1, 2. (a) Wanem nao wanfala samting wea mekem Olketa Jehovah’s Witness difren from olketa nara religion? (b) Wanem nao bae iumi storyim long disfala study and long nextfala study?

STAKA taem pipol savve askem iumi Olketa Jehovah’s Witness: “Hu nao leader bilong iufala?” Olketa laek for savve long diswan bikos staka religion garem wanfala man or woman wea hem leader bilong olketa. Bat iumi savve hapi for talem olketa Leader bilong iumi hem Jesus Christ, and no wanfala man long disfala earth. And Jesus tu hem obeyim Dadi bilong hem Jehovah wea hem Leader bilong hem.—Matt. 23:10.

² Nomata olsem, wanfala smol grup wea Bible kolem “datfala wakaman wea faithful and wise,” olketa nao leadim pipol bilong God long earth distaem. (Matt. 24:45) Bat hao nao iumi fit for sei Jehovah nao hem leadim iumi and hem iusim Son bilong hem for duim datwan? Long disfala study and long nextfala study bae iumi storyim thrifala samting wea pruvim datwan. And nomata Jehovah iusim samfala man for leadim pipol bilong hem, bae iumi luksavve Jehovah nao leadim pipol bilong hem start long bifor kam kasem distaem.—Isa. 58:11.

3. Wanem nao helpem Moses for leadim olketa Israelite?

³ Holy spirit helpem olketa man wea leadim pipol bilong God. God  chusim Moses for leadim olketa Israelite. Wanem nao helpem hem for duim datfala important waka? Jehovah givim Moses “holy spirit bilong Hem.” (Readim Isaiah 63:11-14.) So Jehovah nao leadim pipol bilong hem bikos spirit bilong hem nao helpem Moses.

4. Wanem nao showimaot holy spirit bilong God helpem Moses? (Lukim piksa long start bilong study.)

⁴ Waswe, pipol long datfala taem luksavve holy spirit bilong God helpem Moses? Yes! Holy spirit helpem Moses for duim olketa mirakol and for story abaotem Jehovah long Pharaoh, datfala king bilong Egypt wea garem bigfala paoa. (Ex. 7:1-3) And holy spirit bilong God helpem Moses for patient and for showimaot love long olketa Israelite. Hem no olsem olketa leader bilong olketa nara kantri wea raf and selfish long pipol wea olketa rulim! (Ex. 5:2, 6-9) Datwan pruvim Jehovah nao chusim Moses for leadim pipol bilong Hem.

5. Hu nao olketa narawan wea Jehovah givim holy spirit long olketa for leadim pipol bilong hem?

⁵ Hu nao olketa narawan wea Jehovah givim holy spirit long olketa for leadim pipol bilong hem? Bible sei: “Joshua son bilong Nun hem kasem spirit from God wea diswan mekem hem wise.” (Deut. 34:9) “Jehovah givim spirit bilong hem long Gideon.” (Judg. 6:34) And “spirit bilong Jehovah helpem David.” (1 Sam. 16:13) Evriwan hia depend long spirit bilong God for helpem olketa for duim samting wea olketa no savve duim witim strong bilong olketa seleva. (Josh. 11:16, 17; Judg. 7:7, 22; 1 Sam. 17:37, 50) So Jehovah nao givim strong long olketa for duim olketa bigfala samting dastawe hem nomoa fit for kasem praise from datwan.

6. Why nao God laekem olketa Israelite for respectim olketa man wea leadim olketa?

⁶ Wanem nao olketa Israelite shud duim taem olketa lukim holy spirit bilong God helpem Moses, Joshua, Gideon, and David? Olketa shud respectim olketa man hia. Taem olketa Israelite komplen abaotem Moses, diswan nao samting wea Jehovah talem: “Hao long nao bae pipol hia gohed for no respectim mi?” (Num. 14:2, 11) Tru nao, Jehovah nao chusim olketa man hia for leadim pipol bilong Hem. Taem olketa Israelite obeyim wanem olketa hia talem, olketa obeyim Leader bilong olketa Jehovah.

