1, 2. Katapos sumaka ni Jesus ha langit, ano an posible nga ginhunahuna han iya mga apostol?

AN MGA apostol ni Jesus naninindog ha Bukid han mga Olibo ngan nagkikita ha langit. Nakita pa la nira an ira agaron ngan sangkay nga hi Jesus nga gindara tipaigbaw ngan gintabonan hin dampog. (Buh. 1:9, 10) Ha sulod hin pipira ka tuig, gintutdoan, ginparig-on, ngan ginpangunahan hira ni Jesus. Pero yana waray na hiya. Ano an ira bubuhaton?

² Ginsugo ni Jesus an iya mga sumurunod: “Magigin mga saksi ko kamo ha Jerusalem, ha bug-os nga Judea ngan Samaria, ngan tubtob ha pinakahirayo nga lugar ha tuna.” (Buh. 1:8) Paonan-o daw la nira ito matutuman? Hi Jesus nagpasarig ha ira nga diri mag-iiha makakarawat nira an baraan nga espiritu. (Buh. 1:5) Pero an bug-os-kalibotan nga pagsangyaw nga buruhaton nagkikinahanglan hin paggiya ngan pag-organisar. Ha panahon han mga Israelita, ginamit hi Jehova hin mga tawo sugad nga iya representante basi giyahan ngan organisaron an iya katawohan. Salit posible nga naghunahuna an mga apostol, ‘Magpipili ba yana hi Jehova hin bag-o nga lider?’

3. (a) Katapos ni Jesus sumaka ha langit, ano nga importante nga desisyon an ginhimo han matinumanon nga mga apostol? (b) Ano an aton hihisgotan hini nga artikulo?

 ³ Paglabay hin haros duha ka semana, gin-usisa han mga disipulo ni Jesus an Kasuratan, nag-ampo hira para han giya han Dios, ngan ira ginpili hi Matias nga magin ika-12 nga apostol sugad nga kasaliwan ni Judas Iscariote. (Buh. 1:15-26) Kay ano nga importante gud para ha mga apostol ngan kan Jehova nga makompleto an 12 nga apostol? Tungod kay may importante ito nga papel ha kahikayan han organisasyon han Dios. * Ginpili ni Jesus an iya mga apostol diri la basi updan hiya ha pagministeryo kondi basi ira matuman an importante nga papel ha katawohan han Dios. Ano ito nga papel, ngan paonan-o hira ginbuligan ni Jehova pinaagi kan Jesus basi matuman nira ito? Ano nga kahikayan hadto an ginsusunod han katawohan han Dios yana? Ngan paonan-o naton maipapakita nga ‘ginhihinumdom naton an mga nangunguna’ ha aton, labi na “an matinumanon ngan maaramon nga uripon”?—Heb. 13:7; Mat. 24:45.

4. Ano an papel han mga apostol ngan han iba pa nga tigurang ha Jerusalem ha siyahan nga siglo?

⁴ Han Pentekostes 33 C.E., nagtikang manguna an mga apostol ha Kristiano nga kongregasyon. Hito nga higayon, “tinindog hi Pedro ngan an 11 nga apostol” ngan iginpasamwak an nagtatalwas hin kinabuhi nga mga kamatuoran ha daku nga grupo nga ginkukompwesto hin mga Judio ngan mga nakombirte. (Buh. 2:14, 15) Damu ha ira an nagin mga Kristiano. Katapos hito, inin bag-o nga mga Kristiano “nagpadayon . . . ha pagpamati hin maopay ha igintututdo han mga apostol.” (Buh. 2:42) An mga apostol an nanginano ha pundo han kongregasyon. (Buh. 4:34, 35) Ira gin-ataman an espirituwal nga panginahanglan han katawohan han Dios. Hira nagsiring: “Gagamiton namon an amon panahon ha pag-ampo ngan pagtutdo han pulong han Dios.” (Buh. 6:4) Nagtoka hira hin eksperyensyado nga mga Kristiano basi mapauswag an pagsangyaw nga buruhaton ha bag-o nga mga teritoryo. (Buh. 8:14, 15) Ha urhi, nagin kaupod han mga apostol an iba pa nga dinihogan nga tigurang ha pagpanguna ha mga buruhaton ha kongregasyon. Sugad nga nagmamando nga lawas, hira an naghahatag hin giya ha ngatanan nga kongregasyon.—Buh. 15:2.

5, 6. (a) Paonan-o ginbuligan han baraan nga espiritu an nagmamando nga lawas? (Kitaa an retrato ha tinikangan hini nga artikulo.) (b) Paonan-o ginbuligan han mga anghel an nagmamando nga lawas? (c) Paonan-o ginigiyahan han Pulong han Dios an nagmamando nga lawas?

