1, 2. а) Йегови Ӕвдесӕнтӕ иннӕ динтӕй цӕмӕй хецӕн кӕнунцӕ? б) Аци ӕма иннӕ статьяй цӕбӕл дзордзиан?

«УӔ ХЕЦАУ ка ӕй?» Аци фарста арӕх фӕддӕттунцӕ Йегови Ӕвдесӕнтӕн. Ӕма е дессаг дӕр нӕй, уомӕн ӕма абони берӕ динтӕн ес сӕргълӕууӕг кенӕ хецау. Мах ба ӕргом фӕззӕгъӕн, нӕ разамонӕг ӕнӕнхӕст адӕймаг ке нӕй, фал Йесо Киристе. Киристе ба игъосуй ӕ уӕларвон Фидӕ Йеговӕ Хуцауи разамундмӕ (Матф. 23:10).

² Абони Хуцауи адӕнӕн разамунд дӕттунцӕ, Библи «зундгин ӕма ӕууӕнкгун цагъар» ке хонуй, еци нӕлгоймӕгти къуар (Матф. 24:45). Мадта уотӕ зӕгъӕн цӕмӕн ес, ӕма нин разамунд Йеговӕ ӕма ӕ Фурт дӕттунцӕ? Аци статьяй ӕркӕсдзиан, уобӕл нӕ бон федарӕй ӕууӕндун цӕмӕн ӕй, уой фӕдбӕл ӕртӕ гъуддагемӕ. Кӕд Йеговӕ ӕ адӕнӕн разамунд дӕттунмӕ цидӕр нӕлгоймӕгти равзаридӕ, уӕддӕр бӕрӕг ӕй, рагидзаманти дӕр сӕйраг Разамонӕг ӕхуӕдӕг ке адтӕй ӕма абони дӕр ӕхуӕдӕг ке ӕй (Ис. 58:11).

3. Моисеййӕн израилӕгтӕн разамунд дӕттунмӕ ци ӕнхус кодта?

³ Хуцау разамонӕгӕй ке исӕвӕридӕ, етӕ хайгин адтӕнцӕ ӕ сугъдӕг хъаурӕй. Хуцау Моисеййи исӕвардта израилӕгти разамонӕгӕй. Цума ин еци устур ихӕс ӕнхӕст кӕнунмӕ ци банхус кодта? Йеговӕ «ӕй ӕ сугъдӕг хъаурӕй... исхайгин кодта». (Бакӕсӕ Исаййи 63:11–14.) Моисеййӕн разамунд дӕттунмӕ  Хуцауи сугъдӕг хъаурӕ ке ӕнхус кодта, уомӕ гӕсгӕ зӕгъӕн ес, ӕма еци разамунд Йеговӕй цудӕй.

4. Моисей Хуцауи сугъдӕг хъаурӕй хайгин ке адтӕй, е цӕмӕй бӕрӕг адтӕй? (Кӕсӕ хузӕмӕ статьяй райдайӕни.)

⁴ Цума адӕни бон адтӕй фӕууинун, Моисей сугъдӕг хъаурӕй хайгин ке адтӕй, уой? Гъо! Йегови сугъдӕг хъаури фӕрци Моисей берӕ дессӕгтӕ бавдиста, удта Йегови ном фараонӕн фегъосун кодта (Рац. 7:1–3). Уомӕй уӕлдай ма сугъдӕг хъаури фӕрци Моисей адтӕй фӕлмӕнзӕрдӕ, сӕрниллӕг ӕма фӕразон. Моисей иннӕ адӕни сӕргълӕугути хузӕн ӕнӕхатир ӕма хеуарзагӕ н’ адтӕй (Рац. 5:2, 6–9). Мадта бӕрӕг ӕй, Моисеййи разамонӕгӕй Йеговӕ ке исӕвардта.

5. Йеговӕ ма ӕ сугъдӕг хъаурӕй ке исхайгин кодта?

