1, 2. (a) Ki diferensia tin entre e hendenan ku ta dirigí Testigunan di Yehova i esnan ku ta dirigí otro religion? (b) Kiko nos lo trata den e artíkulo akí i esun siguiente?

“KEN ta boso lider?” Hopi biaha hende sa hasi Testigunan di Yehova e pregunta ei, i ku nan rason. Den hopi religion, ta un hòmber òf muhé ta e lider, òf kabesante. Pero nos ta orguyoso di por bisa nan ku nos Lider no ta un hende imperfekto. Mas bien, nos ta sigui e guia di Kristu, kende na su turno ta sigui e guia di su Tata, Yehova.—Mat. 23:10.

² Sinembargo, tin un grupo di hòmber, “e esklabo fiel i prudente,” ku ta dirigí e pueblo di Dios awe riba tera. (Mat. 24:45) Pues, kon nos por sa ku ta Yehova ta esun ku realmente ta dirigí nos mediante su Yu ku ta den shelu? Wèl, den e artíkulo akí i esun siguiente, nos lo analisá kon pa míles di aña kaba Yehova a bin ta nombra sierto hòmber pa dirigí su pueblo. Tur dos artíkulo lo trata tres motibu pakiko nos por tin sigur ku Yehova en bèrdat ta guia e hòmbernan akí. Esaki lo yuda nos mira ku e tabata—i ainda ta—e berdadero Lider di su pueblo.—Isa. 58:11.

3. Kiko a yuda Moises dirigí e israelitanan?

³ Spiritu santu a duna e representantenan di Dios poder. Laga nos tuma e ehèmpel di Moises, kende a haña e enkargo pa ta lider  di e israelitanan. Kiko a prepar’é pa kumpli ku e tarea masha importante akí? Yehova “a pone su spiritu santu” den dje. (Lesa Isaías 63:11-14.) Pues, bon mirá, ta Yehova tabata esun ku a dirigí su pueblo, pasobra ta su spiritu santu tabata yuda Moises.

4. Kon e israelitanan por tabata sa ku Moises tabatin e spiritu di Dios? (Wak e promé plachi.)

⁴ Pero spiritu santu ta un forsa invisibel. Pues kon e israelitanan por tabata sa ku e forsa akí tabata obra riba Moises? Spiritu santu a duna Moises e kapasidat pa hasi milager i pa deklará e nòmber di Dios na Fárao. (Éks. 7:1-3) Ademas, spiritu santu a yuda Moises kultivá bunita kualidatnan manera amor, humildat i pasenshi, ku a hasié kapas pa dirigí e israelitanan. Ki un kontraste grandi esaki tabata ku e lidernan egoista i kruel di e otro nashonnan! (Éks. 5:2, 6-9) Pues, tabata bisto anto ku Yehova a skohe Moises pa ta e lider di Su pueblo.

5. Splika kon Yehova a duna otro hòmber israelita poder di spiritu santu pa nan por a dirigí su pueblo.

⁵ Mas despues, Yehova a nombra otro hòmbernan pa dirigí su pueblo i a duna nan tambe poder mediante su spiritu santu. Beibel ta bisa: “Hosue, yu hòmber di Nun, tabata yen di e spiritu di sabiduria.” (Deu. 34:9) “E spiritu di SEÑOR a bini riba Gideon.” (Hues. 6:34) I “e spiritu di SEÑOR a bini ku poder riba David.” (1 Sam. 16:13) Tur e hòmbernan akí a dependé riba e spiritu santu di Dios pa yuda nan, i e spiritu ei a duna nan poder pa realisá hazañanan ku nan lo no por a hasi riba nan mes. (Hos. 11:16, 17; Hues. 7:7, 22; 1 Sam. 17:37, 50) Komo resultado, Yehova a haña e alabansa ku e meresé pa e obranan poderoso akí.

6. Dikon Dios tabata ke pa su pueblo respetá e hòmbernan ku el a nombra pa dirigí nan?

⁶ Kiko e israelitanan mester a hasi ora tabata bisto ku e hòmbernan akí tabata obra ku poder di spiritu santu? Nan mester a respetá nan. P’esei, ora e pueblo a murmurá kontra Moises su liderato, Yehova a puntra: “Kuantu tempu mas e pueblo akí lo despresiá mi?” (Num. 14:2, 11) Sí, ta Yehova a skohe Moises, Hosue, Gideon i David pa represent’é komo Lider. Ora e pueblo a obedesé e hòmbernan ei, en realidat nan tabata obedesé Yehova komo nan Lider.