⁵ Kombinsido an mga Kristiano ha siyahan nga siglo nga ginigiyahan ni Jehova nga Dios an nagmamando nga lawas pinaagi han ira Lider nga hi Jesus. Kay ano nga sigurado hira hito? Siyahan, gintagan han Dios han baraan nga espiritu an nagmamando nga lawas. (Juan 16:13) Iginbubo ito ha ngatanan nga dinihogan nga Kristiano, pero partikular nga ginbuligan hito an mga apostol ngan an iba pa nga tigurang ha pagtuman han ira papel sugad nga mga paramangno. Pananglitan, han 49 C.E., gin-giyahan han baraan nga espiritu an nagmamando nga lawas ha paghimo hin desisyon may kalabotan han isyu han pagturi. Ginsunod han mga Kristiano an giya hito salit “padayon nga naparig-on an pagtoo han mga kongregasyon, ngan ha adlaw-adlaw nagtikadamu an mga tumuroo.” (Buh. 16:4, 5) An surat nga nagsusulod han desisyon han nagmamando nga lawas nagpapakita liwat nga ira napatubo an bunga han espiritu han Dios, sugad han gugma ngan pagtoo.—Buh. 15:11, 25-29; Gal. 5:22, 23.

⁶ Ikaduha, ginbuligan han mga anghel an nagmamando nga lawas. Antes mabawtismohan hi Cornelio sugad nga an siyahan nga diri turi nga Hentil nga Kristiano, ginsidngan hiya han anghel nga pakadaon ha iya hi apostol Pedro. Katapos sangyawan ni Pedro hi Cornelio pati an iya mga paryente,  iginbubo ha ira an baraan nga espiritu bisan kon diri turi an mga kalalakin-an. Nagpagios ini ha mga apostol ngan ha iba pa nga kabugtoan nga sundon an kaburut-on han Dios ngan karawaton an diri turi nga mga Hentil ha Kristiano nga kongregasyon. (Buh. 11:13-18) Dugang pa, an mga anghel aktibo nga binulig ha pagsangyaw nga buruhaton nga ginpapangunahan han nagmamando nga lawas. (Buh. 5:19, 20) Ikatulo, ginigiyahan han Pulong han Dios an nagmamando nga lawas. Nagdidesisyon man hira may kalabotan ha mga gintotoohan o naghahatag hin giya ha mga kongregasyon, inin dinihogan nga mga tigurang nagpapagiya ha Kasuratan.—Buh. 1:20-22; 15:15-20.

7. Kay ano nga masisiring naton nga hi Jesus an nanguna ha mga Kristiano ha siyahan nga siglo?

⁷ Bisan kon an nagmamando nga lawas may awtoridad ha kongregasyon ha siyahan nga siglo, ira ginkilala nga hi Jesus an ira Lider. Hi apostol Pablo nagsiring: “Iginhatag niya [han Kristo] an iba sugad nga mga apostol.” Hiya nagdugang: “Magyakan kita han kamatuoran ngan magpakita hin gugma, basi magin hamtong kita ha ngatanan nga butang uyon ha Kristo nga amo an ulo.” (Efe. 4:11, 15) Imbes nga tawagon hira ha ngaran han usa nga prominente nga apostol, “gintawag nga mga Kristiano an mga disipulo pinaagi han giya han Dios.” (Buh. 11:26) Ginkilala ni Pablo nga importante nga ‘sundon gud an mga tradisyon,’ o mga buruhaton nga basado ha Kasuratan, nga iginhahatag han mga apostol ngan iba pa nga kalalakin-an nga nangunguna. Pero nagsiring liwat hiya: “Karuyag ko hibaroan niyo nga an ulo han tagsa nga lalaki [pati na han tagsa nga membro han nagmamando nga lawas] amo an Kristo; . . . ngan an ulo han Kristo amo an Dios.” (1 Cor. 11:2, 3) Oo, ginpapangunahan han ginhimaya nga hi Jesu-Kristo an kongregasyon ilarom ha paggiya ni Jehova sugad nga iya ulo.

8, 9. Ha tinikangan han dekada han 1870, ano an nagin importante nga papel ni Bugto Russell?

