1, 2. (a) Ano ang ginpahayag sa aton ni Jehova? (b) Ano ang ginapasalig sang Isaias 46:10, 11 kag 55:11?

AMO ini ang simple pero makapahunahuna nga una nga mga tinaga sang Biblia: “Sa ginsuguran gintuga sang Dios ang langit kag ang duta.” (Gen. 1:1) Diutay lang ang aton nahibaluan parte sa madamo nga mga tinuga sang Dios, pareho sang kahawaan, kasanag, kag grabidad, kag gamay lang nga bahin sang uniberso ang aton nakita. (Man. 3:11) Pero, ginpahayag sa aton ni Jehova ang iya katuyuan sa duta kag sa katawhan. Gintuga niya ang mga tawo suno sa iya larawan kag gusto niya nga mabuhi sila nga malipayon sa duta. (Gen. 1:26) Mangin anak sila ni Jehova, kag mangin Amay nila sia.

² Ginapaathag sang ikatlo nga kapitulo sang Genesis nga may gusto mag-upang sa katuyuan ni Jehova. (Gen. 3:1-7) Pero, may solusyon sa sini si Jehova. Wala sing makapugong sa iya. (Isa. 46:10, 11; 55:11) Gani, makasigurado kita nga matuman ang orihinal nga katuyuan ni Jehova sa nagakaigo gid nga tion!

3. (a) Anong importante nga mga kamatuoran ang kinahanglan para mahangpan naton ang mensahe sang Biblia? (b) Ngaa ginabinagbinag naton ini nga mga panudlo subong? (c) Ano nga mga pamangkot ang binagbinagon naton?

³ Nahibaluan naton ang mga kamatuoran sa Biblia parte sa katuyuan sang Dios sa duta kag sa katawhan kag parte sa panguna nga papel ni Jesucristo sa pagtuman sini nga katuyuan.  Importante gid ini nga mga kamatuoran kag mahimo nga amo ini ang una naton nga nahibaluan sang nagtuon kita sang Pulong sang Dios. Kag gusto man naton buligan ang mga interesado nga mahibaluan ining importante nga mga panudlo. Ginabinagbinag naton subong ini nga artikulo sa aton mga kongregasyon kay gusto naton agdahon ang madamo nga tawo sa Memoryal sang kamatayon sang Cristo. (Luc. 22:19, 20) Kon magtambong sila, matun-an nila ang parte sa katuyuan sang Dios. Pila na lang ka adlaw kag pagahiwaton na naton ang Memoryal, gani nagakaigo nga binagbinagon naton ang mga pamangkot nga magamit naton para mangin interesado sa sining importante nga okasyon ang aton mga ginatun-an sa Biblia kag iban pa. Binagbinagon naton ang tatlo ka pamangkot: Ano ang orihinal nga katuyuan sang Dios sa duta kag sa katawhan? Ano ang nangin problema? Kag ngaa ang halad-gawad ni Jesus amo ang paagi para matuman ang katuyuan sang Dios?

4. Paano ginapahayag sang mga tinuga ang himaya ni Jehova?

⁴ Si Jehova dalayawon nga Manunuga. Pinakamaayo gid ang tanan niya nga tinuga. (Gen. 1:31; Jer. 10:12) Ano ang matun-an naton sa katahom kag kahim-ong sang mga tinuga sang Dios? Kon panilagan naton ang mga tinuga ni Jehova, gamay man ukon daku, nagadayaw kita sa katuyuan sini. Sin-o ang indi magdayaw sa makatilingala nga selula sang tawo, sa makaulumol nga lapsag, ukon sa matahom nga pagtunod sang adlaw? Nagadayaw kita sa sini kay gintuga kita nga may ikasarang sa pag-apresyar sang katahom.—Basaha ang Salmo 19:1; 104:24.