7. Kon angel a yuda Moises?

⁷ Angel a yuda e representantenan di Dios. (Lesa Hebreonan 1:7, 14.) Yehova a manda angel pa duna Moises su asignashon, pa prepar’é i pa gui’é. Kon asina? Promé, Dios a manda Moises serka e israelitanan “komo gobernante i tambe libertadó pa medio di e angel ku a aparesé na dje den e mata di sumpiña.” (Echo. 7:35) Di dos, Yehova a ‘transmití e Lei pa medio di angel,’ i Moises a usa e Lei ei pa instruí e israelitanan. (Gal. 3:19) I di tres, Yehova a bis’é: “Hiba e pueblo kaminda mi a bisa bo. Mira, mi angel lo bai bo dilanti.” (Éks. 32:34) Beibel no ta bisa ku e israelitanan a mira un angel den kurpa di hende kumpli ku e tareanan akí. Sinembargo, e manera ku Moises a instruí i dirigí e pueblo a mustra bon kla ku e tabatin yudansa sobrehumano.

8. Kon angel a yuda Hosue i Ezekías?

⁸ Despues, “e kapitan di SEÑOR su ehérsito,” esta, un angel, a fortalesé Moises su susesor, Hosue, pa dirigí e pueblo di Dios den bataya kontra e kananeonan. Anto e israelitanan a sali viktorioso. (Hos. 5:13-15; 6:2, 21) Mas despues, tempu Rei Ezekías tabata dirigí e pueblo di Dios, e inmenso ehérsito di Asiria a menasá di invadí Herúsalèm. Pero, den un solo anochi, ‘e angel di Yehova a mata 185.000 sòldá.’—2 Rei. 19:35.

9. Akaso e imperfekshon di e representantenan di Dios tabata un motibu pa e israelitanan no sigui nan guia? Splika esei.

 ⁹ Naturalmente, e angelnan ta perfekto, pero e hendenan ku nan a yuda si no tabata perfekto. Por ehèmpel, un biaha Moises a keda sin santifiká Yehova. (Num. 20:12) Hosue no a buska Dios su guia promé ku el a sera un aliansa ku e gabaonitanan. (Hos. 9:14, 15) Pa un periodo kòrtiku, Ezekías “su kurason tabata orguyoso.” (2 Kró. 32:25, 26) Pero apesar di e imperfekshon di e hòmbernan akí, Dios tabata ke pa e israelitanan sigui nan guia. Dikon? Pasobra ta Yehova tabata apoyá e hòmbernan ei ku yudansa di su angelnan poderoso. Sí, ta Yehova tabata dirigí su pueblo.

10. Kon e Lei di Dios a guia Moises?

¹⁰ E Palabra di Dios a guia e representantenan di Dios. Beibel ta referí na e Lei ku Israel a haña komo “e Lei di Moises.” (1 Rei. 2:3) Sinembargo, e Skritura ta bisa ku en realidat ta Yehova ta Esun ku a duna e Lei, i Moises mes tambe mester a obedesé e Lei akí. (2 Kró. 34:14) Por ehèmpel, despues ku Yehova a duna Moises instrukshon kon pa traha e tabernakel, Beibel ta bisa ku ta “asina Moises a hasi; konforme tur loke SEÑOR a orden’é, asina el a hasi.”—Éks. 40:1-16.

11, 12. (a) Kiko Hosue i e reinan ku a goberná e pueblo di Dios mester a hasi? (b) Ki efekto e Palabra di Dios tabatin riba e hòmbernan ku tabata dirigí e pueblo di Dios?

¹¹ For di ora Hosue a bira lider, e tabatin un registro skirbí di e Palabra di Dios. Yehova a bis’é: “Bo mester meditá den dje di dia i anochi, pa bo perkurá di hasi konforme tur loke ta pará skirbí den dje.” (Hos. 1:8) E reinan ku mas despues a goberná e pueblo di Dios mester a hasi meskos. Nan tabatin ku lesa e Lei tur dia, traha un kopia di dje i “perkurá di kumpli ku tur e palabranan di e Lei i di e statutonan akí.”—Lesa Deuteronomio 17:18-20.

