1, 2. (a) Antoy pidumaan na saray mangidadaulod Saray Tasi nen Jehova ed saray mangidadaulod arum ya relihyon? (b) Antoy aralen tayo ed sayan artikulo tan ed onsublay?

“SIOPAY lider yo?” Atan so mabetbet ya itetepet ed Saray Tasi nen Jehova. Tan agtayo la pankelawan itan! Diad dakel ya relihyon, walan walay lider o pangulo da. Diad sikatayo balet, proud tayon mangibaga ed saray mantetepet ya say Lider tayo et aliwan imperpekton too. Imbes, tutumboken tayoy panangiwanwan na apaolin Kristo, ya ontutumbok met ed panangiwanwan na Ama to, si Jehova.—Mat. 23:10.

² Walay grupo na lalaki, say “matoor tan makabat ya aripen” ya mangiwawanwan ed totoo na Dios natan. (Mat. 24:45) Balet panon tayon amta ya talagan si Jehova so mangiwawanwan ed sikatayo panamegley na Anak to? Diad sayan artikulo tan ed onsublay, pantongtongan tayo no panon ya diad nilibo lan taon et igigiya nen Jehova iray pigaran totoo ya mangidaulo. Aralen ed sarayan artikulo so taloran ebidensya ya talagan indaulo nen Jehova iraman ya lalaki. Prueba iratan ya sikato nensaman anggad natan so tuan Lider na totoo to.—Isa. 58:11.

3. Antoy amabiskeg ed si Moises ya mangidaulo ed Israel?

³ Pinabiskeg na masanton espiritu iray angirepresenta ed Dios.  Imanoey Moises ya pinilin lider na saray Israelita. Antoy akatulong pian nagawaan toy ambelat ya asainmin to? ‘Inyan nen Jehova so masanton espiritu To ed sikato.’ (Basaen so Isaias 63:11-14.) Lapud pinabiskeg na masanton espiritu si Moises, si Jehova sirin so talagan mangiwawanwan ed totoo To.

4. Panon ya atebek na saray Israelita ya walad si Moises so espiritu na Dios? (Nengnengen so litratod gapo na artikulo.)

⁴ Lapud agnanengneng so masanton espiritu, panon ya atebek na saray Israelita ya wala itan ed si Moises? Atan so tinmulong ed sikato pian makapanggawa na saray milagro tan nipaamta toy ngaran na Dios ed Faraon. (Exo. 7:1-3) Lapud masanton espiritu et nipatnag met nen Moises iray balibalin kualidad a singa say aro, inkauyamo, tan anos, kanian kualipikado ya mangidaulo ed saray Israelita. Talagan duma si Moises ed saray maruksa tan makasarilin lider na arum ya bansa! (Exo. 5:2, 6-9) Malinew so ebidensya: Pinili nen Jehova si Moises ya magmaliw a lider na totoo To.

5. Panon ya pinabiskeg nen Jehova iray arum nin Israelitan lalaki pian niwanwan day totoo to?

⁵ Ag-abayag, pinabiskeg na masanton espiritu nen Jehova so arum nin lalaki ya aturon mangiwanwan ed totoo to. “Si Josue ya anak nen Nun et napno na espiritu na karunongan.” (Deu. 34:9) “Niwala ed si Gideon so espiritu nen Jehova.” (Ukom 6:34) Tan “pinabiskeg na espiritu nen Jehova si David.” (1 Sam. 16:13) Amin ira et nanmatalek ed tulong na espirituy Dios, tan atan so amabiskeg ed sikara pian nagawaan da ray agda nasarag no diad sarili dan biskeg. (Jos. 11:16, 17; Ukom 7:7, 22; 1 Sam. 17:37, 50) Bilang resulta, nidayew si Jehova ed saray makapakelkelaw ya agawaan da.

6. Akin et labay na Dios ya respetoen na saray Israelita iray lider da?

⁶ Antoy dugan reaksion komon na saray Israelita ed malinew iran ebidensya ya papabiskegen na masanton espiritu iraman ya lalaki? Nen nanreklamo iray Israelita ed panangidaulo nen Moises, intepet nen Jehova: “Anggad kapigan so agpanrespeto ed siak na sarayan totoo?” (Num. 14:2, 11) On, malinew ya pinili nen Jehova si Moises, Josue, Gideon, tan David ya mangirepresenta ed sikato bilang Lider. Nen inunor na totoo irayan lalaki, diad tua et si Jehova so uunoren da bilang Lider.