⁵ Йеговӕ ма ӕ адӕнӕн разамунд дӕттунмӕ ӕ сугъдӕг хъаурӕй ке исхайгин кодта? Библи зӕгъуй: «Навини фурт Йесо хайгин адтӕй зундӕй» (Дук. з. 34:9); «Гедеонбӕл Йегови хъаурӕ ӕрцудӕй» (Тӕрх. 6:34); «Давид хайгин адтӕй Йегови хъаурӕй» (1 Сам. 16:13). Аци адӕн сӕ зӕрдӕ Хуцауи сугъдӕг хъаурӕбӕл дардтонцӕ, ӕма еци хъаури фӕрци искодтонцӕ, сӕхуӕдтӕ кӕбӕл не ’схъаурӕ кодтайуонцӕ, уӕхӕн устур гъуддӕгтӕ (Йес. Н. 11:16, 17; Тӕрх. 7:7, 22; 1 Сам. 17:37, 50). Еци хъаурӕ син Йеговӕ лӕвардта ӕма еугур кади аккаг дӕр е адтӕй.

6. Йегови цӕмӕн фӕндадтӕй, цӕмӕй израилӕгтӕ сӕ разамонгути нимадтайуонцӕ?

⁶ Моисей, Йесо Навин, Гедеон ӕма Давидбӕл Хуцауи сугъдӕг хъаурӕ ке адтӕй, уомӕ израилӕгтӕ цӕхуӕн цӕстӕй гъӕуама кастайуонцӕ? Гъӕуама сӕ нимадтайуонцӕ. Адӕн Моисейбӕл хъур-хъур кӕнун ку райдӕдтонцӕ, уӕд Йеговӕ загъта: «Аци адӕн ма мӕбӕл берӕ гириз кӕндзӕнцӕ?» (Ним. 14:2, 11). Еци нӕлгоймӕгти Йеговӕ ӕ адӕнӕн разамонгутӕй ӕхуӕдӕг исӕвардта. Ӕма сӕмӕ адӕн ку игъустонцӕ, уӕд зӕгъӕн ес, ӕма Йеговӕмӕ игъустонцӕ.

7. Изӕдтӕ Моисеййӕн куд ӕнхус кодтонцӕ?

⁷ Хуцау разамонӕгӕй ке исӕвӕридӕ, уонӕн ӕнхус кодтонцӕ изӕдтӕ. (Бакӕсӕ Дзиуиттӕгтӕмӕ 1:7, 14.) Йеговӕ Моисеймӕ изӕдти рарветидӕ, цӕмӕй ин ӕ фӕндон фегъосун кодтайдӕ. Фиццаг хатт «синдзи къотӕри имӕ ци изӕд фӕззиндтӕй», е ин баихӕс кодта израилӕгти исуӕгъдӕ кӕнун ӕма ’й сӕ сӕргълӕууӕгӕй исӕвардта (Гъуд. 7:35). Дуккаг хатт имӕ Хуцау изӕди рарвиста, цӕмӕй ин Закъон ниффинсун кодтайдӕ. Еци Закъони фӕрци Моисей израилӕгтӕн разамунд лӕвардта (Гал. 3:19). Ӕртиккаг хатт ба ин Йеговӕ загъта: «Адӕни кӕнӕ, кумӕ дин загътон, уордӕмӕ. Мӕ изӕд цӕудзӕй дӕ разӕй» (Рац. 32:34). Библий финст не ’рцудӕй, адӕн еци изӕди уидтонцӕ ӕви нӕ, е. Фал Моисей адӕнӕн разамунд куд лӕвардта ӕма сӕ куд ахур кодта, уомӕй бӕрӕг адтӕй, изӕдтӕ ин ке ӕнхус кодтонцӕ.

8. Изӕдтӕ Йесо Навин ӕма Езекийӕн куд банхус кодтонцӕ?

⁸ Изӕдтӕ ма кӕмӕн ӕнхус кодтонцӕ? Библи зӕгъуй, «Йегови ӕфсади сӕргълӕууӕг» изӕд ке адтӕй ӕма Йесо Навинӕн ке банхус кодта ханаайнӕгти ниццӕгъдун (Йес. Н. 5:13–15; 6:2, 21). Фӕстӕдӕр паддзах Езекий рӕстӕг Ассирий ӕфсӕдтӕ Йерусалимбӕл ӕрбамбурд ӕнцӕ, цӕмӕй ӕй ниппурхӕ кодтайуонцӕ. Ӕма уӕд еунӕг ӕхсӕвӕмӕ «Йегови изӕд рацудӕй ӕма Ассирий ӕфсадӕй ниццагъта сӕдӕ ӕстай фондз мин лӕги» (2 Пад. 19:35).

9. Израилӕгтӕ ӕнӕнхӕст разамонгутӕмӕ цӕмӕн гъӕуама игъустайуонцӕ?

