1, 2. ა) მი ხემძღვანელენს ამდღა იეჰოვაშ მოწმეეფს შხვა რელიგიეფიშ გინაწონს? ბ) მუს გუვარჩიენთ თე დო უკულიან სტატიას?

იეჰოვაშ მოწმეეფს ხშირას ოკითხუნა: „მი რე თქვან უნჩაშ?“. თენა გასაკვირ ვა რე, მუშენდა ბრელ რელიგიას კოჩ ვარდა ოსურ ჸუნა ხემძღვანელო. თინეფიშ გინაწონს, თამამას მარაგადენა, ნამდა არასრულყოფილ კოჩ ვეგემრენა უნჩაშო. ჩქი მეპჸუნთ იესოშ ხემძღვანელობას, ნამუთ მუშ მუმაშ, იეჰოვაშ ხემძღვანელობას მეჸუნს (მათ. 23:10).

² თეშ გარდა, არსებენს ქომოლკათაშ ჯგუფ, „ართგურ დო გონიერ მონა“, ნამუთ ამდღა ხემძღვანელენს ღორონთიშ ხალხის (მათ. 24:45). სოვრეშე მიჩქუნა, ნამდა მართალო იეჰოვა ბხემძღვანელენა მუშ სქუაშ მეშვეობით? თე დო უკულიან სტატიას გუვარჩიენთ, ანთასობით წანაშ დინახალე, მუჭო გიმირინუანდ იეჰოვა ნამთინე კოჩის, მუშ ხალხიშ ხემძღვანელო. ჟირხოლო სტატიას გარჩიებულ იჸი სუმ მხარე, ნამუთ მარწმუნენა თიშა, ნამდა თი კათაშ უკახლე იეჰოვა გერდ დო მუჭო ჯვეშ დროსინ თეშ, ამდღა ხოლო თინა ხემძღვანელენს მუშ ხალხის (ეს. 58:11).

3. მუქ მეხვარ, მოსეს ისრაელეფშა ქუხემძღვანელებუდკო?

³ ღორონთიშ წარმომადგენელეფს წმინდა შური ამანგარენდ. გუვარჩუათ მოსეშ მაგალით, ნამუთ ისრაელიშ წინამძღოლო  რდუ გერნაფილ. მუქ მეხვარ მოსეს თეცალ რთულ დავალებაშ შესრულებას? იეჰოვაქ „თის მუშ წმინდა შურ მეჩუ“ (წეკითხით ესაიაშ 63:11—14). მოსეშა წმინდა შურიშ გინოჩამათ იეჰოვა აგრძელენდ მუშ ხალხიშ ხემძღვანელობას.

4. მუ აჯერენდ ისრაელეფს, ნამდა მოსეს ღორონთიშ შურ ხემძღვანელენდ? (ქოძირით სურათ მა-18 გვერდის)

⁴ წმინდა შურ თოლით უძირაფ ძალა რე, ათეშგურშენ მუ აჯერენდ ისრაელეფს, ნამდა მოსეს მართალო თინა ხემძღვანელენდ? წმინდა შურ ოხვარუდ მოსეს გუკეთებუდკო სასწაულეფ დო გუცხადებუდკო ფარაონშა ღორონთიშ სახელი (გამ. 7:1—3). თე ძალაშ საშვალებათ მოსექ განვითარ თიშნერ ჯგირ თვისებეფ, მუნერით რე: ჸოროფა, თვინიერება დო მოთვინება, ნამდგაქ მეხვარ თის ისრაელიშ ხემძღვანელობას. მუშ მაჯგირა რდუ, ნამდა მოსე შურო ვაგუდ შხვა ქიანეფიშ სასტიკ დო ეგოისტ მართველეფს! (გამ. 5:2, 6—9). არგამათ იძირედ, ნამდა მოსე იეჰოვას აფუდ გერნაფილ მუშ ხალხიშ ხემძღვანელო.

5. მუჭო ოხვარუდ იეჰოვა შხვა ისრაელ ქომოლკათას, ნამდა მუშ ხალხის ქუხემძღვანელკო?