7. Panon ya tinulongan na saray anghel si Moises?

⁷ Tinulongan na saray anghel iray angirepresenta ed Dios. (Basaen so Hebreo 1:7, 14.) Inusar nen Jehova iray anghel ya mangiganggan, ontulong, tan mangigiya ed si Moises. Imbaki na Dios si Moises “bilang manuley tan mangiliktar diad panamegley na anghel a nampanengneng ed sikato diad masabit a kiew.” (Gawa 7:35) ‘Impasabi nen Jehova panamegley na saray anghel’ so Ganggan, ya inusar nen Moises pian nibangat iray Israelita. (Gal. 3:19) Tan imbaga nen Jehova ed sikato: “Iwanwan mo iray totoo diad pasen a sinalitak ed sika. Say anghel ko so onlad unaan mo.” (Exo. 32:34) Anggapoy ibabaga na Biblia ya akanengneng iray Israelita na anghel ya manggagawad saraman ya kimey. Balet, diad paraan na impangibangat tan impangigiya nen Moises ed sikara, malinew ya wala ray ontutulong ed sikato ya mas mabiskeg nen say too.

8. Panon ya tinulongan na saray anghel si Josue tan si Hezekias?

⁸ Say sinmublay ed si Moises ya si Josue et pinabiskeg na “prinsipe na armada nen Jehova” pian idaulo so totoo na Dios ya milaban ed saray Canaanita tan analo iray Israelita. (Jos. 5:13-15; 6:2, 21) Ag-abayag, tinaktakot na saray Asiryano si Arin Hezekias ya lusoben tan sakopen na dakdakel ya sundalo da so Jerusalem. Balet diad sakey a labi labat, “say anghel nen Jehova et pinatey toy 185,000 lalaki.”—2 Ara. 19:35.

9. Kasin agla unoren na saray Israelita iray mangidadaulo ed sikara lapud aliwa ran perpekto? Ipaliwawa.

 ⁹ Siempre, perpekto iray anghel, balet saray lalakin tinulongan da et aliwan perpekto. Aminsan et ag-apasanto nen Moises si Jehova. (Num. 20:12) Agkinerew nen Josue so panangiwanwan na Dios antis ya akisipanan ed saray Gibeonita. (Jos. 9:14, 15) Tan walay panaon a nagmaliw ya “mapaatagey so puso” nen Hezekias. (2 Awa. 32:25, 26) Balet anggano imperpekto iraman ya lalaki, iilaloan nen Jehova ya unoren na saray Israelita so panangiwanwan da. Tinulongan to iraman ya lalaki panamegley na saray anghel to. On, si Jehova so mangiwawanwan ed totoo to.

10. Panon ya inggiya na Ganggan na Dios si Moises?

¹⁰ Inggiya na Salitay Dios iray angirepresenta ed sikato. Diad Biblia, say Ganggan ya inter ed Israel et tinawag ya “Ganggan nen Moises.” (1 Ara. 2:3) Balet, ibabaga na Kasulatan ya si Jehova so talagan Manangiter na Ganggan, tan kaukolan ya unoren met nen Moises itan ya Ganggan. (2 Awa. 34:14) Sanen inikdan nen Jehova na instruksion no panon ya ipaalagey so tabernakulo, “ginawa nen Moises so amin ya ingganggan nen Jehova ed sikato. Ontan so ginawa to.”—Exo. 40:1-16.

11, 12. (a) Antoy obligadon gawaen nen Josue tan saray arari ya angidaulo ed totoo na Dios? (b) Antoy epekto na Salitay Dios ed saramay lalakin angidaulo?

¹¹ Manlapud gapo na impangidaulo nen Josue, walay kopya to na Salitay Dios. Oniay ingganggan ed sikato: “Nepeg mon basaen a makalna ed agew tan labi, pian maalwar mon nagawaan so amin a nisulat ed saya.” (Jos. 1:8) Ag-abayag, saray ararin nanuley ed totoo na Dios et ontan met so ginawa da. Obligado ran basaen so Ganggan ya inagew-agew, kopyaen, tan ‘gawaen so amin a salita na Ganggan tan saray totontonen diad pangunor dad saratan.’—Basaen so Deuteronomio 17:18-20.

¹² Antoy epekto na Salitay Dios ed saramay lalakin angidaulo? Imanoen pay alimbawa nen Arin Josias. Sanen aromog so sakey ya dokumenton akasulatan na Mosaikon Ganggan, imbasa itan na sekretaryo nen Josias ed sikato. * Antoy reaksion na ari? “Sanen nadngel na ari iray salitan walad libro na Ganggan, pinilat toy kawes to.” Balet aliwan satan labat. Nampaigiya ed Salita na Dios si Josias, tan ginapoan toy impasyan kampanya pian patundaey idolatriya tan inorganisa toy sankabalgan ya panselebray Paskua. (2 Ara. 22:11; 23:1-23) Lapud inggiya na Salitay Dios si Josias tan saray arum nin matoor ya lider, akaparaan iran umanen tan linewen so instruksion ya iiter dad totoo na Dios. Akatulong iratan ya pananguman pian nagawaan na saray totoo na Dios nensaman so panlabayan To.

