Medewehla imwilahn dahme ekei medewehki peideko. Karasepe, emen brother me nah pwutako pein kemehla ih idek: ‘Ia duwe, Siohwa ketin kasawiher mwowe me ngehi oh ei pwoudo pahn kak dadaurete pahn kahpwalo me nait pwutako wiahda? Kahpwal wet wiawi pwehki Koht ketin koasoanehdier me se kak powehdi?’ Mie kahrepe mwahu en kamehlele me Siohwa kin ketin kamwakid de wekidala irair en atail mour ni ahl me pisetik duwehte met?

Atail tehk dahme Pohl koasoia nan 1 Korint 10:13 pahn sewese kitail en wehwehki met. Sohte mehn kadehde nan Paipel pwe kitail en kamehlele me Siohwa kin ketin kasawih mwowe dahme kitail kakohng oh eri ketin pilada mehnia kasongosong me kitail pahn lelohng poahsoankihda dahme e ketin kasawiher. Kitail pahn tehkpene kahrepe pahieu ong dahme kahrehda kitail kak ndahki met.

Keieu, Siohwa ketikihong aramas akan saledek en wiahda pilipil. E kupwurki kitail en pilada dahme kitail en wia nan atail mour. (Deud. 30:19, 20; Sos. 24:15) Ma kitail pilada ahl me pwung, kitail kak kilangwohng Siohwa en ketin kaweid kitail. (Lep. Pad. 16:9) Ahpw ma kitail pilada ahl me sapwung, kitail pahn lelohng imwila suwed. (Kal. 6:7) Ma Siohwa pahn ketin pilada mehnia kahpwal me pahn lelohng kitail, e sou pahn ketin katikala atail saledek en wiahda pilipil me e ketikihong kitail?

Keriau, Siohwa sohte kin ketin pere kitail sang “paisuwed” me kin lelohng kitail koaros. (Ekl. 9:11) Aksident laud kan, ele me kin inenen imwila suwed, kak pwarada pwehki kitail mihmi wasa ehu me kahpwal ehu kitail sohte kasik wiawi. Sises mahsanih duwen kahpwal ehu me wiawihong aramas 18 me mehla ni wasahn iroir ehu eh pwupwudiong pohrail. E ketin kasalehda me kahpwal pwukat kaidehn kupwuren Koht. (Luk 13:1-5) E sou pahn sapwung en medewe me Koht pahn ketin koasoanehdi mwowe ihs me pahn mour oh mehla pwehki mwekid ehu me wiawi ni soh kasikpe?

Kesiluh, emenemen kitail anahne kolokol atail lelepek ong Siohwa. Taman me Sehdan peidengki lelepek en irail kan me kin papah Siohwa oh kose me kitail sohte  pahn kolokol atail loalopwoatohng Siohwa ni atail kin lelohng kasongosong kan. (Sohp 1:9-11; 2:4; Kaud. 12:10) Ma Siohwa ketin pere kitail sang ekei kasongosong kan pwehki e ketin medewe me kitail sohte kakohng, met sou pahn kalaudehla ahn Sehdan karaun likamw me dene kitail kin papah Koht pwehki pein atail ineng en roporop?

Kapahieu, Siohwa sohte anahne mwahngih soahng koaros me kin wiawiong kitail mwohn ar wiawi. Madamadauo me dene Koht ketin piladahier mwowe mehnia kasongosong me kitail pahn lelohng kin kasalehda me e mwahngiher soahng koaros duwen dahme pahn wiawiong kitail ahnsou kohkohdo. Ahpw soangen madamadau wet sohte kohsang nan Paipel. Koht uhdahn kak ketin mwahngih dahme pahn wiawi ni ahnsou kohkohdo. (Ais. 46:10) Ahpw Paipel kasalehda me e sohte kin ketin pilada en mwahngih soahng koaros me pahn wiawi mwohn ar wiawi. (Sen. 18:20, 21; 22:12) Ni toupahrek, e ketin kasalehda me e sapwellimanki manaman en mwahngih dahme pahn wiawi mwowe oh pil wauneki atail saledek en wiahda pilipil. Kaidehn ih met me kitail pahn kasik sang Koht men me kin ketin kesempwalki atail saledek oh ahnsou koaros doadoahngki sapwellime irair kaselel kan ni toupahrek?​—Deud. 32:4; 2 Kor. 3:17.

