1, 2. Sanen sinmegep ed tawen si Jesus, antoy nayarin inisip na saray apostol to?

AKAALAGEY iray apostol nen Jesus diad Palandey na Olibo, tan akatangay irad tawen. Kakkayari dan anengneng so katawan tan kaaro dan si Jesus ya tinmagey tan sinaniban na lurem. (Gawa 1:9, 10) Diad loob na duay taon et imbangat, pinaseseg, tan indaulo ira nen Jesus. Balet natan et amawil lad tawen. Antoy gawaen da?

² Ingganggan nen Jesus iray papatumbok to: “Mantasi kayo nipaakar ed siak diad Jerusalem, diad interon Judea tan Samaria, tan diad sankaarawian a pasen na dalin.” (Gawa 1:8) Panon dan nasumpal itan ya asainmin? Impaseguro nen Jesus ya magano la ran makaawat na masanton espiritu. (Gawa 1:5) Balet pian napulongan day interon mundo, kaukolan so panangigiya tan organisasyon. Pian nigiya tan naorganisa iray totoo na Dios nensaman, angusar si Jehova na totoon mangirepresenta ed sikato. Kanian nayarin iisipen na saray apostol, ‘Kasin manuro si Jehova na balon lider?’

3. (a) Sanen sinmegep ed tawen si Jesus, anton importantin desisyon so ginawa na saray matoor ya apostol? (b) Antoy aralen tayod sayan artikulo?

 ³ Kayari na ngalngali duay simba, kinonsulta na saray disipulo nen Jesus so Kasulatan, nampikasi ra parad panangigiya, tan pinili ray Matias ya kasalat nen Judas Iscariote bilang koma 12 ya apostol. (Gawa 1:15-26) Akin ya importante ed sikara tan ed si Jehova iyan pampili? Kaukolan ya onsalat si Matias parad importantin betang ed organisasyon. * Nampili si Jesus na saray apostol to aliwan pian walay nakaiba ton manpulong noagta pian nagawaan day importantin betang ed organisasyon na Dios. Anto itan ya betang, tan panon iran tinulongan nen Jehova panamegley nen Jesus? Anton uksoyan natan so miparad satan? Tan panon tayon ‘nonoten iramay mangidadaulo’ ed sikatayo, lalo lay “matoor tan makabat ya aripen”?—Heb. 13:7; Mat. 24:45.

4. Antoy betang na saray apostol tan arum nin mamatatken ed Jerusalem nen inmunan siglo?

⁴ Nen Pentecostes 33 C.E., saray apostol la so mangidadaulo ed Kristianon kongregasyon. Diad saman, “inmalagey si Pedro a kaiba so Labinsakey” tan innabang toy manangisalbay bilay ya katuaan ed dakel a Judio tan proselita. (Gawa 2:14, 15) Dakel ed sikaray nagmaliw ya mananisia. Kayari na saman, saray balon Kristiano et “nanseetan dan inaral so ibabangat na saray apostol.” (Gawa 2:42) Saray apostol so mangaasikaso ed pinansyal ya pankaukolan na kongregasyon. (Gawa 4:34, 35) Sikara met so mangaasikaso ed espiritual a pankaukolan na totoo na Dios, tan inkuan da: “Usaren mi so amin a panaon tan biskeg mi diad panagpikasi tan pambangat mid salita na Dios.” (Gawa 6:4) Tan sikaray mangibabaki na saray eksperiensyadon Kristiano ya manpulong ed saray balon teritorya. (Gawa 8:14, 15) Ag-abayag, saray arum ya alanaan a mamatatken et kaiba la na saray apostol ya mangaasikaso ed saray kongregasyon. Bilang mananguley ya ulop, sikara so mangiiter na panangiwanwan ed amin ya kongregasyon.—Gawa 15:2.

5, 6. (a) Panon ya pinabiskeg na masanton espiritu so mananguley ya ulop? (Nengnengen so litratod gapo na artikulo.) (b) Panon ya tinulongan na saray anghel so mananguley ya ulop? (c) Panon ya nampaigiyad Salitay Dios so mananguley ya ulop?