⁹ Изӕдтӕ алцӕмӕйдӕр ӕнхӕст ӕнцӕ,  фал ӕнхус ба кодтонцӕ ӕнӕнхӕст адӕнӕн. Зӕгъӕн, Моисей Йегови не ’скадгин кодта (Ним. 20:12). Йесо Навин гаваойнӕгти хӕццӕ бадзурд искӕнуни разӕй Хуцауи нӕ бафарста (Йес. Н. 9:14, 15). Езеки ба еу рӕстӕг иссӕй сӕрбӕрзонд (2 Анз. 32:25, 26). Кӕд еци нӕлгоймӕгтӕ ӕнӕнхӕст адтӕнцӕ, уӕддӕр син израилӕгтӕ гъӕуама сӕ разамундмӕ игъустайуонцӕ, уомӕн ӕма бӕрӕг адтӕй, Йеговӕ син изӕдти фӕрци ке ӕнхус кодта. Ӕцӕгӕйдӕр, Йеговӕ ӕ адӕнӕн адтӕй сӕ разамонӕг.

10. Моисей Хуцауи Закъон куд ӕнхӕст кодта?

¹⁰ Хуцау разамонӕгӕй ке исӕвардта, етӕ архайдтонцӕ Хуцауи Дзурди амундтӕмӕ гӕсгӕ. Израилӕгтӕн лӕвӕрд закъон Библи хонуй «Моисеййи закъон» (1 Пад. 2:3). Фал уӕддӕр Библи комкоммӕ зӕгъуй, еци Закъон син Йеговӕ ке равардта, ӕма ’й Моисей ӕхуӕдӕг дӕр гъӕуама ӕнхӕст кодтайдӕ (2 Анз. 34:14). Зӕгъӕн, Йеговӕ ин цатур искӕнун ку баихӕс кодта, уӕд «Моисей алцидӕр искодта, Йеговӕ ин куддӕриддӕр загъта, уотӕ» (Рац. 40:1–16).

11, 12. а) Йесо Навин ӕма Хуцауи адӕнӕн разамунд ка лӕвардта, еци паддзӕхтӕ ци гъӕуама кодтайуонцӕ? б) Израилӕгти разамонгутӕ Хуцауи Дзурдмӕ гӕсгӕ куд архайдтонцӕ?

¹¹ Йесо Навин разамонӕг ку иссӕй, уӕд имӕ адтӕй Хуцауи Дзурди къохфинст, ӕма ин Йеговӕ загъта: «Ӕхсӕвӕй-бонӕй ӕй дӕхецӕн сабур гъӕлӕсӕй кӕсӕ, цӕмӕй си ци финст ес, уони еугурейдӕр ӕнхӕст кӕнай» (Йес. Н. 1:8). Аци фӕдзӕхстмӕ гӕсгӕ ма архайдтонцӕ, фӕстӕдӕр Хуцауи адӕнӕн разамунд ка лӕвардта, еци паддзӕхтӕ дӕр. Етӕ гъӕуама Закъон сӕхецӕн рафинстайуонцӕ, алли бон дӕр ӕй кастайуонцӕ, ӕма «закъони цидӕриддӕр финст ес», уой ӕнхӕст кодтайуонцӕ. (Бакӕсӕ Дуккаг закъон 17:18–20.)

¹² Цума израилӕгти разамонгути Хуцауи Дзурд цӕмӕ разӕнгард кодта? Ӕркӕсӕн паддзах Иосий хабармӕ. Моисеййи закъон ку иссирдтонцӕ, уӕд ӕй Иосийӕн кӕсун райдӕдтонцӕ *. Цума паддзах куд бакодта, Закъони дзурдтӕ ку фегъуста, уӕд? Библи зӕгъуй: «Куддӕр паддзах закъони киунуги дзурдтӕ фегъуста, уотӕ ӕ уӕледарӕс ӕрӕскъудта». Хуцауи Дзурд Иосий зӕрдӕмӕ уотӕ багъардта, ӕма ӕнӕгъӕнӕ бӕсти ӕндӕр хуцӕуттӕн цидӕриддӕр гумеритӕ адтӕй, уони ниппурхӕ кодта, удта Комуадзӕни фӕдбӕл дессаги устур бӕрӕгбон искодта (2 Пад. 22:11; 23:1–23). Иоси дӕр ӕма иннӕ еузӕрдон разамонгутӕ дӕр Хуцауи Дзурдмӕ ке игъустонцӕ, уой фӕрци цӕттӕ адтӕнцӕ, адӕнӕн ци разамунд лӕвардтонцӕ, уой, Хуцау куд зӕгъуй, уомӕ гӕсгӕ раййевун. Еци ӕййивддзийнӕдтӕ адӕнӕн ӕнхус кодтонцӕ Хуцаумӕ игъосун.

