Mulandu nshi cishingabela bwino ukutontonkanya muli uyu musango? Ilyo umwana wa kwa munyinefwe umo ayipeye, munyinefwe aipwishe ati: ‘Bushe Yehova alishibile libela ukuti ine no mwina mwandi tukashipikisha umwana wesu nga aipaya? Bushe icalengele ukuti ici cicitike ni co Lesa alishibe ukutila kuti twashipikisha?’ Bushe kwaliba icingalenga twasumina ukuti kwaliba ifyo Yehova acita pa kuti ifintu fimo filetucitikila?

Ukusambililapo na fimbi pa mashiwi Paulo alandile ayaba pali 1 Abena Korinti 10:13, kwalengele twasondwelele ukuti: Baibolo tayalanda nangu cimo icingalenga twasumina ukuti Yehova aleshibila libela amafya twingashipikisha, pa numa nga aishiba e lyo asala ubwesho ubo tulingele ukukwata. Cinshi twalandila ifi? Natulande pa fishinka fine.

Icishinka ca kubalilapo, Yehova alipeela abantu ubuntungwa bwa kuisalila ifya kucita. Afwaya tuleisalila fwe bene ifya kucita. (Amala. 30:19, 20; Yosh. 24:15) Nga twasalapo ukulacita ifisuma, kuti twalomba Yehova ukuti aletungulula intampulo shesu. (Amapi. 16:9) Nomba nga twasalapo ukucita ifyabipa, ifingafumamo kuti fyalenga twalacula. (Gal. 6:7) Yehova nga alatusalila amesho tulingile ukukwata, bushe ninshi tatwikala pa nsambu twakwata isha kuisalila ifya kucita?

Icishinka ca bubili, Yehova tatucingilila ku “inshita ya macushi ne nshita ya fintu fyabula ukwenekela.” (Luk. Mil. 9:11) Amasanso kuti yatucitikila pa mulandu wa kuba pa cifulo apalecitika ubusanso pa nshita iyo ine bwacitika. Yesu alilandile pa busanso ubwacitike umo abantu 18 bafwile ilyo ulupungu lwabawiliile, kabili atile Lesa te walengele bulya ubusanso ukucitika. (Luka 13:1-5) Bushe kuti caba fye bwino ukutontonkanya ukuti Lesa alapangila libela abantu abali no kupusuka e lyo na bali no kufwa mu masanso ayacitika ukwabula ukwenekela?

Icishinka calenga butatu, umulandu Satana aimya uwabukaele walitukuma fye bonse. Mufwile mulebukisha ukuti Satana alatwishika ababomfi bonse aba kwa Yehova nga kuti batwalilila aba cishinka, atila te kuti tutwalilile ukuba aba cishinka kuli Yehova nga tuleeshiwa. (Yobo 1:9-11; 2:4; Ukus. 12:10) Nga ca kuti Yehova alatucingilila ku mesho yamo  pa mulandu wa kuti alamona ukuti te kuti tushipikishe ayo mesho, bushe ico te kuti cimoneke kwati ifyo Satana alanda fya cine ukuti ico tubombela Lesa ni co alatucitilapo fimo?

Icishinka calenga bune, Yehova alasalapo ukukanaishibila libela fyonse ifitucitikila. Ukulanda ukuti Lesa alasalila libela amesho tukakwata calola mu kuti alishibila libela fyonse fye ifikatucitikila ku ntanshi. Lelo ifi te fyo Amalembo yalanda. Lesa nga alefwaya kuti aishiba fyonse ifikacitika ku ntanshi. (Esa. 46:10) Lelo Baibolo itulanga ukuti alasala ifyo alefwaya ukwishibila libela. (Ukute. 18:20, 21; 22:12) Yehova tabomfya bubi bubi amaka akwata ayakwishibila libela ifikacitika ica kuti atwikala na pa buntungwa twakwata ubwa kuisalila ifya kucita. Bushe ifi te fyo twingenekela Lesa ukucita uwacindika ubuntungwa atupeela kabili uucita ifintu ukulingana ne mibele yakwe?—Amala. 32:4; 2 Kor. 3:17.