⁵ Binidbir na saray Kristiano nen inmunan siglo ya say mananguley ya ulop et iwawanwan nen Jehova a Dios panamegley na tinuro ton Lider, si Jesus. Akin et segurado ira? Unona, pinabiskeg na masanton espiritu so mananguley ya ulop. (Juan 16:13) Nikalbo so masanton espiritu ed amin ya alanaan ya Kristiano, tan espisipikon tinmulong itan ed saray apostol tan arum nin mamatatken ed Jerusalem pian nagawaan day betang da bilang manangasikaso. Singa bilang, nen 49 C.E. et inggiya na masanton espiritu so mananguley ya ulop pian makapanggaway dugan desisyon nipaakar ed isyu na panagsegat. Inunor na saray kongregasyon so panangiwanwan da tan ‘nantultuloy iran binmiskeg ed pananisia tan dinmakel so bilang da ed kada agew.’ (Gawa 16:4, 5) Diad samay sulat na mananguley ya ulop nipaakar ed desisyon da et napatnagay bunga na espirituy Dios, kaibay aro tan pananisia.—Gawa 15:11, 25-29; Gal. 5:22, 23.

⁶ Komadua, tinulongan na saray anghel so mananguley ya ulop. Pian nabautismoan si Cornelio bilang unonan ag-asegat ya Kristianon Gentil, sikatoy ingganggan na anghel  ya patawag toy apostol Pedro. Kayarin pinulongan nen Pedro si Cornelio tan saray kakanayon to, nikalbo ed sikara so masanton espiritu, anggano ag-asegat iray lalakin wadman. Bilang resulta, apakiwas iray apostol tan arum nin agagi ya unorey panlabayan na Dios tan awaten iray ag-asegat ya Gentil ed Kristianon kongregasyon. (Gawa 11:13-18) Niarum ni, aktibon sinuportaan tan pinapeles na saray anghel so panagpulong a kimey ya indaulo na mananguley ya ulop. (Gawa 5:19, 20) Komatlo, inggiya na Salitay Dios so mananguley ya ulop. Balanglan walay aasikasoen dan isyu nipaakar ed doktrina odino mangiiter iray instruksion ed organisasyon, saraman ya nilanaan na espiritun mamatatken et nampaigiya ed Kasulatan.—Gawa 1:20-22; 15:15-20.

7. Akin ya nibaga tayon inwanwan nen Jesus iray Kristiano nen inmunan siglo?

⁷ Anggano walay autoridad na mananguley ya ulop ed kongregasyon nen inmunan siglo, binidbir da ya say Lider da et si Jesus. Insulat nen apostol Pablo: “Inter to [nen Kristo] so arum bilang apostol . . . Nisengeg ed aro et ombaleg itayo komon ed amin a bengatla a mitunosan ed samay ulo, si Kristo.” (Efe. 4:11, 15) Imbes ya patawag irad ngaran na prominentin apostol, “atawag a Kristiano iray disipulo . . . lapud panangiwanwan na Dios.” (Gawa 11:26) Tua, binidbir nen Pablo ya importantin ‘maapit a tumboken iray bangat’ odino tradisyon a base ed Kasulatan ya inter na saray apostol tan arum nin lalaki ya angidaulo. Anggaman ontan, inyarum to: “Balet labay kon naamtaan yo a say ulo na balang laki [kaiba lay kada membro na mananguley ya ulop] et say Kristo; . . . tan say ulo na Kristo et say Dios.” (1 Cor. 11:2, 3) On, diad panangidaulo nen Jehova a Dios, inwanwan na agnanengneng tan niglorian Kristo Jesus so kongregasyon.

8, 9. Diad pansampot na koma 19 ya siglo, anto so importantin betang nen Brother Russell?