⁸ Ha tinikangan han dekada han 1870, hi Charles Taze Russell ngan an iya mga kaupod nangalimbasog nga ibalik an tinuod nga pagsingba. Basi maipasamwak an mga kamatuoran han Biblia ha iba-iba nga linggwahe, han 1884, iginparehistro nira an Zion’s Watch Tower Tract Society sugad nga legal nga korporasyon, ngan hi Bugto Russell an presidente hito. * Gin-adman niya hin maopay an Biblia ngan maisugon nga iginbuhayhag an sayop nga mga doktrina sugad han trinidad ngan diri namamatay nga kalag. Nasabtan niya nga diri literal nga makikita an pagbalik han Kristo ngan matatapos “an itinanda nga panahon han mga nasud” ha 1914. (Luc. 21:24) Gin-gamit gud ni Bugto Russell an iya panahon, kusog, ngan kwarta para maipasamwak ini nga mga kamatuoran. Matin-aw nga hinin importante nga panahon, gin-gamit ni Jehova ngan ni Jesus hi Bugto Russell nga manguna ha Iya katawohan.

⁹ Hi Bugto Russell waray maghingyap nga dayawon han mga tawo. Han 1896, hiya nagsurat: “Diri kami naghihingyap hin kadungganan, o kadayawan, para ha amon kalugaringon o ha amon mga sinurat; diri liwat namon karuyag nga tawagon kami nga Harangdon o Magturutdo. Diri man liwat namon hingyap nga an iba tawagon ha amon ngaran.” Ha urhi hiya nagsiring: “Diri ini kanan tawo buruhaton.”

10. (a) Kakan-o ginpili ni Jesus “an matinumanon ngan maaramon nga uripon”? (b) Isaysay kon paonan-o hinay-hinay nga nasabtan an kaibahan han Nagmamando nga Lawas ngan han Watch Tower Society.

¹⁰ Han 1919, tulo ka tuig katapos mamatay hi Bugto Russell, ginpili ni Jesus “an matinumanon ngan maaramon nga uripon.” Kay ano? Basi maghatag hin “pagkaon ha husto nga panahon” ha iya mga surugoon ha panimalay. (Mat. 24:45) Bisan hadto pa, may gutiay na nga grupo hin dinihogan nga kabugtoan nga nag-aalagad ha headquarters ha Brooklyn, New York nga nag-aandam ngan naghahatag hin espirituwal nga pagkaon ha mga sumurunod ni Jesus. An mga pulong nga  “nagmamando nga lawas” nagtikang gamiton ha aton mga publikasyon han dekada han 1940. Hito nga panahon, ginhuhunahuna nga ito nga mga pulong nagtutudlok ha mga direktor han Watch Tower Bible and Tract Society. Pero han 1971, nagin matin-aw an kaibahan han Nagmamando nga Lawas ngan han Watch Tower Society pati na han mga direktor hito. An Watch Tower Society usa nga legal nga korporasyon, diri usa nga grupo nga gin-unabi han Kasuratan. Salit tikang hini nga tuig, mahimo na magin membro han Nagmamando nga Lawas an dinihogan nga mga brother nga diri direktor han Watch Tower Society. Hinin bag-o la, may responsable nga mga brother nga kaapi han “iba nga mga karnero” nga nagin mga direktor ha Watch Tower Society ngan ha iba pa nga mga korporasyon nga ginagamit han katawohan han Dios, salit nakakapokus an Nagmamando nga Lawas ha pagtagana hin instruksyon ngan giya tikang ha Biblia. (Juan 10:16; Buh. 6:4) Iginsasaysay han Hulyo 15, 2013 nga gowa han An Barantayan nga “an matinumanon ngan maaramon nga uripon” usa nga gutiay nga grupo han dinihogan nga kabugtoan nga nagkukompwesto han Nagmamando nga Lawas.

11. Paonan-o nagdidesisyon an Nagmamando nga Lawas?

¹¹ An Nagmamando nga Lawas nagdidesisyon sugad nga grupo. Paonan-o? Nagmimiting hira kada semana. Nabulig ini nga magkaada hira maopay nga komunikasyon ngan matipigan an pagkaurosa. (Prob. 20:18) Tungod kay waray membro han Nagmamando nga Lawas nga gintatagad nga labaw kay ha iba, nagsusurosaliwan hira kada tuig ha pagtsirman ha mga miting. (1 Ped. 5:1) Nagsusurosaliwan liwat hira pagtsirman ha tagsa han unom nga komite han Nagmamando nga Lawas. Ngan diri ginhuhunahuna han tagsa nga membro han Nagmamando nga Lawas an iya kalugaringon sugad nga lider han iya mga igkasi-tumuroo, kondi usa nga membro han “panimalay” nga ginpapakaon han matinumanon nga uripon ngan sakop han pagpanguna hito.

