N’o ye tiɲɛn ye, miiri ka filɛ o be se ka nɔɔ min to an ka ɲɛnamaya kan. Balimacɛ dɔ dencɛ y’a yɛrɛ faga minkɛ, a y’a yɛrɛ ɲininga ko: “Yala Jehova kɔnna k’a filɛ koo minw bena kɛ an ka ɲɛnamaya kɔnɔ wa? Yala Ala y’a latigɛ ko ne ni n’ muso bena se ka an dencɛ ka saya muɲu wa?” Yala a bɛnnin lo an k’a miiri ko koo o koo b’an sɔrɔ Jehova lo b’o latigɛ wa?

N’an ye ciden Pol ka kumaw sɛgɛsɛgɛ koɲuman 1 Korɛntikaw 10:13 kɔnɔ, an b’a faamu ko: Foyi t’a yira Bibulu kɔnɔ ko Jehova be kɔn k’a filɛ an be se ka kɔrɔbɔli minw muɲu k’a sɔrɔ k’a latigɛ kɔrɔbɔli minw bena an sɔrɔ. An ka koo naani lajɛ minw b’o yira.

A fɔlɔ, Jehova ye see di adamadenw ma ka koow latigɛ u yɛrɛ ma. A b’a fɛ an k’an ka ɲɛnamaya kɛcogo latigɛ an yɛrɛ ma (Deter. 30:19, 20; Zozuwe 24:15). N’an y’a latigɛ ka ɲɛnamaya kɛ cogo ɲuman na, an be se ka la a la ko Jehova bena an ɲɛminɛ (Talenw 16:9, ABM). Nka, n’an y’a latigɛ ka ɲɛnamaya kɛ cogo dɔ la min man ɲi, an bena gwɛlɛya caaman sɔrɔ (Gal. 6:7). Ni Jehova tun b’a latigɛ kɔrɔbɔli minw bena an sɔrɔ, yala an be se k’a fɔ ko see b’an ye tiɲɛn na ka koow latigɛ an yɛrɛ ma wa?

A filanan, Jehova t’an tanga ‘barinankow’ ma (Waaj. 9:11). Kasaraw be se k’an sɔrɔ sabu an be yɔrɔ min na ani wagati min na, o man ɲi. O kasara yɛrɛ be se ka tɔɔrɔ lase an ma. Sangaso tun benna mɔgɔ tan ni seegi dɔw kan k’u faga. Yezu kumana u koo la k’a ɲɛfɔ k’o gwɛrɛgwɛrɛko tɛ Ala sago ye (Luka 13:1-5). Yala a bɛnnin lo an k’a miiri ko sanni kasara dɔ ka kɛ, Ala be kɔn k’a latigɛ jɔn lo bena to niin na ani jɔn lo bena sa wa?

A sabanan, an kelen kelen bɛɛ ka ɲi ka to kantigiya la. Kana ɲinɛ ko Sutana ye Jehova sagokɛlaw bɛɛ ka kantigiya sɔsɔ. A y’a fɔ ko an tɛna to ka kantigiya kɛ Jehova ye ni tɔɔrɔ b’an kan (Zɔbu 1:9-11; 2:4; Yir. 12:10). Sutana ko an be Jehova batora an yɛrɛ nafa dɔrɔn lo kosɔn. Ni  Jehova tun b’an kisi tɔɔrɔ dɔw ma sabu a b’a jati ko an tɛ se k’o muɲu, o tun bena joo di Sutana ma.

A naaninan, Jehova t’a ɲini ka koo bɛɛ lɔn sanni u k’an sɔrɔ. Gwɛlɛya minw bena an sɔrɔ, ni Jehova tun be kɔn k’u sugandi, o kɔrɔ ko koo minw bɛɛ bena an sɔrɔ an ka ɲɛnamaya kɔnɔ, a b’u bɛɛ kala ma. Nka Bibulu t’o lo fɔ. Tiɲɛn lo ko see be Ala ye ka koo nataw bɛɛ lɔn, siga si t’o la (Ezayi 46:10). Nka Bibulu b’a yira ko a t’a ɲini ka koo nataw bɛɛ lɔn (Zɛnɛzi 18:20, 21; 22:12). See min be Jehova ye ka koo nataw bɛɛ lɔn, a be baara kɛ n’o ye k’a dama kɛɲɛ. A b’o kɛ walisa an ka se ka koow latigɛ an yɛrɛ ma. Yala o t’a yira ko see min b’an ye ka koow latigɛ an yɛrɛ ma, Ala be bonya la o kan ani ko a b’a ka setigiya kɛ k’a dama kɛɲɛ cogo dafanin na wa?—Deter. 32:4; 2 Kor. 3:17.