7. Olketa wanem samting nao olketa angel helpem Moses for duim?

⁷ Olketa angel helpem olketa man wea leadim pipol bilong God. (Readim Hebrew 1:7, 14.) God iusim olketa angel for helpem Moses. Bible sei: “God hem iusim datfala angel wea Moses lukim” long fire wea bonem wanfala tree for givim Moses assignment for leadim olketa Israelite and for mekem olketa kamap free. (Acts 7:35) Then “God iusim olketa angel for talem datfala Law long Moses,” and Moses iusim Law hia for teachim olketa Israelite. (Gal. 3:19) And tu, Jehovah talem Moses: “Leadim pipol hia go long ples wea mi storyim finis long iu. Angel bilong mi nao bae go firstaem long iu.” (Ex. 32:34) Bible no storyim olketa Israelite lukim eni angel hem duim diswan. Bat hao Moses teachim and leadim olketa showimaot olketa angel nao helpem hem.

8. Wanem nao olketa angel duim for helpem Joshua and Hezekiah?

⁸ Hu nao olketa narawan wea olketa angel helpem? Bible sei “datfala angel wea garem hae position insaed army bilong Jehovah,” hem nao helpem Joshua for winim army bilong Canaan. (Josh. 5:13-15; 6:2, 21) Bihaen, taem King Hezekiah hem leadim pipol bilong God, bigfala army bilong Assyria sei bae olketa kam distroem Jerusalem. Long wanfala naet nomoa “angel bilong Jehovah  hem go and killim dae 185,000 man long camp bilong olketa bilong Assyria.”—2 Ki. 19:35.

9. Nomata olketa man wea leadim pipol bilong God no perfect, wanem nao Jehovah laekem olketa Israelite for duim?

⁹ Olketa angel olketa perfect bat olketa man wea olketa angel helpem olketa no perfect. Olsem example, wantaem Moses hem no mekhae long Jehovah. (Num. 20:12) Joshua hem no askem advaes from God bifor hem mekem agreement witim olketa Gibeonite. (Josh. 9:14, 15) Wantaem, Hezekiah tu hem kamap praod. (2 Chron. 32:25, 26) Nomata olketa man hia no perfect, Jehovah laekem olketa Israelite for duim wanem olketa man hia talem. Olketa Israelite luksavve Jehovah hem iusim olketa angel for sapotim olketa man hia. Tru nao, Jehovah nao leadim pipol bilong hem.

10. Hao nao Law bilong God hem leadim Moses?

¹⁰ God iusim toktok bilong hem for helpem olketa man wea leadim pipol bilong hem. Bible kolem Law wea olketa Israelite kasem “Law bilong Moses.” (1 Ki. 2:3) Nomata olsem, Bible talem klia datfala Law hem kam from Jehovah and Moses tu mas obeyim olketa law hia. (2 Chron. 34:14) Olsem example, bihaen Jehovah givim instruction long Moses long hao for wakem datfala tabernacle, “Moses duim evri samting wea Jehovah komandim hem for duim.”—Ex. 40:1-16.

11, 12. (a) Wanem nao Joshua and olketa king wea leadim pipol bilong God mas duim? (b) Long wanem wei nao toktok bilong God helpem olketa man wea leadim pipol hem?

¹¹ Taem Joshua kamap leader long Israel, hem garem datfala buk bilong Law and olketa nara toktok bilong God, and Jehovah sei olsem long hem: “Iu mas readim and ting raonem evri day and evri naet, mekem iu savve followim gud evri samting wea hem talem.” (Josh. 1:8) Bihaen, olketa king wea rulim pipol bilong God, olketa tu mas readim datfala Law evriday, raetem wanfala copy bilong datfala Law and “obeyim evri samting wea datfala Law talem.”—Readim Deuteronomy 17:18-20.

