Mfasan ôte ô ne bo na bi simesan aya? Mone mojañ éziñ a nga wôé émien, ane mojañ ate a nga sili na: ‘Ye Yéhôva a nga taté yen na, bia minga wom bi ne jibi awu mone wongan? Ye mone wongan a nga wôé émien, amu Zambe a nga tyi’i na, bia minga wom bi ne jibi meve’ele mete?’ Ye é ne mvo’é ya simesane na, Zambe nnye a bo na bi tôban avale nju’u éziñ?

Éyoñe bia tu’a fase mejô me Paul bia koon e kalate 1 Becorinthien 10:13, bia yene na: Teke éfus éziñe ya Kalate Zambe ja liti na, Yéhôva a yen mam bi ne jibi, éyoñ ete a tobe meve’ele bia ye tôbane me. Bi tame yen beamu benyin ba volô bia na bi jô nalé.

Amu ôsu a ne na, Yéhôva a nga ve mona môt ase fili ya top. A nga yi na môt ase a tobe zen a ye tôñ. (Dt. 30:19, 20; Jos. 24:15) Nge bia tobe mbamba zen, bia ye jô’é Yéhôva a wulu bia. (Min. 16:9) Ve nge bia tobe mbia zen, bia ye kôane bibuma ya mimboane miangan. (Beg. 6:7) Nge Yéhôva nnye a tobe minju’u bia ye tôbane mie, ye nalé a tinane ke na, bi nji bo fili ya top?

Amu baa a ne na, Yéhôva a nji kamane na “éyoñ a ndôba’ane” bi kui bia. (Ec. 9:11) Mbia jam a ne kui bia atemetem, amu bi tele mbia vôme mbia éyoñ, nalé a ne bo bia nlem mintaé abui. Yésus a nga kobô ajô ébubua jam é nga wôé bôt 18, éyoñe nda mekok é nga ku be yôp, a nga liti na éyoñ avale mbia jam ete da kui, a nji bo nkômbane Zambe. (Lc. 13:1-5) Nde ye ô lôô ke na, e nji bo mvo’é ya simesane na, éyoñ mbia jam a kui, Yéhôva nnye a tobe môt a ye nyiñ, a nyô a ye wu?

Amu lale a ne na, môt ase ya be bia, a yiane liti na, mame Satan a nga kate Ève afub Éden me mbe minsos. Te vuane na Satan a nga jô na, môt ase a bo Yéhôva ésaé, a ye lume nye mvus nge a tebe minju’u été. (Jb. 1:9-11; 2:4; Nli. 12:10) Nge Yéhôva a kamane na bi tôbane minju’u miziñ, amu a simesane na bi vo’o mie jibi, ye nalé a nji liti na, Satan a nga bele éyoñ a nga jô na, bia bo Yéhôva ésaé amu bia sôñe jôm éziñ?

 Amu nyini a ne na, Yéhôva a nji kômbô yem mame mese bia ye tôbane me ényiñe jangan ôsusua na ma boban. Nge bia jô na, Yéhôva a yen minju’u bia ye tôbane mie ôsusua na mia kui, nalé a tinane na a jeñ na a yem mame mese ma ye boban ényiñe jangan melu ma zu. Ve Mejô me Zambe me nji ye’ele nalé. Zambe a bili ngule ya yen mam ma ye boban. (És. 46:10) Ve kalate Zambe a ye’ele bia na a tobe mam a jeñ na a yem. (Met. 18:20, 21; 22:12) A nji belane ngule jé ya yem mam ma ye boban a lôte nné, amu a yem na mona môt a ne fili ya top. Ye e nji bo été na, bia nye’e éyoñ Zambe a semé éto fili jangan, amu a yeme belane ngule jé ya yen mam ma ye boban?​—Dt. 32:4; 2 Bec. 3:17.

Nde ñhe, bifia bi Paul bi bia tinan aya: “Zambe . . . a ye bo te me’ete na, mi yene meve’ele me adañe ma mi ne ngule ya jibi”? Paul a nji kate jam Yéhôva a bo ôsusua na bia tôbane meve’ele, ve jam a bo éyoñ bi ntele meve’ele été. * Paul a kate bia na, nge bi too ndi a Yéhôva, a ye su’u bia, ja’a bia tôbane avale meve’ele avé. (Bs. 55:22) Ngaka’a Paul nyi é tii e benya miñye’elan mibaé ya Kalate Zambe.

