1, 2. იესოშ ზეცაშა ამაღალებაშ უკულ, მუს შილებედ ფიქრენდესკო თიშ მოწაფეეფი?

იესოშ მოწაფეეფ ზეთისხილიშ გვალას გიმარდეს დო თოლს ვაუთხინუანდეს ცას. მუშენდა ჭიჭე ხანიშ წოხოლე თინეფქ ქოძირეს, ნამდა მუნეფიშ მოძღვარ დო მეგობარქ ზეცაშა ემაღალ დო უკულ მუნაფაქ დოფორ (საქ. 1:9, 10). სოდგარენ ჟირ წანას იესო ოგურუანდ, გვერდით ელურდ დო ხემძღვანელენდ მუშ მოწაფეეფს. ასე მუჟამსით თიქ მიდართუნ, მუშ კეთება ულამუდეს თინეფს?

² იესოქ მუშ მოწაფეეფს დავალება მეჩუ: „იჸუაფუთ ჩქიმ მოწმეეფ იერუსალიმს, მთელ იუდეას დო სამარიას დო დედამიწაშ ძგაშეძგაშა“ (საქ. 1:8). მუჭო შეიალებედეს თინეფს თე დავალებაშ შესრულება? მართალ რე, იესოქ შეპირ თინეფს, ნამდა მალას წმინდა შურს მიღენდეს (საქ. 1:5). მარა თეცალ მაშტაბიშ ქადაქებაშ საქმე ითხინდ გეწურაფას დო ორგანიზებას. ჯვეშ დროს იეჰოვა მუშ ხალხიშ გიმაწურაფალო შხვადოშხვა კათას გიმირინუანდ. ათეშგურშენ მოწაფეეფ შილებე ფიქრენდესკო: „იეჰოვა ანწი ახალ ხემძღვანელს ხო ვეგიორინუანს?“.

3. ა) იესოშ ზეცაშა ამაღალებაშ უკულ, მუ მნიშვნელოვან საკითხ გინოჭყვიდეს ართგურ მოციქულეფქ? ბ) მუს გუვარჩიენთ თე სტატიას?

 ³ სოდგარენ ჟირ მარაშ უკულ იესოშ მოწაფეეფქ ართო ეკიშაყარეს, არჩიენდეს წმიდა წერილეფს, ღორონთის ქოთხის ხემძღვანელობა დო იუდა ისკარიოტელიშ მანგიორო მავითოჟირა მოციქულო მატთია გეიშაგორეს (საქ. 1:15—26). მუშენ რდუ თეშ გინოჭყვიდუა თეჯგურა მნიშვნელოვან მუჭოთ თინეფშო დო თეშ იეჰოვაშო? მატთიაშ გიშაგორუა ორგანიზაციულ საჭიროებაშ გურშენ აუცილებერ რდუ. * იესოს მუშ მოციქულეფ ხვალე მუწკუმა ართო უმსახურებდესკო თიშ გურშენ ვეიშუგორ; თინეფს შეუსრულებდესკო ოკო მნიშვნელოვან როლი ღორონთიშ ხალხ შქას. მუ რდუ თე მნიშვნელოვან როლი დო იესოშ საშვალებათ, მუჭო მამზად იეჰოვაქ თინეფ თიშ შეიოსრულებელო? თეშ მაგვარ მუ საქმე არსებენს ამდღა ღორონთიშ ხალხ შქას? მუჭო შემლებნა ფშუდან „თინეფ, მიდგას ხემძღვანელობა ოვალ“ ჩქინ შქას, განსაკუთრებულო „ართგურ დო გონიერ მონა“? (ებრ. 13:7; მათ. 24:45).

4. მუ მოვალეობეფს ასრულენდეს მოციქულეფ დო შხვა უხუცესეფ პირველ საუკუნეს იერუსალიმს?