12. Tungod kay an Nagmamando nga Lawas diri nakakakarawat hin mga kapahayagan tikang ha Dios ngan diri hira perpekto, ano nga pakiana an nabangon?

¹² An Nagmamando nga Lawas diri nakakakarawat hin mga kapahayagan tikang ha Dios, ngan diri hira perpekto. Salit mahimo hira magsayop may kalabotan ha pagsabot ha mga gintotoohan o ha paggiya ha organisasyon. Ngani, an Watch Tower Publications Index may-ada ulohan nga “Beliefs Clarified,” diin nakalista an mga pagbag-o ha aton pagsabot ha Kasuratan tikang han 1870. * Waray magsiring hi Jesus nga an matinumanon nga uripon magtatagana hin perpekto nga espirituwal nga pagkaon. Salit paonan-o naton mahibabaroan an baton han pakiana ni Jesus: “Hin-o gud an matinumanon ngan maaramon nga uripon?” (Mat. 24:45) Ano an mga pamatuod nga an Nagmamando nga Lawas amo an nagbubuhat hito nga papel? Tagdon naton an amo gihapon nga tulo nga bulig nga nakarawat han nagmamando nga lawas ha siyahan nga siglo.

13. Paonan-o ginbubuligan han baraan nga espiritu an Nagmamando nga Lawas?

¹³ Ebidensya han bulig han baraan nga espiritu. An baraan nga espiritu nabulig ha Nagmamando nga Lawas nga masabtan an mga kamatuoran ha Biblia nga waray masabti hadto. Pananglitan, hunahunaa an iginpatin-aw nga mga gintotoohan nga gin-unabi ha nahiuna nga parapo. Sigurado nga waray gud tawo nga makakasabot ngan makakag-esplikar hinin “hilarom nga mga butang han Dios”! (Basaha an 1 Corinto 2:10.) Inabat gud han Nagmamando nga Lawas an pariho han ginsiring ni apostol Pablo: “Ginhihisgotan liwat naton ini nga mga butang, diri pinaagi han mga pulong nga hinbaroan naton tikang ha kinaadman han tawo, kondi pinaagi han hinbaroan naton tikang ha espiritu.” (1 Cor. 2:13) Tungod han damu ka siglo nga apostasya ngan pagin uripon ha espirituwal  nga kasisidman, mag-uuswag ba an aton pagsabot ha kamatuoran tikang han 1919 kon waray bulig han baraan nga espiritu?

14. Uyon ha Pahayag 14:6, 7, paonan-o ginbubuligan han mga anghel an katawohan han Dios yana?

¹⁴ Ebidensya han bulig han mga anghel. An Nagmamando nga Lawas yana may daku gud nga responsabilidad ha pagpanguna ha bug-os-kalibotan nga pagsangyaw nga buruhaton nga may-ada sobra walo ka milyon nga magwarali. Kay ano nga nagigin malampuson gud ito nga buruhaton? Tungod han bulig han mga anghel. (Basaha an Pahayag 14:6, 7.) Ha damu nga kahimtang, may mga indibiduwal nga nasasangyawan nga katatapos pa la mag-ampo para han bulig! * Tungod han bulig han mga anghel, nagin posible liwat an padayon nga pag-uswag han pagsangyaw ngan paghimo hin disipulo nga buruhaton bisan pa han duro nga pagkontra ha pipira nga lugar.

15. Ano an kaibahan han Nagmamando nga Lawas ha mga lider han Kakristianohan? Paghatag hin ehemplo.

¹⁵ Nagpapagiya ha Pulong han Dios. (Basaha an Juan 17:17.) Tagda an nahitabo han 1973. An Hunyo 1 nga gowa han The Watchtower nagbangon hini nga pakiana: “Magigin kwalipikado ba ha bawtismo an indibiduwal nga padayon nga nagamit hin tabako?” An baton: “Matin-aw nga iginpapakita han Kasuratan nga diri hira puydi magin kwalipikado.” An The Watchtower nag-unabi hin mga teksto nga naghihisgot may kalabotan hito ngan nagsaysay kon kay ano nga an diri mabinasulon nga parasigarilyo sadang paiwason ha kongregasyon. (1 Cor. 5:7; 2 Cor. 7:1) Nagsiring  liwat ito: “Diri ini ginhihimo nga waray basihan ngan basta la nga iginpapatuman. Ini nga istrikto nga giya tikang gud ha Dios, ngan iginpahayag niya ito ha iya sinurat nga Pulong.” May iba pa ba nga relihiyon nga andam sumunod ha Pulong han Dios, bisan kon an pagbuhat hini magigin makuri para ha pipira han membro hito? An usa nga bag-o la nga libro ha Estados Unidos nga naghihisgot may kalabotan ha relihiyon nagsiring: “Pirme ginrirebisa han mga lider han Kakristianohan an ira mga katutdoan basi ipahiuyon ha mga gintotoohan ngan opinyon nga ginsusuportaran han ira mga membro ngan han kadam-an ha sosiedad.” Kon ginsusunod han Nagmamando nga Lawas an giya han Pulong han Dios ha paghimo hin mga desisyon imbes nga an opinyon han kadam-an, diri ba ito nagpapamatuod nga hira an ginpili han Dios basi manguna ha iya katawohan yana?