⁸ Diad pansampot na koma 19 ya siglo, nansagpotan nen Charles Taze Russell tan arum nin kakaiba to ya ipawil so dugan Kristianon panagdayew. Pian nipaamta day katuaan ya walad Biblia diad nanduruman lenguahe, inrehistro day Zion’s Watch Tower Tract Society nen 1884, tan si Brother Russell so presidente. * Maseet ton inaral so Biblia, tan makpel ton impaamta iray palson doktrina a singa say Trinidad tan ag-ipatey na kamarerwa. Atalosan ton say ipawil nen Jesus et agnanengneng, tan say “aturon panaon na saray nasyon” et manampot ed taon 1914. (Luc. 21:24) Mabulos ya inusar nen Brother Russell so panaon, biskeg, tan kuarta to pian ninabang irayan katuaan ed arum. Malinew ya diad satan ya importantin panaon, si Brother Russell et inusar nen Jehova tan say ulo na kongregasyon.

⁹ Aglabay nen Brother Russell so padayew ed totoo. Nen 1896 et oniay insulat to: “Agtayo labay ya alaen so dayew odino galang, parad sarili tayo odino saray insulat tayo; tan agtayo labay so patawag ya Reverend odino Rabbi. Tan agtayo met labay ya natawag so arum diad ngaran tayo.” Onia ni inkuan to: “Aliwa yan kimey na too.”

10. (a) Kapigan tinuro nen Jesus so “matoor tan makabat ya aripen”? (b) Ipaliwawa no panon ya kalkalnan atalosan so pandumaan na Mananguley ya Ulop tan Watch Tower Society.

¹⁰ Nen 1919, taloy taon kayari impatey nen Brother Russell, tinuro nen Jesus so “matoor tan makabat ya aripen.” Parad anto? Pian itaryaan iray lingkor na sankaabungan to na “naakan da diad dugan  panaon.” (Mat. 24:45) Anggan diad saraman ya taon, walay melag a grupo na alanaan ya agagi a manlilingkor ed headquarters diad Brooklyn, New York. Ipaparaan tan ibubunog da iray espiritual ya naakan parad saray papatumbok nen Jesus. Say balikas ya “mananguley ya ulop” et ginmapon nabasa ed saray publikasyon tayo nen 1940’s, tan say pakatalos da nid saman et mikonektaan itan ed Watch Tower Bible and Tract Society. Balet nen 1971, atalosan day pandumaan na Mananguley ya Ulop tan say Watch Tower Society—say legal ya korporasyon ya uusaren tayo—kaiba la ray direktor na satan. Manlapu lad saman, wala ray alanaan ya brother ya nagmaliw a membro na Mananguley ya Ulop balet aliwa ran direktor na Society. Diad agano ni ran taon, saray responsablin agagi ya kabiangan na ‘arum a karnero’ so manlilingkor bilang direktor na Watch Tower Society tan arum nin korporasyon ya uusaren na totoo na Dios. Diad ontan et makapampokus so Mananguley ya Ulop ed pangitarya na espiritual ya instruksion tan panangiwanwan. (Juan 10:16; Gawa 6:4) Diad samay Hulyo 15, 2013 ya Panag-bantayan, nipaliwawa ya say “matoor tan makabat ya aripen” et melag a grupo na saray alanaan a brother ya manugyop ed Mananguley ya Ulop.

11. Antoy kimey na Mananguley ya Ulop?

¹¹ Bilang sakey a grupo, say Mananguley ya Ulop so manggagawa na saray importantin desisyon. Panon? Manmimiting iran sinimba, kanian walay komunikasyon tan pankakasakey da. (Pro. 20:18) Tinaon ya ontetelek so man-chairman ed saray miting da, lapud anggapoy membro na Mananguley ya Ulop ya ipapasen a mas importante nen say arum ya membro. (1 Ped. 5:1) Tinaon met ya ontetelek so man-chairman ed saray anemiran committee na Mananguley ya Ulop. Tan ag-ipapasen na kada membro ya sikatoy lider na saray agagi to, noagta bilang sakey ed “saray lingkor na sankaabungan,” ya papakanen na matoor ya aripen tan manpapasakop ed panangidaulo na satan.