⁴ ახალ წანაკოროცხუათ 33 წანას მოციქულეფქ ქრისტიანულ კრებაშ ხემძღვანელობა ქიდიჭყეს. თე დროს, „განწოდირთ პეტრექ ვითაართწკუმა ართო“ დო სიცოცხლეშ გინმასკილიდაფარ ჭეშმარიტება ქუქადაქ იუდეველეფიშ დო პროზელიტეფიშ დიდ ჯგუფის (საქ. 2:14, 15). თინეფშე ბრელქ გინირთ მორწმუნეთ. თეშ უკულ ხოლო თე ახალ ქრისტიანეფ „მოციქულეფშე ირიათო გურაფლენდეს“ (საქ. 2:42). მოციქულეფ კრებაშ ფინანსურ საკითხეფს ხოლო აგვარენდეს (საქ. 4:34, 35). თინეფ ღორონთიშ ხალხიშ სულიერ მოთხოვნილებეფს აქცენდეს ყურადღებას. ბიბლიას ჭარუ: „ჩქი ლოცვას დო სიტყვაშ მსახურებას ოკო მეუძღვინათ დუდი“ (საქ. 6:4). მოციქულეფქ ქუდარინეს გამოცდილ ქრისტიანეფ, ქუხემძღვანელესკო ახალ ტერიტორიეფს ქადაქებაშ საქმეს (საქ. 8:14, 15). დროხანიშ უკულ, შხვა ცხებულ უხუცესეფქ ხოლო მოციქულეფწკუმა ართო ქიდიჭყეს კრებაშ საქმეეფიშ ხემძღვანელობა. თინეფ, მუჭო ხემძღვანელ საბჭონ თეშ, კრებეფს მითითებეფს არზენდეს (საქ. 15:2).

5, 6. ა) მუჭო ამანგარენდ ხემძღვანელ საბჭოს წმინდა შური? (ქოძირით სურათ 23-ა გვერდის) ბ) მუჭო ოხვარუდეს ანგელოზეფ ხემძღვანელ საბჭოს? გ) მუჭო ღებულენდ ხემძღვანელ საბჭო მითითებეფს ღორონთიშ სიტყვაშე?

⁵ პირველ საუკუნეშ ქრისტიანეფ ორწყედეს, ნამდა ხემძღვანელ საბჭოს იეჰოვა იესოშ საშვალებათ ხემძღვანელენდ. მუ არწმუნენდ თინეფს თეშა? პირველ, წმინდა შურ ამანგარენდ ხემძღვანელ საბჭოს (იოან. 16:13). წმინდა შურქ არძა ცხებულ ქრისტიანშა გინორთ, მარა თინა განსაკუთრებულო ოხვარუდ მოციქულეფს დო შხვა უხუცესებს, ნამუთ იერუსალიმს რდესინ, ქუხემძღვანელესკო კრებაშ საქმეს. მაგალთო, ახალ წანაკოროცხუათ 49 წანას წმინდა შურქ მეხვარ ხემძღვანელ საბჭოს წინადაცვეთაშ საკითხიშ გინოჭყვიდუას. კრებეფქ ქიმიაჸუნეს თინეფიშ მითითებას დო შედეგო „რწმენას იმანგარებუდეს დო ირ დღას რიცხობრივო იძინანდეს“ (საქ. 16:4, 5). თი წერილშე, სოდეთ თე მითითება რდუ მოჩამილინ, იძირედ, ნამდა ხემძღვანელ საბჭო ღორონთიშ შურიშ ნაყოფის გიმირჩქინანდ, ნამდგაშა მიშურს ჸოროფა დო რწმენა (საქ. 15:11, 25—29; გალ. 5:22, 23).