⁵ უმოს გვიანო, იეჰოვაშ წმინდა შურ შხვეფს ხოლო ოხვარუდ, მით დანიშნულ რდუ მუშ ხალხიშ ხემძღვანელო. „იესო ნავეშ სქუა სიბრძნეშ შურით რდუ ეფშა“ (კან. 34:9). „იეჰოვაშ შურქ გინილ გედეონშა“ (მსაჯ. 6:34). „იეჰოვაშ შურქ დავითწკუმა მოქმედება ქიდიჭყუ“ (1 სამ. 16:13). არძა თე ქომოლკათა ღორონთიშ შურიშ მოხვარაშა რდუ დაიმენდებულ დო თიშ ჭყოლოფუათ თიშნერ სარკო საქმეეფ გაკეთეს, ნამუთ მუნეფიშ ძალათ ვეშიალებედეს (იეს. 11:16, 17; მსაჯ. 7:7, 22; 1 სამ. 17:37, 50). თე ირფელქ იეჰოვა განადიდუ.

6. მუშენ ითხინდ იეჰოვა ისრაელშე მუშ გერნაფილ ხალხიშ მორჩილებას?

⁶ მუნერ რეაქცია ოკო უღუდესკო ისრაელეფს, მუჟამსით ქოძირუნდეს, ნამდა თე კათას წმინდა შურ ხემძღვანელენდ? ხალხიქ უკმაყოფილება გიმოხანტ მოსეშ ხემძღვანელობაშე დო იეჰოვაქ ქიკითხუ: „მუჟამშა ოკო მოქცუდას უპატიცემოთ თე ხალხი?“ (რიცხ. 14:2, 11). სინამდვილეს მოსე, იესო ნავეშ სქუა, გედეონ დო დავით იეჰოვაქ გიშაგორ მუშ წარმომადგენელეფო, ნამდა ისრაელ ხალხშა ქუხემძღვანელებდესკო. თინეფიშ მორჩილება ფაქტიურო, ღორონთიშ მორჩილებას ნიშნენდ.

7. მუჭო ოხვარდეს ანგელოზეფ მოსეს?

⁷ ანგელოზეფ ოხვარუდეს ღორონთიშ წარმომადგენელეფს (წეკითხით ებრაელეფიშ 1:7, 14). იეჰოვაქ ანგელოზეფს დავალ, ნამდა ქუხემძღვანელესკო მოსეს. ღორონთიქ თინა დარინუ „მართველო დო მარსხებელო თი ანგელოზიშ ხეთ, ნამუქით თის ძიგირამ ბართვიას ქეწაძირ“ (საქ. 7:35). ღორონთიქ მოსეს ანგელოზეფიშ საშვალებათ გინოჩ კანონი, ნამუსით თინა ისრაელეფიშ ოგურაფალო გიმირინუანდ (გალ. 3:19). იეჰოვაქ უწუ თის: „მიდეჸუნ ხალხი, სოდეთ გიწინ თექ. ჩქიმ ანგელოზი ქეწკაჸუნუ“ (გამ. 32:34). ბიბლიას ვა ჭარ, ნამდა ისრაელეფქ მუნეფიშ თოლით ძირეს ანგელოზ, ნამუქით შეასრულ თე დავალებეფი. მარა თევრეშე, მუჭო ხემძღვანელენდ მოსე ღორონთიშ ხალხის, იძირედ, ნამდა თის ანგელოზეფი ოხვარდეს.

8. მუჭო მეხვარეს ანგელოზეფქ იესო ნავეშ სქუას დო ხიზკიას?

⁸ მოსეშ უკულ იესო ნავეშ სქუა გამანგარ „იეჰოვაშ ჯარიშ უნჩაშიქ“, ნამდა თიქ ქუხემღვანელუკო ღორონთიშ ხალხის ქანაანწკუმა ჩხუპიშ დროს, სოდეთ ისრაელეფქ თინეფს ორჯგინეს (იეს. 5:13—15; 6:2, 21). უმოს გვიანო, მეფე ხიზკიას აწარინალქ აჸუ ასურელეფიშ ძალიერ ჯარშა, ნამუთ ირცქინაფუდ იერუსალიმიშ ეჭოფუათ. ართ სერიშ დინახალე, იეჰოვაშ ანგელოზიქ მიდართ დო 185 000 ასურელ ჯარიშკოჩი გოჭყვიდ (2 მეფ. 19:35).