12. Lapud say Mananguley ya Ulop et agpinuyanan tan aliwan perpekto, anto ray nitepet tayo?

¹² Say Mananguley ya Ulop et agpinuyanan tan aliwan perpekto. Kanian, posiblin nalingo ira ed saray doktrina odino instruksion ed organisasyon. Diad tua, kaiba ed Giya ed Panag-research so heading ya “Pamalinew ed Saray Papanisiaan Tayo.” Nanengneng ditan so listaan na saray pananguman ed pakatalos tayod Biblia. Siempre, ag-imbaga nen Jesus ya mangitarya so matoor ya aripen na perpekton espiritual iran naakan. Kanian panon tayon naebatan so tepet nen Jesus ya “siopan talaga so matoor tan makabat ya aripen?” (Mat. 24:45) Antoy prueba ya say Mananguley ya Ulop so tutukoyen na satan? Pantongtongan tayo imay taloran ebidensya ya walay angiwanwan ed mananguley ya ulop nen inmunan siglo.

13. Panon ya tinulongan na masanton espiritu so Mananguley ya Ulop?

¹³ Ebidensyan ontutulong so masanton espiritu. Tinulongan na masanton espiritu so Mananguley ya Ulop pian natalosan iray katuaan ed Biblia ya datin agnatatalosan. Singa bilang, imanoen pa imay abitlan listaan ed Giya ed Panag-research nipaakar ed saray apalinew ya papanisiaan tayo. Malinew ya anggapoy toon nidayew ed impakaamta tan impangipaliwawa ed sarayan “aralem a bengatlan nipaakar ed Dios”! (Basaen so 1 Corinto 2:10.) Say panmoria na Mananguley ya Ulop et miparad si apostol Pablo, ya angisulat: “Itotongtong tayo met irayan bengatla, aliwan diad saray salitan imbangat ed panamegley na karunongan na too,  noagta diad saramay imbangat ed panamegley na espiritu na Dios.” (1 Cor. 2:13) Kayari na nilasus taon ya apostasya tan espiritual a kabilungetan, wala ni kasi arum nilikud ed masanton espiritu ya akatulong pian maples ya onlinew so espiritual ya pakatalos tayo manlapu nen 1919?

14. Base ed Apocalipsis 14:6, 7, panon ya tutulongan na saray anghel iray totoo na Dios natan?

¹⁴ Ebidensyan ontutulong iray anghel. Baleg so kimey na Mananguley ya Ulop pian naasikaso so internasyonal ya panagpulong a kimey na masulok ya waloran milyon. Akin ya matalona dan nagagawaan itan? Say sakey ya rason et ontutulong iray anghel. (Basaen so Apocalipsis 14:6, 7.) Dakel so eksperiensya ya akatongtong na saray manangipalapag iray indibidual ya kakkayari dan nampikasi parad tulong! * Say inyaligwas na panagpulong tan panaggaway babangatan anggano wala ray onsusumpa diad pigaran bansa et nagagawa lapud tulong na saray anghel.

15. Antoy pidumaan na Mananguley ya Ulop ed saray lider na Kakristianoan? Mangiter na alimbawa.

¹⁵ Manmamatalek ed Salita na Dios. (Basaen so Juan 17:17.) Imanoey agawa nen 1973. Oniay tepet ed Hunyo 1 ya The Watchtower: “Kasin . . . kualipikadon manpabautismo iray agda ni intunday panagsigarilyo ra?” Say ebat et: “Base ed prinsipyon walad Biblia, andi.” Angiter na pigaran importantin teksto so Watchtower, tan nipaliwawa no  akin ya nepeg a dispelosipen iray agmagbabawin mansisigarilyo. (1 Cor. 5:7; 2 Cor. 7:1) Nabasa ed satan: “Agmi papasooten odino didiktaan so arum. Say istrikton mangigaganggan ed saya et say Dios, ya angipasabi ed mensahe to panamegley na nisulat ya Salita to.” Wala kasi arum a relihyon ya mabulos ya manguunor ed Salita na Dios anggano nairapan iray membro ra ya manggawa ed satan? Oniay nabasa ed sakey ya libro nipaakar ed relihyon diad United States: “Mabetbet ya uumanen na saray Kristianon lider iray bangat da pian ombagay ed saray papanisiaan tan opinyon a labalabay na saray onsusuportan kamembro ra tan dakel a totoo.” No saray membro na Mananguley ya Ulop et manpapaigiyad Salita na Dios imbes ya diad saray opinyon na dakel a totoo, agta malinew ya si Jehova so mangidadaulo ed totoo to natan?