13. Хуцауи адӕни сӕргълӕугутӕ иннӕ адӕни сӕргълӕугутӕй цӕмӕй хецӕн кодтонцӕ?

¹³ Ӕндӕр адӕниххӕттити сӕргълӕугутӕ архайдтонцӕ адӕймаги ӕнӕнхӕст зундӕй. Зӕгъӕн, ханаайнӕгти сӕргълӕугутӕ ӕма сӕ адӕн хъӕбӕр илгъаг гъуддӕгтӕ кодтонцӕ. Уонӕмӕ хаттӕнцӕ тогӕй хӕстӕгути хӕццӕ, фонси хӕццӕ, нӕлгоймаг нӕлгоймаги хӕццӕ, удта силгоймаг силгоймаги хӕццӕ. Уомӕй уӕлдай ма мӕнгӕ хуцӕуттӕн кувтонцӕ ӕма син сӕ сувӕллӕнтти нивондӕн хастонцӕ (Лев. 18:6, 21–25). Хуцауи фӕрци израилӕгтӕн кӕдзосдзийнади фӕдбӕл ци амундтӕ адтӕй, уӕхӕн амундтӕ Вавилони ӕма Египети паддзӕхтӕмӕ дӕр н’ адтӕй (Ним. 19:13). Хуцауи адӕн ба ’й уидтонцӕ, сӕ сӕргълӕугутӕ кӕдзос ке адтӕнцӕ, мӕнгӕ хуцӕуттӕн ке нӕ кувтонцӕ ӕма ӕнӕгъдау гъуддӕгтӕй  сӕхе еуварс ке дардтонцӕ. Бӕрӕг ӕй, Йеговӕ адтӕй сӕ разамонӕг.

14. Йеговӕ ӕ адӕни разамонгути еуӕй-еухатт цӕмӕн бафхуӕридӕ?

¹⁴ Фал Хуцауи адӕнӕн разамунд ка лӕвардта, еци паддзӕхтӕй алке Хуцауи амундтӕмӕ гӕсгӕ нӕ архайдта. Еуӕй-еуетӕ ба си Хуцауи Дзурд, сугъдӕг хъаури разамунд ӕма изӕдти ӕнхус ӕппундӕр нецӕмӕ дардтонцӕ. Уой туххӕй сӕ Йеговӕ бафхуӕридӕ кенӕ син сӕ бӕсти ӕндӕр еске ниввӕридӕ (1 Сам. 13:13, 14). Фӕстӕдӕр ба Йеговӕ ӕ адӕнӕн исӕвардта, алцӕмӕйдӕр ӕнхӕст ка адтӕй, уӕхӕн разамонӕги.

15. а) Пахампартӕ ци дзурдтонцӕ, ӕнхӕст разамонӕг ке гъӕуама ӕрцудайдӕ, уой туххӕй? б) Еци разамонӕг ка иссӕй?

¹⁵ Йеговӕ ӕности дӕргъи игъосун кодта, ӕ адӕнӕн тӕккӕ хуӕздӕр разамонӕги ке исӕвӕрдзӕй. Зӕгъӕн, Моисей израилӕгтӕн загъта: «Дӕ Хуцау Йеговӕ дин уӕхе ’хсӕнӕй, де ’нсувӕртӕй, ратдзӕй мӕн хузӕн пахампар, ӕма гъӕуама уомӕ игъосайтӕ» (Дук. з. 18:15). Пахампар Исай ба уой туххӕй загъта, зӕгъгӕ, е уодзӕй «хецау ӕма разамонӕг» (Ис. 55:4). Данел ба финста «Разамонӕг» Мессийӕ ке уодзӕй (Дан. 9:25). Фӕстӕдӕр Йесо Киристе дӕр загъта, Хуцауи адӕнӕн «Разамонӕг» ӕхуӕдӕг ке уодзӕй. (Бакӕсӕ Матфеййи 23:10). Йесой ахуркӕнуйнӕгтӕ ӕууӕндтӕнцӕ, Хуцау уой ке равзурста, уобӕл ӕма ӕ фӕдбӕл цудӕнцӕ (Иоан. 6:68, 69). Цума Йеговӕ ӕ адӕнӕн разамонӕгӕй Киристей ке исӕвардта, уобӕл уотӕ федарӕй цӕмӕн ӕууӕндтӕнцӕ?