¹² Ki efekto e Palabra di Dios tabatin riba e hòmbernan ku tabata dirigí e pueblo? Laga nos tuma Rei Yosías komo ehèmpel. Despues ku nan a haña un dokumento ku e Lei di Moises, Yosías su sekretario a kuminsá les’é p’e. * Kon e rei a reakshoná? Beibel ta kontestá: “Ora rei a tende e palabranan di e buki di Lei, el a sker su pañanan.” Pero el a hasi mas. Yosías a laga e Palabra di Dios gui’é i esei a motiv’é pa destruí tur e imágennan di e diosnan falsu den e pais i pa hasi preparashon pa e selebrashon di mas grandi di e Pasku Hudiu. (2 Rei. 22:11; 23:1-23) Komo ku Yosías i otro lidernan fiel a laga e Palabra di Dios guia nan, nan tabata dispuesto pa ahustá nan manera di dirigí i instruí e pueblo di Dios. E kambionan akí a yuda e pueblo di Dios di antigwedat biba di akuerdo ku su boluntat.

13. Kon e lidernan di e pueblo di Dios tabata diferente for di esnan di e nashonnan pagano?

¹³ E reinan fiel ei tabata hopi diferente for di e lidernan di e otro nashonnan, kendenan a laga sabiduria humano guia nan i kendenan tabatin un punto di bista limitá di sierto kosnan. Por ehèmpel, e lidernan kananeo i nan hendenan tabata praktiká kosnan repugnante, entre otro, insesto, homoseksualidat, relashon seksual ku bestia, sakrifisio di mucha i venerashon di dios falsu. (Lev. 18:6, 21-25) Ademas, e lidernan di Babilonia i di Egipto no tabata sigui e reglanan di higiena ku Dios a duna Israel i ku siensia a komprobá ku nan tabata na nan lugá. (Num. 19:13) Pero e pueblo di Dios di antigwedat sí a mira kon nan lidernan fiel tabata animá nan pa ta spiritualmente,  moralmente i físikamente limpi. Ta bisto ku ta Yehova tabata ku e lidernan ei.

14. Dikon Yehova a disipliná algun di e lidernan di su pueblo?

¹⁴ No ta tur e reinan ku a reina riba e pueblo di Dios di antigwedat a sigui e instrukshonnan di Dios. E reinan ku no a obedesé Yehova a nenga di sigui e guia di su spiritu, di su angelnan i di su Palabra. Den algun kaso, Yehova a disipliná e lidernan akí òf a remplasá nan. (1 Sam. 13:13, 14) Pero na Yehova su debido tempu, el a nombra un persona ku ta superior na kualke un di e hòmbernan ku el a usa te asina leu.

15. (a) Kon e profetanan a indiká ku un lider úniko mester a bini? (b) Ken tabata e lider ku nan a profetisá di dje?

¹⁵ Pa hopi siglo, Yehova a profetisá ku lo el a nombra un lider úniko i kualifiká pa dirigí Su pueblo. Moises a bisa e israelitanan: “SEÑOR bo Dios lo lanta pa bo un profeta manera ami for di meimei di bo, for di bo paisanonan; boso mester skucha na dje.” (Deu. 18:15) Isaías a profetisá ku e Persona akí lo a bira “un lider i komandante.” (Isa. 55:4) Anto Dios a inspirá Daniel pa skirbi tokante e yegada di “Mesías, e Lider.” (Dan. 9:25, NW) Finalmente, Hesukristu a identifiká su mes komo “e Lider” di e pueblo di Dios. (Lesa Mateo 23:10.) Hesus su disipelnan a siguié di buena gana, i nan a konfirmá ku ta Yehova a skoh’é. (Huan 6:68, 69) Kiko a konvensé nan ku Hesukristu tabata esun ku Yehova tabata usa pa dirigí su pueblo?

16. Kiko a demostrá ku Hesus tabata obra ku poder di spiritu santu?

¹⁶ Spiritu santu a duna Hesus poder. Ora Hesus a batisá, Huan Boutista a mira “shelu habri i spiritu santu baha riba dje manera un palomba.” Despues di esei, “e spiritu a pon’é bai den desierto.” (Mar. 1:10-12) Durante henter Hesus su sirbishi riba tera, e spiritu santu di Dios a duna Hesus poder pa hasi milager i pa papia ku outoridat. (Echo. 10:38) Ademas, spiritu santu a produsí den Hesus un fruta perfekto ku a inkluí amor, goso i un fe inkebrantabel. (Huan 15:9; Heb. 12:2) Niun otro lider no a duna prueba asina konvinsente di ku nan tabatin Dios su spiritu santu. Ta bon kla anto ku ta Yehova a skohe Hesus komo Lider.

17. Kon angel a yuda Hesus?

¹⁷ Angel a yuda Hesus. Djis despues ku Hesus a batisá, “angelnan a bini i kuminsá sirbi Hesus.” (Mat. 4:11) Algun ora promé ku su morto, “un angel for di shelu a aparesé na dje i a fortales’é.” (Luk. 22:43) Hesus tabatin e konfiansa ku Yehova lo a manda angel pa yud’é na kualke momento ku e tabatin mester di esei pa kumpli ku e boluntat di Dios.—Mat. 26:53.

