Luku san a denki disi wani taki. Wan brada en manpikin kiri ensrefi. A brada disi ben aksi: ’A tru taki Yehovah ben kan si kaba taki mi nanga mi wefi ben o man pasa a tesi disi di miti wi, di wi manpikin kiri ensrefi? A sani disi pasa fu di Gado ben bosroiti taki wi ben o man tyari en?’ Wi musu bribi taki Yehovah e tiri iniwan sani di e pasa na ini wi libi?

Te wi e luku moro fini san Paulus skrifi na 1 Korentesma 10:13, dan wi e si disi: Bijbel no e sori taki Yehovah e luku na fesi san wi man tyari èn taki a e bosroiti baka dati sortu tesi o miti wi. Meki wi luku fo sani fu san ede wi kan bribi dati.

A fosi sani, na taki Yehovah gi libisma a grani fu teki den eigi bosroiti. A wani taki wi srefi bosroiti fa wi wani libi (Deut. 30:19, 20; Yos. 24:15). Efu wi e bosroiti fu du bun, dan Yehovah o sori wi a pasi (Odo 16:9). Ma efu wi no e du bun, dan wi o abi fu libi nanga den bakapisi fu dati (Gal. 6:7). Efu Yehovah ben o bosroiti sortu tesi musu miti wi, dan a no ben o gi wi na okasi trutru fu gebroiki a grani di wi abi fu teki wi eigi bosroiti, a no so? Fu taki en leti, a ben o tapu pasi gi wi fu gebroiki a grani disi.

A di fu tu sani, na taki Yehovah no e kibri wi gi ’ogri ten nanga sani di wi no e fruwakti’ (Preik. 9:11). Wan ongoloku kan pasa nanga wi èn kande a sani disi e tyari takru bakapisi kon gi wi. Nofo tron na fu di wi ben de drape meki a sani dati miti wi. Yesus ben taki fu wan rampu pe 18 sma lasi den libi di wan toren fadon na den tapu. A ben taki tu dati a no Gado ben meki a rampu disi pasa (Luk. 13:1-5). Te den sortu sani disi e pasa wantronso, dan yu denki taki Gado ben bosroiti na fesi suma o tan na libi èn suma o dede?

A di fu dri sani, na taki ibriwan fu wi musu sori taki a o tan gi yesi na Gado. Memre taki Satan ben feni taki sma no o tan dini Yehovah te tesi e miti den (Yob 1:9-11; 2:4; Openb. 12:10). Efu  Yehovah ben kibri wi gi tesi fu di a ben feni taki den hebi tumusi gi wi, dan yu no denki taki Satan ben o abi leti fu taki dati wi e dini Gado soso fu di wi e suku wi eigi bun?

A di fu fo sani, na taki Yehovah no feni en fanowdu ala ten fu sabi na fesi sortu sani o miti wi. Efu wi e bribi taki Gado e bosroiti na fesi sortu tesi o miti wi, dan fu taki en leti wi e bribi taki a sabi ala sani di o miti wi na ini a ten di e kon. Ma a denki dati no e kruderi nanga Bijbel. A tru taki Gado man sabi na fesi fa sani o waka na ini a ten di e kon (Yes. 46:10). Ma Bijbel e sori taki en srefi e bosroiti san a wan sabi te a abi fu du nanga a ten di e kon (Gen. 18:20, 21; 22:12). Sobun, aladi a man sabi na fesi fa sani o waka nanga wi, toku a e sori taki a e lespeki a grani di wi abi fu teki wi eigi bosroiti. A no dati wi e fruwakti fu a Gado di e gi wi a grani fu de fri èn di e du san reti ala ten?—Deut. 32:4; 2 Kor. 3:17.

Ma dan fa wi musu frustan a sani disi di Paulus ben taki: ’Gado no o meki unu kisi tesi di hebi moro leki san unu man tyari’? Dyaso Paulus e sori san Yehovah e du te tesi e miti wi, a no bifo tesi e miti wi. Den wortu fu na apostel e gi wi a dyaranti taki awansi sortu tesi e miti wi, Yehovah o horibaka gi wi te wi e frutrow na en tapu (Ps. 55:22). Tu prenspari sani de fu san ede wi kan bribi den moi wortu disi fu Paulus.

A fosiwan, na taki den tesi di e miti wi na sani di e miti „tra libisma” tu. Wi man pasa den tesi disi efu wi e frutrow tapu Gado (1 Petr. 5:8, 9). Te wi e luku den tekst di skrifi fosi 1 Korentesma 10:13, dan wi e si taki Paulus ben e taki fu den tesi di ben miti Israel na ini a gran sabana (1 Kor. 10:6-11). Nowan fu den tesi di a pipel dati ben kisi ben de sani di libisma no ben ondrofeni kaba, noso sani di den reti-ati Israelsma no ben man tyari. Fo leisi Paulus taki dati „sonwan fu den” ben trangayesi. Disi ben kon fu di son Israelsma ben meki den sondu firi fu den basi den èn fu di den no ben e frutrow tapu Gado.

A di fu tu sani, na taki ’wi kan frutrow na Gado tapu’. Te wi e luku fa Gado ben libi nanga a pipel fu en, dan wi e si taki a e du bun gi „den wan di lobi en èn di e gi yesi na den komando fu en” (Deut. 7:9). Den sani dati e sori tu taki Gado ala ten e du san a pramisi (Yos. 23:14). Te wi e luku fa a tan hori ensrefi na a wortu fu en, dan den wan di lobi en èn di e gi yesi na en kan abi a frutrow taki a o du den tu sani disi te den e kisi tesi: (1) Noiti a o gi pasi taki wan tesi e kon hebi so te taki den no man tyari en èn (2) ’a o yepi den’ te den de na ini a situwâsi dati.

Fa Yehovah e yepi den wan di e frutrow na en tapu te den e kisi tesi? A no de fu taki, dati efu a wani, a kan puru a tesi. Ma memre san Paulus ben taki: „Te tesi miti unu, [Yehovah] o yepi unu, so taki unu man horidoro.” Sobun, son leisi a o gi wi san wi abi fanowdu so taki wi man pasa den tesi di e miti wi. Luku wan tu fu den fasi fa Yehovah kan yepi wi:

• A e „trowstu wi te wi de na ini ala sortu banawtu” (2 Kor. 1:3, 4). Nanga yepi fu en Wortu, en santa yeye èn a leri di wi e kisi fu a koni srafu, Yehovah kan kowru wi ati èn a kan meki taki wi no e broko wi ede tumusi.—Mat. 24:45; Yoh. 14:16; Rom. 15:4.

• A kan tiri wi nanga yepi fu en santa yeye (Yoh. 14:26). Te tesi e miti wi, dan a yeye kan yepi wi fu memre tori nanga leri na ini Bijbel di kan yepi wi fu kon sabi san na a moro bun sani fu du.

• A kan gebroiki engel fu yepi wi.—Hebr. 1:14.

• A kan gebroiki wi Kresten brada nanga sisa fu „trowstu” wi nanga yepi fu den sani di den e taki èn e du.—Kol. 4:11.

San wi kon frustan fu a sani di Paulus taki na 1 Korentesma 10:13? Yehovah no e bosroiti sortu tesi o miti wi. Ma te tesi e miti wi dan wi kan bribi a sani disi: Efu wi e frutrow tapu Yehovah nanga wi heri ati, dan noiti a o gi pasi taki den tesi o hebi moro leki san wi man tyari. Ala ten a o yepi wi so taki wi man horidoro. A sani disi na wan bigi trowstu gi wi!