16. Йесо Хуцауи сугъдӕг хъаурӕй хайгин ке адтӕй, е цӕмӕй бӕрӕг адтӕй?

¹⁶ Йесо хайгин адтӕй Хуцауи сугъдӕг хъаурӕй. Йесо донаргъуд ку райста, уӕд Аргъауӕг Иоанн фӕууидта «арв куд фегон ӕй ӕма ӕ сӕрмӕ Хуцауи сугъдӕг хъаурӕ бӕлӕуи хузи куд ӕрцӕйцудӕй, уой» (Мар. 1:10–12). Киристе зӕнхӕбӕл ку лӕггадӕ кодта, уӕд Хуцауи сугъдӕг хъаури фӕрци адӕни ахур кодта ӕма дессӕгтӕ ӕвдиста (Гъуд. 10:38). Уомӕй уӕлдай ма имӕ адтӕй, сугъдӕг хъаурӕй ка цӕуй, уӕхӕн менеугутӕ дӕр: уарзондзийнадӕ, цийнӕдзийнадӕ ӕма федар ӕууӕндундзийнадӕ (Иоан. 15:9; Дзиуит. 12:2). Еунӕг сӕргълӕууӕгӕй дӕр уотӕ федарӕй зӕгъӕн нӕййес, ӕма Хуцауи сугъдӕг хъаурӕй хайгин адтӕй. Мадта бӕрӕг ӕй, Йеговӕ Киристей ӕхуӕдӕг ке равзурста.

17. Изӕдтӕ Йесойӕн куд ӕнхус кодтонцӕ?

¹⁷ Йесойӕн изӕдтӕ ӕнхус кодтонцӕ. Донаргъуди фӕсте Йесомӕ «фӕззиндтӕнцӕ изӕдтӕ ӕма ин лӕггадӕ кодтонцӕ» (Матф. 4:11). Ӕ мӕлӕтмӕ ма цалдӕр сахатти ку байзадӕй, «уӕд имӕ уӕларвӕй ӕрцудӕй изӕд ӕма ’й бафедар кодта»  (Лук. 22:43). Йесо ӕй зудта багъӕуаги имӕ Йеговӕ изӕдти ӕнхусмӕ ке рарветдзӕй (Матф. 26:53).

18, 19. Хуцауи Дзурд Йесой цардбӕл ӕма иннети куд ахур кодта, уобӕл куд фӕббӕрӕг ӕй?

¹⁸ Йесо Хуцауи Дзурдӕн аргъ кодта. Йесо ӕ лӕггади райдайӕнӕй, ӕ мӕлӕти уӕнгӕ дӕр ӕвдиста, Хуцауи Дзурдӕн ке аргъ кӕнуй (Матф. 4:4). Мӕлгӕ ку кодта, уӕддӕр ма загъта, Мессийи туххӕй пахампаради финст ка ’нцӕ, еци дзурдтӕ (Матф. 27:46; Лук. 23:46). Уӕди рӕстӕги дини разамонгутӕ Йесой хузӕн н’ адтӕнцӕ. Хуцауи Дзурди ци финст ес, е сӕ зӕрдӕмӕ ку нӕ фӕццӕуидӕ, уӕд ибӕл сӕ къох ракъуӕриуонцӕ. Йесо уони туххӕй пахампар Исаййи дзурдтӕ ӕрхаста: «Аци адӕн мӕ кадгин кӕнунцӕ цъухӕй, сӕ зӕрдитӕ ба идард ӕнцӕ мӕнӕй. Дзӕгъӕли мин ковунцӕ, уомӕн ӕма, ци амонунцӕ, етӕ адӕни имисгӕ фӕдзӕхститӕй ӕндӕр неци ’нцӕ» (Матф. 15:7–9). Цума Йеговӕ ӕ адӕнӕн уӕхӕн разамонӕги ескӕд исӕвардтайдӕ?