18, 19. Kon e Palabra di Dios a dirigí Hesus su bida i su siñansa?

 ¹⁸ E Palabra di Dios a guia Hesus. For di kuminsamentu di Hesus su sirbishi, el a laga e Skritura gui’é. (Mat. 4:4) De echo, el a bai te asina leu di muri na un staka di tormento pa obedesé e Palabra di Dios. Ademas, djis promé ku el a muri, el a sita palabranan profétiko tokante e Mesías. (Mat. 27:46; Luk. 23:46) Na kontraste, e lidernan religioso di e tempu ei tabata ignorá e Palabra di Dios ora ku esei no tabata di akuerdo ku nan tradishonnan. Refiriendo na e lidernan ei, Hesus a sita e siguiente palabranan di Yehova mediante profeta Isaías: “E pueblo akí ta onra mi ku nan lep, ma nan kurason ta masha leu for di mi. Ta pòrnada nan ta sigui adorá mi, pasobra nan ta siña mandamentu di hende komo doktrina.” (Mat. 15:7-9) Hamas Yehova lo a skohe hende ku no ta sigui su Palabra pa dirigí su pueblo.

¹⁹ Hesus a permití e Palabra di Dios dirigí tantu su akshonnan komo loke el a siña hende. Ora el a hañ’é ku kontroversia religioso, e no a stèns riba su mes sabiduria ni riba tur e eksperensia di bida ku e tabatin. Mas bien, el a usa e Skritura komo e outoridat final ora e tabata siña hende. (Mat. 22:33-40) I na lugá di entretené su oyentenan ku historianan personal tokante su bida den shelu òf tokante e kreashon di universo, “el a habri nan mente kompletamente pa nan kapta nifikashon di e Skritura.” (Luk. 24:32, 45) Hesus tabata stima e Palabra di Dios, i e tabata ansioso pa kompartié ku otro hende.

20. (a) Kon Hesus a rekonosé Yehova komo e Lider outéntiko? (b) Ki diferensia tabatin entre e aktitut di Hesus i esun di Heródes Agripa I, i kiko esei ta siña nos tokante e klase di persona ku Yehova ta skohe komo lider?

²⁰ Aunke Hesus su “palabranan yen di grasia” a impreshoná su oyentenan, semper el a duna gloria na su Maestro, Yehova. (Luk. 4:22) Ora un hòmber riku kier a duna Hesus gloria ku e título “Bon Maestro,” Hesus a kontest’é humildemente: “Pakiko bo ta yama mi bon? Ningun hende no ta bon, sino ún so, Dios.” (Mar. 10:17, 18) Ki un kontraste grandi ku Heródes Agripa I, kende a bira rei, òf lider, di Hudea mas o ménos ocho aña despues. Na un evento ku vários diplomátiko, Heródes a bisti su “pañanan ofisial di rei.” Ora un multitut di atmiradó a mir’é i skuch’é, nan a kuminsá grita: “Esaki no ta stèm di hende sino di un dios!” Di mes Heródes a gosa mashá di nan elogio. Pero kiko a sosodé e ora ei? Beibel ta bisa: “Mesora e angel di Yehova a dal Heródes ku un malesa, pasobra e no a duna gloria na Dios; i bichi a kom’é i el a muri.” (Echo. 12:21-23) Siguramente anto, niun opservadó imparsial lo no a pensa ku Yehova a skohe Heródes komo lider. Di otro banda, Hesus a duna prueba konvinsente ku ta Dios a nombr’é, i konstantemente e tabata duna gloria na Yehova komo e Lider Supremo di su pueblo.

21. Kiko nos lo konsiderá den e siguiente artíkulo?

²¹ E intenshon no tabata pa Hesus keda lider pa algun aña so. Despues di su resurekshon, el a bisa: “Mi a risibí tur outoridat den shelu i riba tera.” Anto el a agregá: “I wak!, mi ta ku boso tur e dianan, te na konklushon di e era akí.” (Mat. 28:18-20) Pero, komo un spiritu invisibel den shelu, kon Hesus lo a dirigí e pueblo di Dios riba tera? Ken Yehova lo a usa pa traha bou di e liderato di Kristu i pa dirigí Su pueblo? I kon kristiannan lo a rekonosé e representantenan di Dios? E siguiente artíkulo lo kontestá e preguntanan akí.