Pol y’a fɔ ko: “Ala . . . tena sɔn aw ka kɔrɔbɔ fɔɔ ka taga tɛmɛ aw barika danyɔrɔ kan.” O kumaw kɔrɔ ko di? Jehova be min kɛ ka kɔn gwɛlɛyaw ɲɛ, Pol tun tɛ kumana o koo le la. Nka, Jehova be min kɛ gwɛlɛyaw wagati la Pol tun b’o lo yirala. Ciden Pol ka kumaw b’an hakili sigi ko n’an y’an jigi la Jehova kan, gwɛlɛya o gwɛlɛya mana an sɔrɔ an ka ɲɛnamaya kɔnɔ, Jehova bena an dɛmɛ (Zab. 55:23). Pol ka dususalo kumaw basiginin be dalilu fila lo kan.

A fɔlɔ, kɔrɔbɔli minw b’an kan o “ɲɔgɔn delila ka adamaden sɔrɔ.” Kɔrɔbɔli o kɔrɔbɔli b’an kan, o ɲɔgɔn delila ka mɔgɔ dɔ sɔrɔ. Komi an be Sutana ka duniɲa kɔnɔ, an bɛɛ bena gwɛlɛyaw sɔrɔ, n’a sɔrɔ kasaraw yɛrɛ. Nka, n’an y’an jigi la Jehova kan, an bena se k’o gwɛlɛyaw muɲu ani ka to kantigiya la (1 Piyɛri 5:8, 9). Korɛntikaw fɔlɔ, sapitiri 10nan daminɛ na, Pol kumana Israɛldenw ka kɔrɔbɔli dɔw koo la tuma min na u tun be kongokolon kɔnɔ (1 Kor. 10:6-11). O kɔrɔbɔliw ɲɔgɔn tun delila ka adamadenw sɔrɔ ani Israɛlden kantigiw tun be se k’u muɲu. Minw y’u jigi la Jehova kan, u sera k’u muɲu. Nka, Israɛlden dɔw ma mɛnni kɛ Jehova fɛ. U ma to kantigiya la sabu u m’u jigi la Jehova kan.

A filanan, “Ala ye kantigi ye.” A ye min kɛ a sagokɛlaw ye, o b’a yira ko “a koo ka di mɔgɔ minw ye n’u b’a ka kuma bato,” a be kanuya kantigiman kɛ olu ye (Deter. 7:9). O fana b’a yira ko Ala b’a ka layiduw dafa tuma bɛɛ (Zozuwe 23:14). O daliluw b’a yira ko minw be Ala kanu ani u be mɛnni kɛ a fɛ, olu ka la a la ko a bena a ka layidu fila nunu dafa ni kɔrɔbɔli b’u kan: 1) A tɛna a to kɔrɔbɔli si ka juguya fɔɔ u tɛ se k’a muɲu, 2) ‘a bena bɔyɔrɔ di u ma.’

Minw b’u jigi la Jehova kan kɔrɔbɔli tuma na, a be bɔyɔrɔ d’u ma cogo di? Tiɲɛn lo ko n’a bɛnnin be Ala sago ma, a be se k’o kɔrɔbɔli bɔ an kan. Nka, i hakili to Pol ka kuma nunu na: “A [Jehova] bena bɔyɔrɔ d’aw ma ani ka barika don aw la ka se k’o muɲu.” A bena ‘bɔyɔrɔ d’an ma’ cogo di? An mako be min na walisa ka kɔrɔbɔliw muɲu, a bena o d’an ma. Jehova be bɔyɔrɔ di an ma cogo minw na, an k’o dɔw lajɛ:

• “Ale lo b’an jigi tugu an ka tɔɔrɔ bɛɛ la.” (2 Kor. 1:3, 4). Jehova be se k’an hakili sigi ani k’an dusukun lafiya. A b’o kɛ a ka Kuma, a ka hakili senu, ani jɔncɛ kantigiman ka gafew sababu fɛ.—Mat. 24:45; Zan 14:16; Ɔrɔm. 15:4.

• Ala be se k’an ɲɛminɛ fana a ka hakili senu sababu fɛ (Zan 14:26). Ni kɔrɔbɔliw b’an kan, hakili senu be se k’an dɛmɛ k’an hakili jigi Bibulu ka maana ni sariyakolo dɔw la. O cogo la, an bena se ka desizɔn ɲumanw ta.

• A be se ka tɛmɛ a ka mɛlɛkɛw fɛ k’an dɛmɛ.—Eburuw 1:14.

• A be se ka tɛmɛ an kerecɛnɲɔgɔnw fɛ k’an dɛmɛ. U ka kumaw ani u ka kɛwalew be se k’an ‘jigi tugu.’—Kɔlɔs. 4:11.

Pol ye min fɔ 1 Korɛntikaw 10:13 kɔnɔ, an ye mun lo faamu o koo la? An y’a faamu ko Jehova lo t’a latigɛ kɔrɔbɔli minw ka ɲi k’an sɔrɔ. Nka ni kɔrɔbɔliw y’an sɔrɔ, an ka la a la ko: N’an y’an jigi la Jehova kan, a tɛna a to an ka tɔɔrɔ fɔɔ k’a dama tɛmɛ. A bena bɔyɔrɔ di an ma tuma bɛɛ walisa an ka se k’o muɲu. O ye dususalo kuma ye dɛ!