⁶ მაჟია, ანგელოზეფ ოხვარუდეს ხემძღვანელ  საბჭოს. შხვა რჯულიშ წინადაუცვეთელ კორნელიუსი პირველ რდუ, მიდგაქ ქრისტიანო ინათ. ნათუაშახ ანგელოზიქ მითითება ქიმეჩ თის, პეტრე მოციქულ ქუჭანუაფუდკო. პეტრექ კორნელიუსის დო თიშ ნათესეფს ქუქადაქუნ თიშ უკულ, თიშ უმკუჯინუო, ნამდა წინადაცვეთილ ვარდესინ, თინეფშა წმინდა შურქ გეგნორთ. თექ სტიმულ ქიმეჩ მოციქულეფს დო შხვა უხუცესეფს, ქუდოჸუნაფდესკო ღორონთიშ ნებას დო წინადაუცვეთელ შხვა რჯულიშ ხალხი ხოლო მეუღებდესკო კრებაშა (საქ. 11:13—18). თეს გეძინელ, ანგელოზეფ აქტიურო მონაწილენდეს დო აჩქარენდეს ქადაქებაშ საქმეს, ნამუსით ხემძღვანელ საბჭო ზედამხედველენდ (საქ. 5:19, 20). მასმა, ხემძღვანელ საბჭო ღორონთიშ სიტყვაშე ღებულენდ მითითებეფს. გურაფეფიშ დოდგინება იჸიდ დო ვარ ორგანიზაციულ საკითხეფიშ გინოჭყვიდუან, შურით ცხებულ უხუცესეფ წმინდა წერილეფით ხემძღვანელენდეს (საქ. 1:20—22; 15:15—20).

7. მუშენ შემლებნა თიშ რაგად, ნამდა იესო ხემძღვანელენდ ჯვეშო ქრისტიანეფს?

⁷ თიშ უმკუჯინუო, ნამდა პირველ საუკუნეს ხემძღვანელ საბჭოს ზედამხედველობაშ უფლებაქ ქიმიაჩუნ, თინეფს უჩქუდეს მუჭო მუნეფიშ ხემძღვანელ იესო რდუ. მოციქულ პავლექ თქუ: „თიქ [იესოქ] ნამთინე მოციქულეფო გიორინუ“, „ირფელს ჸოროფათ მიბრდათ თიწკუმა, მით რე დუდ — ქრისტე“ (ეფეს. 4:11, 15). თიშ მანგიორო, ნამდა მუნეფიშ დუდშა გიმორჩქინელ მოციქულეფ დუძახინდესკონ, „მოწაფეეფს ღორონთიშ ნებათ . . . ქიგიადვეს სახელო ქრისტიანეფქ“ (საქ. 11:26). პავლეს ჯგირო არჩქილედ, მუშმადიდა მნიშვნელობა უღუდ მოციქულეფიშ დო ხემძღვანელობა ოვალუდუნ ფერ შხვა ქომოლკათაშ მუნაჩემ, წმინდა წერილეფშა გერსხილ გურაფეფიშ მეჸუნას. თიქ გეუძინ: „მარა მოკო გიჩქუდან, ნამდა არძა კოჩიშ [თინეფწკუმა ართო ხემძღვანელ საბჭოშ არძა წევრიშ] დუდ ქრისტე რე . . . ქრისტეშ დუდ — ღორონთი“ (1 კორ. 11:2, 3). იეჰოვა ღორონთი თოლშო უძირაფ დო განდიდებულ იესო ქრისტეშ საშვალებათ ხემძღვანელენს კრებას.

8, 9. მუ მნიშვნელოვან საქმე შეასრულ ჯიმა რასელქ მა-19 საუკუნეშ ბოლოშო?

⁸ მა-19 საუკუნეშ ბოლოშო, ჩარლზ ტეიზ რასელ დო ნამთინე თიშ მომხრეეფ ოცადუდეს, აღუდგინებდესკო ჭეშმარიტ ქრისტიანულ თაყვანიშცემა. ბიბლიურ ჭეშმარიტება შხვადოშხვა ნინაშა გავრცელესკონ თიშენ, 1884 წანას „სიონიშ გინაჯინალ კოშკიშ დო ტრაქტატეფიშ საზოგადოება“ დარეგისტრირეს, ნამუშ პრეზიდენტ რდუ ჯიმა რასელი. * თინა ბიბლიაშ გურგედვალირ მარკვიებელ რდუ დო უშკურანჯო აარგამენდ ტყურა გურაფეფს, მუნერით რე სამება დო შურიშ არსებობა. თიქ ქიგეგ, ნამდა ქრისტე თოლიშ უძირაფუო მოურს დო „შხვა რჯულაშ ხალხშო მერჩქინელ დროეფ“ 1914 წანას გეთებუდ (ლუკ. 21:24). ჯიმა რასელქ მუშ დრო, ენერგია დო ფარა ჭეშმარიტებაშ შხვეფშა გინაჩამალო უდუნარღებუო გეგმირინუ. არგამა რდუ, ნამდა თეცალ მნიშვნელოვან დროს იეჰოვაქ დო კრებაშ ხემძღვანელ ქრისტექ ჯიმა რასელ გეგმირინეს.