16. Antoy sakey a paraan ya nipanengneng tayon nononoten tayoy Mananguley ya Ulop?

¹⁶ Basaen so Hebreo 13:7. Say salitan impatalos ya “nonot yo” et nayari met ya mankabaliksan na “bitlaen.” Kanian, say sakey a paraan ya ‘nonoten tayo iramay mangidadaulo diad limog tayo’ et diad pangipikasi tayod Mananguley ya Ulop. (Efe. 6:18) Ipikasi tayoy responsabilidad dan mangitarya na espiritual a naakan, idauloy panagpulong ed interon mundo, tan asikasoen iray indonasyon ya pundo. Seguradon kakkaukolan day tuloytuloy ya pangipikasi tayod sikara!

17, 18. (a) Panon tayon nipanengneng ya mikokoopera tayod Mananguley ya Ulop? (b) Panon ya susuportaan na panagpulong tayo so matoor ya aripen tan si Jesus?

¹⁷ Siempre, nipanengneng tayon nononoten tayoy Mananguley ya Ulop, aliwa labat ya diad salita noagta diad itulok tayod saray instruksion. Mangiiter so Mananguley ya Ulop na instruksion diad saray publikasyon, aral, asemblea, tan kombension tayo. Niarum ni, manuturo ira na saray manangasikaso na sirkito, ya manuturo na saray elder ed kongregasyon. Sankanonot na saray manangasikaso na sirkito tan saray elder so Mananguley ya Ulop diad maapit ya panutumbok dad saray instruksion ya inter ed sikara. Nipanengneng tayon rerespetoen tayoy Lider tayo, si Jesus, diad panguunor tan pampapasakop tayod saray lalakin uusaren to ya mangiwanwan ed sikatayo.—Heb. 13:17.

¹⁸ Say sakey nin paraan ya nipanengneng tayon nononoten tayoy Mananguley ya Ulop et diad makulin pampupulong tayo. Diad tua, pinaseseg nen Pablo iray Kristiano ya aligen day pananisia na saray mangidadaulo ed sikara. Nibaga tayon mabiskeg so pananisia na matoor ya aripen ta makulikulin mangipapaseseg tan mangiyaabawag ed maong a balita na Panarian. Kasin sakey tayod saray arum a karnero ya onsusuporta ed saray alanaan diad sayan importantin kimey? Seguradon manliket tayo no oniay ibaga na Lider tayon si Jesus: “No ginawa yo itan ed sakey ed saray sankamelagan ed sarayan agagik, ginawa yo met la itan ed siak.”—Mat. 25:34-40.

19. Akin ya determinado kan tumboken so Lider tayo, si Jesus?

¹⁹ Nen pinmawil ed tawen si Jesus, agto pinaulyan iray papatumbok to. (Mat. 28:20) Asali toy tinulongan na masanton espiritu, saray anghel, tan say Salita na Dios pian nidaulo to ray lingkor na Dios nen wadiad dalin. Kanian, iiter to met ed matoor ya aripen natan so ontan ya tulong. Saray alanaan ya Kristiano, a membro na satan ya aripen et “nantultuloy a tinmumbok ed Kordero anggan iner so laen to.” (Apo. 14:4) Kanian no tutumboken tayoy panangiwanwan da, tutumboken tayoy Lider tayo, si Jesus. Diad arapen, iwanwan to tayo ed bilay ya anggapoy anggaan. (Apo. 7:14-17) Tan anggapoy toon lider ya makagawa ed satan!