¹² Hao nao toktok bilong God leadim olketa king hia? Tingim example bilong King Josiah. Bihaen olketa faendem wanfala copy bilong Law bilong Moses, secretary bilong Josiah start for readim datfala law long hem. * Bible sei: “Taem king herem samting wea datfala buk bilong Law hem talem, hem brekem kaleko bilong hem.” Bihaen datwan, Josiah distroem evri idol long Israel and arrangem wanfala bigfala Pasova celebration. (2 Ki. 22:11; 23:1-23) Josiah and olketa nara faithful man wea leadim pipol bilong God followim toktok bilong God. Datwan mekem olketa no hol bak for stretem tingting bilong olketa Israelite and diswan helpem pipol hia for duim wanem God laekem.

13. Hao nao olketa man wea leadim pipol bilong God olketa difren from olketa leader bilong olketa nara nation?

¹³ Olketa leader bilong olketa nara nation followim nomoa tingting bilong olketa man. Olsem example, olketa leader long Canaan and pipol wea olketa leadim, evriwan duim staka nogud samting olsem sex witim klos relative, man sleep witim man or woman witim woman, sex witim animal, sakrifaesim pikinini, and worshipim idol. (Lev. 18:6, 21-25) And tu, olketa king bilong Babylon and Egypt no followim olketa rul saed long wei for klin olsem olketa rul wea pipol bilong God followim. (Num. 19:13) Bat pipol bilong God luksavve olketa man wea leadim olketa encouragem olketa for klin long spiritual wei, physical wei, and long fasin bilong olketa. Tru nao, Jehovah nao leadim olketa.

14. Why nao Jehovah disciplinem samfala man wea leadim pipol bilong hem?

 ¹⁴ No evri king wea rulim pipol bilong God nao followim instruction bilong God. Samfala king hia wea no obeyim God, olketa no letem holy spirit, olketa angel, and toktok bilong God for leadim olketa. So Jehovah disciplinem samfala long olketa or hem aotem olketa from datfala waka. (1 Sam. 13:13, 14) Gogo, Jehovah markem wanfala wea bae leadim pipol bilong Hem wea winim evri narawan.

15. (a) Wanem nao olketa profet talem wea showimaot wanfala perfect leader bae kam? (b) Hu nao datfala perfect leader?

¹⁵ For staka year Jehovah story abaotem wanfala perfect man wea bae leadim pipol bilong hem. Olsem example, Moses sei olsem long olketa Israelite: “Jehovah God bae chusim wanfala brata bilong iufala for kamap profet olsem mi. Iufala mas duim evri samting wea hem talem long iufala.” (Deut. 18:15) Isaiah sei disfala man bae “kamap leader and bae hem rul ovarem olketa kantri.” (Isa. 55:4) And Daniel raet abaotem “Messiah datfala Leader.” (Dan. 9:25) Gogo, Jesus Christ talemaot hem nao datfala “Leader” bilong pipol bilong God. (Readim Matthew 23:10.) Olketa disaepol bilong Jesus barava willing for followim hem, and olketa luksavve Jehovah nao chusim hem. (John 6:68, 69) Wanem nao mekem olketa barava sure Jesus Christ nao man wea Jehovah bae iusim for leadim pipol bilong hem?

16. Wanem nao showimaot holy spirit bilong God helpem Jesus?

¹⁶ Holy spirit bilong God helpem Jesus. Taem Jesus hem baptaes, John lukim “skae hem open, and hem lukim holy spirit wea olsem wanfala kurukuru kam daon antap long hem.” Bihaen datwan, “holy spirit leadim hem go long wilderness.” (Mark 1:10-12) Taem Jesus duim ministry bilong hem long earth, holy spirit bilong God helpem hem for teachim pipol and duim olketa mirakol. (Acts 10:38) Nara samting tu, holy spirit bilong God helpem Jesus for showimaot love, for hem hapi, and garem strongfala faith. (John 15:9; Heb. 12:2) No eni nara leader hem duim olketa samting hia. Tru nao, Jehovah nao chusim Jesus for kamap Leader.

17. Wanem nao olketa angel duim for helpem Jesus?

¹⁷ Olketa angel helpem Jesus. Bihaen Jesus hem baptaes, “olketa angel kam and helpem hem.” (Matt. 4:11) Bifor hem dae, “wanfala angel from heven kam long hem and strongim hem.” (Luke 22:43) Jesus savve Jehovah bae sendem olketa angel for helpem hem long taem wea hem needim.—Matt. 26:53.