⁹ ჯიმა რასელ ხალხშე დიდებას ვა გორუნდ. 1896 წანას თიქ ჭარ: „ვართ ჩქინ დუდშო მოკონა პატი დო დიდება დო ვართ ჩქინ ნაჭარეფშო; ვართ თინა მოკონა, მოძღვარ ვარდა რაბი დომძახანინ. ჩქი ვა მოკონა მითინს ჩქინ სახელ გეძუდას“. ჭიჭე ხანიშ უკულ გეუძინ: „თე საქმე კოჩშე ვა რე“.

10. ა) მუჟამ გიორინუ იესოქ „ართგურ დო გონიერ მონა“? ბ) მუჭო გეგმერთუ ხემძღვანელ საბჭოქ „საზოგადოება გინაჯინალ კოშკის“?

¹⁰ რასელიშ ღურაშე სუმ წანაშ უკულ, 1919 წანას იესოქ „ართგურ დო გონიერ მონა“  დანიშნუ. თეშ მიზან თინა რდუ, ნამდა „მუშ დროს ქიმუჩამუდკო საზრდო მუშ ჸუდეშარეფშა“ (მათ. 24:45). თი დროს ცხებულ ჯიმალეფიშ ჭიჭე ჯგუფ, მით ბრუკლინს (ნიუ-იორკი), მთავარ სამმართველოს მსახურენდესინ, სულიერ საზრდოს ამზადენდეს დო იესოშ მიმაჸუნალეფს გინოჩანდეს. ჩქინ პუბლიკაციეფს ფრაზა, „ხემძღვანელ საბჭოშ“ გიმორინაფა 1940-იან წანეფს დიჭყეს, ნამუსით „გინაჯინალ კოშკიშ, ბიბლიაშ დო ტრაქტატეფიშ საზოგადოებაწკუმა“ აკავშირენდეს. მარა 1971 წანას ხემძღვანელ საბჭოქ გეგმერთ „საზოგადოება გინაჯინალ კოშკის“ დო თიშ დირექტორეფიშ საბჭოს, ნამუსით ხვალე იურიდიულ სტატუს უღუდ დო ვართ ხოლო ბიბლიურ საფუძველი. თევრეშე მოჸუნაფილ, ხემძღვანელ საბჭოს ინიშნებუდეს ხვალე თი ცხებულ ჯიმალეფ, მით ვა რდეს საზოგადოებაშ დირექტორეფ. ბოლო წანეფს, თე დო შხვა იურიდიულ გაერთიანებეფიშ დირექტორეფო „შხვა შხურიშ“ წარმომადგენელ პასუხიშმგებელ ჯიმალეფ გეირჩიეს. თენა საშვალებას არზენს ხემძღვანელ საბჭოს, მთელ ყურადღება გეგნიღას სულიერ მითითებეფიშ დო ხემძღვანელობაშ გინოჩამაშა (იოან. 10:16; საქ. 6:4). 2013 წანაშ 15 კვირკვეშ თუთაშ „გინაჯინალ კოშკის“ გარჩიებულ რდუ, ნამდა „ართგურ დო გონიერ მონაშ“ ჭიჭე ჯგუფი, ნამუთ შითმოდირთუ ცხებულ ჯიმალეფშე, რე ხემძღვანელ საბჭო.

11. მუჭო მოქმედენს ხემძღვანელ საბჭო?

