Se neʼe mak loos, neʼe bele halo ita hanoin sala kona-ba Jeová. Porezemplu, irmaun ida nia oan-mane oho an. Irmaun neʼe sente triste tebes. Nia hanoin, karik Jeová hatene ona kona-ba sira-nia futuru, tan neʼe Jeová husik buat hanesan neʼe akontese ba sira tanba nia hatene katak sira bele tahan ho akontesimentu neʼe. Ohin loron, ema barak sei hasoru susar oioin. Maibé neʼe dehan katak Jeová mak kontrola buat hotu neʼebé akontese iha ita-nia moris ka lae?

Se ita haree didiʼak ba apóstolu Paulo nia liafuan iha 1 Korinto 10:13, ita bele haree eskritura neʼe la fó ideia katak Jeová haree uluk ba ita-nia forsa, no depois mak hili susar saida mak ita sei hasoru. Tanbasá mak ita hatete nuneʼe? Mai ita koʼalia kona-ba razaun haat.

Primeiru, Jeová fó ita liberdade atu hili. Nia hakarak ita atu halo desizaun rasik. (Deuteronômio [Ulangan] 30:19, 20; Josué [Yosua] 24:15) Se ita foti desizaun neʼebé halo Jeová kontente, ita bele fiar katak Jeová sei fó matadalan ba ita. (Provérbios [Amsal] 16:9) Maibé se ita mak halo desizaun neʼebé sala, ita sei simu konsekuénsia husi ita-nia desizaun neʼe. (Galásia 6:7) Tan neʼe, se Jeová mak hili susar ba ita atu hasoru, ita la bele dehan katak ita iha liberdade atu hili, loos ka lae?

Segundu, Jeová la proteje ita husi “situasaun neʼebé mosu derrepente deʼit”. (Eclesiastes [Pengkhotbah] 9:11) Karik ema ida hetan dezastre tanba nia hamriik iha fatin neʼebé sala no tempu neʼebé sala. Jesus mós koʼalia kona-ba ema naʼin-18 neʼebé uma-andár monu hanehan mate, maibé nia esplika katak akontesimentu neʼe la mai husi Maromak. (Lucas 13:1-5) Tan neʼe, se ita hanoin katak Maromak mak deside sesé mak sei mate bainhira dezastre ida akontese, neʼe hanoin neʼebé la loos.

Terseiru, ita ida-idak envolve iha lia neʼebé Satanás hasaʼe kona-ba Jeová nia direitu atu ukun. Satanás hatete katak ita serbí Jeová tanba buat neʼebé Jeová fó ba ita. No nia dehan katak se ita mak hasoru terus, ita sei la laran-metin tan ba Jeová. (Jó [Ayub] 1:9-11; 2:4; Apokalipse 12:10) Tan neʼe, se Jeová mak proteje hodi susar ruma la kona ita, neʼe hatudu katak Satanás koʼalia loos.

Haat, Jeová la hili atu hatene uluk buat hotu kona-ba saida mak sei akontese ba ita. Jeová iha duni kbiit atu hatene buat hotu kona-ba futuru. (Isaías [Yesaya] 46:10) Maibé Bíblia hatudu katak iha situasaun balu Jeová la hili atu halo nuneʼe. (Gênesis [Kejadian] 18:20, 21; 22:12) Jeová mak Maromak neʼebé domin no laran-loos, tan neʼe nia respeitu ita-nia liberdade atu halo desizaun rasik.—Deuteronômio (Ulangan) 32:4; 2 Korinto 3:17.

Se nuneʼe, Paulo nia liafuan katak sá bainhira nia dehan Jeová “sei nunka husik imi atu hetan tentasaun liu fali buat neʼebé imi bele tahan”? Tuir loloos Paulo nia liafuan koʼalia kona-ba saida mak Jeová sei halo durante ita iha terus laran, laʼós antes ita hetan terus. * (Haree nota iha kraik.) Se ita tau fiar ba Jeová, nia sei ajuda ita atu tahan hasoru terus sira. (Salmo [Mazmur] 55:22) Agora mai ita koʼalia kona-ba razaun rua tansá mak Paulo koʼalia nuneʼe.

Razaun primeiru mak, tanba terus neʼebé ita hetan “baibain ema seluk mós hetan”. Iha Satanás nia mundu, ita hotu sei hasoru susar iha ita-nia moris, dala ruma bele hetan dezastre. Maibé se ita mak sadere ba Jeová, ita bele tahan hasoru susar sira-neʼe hodi laran-metin nafatin ba Jeová. (1 Pedro 5:8, 9) Iha 1 Korinto kapítulu 10, Paulo koʼalia kona-ba tentasaun balu neʼebé ema Izraél hasoru iha rai-fuik maran. (1 Korinto 10:6-11) Sira neʼebé sadere ba Jeová konsege tahan hasoru tentasaun, maibé sira neʼebé la sadere ba nia, kontra fali no la laran-metin ba nia.

Razaun segundu, tanba “Maromak mak laran-metin”. Se ita haree fali oinsá Jeová tau matan ba ninia atan sira iha tempu uluk, nia sempre fó ajuda ba “ema neʼebé hadomi nia no halo tuir ninia mandamentu”. (Deuteronômio [Ulangan] 7:9) Istória sira-neʼe mós hatudu katak Jeová sempre kumpre ninia promesa sira. (Josué [Yosua] 23:14) Neʼe katak (1) Jeová sei nunka husik ita tahan terus neʼebé liu fali ita-nia kbiit, no (2) nia sei ‘hatudu dalan ba ita atu sai’.

Oinsá mak Jeová “hatudu dalan” ba sira neʼebé sadere ba nia? Ita hatene katak se Jeová hakarak, nia bele halakon deʼit ita-nia terus. Maibé ita presiza hanoin-hetan Paulo mós hatete katak Jeová sei “hatudu dalan ba imi atu sai, atu nuneʼe imi bele tahan”. Loos duni, baibain Jeová loke dalan liuhusi fó kbiit ba ita atu bele tahan terus ruma. Mai ita haree dalan balu oinsá Jeová halo nuneʼe ba ita.

• Jeová ‘fó kmaan ba ita iha situasaun hotu’. (2 Korinto 1:3, 4) Liuhusi Bíblia, espíritu santu, no atan laran-metin mak nia halo kalma ita-nia neon, laran, no emosaun.—Mateus 24:45; João 14:16, nota-rodapé; Roma 15:4.

• Jeová bele uza ninia espíritu santu atu fó matadalan ba ita. (João 14:26) Espíritu santu bele ajuda ita hanoin-hetan eskritura no Bíblia nia prinsípiu ruma hodi ita bele halo desizaun ho matenek.

• Jeová bele uza ninia anju sira atu ajuda ita.—Ebreu 1:14.

• Jeová bele uza irmaun-irmán sira atu ajuda ita. Sira bele hametin ita liuhusi liafuan ka ajuda ruma.—Koloso 4:11.

Saida mak ita aprende husi Paulo nia liafuan neʼebé hakerek iha 1 Korinto 10:13? Sin, Jeová nunka hili terus saida mak atu fó ba ita. Maibé ita bele fiar katak nia sei ajuda ita atu tahan hasoru terus naran deʼit se ita tau fiar ba nia. Jeová sempre loke dalan ba ita atu ita bele tahan no laran-metin ba nia.