¹⁹ Йесо иннети ахур кӕнгӕй дӕр пайда кодта Хуцауи Дзурдӕй. Дини разамонгутӕ ин къахӕн фарстатӕ ку лӕвардтонцӕ, уӕд син ӕхе зундӕй кенӕ царди ци фӕууидта, уомӕй дзуапп нӕ раттидӕ. Е адӕнӕн алкӕддӕр дзурдта, Хуцауи Дзурди ци финст ес, уой (Матф. 22:33–40). Киристе ӕ игъосгутӕн, уӕлӕрвти куд цардӕй кенӕ Дун-дуйне куд конд ӕй, уӕхӕн хабӕрттӕ нӕ кодта, фал син «сӕ зунд бунтондӕр байгон кодта, цӕмӕй Финстадӕ балӕдӕрдтайуонцӕ» (Лук. 24:32, 45). Йесо Хуцауи Дзурд уарзта ӕма ’й иннетӕн амудта.

20. а) Йесо Йегови ке кадгин кодта, е цӕмӕй бӕрӕг ӕй? б) Ирод Агриппӕ Фиццаг Йесойӕй цӕмӕй хецӕн кодта?

²⁰ Адӕн хъӕбӕр дес кодтонцӕ, Йесо куд дзоруй уобӕл, фал Йесо уӕддӕр кадӕ кодта ӕхе Ахургӕнӕг Йеговӕ Хуцауӕн (Лук. 4:22). Еу гъӕздуг адӕймаг Йесой «хуарз Ахургӕнӕг» ку исхудта, уӕд ин е ба сӕрниллӕгӕй загъта: «Цӕмӕн мӕ хонис хуарз? Хуцауӕй ӕндӕр хуарз неке ӕй» (Мар. 10:17, 18). Киристе аци дзурдтӕ ку загъта, уомӕй еу аст анзей фӕсте Иудейи сӕргълӕууӕг иссӕй Ирод Агриппӕ Фиццаг. Еци адӕймаг Киристей хузӕн н’ адтӕй. Еухатт Ирод адӕн ӕрӕмбурд кодта ӕма сӕмӕ паддзахи уӕледарӕси рацудӕй. Адӕн ӕй ку фӕууидтонцӕ ӕма куд дзоруй, уой ку фегъустонцӕ, уӕд гъӕр исистонцӕ: «Е адӕймаги дзорун нӕй, фал хуцауи!» Гъема Ирод дӕр ӕхемӕ ниццӕй. Цума уой фӕсте ци ’рцудӕй? Библи зӕгъуй: «Уӕд ӕй ӕвваст Йегови изӕд ӕрцавта, уомӕн ӕма, Хуцауӕн ци кадӕ ӕмбӕлуй, уой ӕхе бакодта, ӕма фӕссӕйгӕ ’й ӕма ’й листӕг золкъитӕ бахуардтонцӕ, ӕма рамардӕй» (Гъуд. 12:21–23). Бӕрӕг адтӕй, Йеговӕ Ироди ӕ адӕнӕн разамонӕгӕй ке нӕ равзурста. Фал Йесо Хуцауӕй ӕвзурст ке ӕй, уомӕн ба ес берӕ бӕлвурдгӕнӕнтӕ. Йесо кадӕ алкӕддӕр кодта, ӕ адӕнӕн разамунд ка дӕттуй, еци Хуцау Йеговӕн.

21. Иннӕ статьяй цӕбӕл дзордзиан?

²¹ Йегови уотӕ нӕ фӕндадтӕй, цӕмӕй Йесо разамонӕг ӕрмӕстдӕр цалдӕр анзей дӕргъи адтайдӕ. Йесо ку райгас ӕй, уӕд ӕ ахуркӕнуйнӕгтӕн загъта: «Лӕвӕрд мин ӕнцӕ еугур бартӕ уӕлӕрвти дӕр ӕма зӕнхӕбӕл дӕр. [...] Ӕма цалинмӕ аци цардӕвӕрди кӕрон не ’рцӕуа, уӕдмӕ ӕз алли бон дӕр уодзӕн уӕ хӕццӕ» (Матф. 28:18–20). Фал Йесойӕн ӕ бон куд ӕй Хуцауи адӕнӕн разамунд уӕлӕрвтӕй дӕттун? Йеговӕ Киристей дӕлбарӕ ке бакодта, цӕмӕй ӕ адӕнӕн разамунд дӕттонцӕ? Ӕма киристӕнтти бон куд ӕй, Хуцауи номӕй ка архайуй, уони базонун? Аци фарстатӕбӕл дзурд цӕудзӕй иннӕ статьяй.