¹¹ ხემძღვანელ საბჭო ართო გინოჭყვიდუნს მნიშვნელოვან საკითხებს. მუჭო მუთმოხვადუ თენა? თინეფ ირ მარას შეთმოხვადუნა ართიანს, ათეშნერო ხეს უნწყუნა ართობას დო ხოლოშიან ურთიერთობას (იგავ. 20:18). ირ წანას შეხვალამაშ თავმჯდომარე ითირუ, თაშ ნამდა, ხემძღვანელ საბჭოშ ნამთინ წევრი ვა რე მითინიშ უმოს (1 პეტ. 5:1). ხემძღვანელ საბჭოშ ამშვ ხოლო კომიტეტის თე პრინციპით ითირუნა თავმჯდომარეეფ. ხემძღვანელ საბჭოშ თითოულ წევრი მუშ დუც თანამორწმუნეეფიშ უნჩაშო ვარინ, „ჸუდეშარეფო“ მირჩქინანს, ნამუთ ართგურ მონაშე ღებულენს საზრდოს დო მეჸუნს თინეფიშ ხემძღვანელობას.

12. მუ კითხვეფქ შილებე წიმიჭკირას, მუჟამსით მიჩქუნა, ნამდა ხემძღვანელ საბჭოშ წევრეფ ვართ სრულყოფილეფ რენა დო ვართ ხილვეფს ორწყენა?

¹² ხემძღვანელ საბჭოშ წევრეფ ვართ სრულყოფილეფ რენა დო ვართ ხილვეფს ორწყენა ღორონთშე. ათეშგურშენ თინეფქ შილებე შეცდომეფ დუშვან გურაფეფს ვარა ორგანიზაციულ საკითხებს. „გინაჯინალ კოშკიშ პუბლიკაციეფიშ საძიებელს“ მოჩამილ რე ართ-ართ სათაური — „გურაფეფქ გასაგებქ ქიჸუ“, სოდეთ გიმაკოროცხილ რე თი გურაფეფ, ნამუთ 1870 წანაშე მოჸუნაფილო ითირუდ. მუშო ოკო რაგად, იესოს ვაუთქუალ, ნამდა ართგურ მონა სრულყოფილ სულიერ საზრდოს გინოფჩანდეს. ათეშგურშენ მუჭო უპასუხათ იესოშ შეკითხვას: „მი რე ართგურ დო გონიერ მონა“? (მათ. 24:45). მუ ამტკიცენს, ნამდა ხემძღვანელ საბჭო ასრულენს თე როლს? მორთ, გუვარჩუათ კინ თი სუმ ფაქტორ, ნამუშ საშვალებათ ღორონთი ოხვარუდ პირველ საუკუნეს ხემძღვანელ საბჭოს.

13. მუჭო ოხვარუდ წმინდა შურ ხემძღვანელ საბჭოს?

¹³ წმინდა შური. წმინდა შურქ მეხვარ ხემძღვანელ საბჭოს თი ბიბლიურ გურაფეფიშ ინონჭაფას, ნამუთ ადრე ბოლოშა ვარჩქილედ. მაგალთო, დეფიფქრათ თი გურაფეფშე, ნამუთ გიმაკოროცხილ რე წოხლეიან აბზაცის მოშინაფილ საძიებელს — „გურაფეფქ გასაგებქ ქიჸუ“. მუშო ოკო რაგად, ნამთინ კოჩ ვემსახურენს დიდებას „ღორონთიშ სიტომბეეფიშ“ გაგებაშ დო ენწყუმაშ გურშენ! (წეკითხით 1 კორინთელეფიშ 2:10). ხემძღვანელ საბჭო იმეორენს მოციქულ პავლეშ ნაჭარა სიტყვეფს: „თეს იფჩიებუთ [ღორონთიშ] შურიშ ნაგურეფუთ დო ვართ ხოლო კოჩიშ სიბრძნეშე ნაგურეფ სიტყვეფით“ (1 კორ. 2:13). მუსხირენ საუკუნეშ  სულიერ უკუმელაშ დო ღორონთიშ შარაშე ერთაფაშ უკულ, წმინდა შურიშ მოხვარაშ უმშო, შხვანერო მუჭო ოკო ეინწყას 1919 წანაშე სულიერ გაგებეფიშ თეშ მაჩქარა ძინაქ?