Ñye’elan ôsu, avale minju’u ete da kui be bôte bese ya si nyô. Bôte befe ba tôbane fe minjuk ane bia. Bi vo’o ke kate jibi minju’u bia tôbane mie, nge bia tabe Yéhôva mebun. (1 P. 5:8, 9) Paul a mbe a kobô’ô ajô minju’u bone b’Israël be nga tôbane mie éyoñe be mbe nkôte si. (1 Bec. 10:6-11) Minju’u mite mise mi nji be avale mona môt a ne kate jibi, nge ke avale môt a wulu a Yéhôva a ne kate jibi. Ve mbia jam a ne na, bôte béziñe y’ayoñ Israël be nga jô’é mbia minkômbane miap mi tindi be na, be bo teke futi ndi nleme jap be Yéhôva.

Ñye’elan baa, Zambe a yeme ba’ale élat. Nkañete ya ényiñe bone b’Israël wo liti na, Yéhôva a liti nye’ane wé ô ne mban be bôt “b’anye’e nye, a ba’ale metiñe mé.” (Dt. 7:9) Nkañete ôte wo liti fe na, Yéhova a tôé bengaka’a bé bese. (Jos. 23:14) Éyoñe bôte ba nye’e nye, a bo nye mewôk, ba fase mimboone mié ya melu mvus mite, nge ba tôbane minjuk, be ne ngule ya buni bengaka’a bebaé ba: (1) A vo’o ke jô’é minju’u miap mi nen akekui abime be se ngule ya jibi, a na(2) “a ye . . . kôme zen ya va [be] été.”

Aval avé Yéhôva a kôme zen ya va bôte be too nye mebun e minju’u été? Nya ajôô a ne na, nge a kômbô, a ne vaa minju’u bia tôbane mie. Ve te vuane mejô me Paul ma: “[Yéhôva] a ye fe kôme zen ya va me été, nde mi aye bo ngule ya jibi mie.” Jôm éte nje, éyoñe bi tele minju’u été, Yéhôva a wô’ô dañe “kôme zen,” éyoñ a ve bia mame mese me ne volô bia na, bi jibi minjuk, a dañe mie. Bi tame yene mezen méziñ a belane me asu ya na, a kôme bia zen:

• A “volô bia minlem nju’u wongan ôse été.” (2 Bec. 1:3, 4) Yéhôva a ne belane Mejô mé, mbamba nsisime wé, a bidi ya nsisim a ve bia a zene ya ôlo ô ne mewôk a fek, asu ya na, a volô bia minlem; a na, bi bo teke dañe tyelé minleme miangane yôp.​—Mt. 24:45; Jn. 14:16, Bero. 15:4.

• A ne belane mbamba nsisime na a liti bia zen. (Jn. 14:26) Éyoñe bia tebe minju’u été, mbamba nsisim a volô bia na bi simesane minlañ, a miñye’elane ya Kalate Zambe mi ne liti bia jam bia yiane bo.

• A ne su’u bia a zene ya beéngele bé asu mfi wongan.​—Beh. 1:14.

• A ne volô bia a zene ya bobejañe ya mbunan, mbe be ne belane mbamba bifiaé a mimboone miap. Nalé a ne ‘volô bia minlem’ a ve bia ngule nyul.​—Beco. 4:11.

Nde ñhe, bi ne jô na bifia bi Paul ya kalate 1 Becorinthien 10:13 bia tinan aya? Yéhôva a taté ke yen, a tobe minju’u bia ye tôbane mie. Ve éyoñe bi tele minju’u été, bi ne tabe ndi na: Nge bia tabe nye mebun, Yéhôva a vo’o ke jô’é na minju’u miangan mi nen abime mona môt a nji bo ngule ya jibi; a ye kôme zen asu ya na bi bo ngule ya jibi mie. Ye ôsimesan ôte ô nji ve bia ngule nyôl?