18, 19. Hao nao Jesus iusim toktok bilong God for leadim hem long evri samting wea hem duim, and long taem wea hem teachim pipol?

 ¹⁸ Toktok bilong God leadim Jesus. Start long taem wea Jesus duim ministry go kasem taem hem dae, hem iusim olketa Holy Raeting for leadim hem. Nomata taem hem redi for dae, hem talem toktok abaotem Messiah from olketa Holy Raeting. (Matt. 27:46; Luke 23:46) Bat olketa bigman long religion long taem bilong Jesus nating tinghae long toktok bilong God. Olketa no laek for followim toktok bilong God sapos hem no sapotim biliv bilong olketa. Taem Jesus story abaotem olketa bigman hia, hem talem disfala toktok bilong God wea profet Isaiah talem: “Long toktok nomoa pipol hia mekhae long mi bat olketa no lovem mi. Olketa hard waka nating for worshipim mi bikos olketa sei olketa law bilong man hem teaching wea kam from God.” (Matt. 15:7-9) Hard tumas for Jehovah chusim olketa man wea no followim toktok bilong hem for leadim pipol bilong hem.

¹⁹ Jesus hem iusim toktok bilong God taem hem teachim pipol. Taem olketa bigman long religion askem olketa kwestin long hem, hem no iusim tingting bilong hemseleva for ansarem olketa bat hem iusim olketa Holy Raeting for teachim pipol. (Matt. 22:33-40) And tu, Jesus no storyim laef bilong hem long heven or hao hem helpem Jehovah for wakem disfala universe mekem pipol tinghae long hem. Bat from hem barava tinghae long toktok bilong God hem willing for storyim datwan long pipol, and “hem helpem olketa for minim gud olketa Holy Raeting.”—Luke 24:32, 45.

20. (a) Wanem nao Jesus duim wea showimaot hem praisem Jehovah? (b) Hao nao Jesus and Herod Agrippa I tufala barava difren?

²⁰ Staka pipol sapraes long olketa nambawan toktok bilong Jesus. Nomata olsem, Jesus evritaem mekhae long Teacher bilong hem, Jehovah. (Luke 4:22) Taem wanfala rich man laek for mekhae long Jesus and kolem hem “Gudfala Teacher,” Jesus sei long hem: “Hao nao iu kolem mi gudfala? God nomoa hem gud, no eniwan moa.” (Mark 10:17, 18) Eitfala year bihaen, Herod Agrippa I, hem kamap leader long Judea. Hem barava difren from Jesus! Wantaem olketa holem wanfala spesol meeting and Herod hem werem olketa barava stael kaleko wea expensive fogud. Taem pipol lukim hem and herem hem toktok, olketa singaot olsem: “Ino man nao toktok. Hem wanfala god ia!” Herod laekem tumas for pipol praisem hem. So wanem nao happen? “Semtaem nomoa, angel bilong Jehovah mekem olketa worm kaikaim Herod and hem dae nao.” (Acts 12:21-23) Hem barava klia, Jehovah no chusim Herod for leadim pipol bilong hem. Bat wanem Jesus duim pruvim God nao chusim hem, and Jesus evritaem praisem Jehovah wea hem nao Nambawan Leader bilong pipol bilong Hem.

21. Wanem nao bae iumi storyim long nextfala study?

²¹ Plan bilong Jehovah for Jesus kamap Leader, hem no for tu-thri year nomoa. Bihaen Jesus hem laef bak, hem sei olsem long olketa disaepol bilong hem: “God givim paoa long mi ovarem evri samting long heven and earth.” Then hem sei tu: “Bae mi stap witim iufala go kasem taem wea world hem finis.” (Matt. 28:18-20) Bat from Jesus hem stap long heven, hao nao bae hem leadim pipol bilong God wea stap long earth? Hu nao Jehovah bae iusim long earth for leadim pipol bilong Hem wea Jesus nao leader bilong olketa? And hao nao olketa Christian bae luksavve long olketa wakaman hia? Long nextfala study, iumi bae storyim ansa bilong olketa kwestin hia.