14. მუჭოთ გამოცხადებაშ 14:6, 7-შე იძირენ, მუჭო ოხვარუნა ამდღა ანგელოზეფ ღორონთიშ ხალხის?

¹⁴ ანგელოზეფი. ხემძღვანელ საბჭოშა მენდებულ რე სერიოზულ დავალება; თინა ზედამხედველენს მსოფლიო ქადაქებაშ საქმეს, ნამდგას ასრულენს ბრუო მილიონშე უმოს მაქადაქებელი. მუშენ მეურს თე საქმე თეშმაჯგირათ? ართ-ართ მხარე რე ანგელოზეფიშ მოხვარა (წეკითხით გამოცხადებაშ 14:6, 7). ბრელ რე თიცალ შემთხვევა, მუჟამსით მაქადაქებელეფქ თიშნერ ხალხშა მერთეს, მიდგა თიმ წუთის ღორონთის მოხვარას თხულენდ! * ნამთინე ქიანას თხოზინიშ უმკუჯინუო, ქადაქებაშ დო მოწაფეეფიშ მომზადებაშ საქმე წოხოლე მიშუ დო თექ ანგელოზეფიშ მოხვარათ იჸუ შეიოლებერქ.

15. მუ განსხვავება რე ხემძღვანელ საბჭო დო ქრისტიანულ ეკლესიეფიშ უნჩაშეფ შქას?

¹⁵ ღორონთიშ სიტყვა (წეკითხით იოანეშ 17:17). ქობძირათ, მუ შეკითხვა რდუ დასვებულ 1973 წანაშ 1 ივანობაშ „გინაჯინალ კოშკის“: „ქიშილებენ დო ვარ დინათან თინეფქ, მიდგას ვაფ მეტებულ სიგარეტიშ შუმა?“. პასუხ თეცალ რდუ: „წმინდა წერილეფს თი დასკვნაშა მეპჸუნთ, ნამდა ვეშილებე თინეფიშ ნათუა“. „გინაჯინალ კოშკის“ მოჸუნაფილ დო ენწყუმილ რდუ მუსხირენ  მუხლი, მუშენ ოკო გერიცხუკო პიროვნებაქ, ნამუთ ვენანიენდ დო აგრძელენდ სიგარეტიშ შუმას (1 კორ. 5:7; 2 კორ. 7:1). თექ ჭარუდ: „თენა ვა რე ჩქინ დოდგინელ დოგმა. სინამდვილეს თეშნერ მკაცრი მერინა ღორონთშე მოურს, ნამუთ მუშ აზრის მუშ სიტყვაშ საშვალებათ გიმოხანტუნს“. ქანდუნანო შხვა რელიგიურ ორგანიზაციეფ ღორონთიშ სიტყვას ბოლოშა, მუჟამსით თინეფიშ ნამთინე მიმაჸუნალს უჭირს თეშ კეთება? ბოლო დროს გიშაშკუმალირ ართ-ართ წიგნის, ნამუთ ოხუდ რელიგიაშ გავლენას შეერთებულ შტატებს, ჭარუდ: „საზოგადოებაშ დო მუნეფიშ მიმაჸუნალეფიშ გურ მიგანინ თიშენ, ქრისტიანულ ეკლესიეფიშ უნჩაშეფ ირიათო ოცადუნა ეკლესიურ გურაფეფ თინეფიშ აზრის ქუდუხუჯუან“. ხემძღვანელ საბჭო საკითხეფიშ გინოჭყვიდუაშ დროს საზოგადოებას გავრცელებულ აზრიშ მანგიორო, ღორონთიშ სიტყვას გიმირინუანს დო თავრეშე იძირე, ნამდა სინამდვილეს ღორონთი ხემძღვანელენს ამდღა მუშ ხალხის.

16. მუჭო შემლებუნა ფშუდან ხემძღვანელ საბჭო?