16. Ano an usa nga paagi ha paghinumdom ha Nagmamando nga Lawas?

¹⁶ Basaha an Hebreo 13:7. An pulong nga iginhubad nga “hinumdumi” mahimo liwat ihubad nga “unabiha.” An usa nga paagi ha ‘paghinumdom ha mga nangunguna’ amo an pag-unabi ha Nagmamando nga Lawas ha imo mga pag-ampo. (Efe. 6:18) Hunahunaa la an ira daku nga responsabilidad ha pagtagana hin espirituwal nga pagkaon, pagpanguna ha pagsangyaw nga buruhaton ha bug-os nga kalibotan, ngan pagin maaramon ha paggamit han mga donasyon. Matin-aw nga kinahanglan gud nira an aton padayon nga pag-ampo para ha ira!

17, 18. (a) Paonan-o naton iginpapakita nga ginsusuportaran naton an Nagmamando nga Lawas? (b) Kay ano nga an aton pagsangyaw nagpapakita nga nasuporta kita ha matinumanon nga uripon ngan kan Jesus?

¹⁷ Ginhihinumdom liwat naton an Nagmamando nga Lawas pinaagi ha pagsunod ha ira giya. Iginhahatag nira an giya pinaagi ha aton mga publikasyon, katirok, asembleya, ngan kombensyon. Dugang pa, nagpipili hira hin mga paramangno han sirkito, nga amo an nagpipili hin mga tigurang ha kongregasyon. Ginhihinumdom han mga paramangno han sirkito ngan mga tigurang an Nagmamando nga Lawas pinaagi ha pagsunod ha ngatanan nga giya nga iginhahatag ha ira. Iginpapakita naton ngatanan an aton pagtahod ha aton Lider nga hi Jesus pinaagi ha pagin masinugtanon ngan mapinasakupon hini nga kalalakin-an nga iya ginagamit ha pagpanguna ha aton.—Heb. 13:17.

¹⁸ Usa pa nga paagi ha paghinumdom ha Nagmamando nga Lawas amo an pagbuhat han aton bug-os nga mahihimo ha pagsangyaw nga buruhaton. Ngani, gin-aghat ni Pablo an mga Kristiano nga subaron an pagtoo hadton mga nangunguna ha ira. Iginpapakita gud han matinumanon nga uripon an ira marig-on nga pagtoo pinaagi ha pagin madasigon ha pagsangyaw han maopay nga sumat han Ginhadian ngan pag-aghat ha iba nga buhaton ito. Usa ka ba han “iba nga mga karnero” nga nasuporta ha mga dinihogan hinin importante nga buruhaton? Malilipay ka gud kon an Lider nga hi Jesus magsiring ha imo: ‘Anoman an ginbuhat mo ha usa nga pinakaubos hini nga akon kabugtoan, ginbuhat mo ha akon.’—Mat. 25:34-40.

19. Kay ano nga determinado ka nga sundon an aton lider nga hi Jesus?

¹⁹ Han binalik hi Jesus ha langit, waray niya pabay-i an iya mga sumurunod. (Mat. 28:20) Maaram hiya nga daku an naibulig han baraan nga espiritu, mga anghel, ngan Pulong han Dios ha iya pagpanguna han nakanhi hiya ha tuna. Salit igintatagana liwat niya yana ha matinumanon nga uripon an amo gihapon nga bulig. Sugad nga dinihogan nga mga Kristiano, an Nagmamando nga Lawas “padayon nga nasunod ha Kordero bisan diin hiya kumadto.” (Pah. 14:4) Salit kon ginsusunod naton an ira paggiya, ginsusunod naton an aton Lider nga hi Jesus. Diri na mag-iiha, gigiyahan kita niya ngadto ha kinabuhi nga waray kataposan. (Pah. 7:14-17) Waray gud tawhanon nga lider nga makakahimo hito!