Eri ia duwen atail kak wehwehki dahme Pohl koasoia ni eh nda: “Koht . . . sohte pahn ketin mweidohng kumwail en ale songosong me kumwail sohte kak powehdi”? Wasaht Pohl kawehwehda dahme Siohwa kin ketin wia, kaidehn mwohn, ahpw erein kasongosong kan kin wiawi. Dahme wahnpoarono koasoia kin kamehlelehiong kitail me sohte lipilipil soangen kasongosong dah me kin lelohng kitail nan atail mour, Siohwa pahn ketin sewese kitail ma kitail likih ih. (Mel. 55:22) Dahme Pohl nda kin poahsoankihda ire mehlel riau.

Keieu, kasongosong kan me kitail ahneki “kin lelohng aramas koaros.” Eri atail kasongosong kan pil kin wiawihong koaros. Kitail kak powehdi kasongosong pwukat ma kitail koapworopworki Koht. (1 Pit. 5:8, 9) Nan iretikitik kan mwohn 1 Korint 10:13, Pohl koasoia duwen kasongosong kan me mehn Israel ko lelohng nan sapwtehno. (1 Kor. 10:6-11) Irail kan me kin koapworopworki Siohwa kak dadaur pahn kahpwal ko. Ahpw ekei mehn Israel ko sapeikiong Siohwa. Re sohte kolokol arail loalopwoat pwehki re sohte koapworopworki ih.

Keriau, “Koht me uhdahn mehlel.” Mehn kadehde kan duwen sapwellimen Koht wiewia ong sapwellime aramas akan kasalehda me e kin ketin kasalehiong sapwellime limpoak poatopoat ong me “poakohng ih oh kapwaiada sapwellime mahsen kan.” (Deud. 7:9) Mehn kadehde wet pil kasalehda me Koht kin ketin ahnsou koaros kapwaiada sapwellime inou kan. (Sos. 23:14) Pwehki eh kin ketin kasalehda lelepek mahso, irail kan me poakohng oh peikiong ih kak likih me e pahn ketin kapwaiada sapwellime inou riau pwukat me pid kasongosong kan me re ele pahn lelohng: (1) E sohte pahn ketin mweidohng kasongosong sohte lipilipil en nohn laudla me pahn kahrehiong irail en sohte kak powehdi, oh (2) ‘e pahn ketikihong irail kehlail.’

Ia duwen Siohwa eh kin ketikihda kehlail ong irail kan me kin likih ih ni arail lelohng kasongosong kan? Ni mehlel, ma e ketin kupwurki, e pahn ketikihsang kasongosong kan. Ahpw taman dahme Pohl koasoia: “E [Siohwa] pahn ketikihong kumwail kehlail pwe kumwail en kak dadaur oh pitsang nan songosongo.” Eri pak tohto, e kin ‘ketikihong kitail kehlail’ sang ni eh kin ketikihda dahme kitail anahne pwe kitail en kak dadaur pahn kasongosong kan oh pweida. Tehk ekei ahl me Siohwa ele kin ketikihong kitail kehlail:

• E kin ketin “sewesei [“kansenamwahwih,” NW] kitail nan atail apwal akan koaros.” (2 Kor. 1:3, 4) Siohwa kak ketin kansenamwahwih de kameleileidi atail madamadau, mohngiongitail, oh atail pepehm kan sang ni eh doadoahngki sapwellime Mahsen, sapwellime manaman, oh padahk mehlel me rasehng kisin tungoal me ladu lelepeko kihda.​—Mad. 24:45; Sohn 14:16; Rom 15:4.

• E kak ketin kaweid kitail ni eh doadoahngki sapwellime manaman. (Sohn 14:26) Ni kasongosong kan ar pwarada, sapwellime manamano kak sewese kitail en tamanda koasoiepen Paipel kan oh kaweid kan oh eri ese ia duwen atail en wiahda kahk kan.

• E kak ketin doadoahngki sapwellime tohnleng kan pwehn sewese kitail.​—Ipru 1:14.

• E kak ketin doadoahngki riatail Kristian kan en sewese kitail. Sang arail lokaia oh wiewia kan, re kak kakehlakahda kitail.​—Kol. 4:11.

Eri dahme kitail kak nda duwen dahme Pohl koasoia nan 1 Korint 10:13? Siohwa sohte kin ketin pilada mehnia kasongosong me kitail pahn lelohng. Ahpw ma kasongosong kan lelohng kitail, kitail kak kamehlele met: Ma kitail uhdahn likih Siohwa, e sohte pahn ketin mweidohng atail kasongosong kan en nohn daulihala dahme aramas akan kak dadaur pah; e pahn ketin ahnsou koaros ketikihong kitail kehlail pwe kitail en kak dadaur pahn kasongosong pwukat. Ia uwen kansenamwahu en ese duwen met!