko lyaKristus ya wilike oshigwana she? Ongiini Aakriste taya vulu okudhimbulula mo aakalelipo ye? Oshitopolwa tashi landula otashi ka yamukula omapulo ngoka.