13. Antoy pidumaan na saray lider na totoo na Dios ed saray paganon bansa?

¹³ Talagan duma iraman ya matoor ya arari ed saray lider na arum a bansa ya nampaigiya ed karunongay too tan makapuy ya estratehiya! Singa bilang, saray lider tan totoo ed Canaan et nanggawa na mauges iran bengatla, kaiba lay piakdol ed kapamilya, homoseksualidad, pisekso ed ayep, pangibagat ed ugugaw, tan graben idolatriya. (Lev. 18:6, 21-25) Aliwan satan labat, saray lider na Babilonia tan Ehipto et anggapoy tutumboken dan ganggan parad kalinisan balet walay inter na Dios ed Israel. (Num. 19:13) Talagan duma iray totoo na Dios nensaman ta anengneng dan impaseseg na saray matoor ya lider da so espiritual, moral, tan pisikal a kalinisan. Malinew ya si Jehova so mangiwawanwan ed sikara.

14. Akin ya dinisiplina nen Jehova so arum ya lider na totoo to?

 ¹⁴ Aliwan amin ya arin nanuley ed totoo na Dios nensaman et maunor ed saray instruksion To. Saramay agtinmulok ed si Jehova et agda inawat so panangiwanwan na masanton espiritu to, saray anghel to, tan say Salita to. Diad pigaran inkagawa, dinisiplina tan sinalatan nen Jehova iraman ya lider. (1 Sam. 13:13, 14) Diad inggeter ton panaon, sikatoy anuro na sakey ya mas superyor nen saray amin ya totoon inusar ton lider.

15. (a) Panon ya impaamta na saray propeta ya walay nikadkaduman lider ya onsabi? (b) Siopa so nipropesiyan lider?

¹⁵ Diad loob na pigan lasus a taon, impropesiya nen Jehova ya sikatoy manuro na nikadkaduma tan kualipikadon lider ya mangidaulo ed totoo to. Oniay mensahe ya impasabi nen Moises ed saray Israelita: “Diad saray agagim et manuro si Jehova a Dios mo na sakey a propeta a singa siak. Sikatoy nepeg mon dengelen.” (Deu. 18:15) Impasakbay nen Isaias ya Sikatoy magmaliw ya “lider tan manuley.” (Isa. 55:4) Tan apuyanan si Daniel a mangisulat nipaakar ed onsabin “Mesias a Pangulo.” (Dan. 9:25) Tan nen wadiad dalin si Jesu-Kristo, tinukoy toy sarili to bilang “Lider” na totoo na Dios. (Basaen so Mateo 23:10.) Sikatoy mabulos met ya tinumbok na saray disipulo to, tan pinaneknekan da ya sikato so pinili nen Jehova. (Juan 6:68, 69) Antoy akakombinse ed sikara ya si Jesu-Kristo so usaren nen Jehova ya mangiwanwan ed totoo to?

16. Anto ray prueba ya pinabiskeg na masanton espiritu si Jesus?

¹⁶ Pinabiskeg na masanton espiritu si Jesus. Nen nampabautismo si Jesus, anengneng nen Juan a Managbautismo ya “nalulukasan so tawen, tan say espiritu a singa malapati et ondadapo ed sikato.” Kayari na satan, “sikatoy pinakiwas na espiritu ya onlad kalawakan.” (Mar. 1:10-12) Diad ministeryo nen Jesus ed dalin, sikatoy pinabiskeg na masanton espiritu pian manggawa na saray milagro tan mansalita a walaan na autoridad a nanlapud Dios. (Gawa 10:38) Sakey ni, sikatoy tinulongan na masanton espiritu pian nipanengneng to ray perpekton bunga na satan, singa say aro, liket, tan mabiskeg a pananisia. (Juan 15:9; Heb. 12:2) Kanian base ed saratan ya ebidensya, talagan si Jesus so pinili nen Jehova ya lider.

17. Antoy ginawa na saray anghel pian tulongan si Jesus?

¹⁷ Tinulongan na saray anghel si Jesus. Ag-abayag kayarin abautismoan si Jesus, “sinmabi iray anghel tan nanlingkor irad sikato.” (Mat. 4:11) Pigaran oras antis na impatey to, “walay anghel a nanlapud tawen a nampanengneng tan amabiskeg ed sikato.” (Luc. 22:43) Segurado si Jesus ya  mangibaki si Jehova na anghel ya ontulong ed sikato no nakaukolan to pian nasumpal so panlabayan na Dios.—Mat. 26:53.