9. მუშენ ოკო მიაჸუნესკო ისრაელეფქ ღორონთიშ წარმომადგენელეფიშ ხემძღვანელობას თინეფიშ არასრულყოფილებაშ უმკუჯინუო?

 ⁹ მუშო ოკო რაგად, ანგელოზეფ სრულყოფილეფ რენა, მარა თინეფ არასრულყოფილ კათას ოხვარუდეს. არჩა მოსექ მუშ საქციელით ღორონთიშ სახელიშ სიწმინდეს პატი ვაცუ (რიცხ. 20:12). ონდო გაბაონელეფწკუმა შენთახმებას დოდვანდუნ, იესო ნავეშ სქუას ღორონთშა ხემძღვანელობა ვაუთხუ (იეს. 9:14, 15). არჩა ხოლო რდუ დრო, მუჟამსით ხიზკიაქ გეამაყ (2 მატ. 32:25, 26). თე ქომოლკათაშ არასრულყოფილებაშ უმკუჯინუო, ისრაელეფშე ღორონთი ელუდ, ნამდა მიაჸუნუდეს თინეფიშ ხემძღვანელობას. იეჰოვა მუშ ანგელოზეფს გიმირინუანდ თინეფიშ მიოხვარებელო. თეგვარო, იეჰოვა ხემძღვანელენდ მუშ ხალხის.

10. მუჭო ხემძღვანელენდ ღორონთიშ კანონი მოსეს?

¹⁰ ღორონთი მუშ წარმომადგენელეფს მუშ სიტყვათ ხემძღვანელენდ. ბიბლია ისრაელშა მეჩამილ კანონს „მოსეშ კანონო“ მიშინუანს (1 მეფ. 2:3). მარა წმინდა წერილეფ იჩიებ, ნამდა თე კანონი იეჰოვას აფუდ დოდგინელ დო მოსე ხოლო თის ომორჩილუდ (2 მატ. 34:14). მუჟამსით იეჰოვაქ მოსეს სამსხვერპლოშ კეთება დავალუნ, თიქ ირფელ, მუჭოთ იეჰოვაქ უწუნ თეშ გაკეთ (გამ. 40:1—16).

11, 12. ა) მუ მეთხიებუდეს იოშიას დო შხვა მეფეეფს, მით ღორონთიშ ხალხის ხემძღვანელენდ? ბ) მუჭო მოქმედენდ ღორონთიშ სიტყვა თიშ ხალხიშ ხემძღვანელეფწკუმა?

¹¹ მუჟამსით იესო ნავეშ სქუაქ ისრაელეფიშ ხემძღვანელობა დიჭყუნ, თის ღორონთიშ სიტყვა ჭარილო უღუდ. იეჰოვაქ იესო ნავეშ სქუას უწუ: „იკითხ თინა დღაშ დო სერით, ნამდა შურდოგურით შეასრულე ირფელ, მუთ თექ ინოჭარ“ (იეს. 1:8). უმოს გვიანო, თი მეფეეფი, ნამუთ ღორონთიშ ხალხის ხემძღვანელენდესინ, თე წესის მეჸუნდეს. თინეფს ოვალუდეს თე კანონიშ ირდღას კითხირ დო თიშ გინოჭარუა; თეშ გარდა ოკო „დეცვესკო დო შეასრულესკო თე კანონიშ არძა სიტყვა დო თე წესეფი“ (წეკითხით კანონიშ 17:18—20).