Nomba ni mwi Paulo aloseshe ilyo atile: “Lesa . . . takamuleke ukweshiwa ubwesho ubo mushingashipikisha”? Pano Paulo alelanda ifyo Yehova acita nga twakwata ubwesho, talelanda pa fyo acita ilyo tushilakwata ubwesho. Amashiwi Paulo alandile yalenga twacetekela ukuti te mulandu na mesho twingakwata, Yehova akatukosha nga twamucetekela. (Amalu. 55:22) Kwaliba ifishinka fibili ifyacindama ifyalengele ukuti Paulo alande aya mashiwi ayakukoselesha.

Ica kubalilapo, amesho tukwata mesho ‘ayaponenako na bantu bambi.’ Amesho tukwata mesho ayo na bantu bambi bakwatako. Nga twashintilila pali Lesa te kuti tufilwe ukushipikisha amesho ya musango uyu. (1 Pet. 5:8, 9) Ilyo Paulo ashilalanda amashiwi ayaba mu cikomo 13 ice lembo lya 1 Abena Korinti icipandwa 10, abalilepo ukulanda pa mesho ayo abena Israele bakwete ilyo bali mu matololo. (1 Kor. 10:6-11) Amesho yonse ayo bakwete, mesho ayo abantu bakwata kabili mesho ayo abena Israele abali ne cishinka bashipikishe. Pa miku ine Paulo alandile amashiwi ya kuti “bamo pali aba” tabaumfwilile Lesa. Ku ca bulanda, abena Israele bamo balikonkelele ulunkumbwa lwa kucita ifyabipa pantu tabashintilile pali Lesa.

Ica bubili, “Lesa wa cishinka.” Ifyo Baibolo yalandapo pa fyo Lesa acitila abantu bakwe filanga ukuti wa cikuuku “ku bamutemwa na basunga amafunde yakwe.” (Amala. 7:9) Ifi Baibolo yalanda filanga no kuti Lesa lyonse alafikilisha ifyo alaya. (Yosh. 23:14) Twamona ukuti Lesa wa cishinka, kanshi ababomfi bakwe abamutemwa kabili abomfwila ifyo alanda kuti bacetekela ukuti nga bakwata amesho, Lesa akafikilisha ifintu fibili ifyo alaya: (1) Takaleke ubwesho bukakule sana ica kuti bakafilwe ukushipikisha, na (2) ‘akafwaya na pa kuti bakafuminemo.’

Bushe Yehova afwaya shani apa kuti abashintilila pali ena bafuminemo mu mesho bakwete? Ukwabula no kutwishika kuti afumyapo ubwesho. Lelo ibukisheni amashiwi ayo Paulo alandile aya kuti: “[Yehova] akafwaya na pa kuti mufuminemo pa kuti mube na maka ya kubushipikisha.” Kanshi ilingi line ‘alafwaya na pa kuti tufuminemo’ nga atupeela ifyo tulekabila pa kuti tushipikishe amesho. Natulande pa nshila shimo isho Yehova abomfya.

• Yehova ‘alatusansamusha mu macushi yesu yonse.’ (2 Kor. 1:3, 4) Yehova abomfya Icebo cakwe, umupashi wa mushilo, ne fya kulya fya ku mupashi ifyo umusha wa cishinka atupeela pa kutusansamusha.—Mat. 24:45; Yoh. 14:16; Rom. 15:4.

• Alabomfya umupashi wa mushilo ku kututungulula. (Yoh. 14:26) Nga twakwata amesho, umupashi wa mushilo kuti watwafwa ukwibukisha amalyashi ya mu Baibolo na mafunde, lyena kuti twaishiba ifyo tulingile ukucita pa bwafya tukwete.

• Alabomfya bamalaika ku kutwafwa.—Heb. 1:14.

• Alabomfya aba bwananyina pa kutwafwa, ifyo bengalanda ne fyo bengacita kuti fyatukoselesha.—Kol. 4:11.

Ukulingana ne fyo twalandapo, ni mwi mwalola amashiwi Paulo alandile ayaba pali 1 Abena Korinti 10:13? Yehova tasala amesho ayo tulingile ukukwata. Lelo nga twakwata amesho tuleibukisha ukuti: Nga twacetekela sana Yehova, takaleke amesho tukwete yakakule ica kuti twafilwa no kushipikisha; lyonse fye akafwaya apa kuti tufuminemo muli ayo mesho pa kuti tube na maka ya kushipikisha. Ala ukwishiba ifi kwatukoselesha icine cine!