18, 19. Panon ya nampaigiya si Jesus ed Salita na Dios diad impanbilay tan impanbangat to?

¹⁸ Inggiya na Salitay Dios si Jesus. Manlapud gapo na ministeryo to, nampaigiya si Jesus ed Kasulatan. (Mat. 4:4) Diad tua, inunor toy Salita na Dios anggad impatey tod panamairapan ya kiew. Anggan sanen asingger lan ompatey, sinalambit toy propesiya nipaakar ed Mesias. (Mat. 27:46; Luc. 23:46) Balet duma iray lider na relihyon ed saman ya panaon ta ibabaliwala day Salita na Dios no kontra la itan ed saray tradisyon da. Inulit nen Jesus imay imbaga nen Jehova panamegley nen propeta Isaias pian deskribien ira: “Sarayan totoo et papagalangan da ak ed panamegley na bibil da, balet arawrawi ed siak so kapusoan da. Anggapoy kakanaan na pandadayew dad siak, ta saray ganggan na totoo so ibabangat dan doktrina.” (Mat. 15:7-9) Wala kasi anggan sakey ed saraman a totoo ya pilien nen Jehova a mangiwanwan ed totoo to?

¹⁹ Nampaigiya si Jesus ed Salita na Dios aliwa labat a diad saray ginawa to noagta pati diad saray bangat to. Nen wala ray isyu nipaakar ed relihyon, agnanmatalek ed malaknab ya karunongan odino eksperiensya to. Imbes, kinonsulta toy ibabaga na Kasulatan. (Mat. 22:33-40) Tan imbes ya pambiliben to ray ondedengel diad pangistorya toy bilay tod tawen odino impamalsa ed uniberso, “nilukasan toy nonot da pian natalosan da so kabaliksan na Kasulatan.” (Luc. 24:32, 45) Pinabpabli nen Jesus so Salita na Dios, tan labalabay ton inabang itan ed arum.

20. (a) Panon ya impanengneng nen Jesus ya sikatoy manpapasakop ed Dios? (b) Antoy naaralan tayod pandumaan nen Jesus tan si Herodes Agripa I nipaakar ed saray pipilien nen Jehova ya lider?

²⁰ Anggano mandinayew iray ondedengel ed si Jesus lapud “makapasagyat ya ibabaga to,” inter toy dayew ed Managbangat to, si Jehova. (Luc. 4:22) Nen indayew na mayaman a laki si Jesus tan tinawag ton “Maong a Managbangat,” oniay mapaabeban inyebat to: “Akin et tatawagen mo ak a maong? Anggapoy arum a maong, noag say Dios.” (Mar. 10:17, 18) Talagan dumay ugali to no ikomparad si Herodes Agripa I, ya nagmaliw ya ari o lider na Judea kayari na ngalngali waloran taon! Diad sakey ya espisyal a miting, nansulong si Herodes na “kawes na ari.” Insan inmeyag iray totoo: “Boses na dios, aliwan boses na too!” Mapatnag ya manlikliket si Herodes ed satan. Antoy sinmublay ya agawa? “Tampol a sikatoy kinabil na anghel nen Jehova, lapud inala toy gloria a parad Dios, tan sikatoy kinan na saray bigis tan inatey.” (Gawa 12:21-23) Seguradon anggapoy makalakal ya toon akanengneng ed saman ya mangibagan pinili nen Jehova si Herodes ya magmaliw a lider. Diad si Jesus balet, dakel so mabiskeg ya ebidensyan sikatoy tinuro na Dios, tan naynay ton iglogloria si Jehova bilang Sankamakapanyarian ya Lider na totoo to.

21. Antoy pantongtongan tayod onsublay ya artikulo?

²¹ Say panuley nen Jesus bilang lider et aliwa labat ya pigaran taon. “Amin a pakauley ed tawen tan diad dalin et niiter lad siak” so inkuan to nen apaolid bilay. “Tan wala ak ed sikayo ed amin ya agew anggad kaunoran a parte na sistema na mundo.” (Mat. 28:18-20) Balet bilang agnanengneng ya espiritu ed tawen, panon ya iwanwan nen Jesus iray totoo na Dios diad dalin? Siopa ray usaren nen Jehova ya mankimey diad panangidaulo nen Kristo tan mangidaulo ed saray totoo To? Tan panon ya nabidbir na saray Kristiano iray mangirerepresenta ed sikato? Saratan ya tepet et naebatan ed onsublay ya artikulo.