¹² მუჭო მოქმედენდ ღორონთიშ სიტყვა თი ქომოლკათაწკუმა, მიდგა ხემძღვანელენდ ღორონთიშ ხალხის? ქობძირათ მეფე იოშიაშ მაგალითი. მუჟამსით ქოძირეს კანონიშ წიგნი, ნამუსით მოჩამილ რდუ მოსეშ კანონი, მაჭარალ შაფანქ ქიდიჭყ თიშ კითხირ. * მუჭო მიქცუ მეფექ? „მუჟამსით მეფექ კანონიშ წიგნიშ სიტყვეფ ქიმირჩქილუნ, ბარგი ქიგისოფ“. მარა თეშ გარდა, იოშიაქ ქიმიაჸუნ ღორონთიშ სიტყვაშ ხემძღვანელობას, ქიდიჭყ კერპეფიშ თაყვანიშცემაშ მოსპუალა დო დღას მითინს ვაუღნიშნებუნ თეშ აღნიშნუ პასექიშ დღახუ (2 მეფ. 22:11; 23:1—23). იოშია დო შხვა ართგურ ქომოლკათა მეჸუნდეს ღორონთიშ სიტყვაშ ხემძღვანელობას, ათეშგურშენ თინეფ მზათ რდეს, ცვლილებეფი გუკეთებდესკო დო ზუსტას გეგნუჩამდესკო ხალხშა ღორონთიშ მითითება. თეცალ ცვლილებეფიშ ჭყოლოფუათ ხალხი ღორონთიშ ნებას ოსადაგუდუნ თეშ ცხოვრენდ.

13. მუთ ვა გუდეს ღორონთიშ ხალხიშ ხემძღვანელეფ შხვა რჯულიშ ხალხიშ ხემძღვანელეფს?

¹³ მუშმანწარათ ვა გუდეს თე ართგურ მეფეეფ შხვა რჯულიშ ხალხიშ ხემძღვანელეფს, მით კოჩიშ სიბრძნეშა რდეს დაიმენდებულ დო წოხოლე ვეჯინედეს! ქანაანიშ მართველობაშ თუდო რდესინ თი ხალხი, საცოდება საქმეეფს ორთუდეს, მუნერით რდუ ზისხირით ნათესეფწკუმა სექსუალურ კავშირ, ჰომოსექსუალიზმი, ზოოფილია, ბაღანეფიშ შეწირუა დო კერპიშ თაყვანიშცემა (ლევ. 18:6, 21—25). თეშ გარდა, ბაბილონელეფიშ დო ეგვიპტელეფიშ ხემძღვანელეფ ვეცვენდეს ამდღა მეცნიერულო  დამტკიცებულ ჰიგიენაშ წესეფს, ნამუთ ღორონთის ისრაელ ხალხშა აფუდ მეჩამილ (რიცხ. 19:13). თეშ გინაწონს, ღორონთიშ ხალხი ჯვეშო ორწყედ, ნამდა ართგურ ხემძღვანელეფი ხეს უნწყუნდეს სულიერ, ზნეობრივ დო ფიზიკურ სისუფთავეს. არგამათ იძირედ, ნამდა იეჰოვა ხემძღვანელენდ თინეფს.

14. მუშენ ასაჯენდ იეჰოვა ნამთინე ხემძღვანელს?

¹⁴ არძა მეფე, მით ჯვეშო ღორონთიშ ხალხის ხემძღვანელენდუნ, ვემეჸუნდ თიშ მითითებეფს. თი ხემძღვანელეფ, მით იეჰოვას ვამორჩილუდესინ, ვემეჸუნდეს თიშ სიტყვაშ, წმინდა შურიშ დო ანგელოზეფიშ ხემძღვანელობას. ათეშგურშენ, ნამთინეშა იეჰოვა ასაჯენდ ვარდა შხვა ხემძღვანელეფით თირანდ თინეფს (1 სამ. 13:13, 14). საჭირო დროს, ღორონთი ქიგიორინუანდ თიშნერ მიდგარენს, მით სრულყოფილ ხემძღვანელ იჸუაფუდ.

15. ა) მუჭო მიშინუანდეს წინასწარმეტყველეფი სრულყოფილ ხემძღვანელიშ მოულას? ბ) მი რდუ თე ხემძღვანელ?