¹⁶ წეკითხით ებრაელეფიშ 13:7. სიტყვაქ „ქორშუდან“ შილებე „მოშინაფათ“ ხოლო ითარგმნას. ართ-ართ საშვალება, ფშუდან თინეფ, მიდგას ხემძღვანელობა ოვალუნ, თინა რე, ნამდა ჩქინ ლოცვეფს ქიმიფშინუათ ხემძღვანელ საბჭო (ეფეს. 6:18). დეფიფქრათ თინეფიშ პასუხიშმგებლობეფშენ მუნერით რე, სულიერ საზრდოთ მომარაგება, მსოფლიო ქადაქებაშ ორგანიზება დო შემოწირულ თანხეფიშ მინჯობუა. მუშო ოკო რაგად, საჭირო რე, ირიათო იბლოცათ თინეფშო.

17, 18. ა) მუჭო ფთანამშრომლენთ ხემძღვანელ საბჭოწკუმა? ბ) მუჭო ვოხვარუთ ქადაქებათ ართგურ მონას დო იესოს?

¹⁷ ხემძღვანელ საბჭო ფშუნან თის ხვალე სიტყვეფით ვარინ, თინეფწკუმა თანამშრომლობათ ხოლო გიმობხანტუნთ. ხემძღვანელ საბჭო მითითებეფს მარზენა პუბლიკაციეფიშ, კრებაშ შეხვალამეფიშ დო კონგრესეფიშ საშვალებათ. თეშ გარდა, ხემძღვანელ საბჭო ანიშნენს რაიონულ ზედამხედველეფს დო თინეფ — უხუცესეფს. რაიონულ ზედამხედველეფ დო უხუცესეფ ხემძღვანელ საბჭოშ მითითებეფიშ კილკილშა მეჸუნათ ოძირანა, ნამდა ვეჭყოლიდუანა თინეფს. ჩქი არძა პატის ფცენთ ჩქინ ხემძღვანელს, იესოს, მუჟამსით ვომორჩილუთ თი ქომოლკათას, მიდგასით თინა გიმირინუანს ჩქინ ხემძღვანელეფო (ებრ. 13:17).

¹⁸ ხოლო ართ საშვალება, ფშუდან ხემძღვანელ საბჭო თინა რე, ნამდა მონდომებულო ვასრულათ ქადაქებაშ საქმე. პავლე მოუწოდენდ ქრისტიანეფს, მიაჸუნესკო თინეფიშ რწმენას, მიდგას ხემძღვანელობა ოვალუდ. ართგურ მონა სამეფოშ გურშენ სახიოლო ამბეშ გურგედვალირო ქადაქებათ დო ხეშ შენწყუალათ რწმენაშ ჯგირ მაგალითის მარზენა. თქვა ხოლო რეთო შხვა შხურეფ შქას, მით ცხებულეფს ელურენა სიცოცხლეშო მნიშვნელოვან საქმეშ კეთებას? მუ ბედნერეფ იპჸით, მუჟამსით ჩქინ ხემძღვანელ, იესო თქუანს: „მუთ ჩქიმ უკლაშ ჯიმალეფშე ართ-ართის უკეთით თინა, მა მიკეთით“ (მათ. 25:34—40).

19. მუშენ გაფუნა გინოჭყვიდილ ჩქინ ხემძღვანელიშ, იესოშ მეჸუნა?

¹⁹ ზეცაშა დორთაშ უკულ, იესოს ვემუტებ მუშ მიმაჸუნალეფ (მათ. 28:20). დედამიწას რდუნ თიმწკუმა, იესოქ მუშ დუდშა გეგმოცად, მუჭო ოხვარუდ ხემძღვანელობას წმინდა შური, ანგელოზეფი დო ღორონთიშ სიტყვა. ამდღა იესო ართგურ მონას ოხვარ თე საშვალებეფით. თე მონაშ წევრეფი, მუჭოთ ცხებულ ქრისტიანეფ, „მეჸუნა კირიბის, სოდგა ვედასინ“ (გამოცხ. 14:4). თინეფიშ ხემძღვანელობაშ მეჸუნათ, ჩქინ ხემძღვანელს, იესოს მეპჸუნთ. მალას თინა მარადიულ სიცოცხლეშა ქიმემჸონანა (გამოცხ. 7:14—17). ნამთინ კოჩის ვეშულებ თეცალ პირობაშ მოჩამა!