¹⁵ საუკუნეეფიშ დინახალე, იეჰოვა წინასწარმეტყველენდ, ნამდა თინა მუშ ხალხის სრულყოფილ ხემძღვანელს ქიგურინუანდ. მოსექ ისრაელეფს უწუ: „იეჰოვა, სქან ღორონთი სქანდე, სქან ჯიმალეფშე, ქუმოიშკვანს ჩქიმნერ წინასწარმეტყველს — თის ურჩქილით“ (კან. 18:15). ესაიაქ იწინასწარმეტყველ, ნამდა თინა იჸუაფუდ „აწმანჯღვერე დო მეთაურ“ (ეს. 55:4). დანიელქ ღორონთიშ შურით ჭარ, ნამდა ქიმიშ „მესია, აწმანჯღვერე“ (დან. 9:25). ბოლოს, იესო ქრისტექ მუშ დუდიშ გურშენ თქუ, ნამდა თინა რდუ ღორონთიშ ხალხიშ „აწმანჯღვერე“ (წეკითხით მათეშ 23:10). იესოშ მოწაფეეფ მუნეფიშ ნებათ ეკოჸუნდეს თის; თინეფს ჯერდეს, ნამდა იესო იეჰოვაშ გიშაგორილ რდუ (იოან. 6:68, 69). მუქ დარწმუნ მოწაფეეფ, ნამდა იესო ქრისტე რდუ თინა, მით იეჰოვაქ მუშ ხალხიშ ხემძღვანელო გიორინუ?

16. სოვრეშე იძირედ, ნამდა იესოს წმინდა შური ამანგარენდ?

¹⁶ წმინდა შურქ გამანგარ იესო. იესოშ ნათუაშ დროს, იოანე ნათლისმცემელქ ქოძირ, ნამდა „გინწყ ცაქ დო ღორონთიშ შური ტორონჯო გიმიშ იესოშა“. თეშ უკულ, ღორონთიშ შურქ იმოქმედ იესოწკუმა, მიდურთუმუდკო უდაბნოშა“ (მარ. 1:10—12). დედამიწას მსახურებაშ დროს, ღორონთიშ შურიშ ძალათ იესო სასწაულეფს ორთუდ დო ღორონთშე მეჩამილ ძალაუფლებათ ოგურუანდ (საქ. 10:38). თეშ გარდა, წმინდა შურქ იესოს მეხვარ, სრულყოფილო გეგმურჩქინუდკო თიშნერ თვისებეფი, მუნერით რე ჸოროფა, ხიოლ დო რწმენა (იოან. 15:9; ებრ. 12:2). თეცალ არგამათ ნამთინ შხვა ხემძღვანელიშ გურშენ ვერაგადედ, ნამდა ღორონთშე რდუ გერინაფილ. იესო, დასურო, იეჰოვაშ გიშაგორილ რდუ.

17. მუჭო მეხვარეს ანგელოზეფქ იესოს?

 ¹⁷ ანგელოზეფ ოხვარუდეს იესოს. ნათუაშ უკულ ხეთეშე, „ანგელოზეფქ ქუმორთეს დო მემსახურეს თის“ (მათ. 4:11). ღურაშახ მუსხირენ საათით ადრე, „ზეცაშე ანგელოზიქ ქუმორთ დო გამანგარ თინა“ (ლუკ. 22:43). იესო დარწმუნებულ რდუ, ნამდა მუჟამსით მოხვარა ქიდესაჭირებუდუნ, იეჰოვა ანგელოზეფიშ საშვალებათ ქიმეხვარებუდ თის მუშ ნებაშ შესრულებას (მათ. 26:53).

18, 19. მუჭო გიმირინუანდ იესო ღორონთიშ სიტყვას მუშ ცხოვრებას დო შხვეფიშ გურაფაშ დროს?

¹⁸ ღორონთი მუშ სიტყვათ ხემძღვანელენდ იესოს. მსახურებაშ დოჭყაფაშე წამებულო ღურაშახ, იესო წმინდა წერილეფით ხემძღვანელენდ დო ომორჩილუდ ღორონთიშ სიტყვას (მათ. 4:4). ღურაშახ, ბოლო წუთეფს ხოლო მესიაშ გურშენ ნაწინასწარმეტყველებ სიტყვეფშე ციტირენდ (მათ. 27:46; ლუკ. 23:46). თეშ გინაწონს, თი დროშიან რელიგიურ წინამძღოლეფ პატის ვაცენდეს ღორონთიშ სიტყვას, მუჟამსით თინა მუნეფიშ ტრადიციეფს ოწინააღმდეგუდ. იესოქ წინასწარმეტყველ ესაიაშ სიტყვეფ მიშინუ დო თქუ: „თე ხალხი ნინათ ფცენს პატის, მარა გურ შორს უღუნა ჩქიმდე. ტყურათ ფცენა თაყვანს, მუშენდა ხალხიშ მცნებეფს თეშ ოგურუანა, მუჭოთ გურაფეფს“ (მათ. 15:7—9). იეჰოვა დღას ვეგშაგორუნდ თეცალ კათას მუშ ხალხიშ აწმანჯღვერეთ.

¹⁹ იესო შხვეფიშ გურაფაშ დროს ხოლო ღორონთიშ სიტყვათ ხემძღვანელენდ. მუჟამსით რელიგიურ ლიდერეფი ონირზუდესინ, თინა დღას ვარდ მუშ სიბრძნეშა დო გამოცდილებაშა მენდებულ. პირიქით, თინა ხალხის ირო წმინდა წერილეფშე ოგურუანდ (მათ. 22:33—40). თიშ მანგიორო, ზეცას მუშ ცხოვრებაშ ვარდა გუნაჭყეფუშ გურშენ უჩიებინუდკონ, იესოქ ხალხის „გონება გოუნწყუ, ქუგუგებდესკო წმინდა წერილეფიშ მნიშვნელობა“ (ლუკ. 24:32, 45). იესოს უჸორდ ღორონთიშ სიტყვა დო შურდოგურით გინოჩანდ თის შხვეფს.

20. ა) მუჭო ოძირანდ იესო ღორონთიშ მორჩილებას? ბ) მუ იძირე იესო დო ჰეროდე აგრიპა I-იშ მაგალითშე?

²⁰ თიშ უმკუჯინუო, ნამდა ხალხი გაკვირვებულ რდუ იესოშ ჩიებათ, თინა მუშ მასწავლებელს, იეჰოვას განადიდენდ (ლუკ. 4:22). მუჟამსით ართ ფარამ კოჩის იესოშ განდიდება ოკოდუნ, უწუ: „ჯგირ მასწავლებელ“. მარა იესოქ მოკრძალებულო უპასუხ: „მუშენ მიძახუქ ჯგირს? მითინ ვა რე ჯგირ, ართიშ, ღორონთიშ მეტ“ (მარ. 10:17, 18). იესო ნამდვილო ვაგუდ ჰეროდე აგრიპა I-ს, ნამუქით სოდგარენ 8 წანაშ უკულ იუდეაშ მეფეთ გინირთ. ართშა ართ მნიშვნელოვან შეხვალამას თიქ მეფეშ ბარგი ქიმკიქუნ. თექ შაყარელ ხალხი იძახუდ: „ღორონთიშ ხონარ რე დო ვართ ხოლო კოჩიშ!“. ჰეროდეს მანგარო ესიამოვნუ თეცალ განდიდებაქ. თიქ „დიდება ვემეჩ ღორონთის დო მუნტურეფშე ჭკუმილქ დოღურ“ (საქ. 12:21—23). მითინს ვარაგადედ, ნამდა ჰეროდე იეჰოვაშ გიშნაგორა ხემძღვანელ რდუ. თიშ გინაწონს, იესოქ არგამათ ქაძირუ, ნამდა ღორონთიშ დორინაფილ რდუ; თინა ირიათო ადიდენდ ღორონთის, მუჭოთ მუშ ხალხიშ უზენაეს ხემღვანელს.

21. ნამ კითხვეფი იჸუაფ გარჩიებულ ანწიან სტატიას?

²¹ იესოშ ხემძღვანელობა ხვალე მუსხირენ წანას ვეჸიდ. აღდგომაშ უკულ თიქ თქუ: „მთელ ძალაუფლება ზეცას დო დედამიწას, ჩქიმდა რე მოჩამილი“. თეშ უკულ გეუძინ: „მა თქვანწკუმა ვორექ თე ქიანაშ აღსასრულშახ“ (მათ. 28:18—20). მარა მუჭო უხემძღვანელენდ იესო ღორონთიშ ხალხის ზეცაშე დედამიწას? მის გიმირინუანდ იეჰოვა მუშ ხალხიშ ხემძღვანელო იესო ქრისტეშ მეთაურობათ? მუჭო გიშეჩინენდეს ქრისტიანეფ ღორონთიშ წარმომადგენელეფს? ანწიან სტატიას გარჩიებულ იჸი თე კითხვეფი.