5. Paano ginsigurado ni Jehova nga mangin mahim-ong ang tanan niya nga tinuga?

⁵ Naghimo si Jehova sing mga kasuguan para sa iya mga tinuga. Naghimo sia sing mga kasuguan sang kinaugali kag mga kasuguan parte sa moral para mangin mahim-ong ang tanan. (Sal. 19:7-9) Ang tanan nga tinuga sa uniberso may lugar kag papel suno sa katuyuan sang Dios. Naghimo si Jehova sing kasuguan kon paano manghikot sing nahiusa ang iya mga tinuga. Halimbawa, ang kasuguan sang grabidad nagapugong sa atmospera nga indi magpalayo sa duta, nagapaposible sang paghunas kag pagtaub sang dagat, kag nagabulig nga mangin mahim-ong ang pagkabuhi sa duta. Ang tanan nga tinuga, lakip ang mga tawo, nagasunod sa sini nga mga kasuguan. Gani, maathag nga ginapakita sang kahim-ong sang mga tinuga nga may katuyuan ang Dios sa duta kag sa katawhan. Sa aton ministeryo, indi bala maayo gid nga ipakilala naton ang nagpaposible sini nga kahim-ong?—Bug. 4:11.

6, 7. Ano ang pila ka regalo nga ginhatag ni Jehova kanday Adan kag Eva?

⁶ Ang orihinal nga katuyuan ni Jehova amo nga ang katawhan magakabuhi sing dayon diri sa duta. (Gen. 1:28; Sal. 37:29) Bangod maalwan sia, ginhatagan niya sanday Adan kag Eva sing sarisari nga hamili nga mga regalo para mangin malipayon sila. (Basaha ang Santiago 1:17.) Ginhatagan sila ni Jehova sing kahilwayan sa pagdesisyon, sing ikasarang sa pagpangatarungan, kag sing ikasarang sa paghigugma kag pagpakig-abyan. Nagpakighambal ang Manunuga kay Adan kag gintudluan sia kon paano mangin matinumanon. Natun-an man ni Adan kon paano atipanon ang iya kaugalingon pati ang mga sapat kag ang duta. (Gen. 2:15-17, 19, 20) Gintuga man ni Jehova sanday Adan kag Eva nga may ikasarang nga makapanabor, makabatyag,  makakita, makabati, kag makapanimaho. Bangod sini, mangin malipayon gid sila sa katahom kag sa kadamuon sang mga tinuga sa ila puluy-an nga Paraiso. Wala sing limitasyon ang puede himuon kag matun-an sining una nga mag-asawa.

⁷ Ano pa ang nalakip sa katuyuan sang Dios? Gintuga ni Jehova sanday Adan kag Eva nga may ikasarang sa pagpanganak sing himpit nga mga anak. Katuyuan sang Dios nga magpanganak man ang ila mga anak, asta nga mapuno ang bilog nga duta sang mga tawo. Gusto ni Jehova nga higugmaon sang mga ginikanan ang ila mga anak, pareho sang paghigugma niya sa iya una nga himpit nga mga anak sa duta nga sanday Adan kag Eva. Mangin permanente nila nga puluy-an ang duta, lakip ang tanan nga manggad sa sini.—Sal. 115:16.

8. Ano ang katuyuan sang sugo sa Genesis 2:16, 17?

⁸ Wala gilayon matuman ang katuyuan sang Dios. Ngaa? Ginhatagan ni Jehova sanday Adan kag Eva sing isa ka simple nga sugo para mapamatud-an nila nga ginabaton nila nga may limitasyon ang ila kahilwayan. Nagsiling sia: “Makapaayaw ka sa pagkaon sang bunga sang tanan nga kahoy sa hardin. Apang indi gid ikaw magkaon sang bunga sang kahoy sang pagkilala sang maayo kag malain, kay sa adlaw nga magkaon ka sang bunga sini pat-od gid nga mapatay ka.” (Gen. 2:16, 17) Indi mabudlay hangpon ini nga sugo para kanday Adan kag Eva; kag indi man ini mabudlay sundon. Kay man, kadamo gid sang ila puede makaon.

9, 10. (a) Ano ang ginsiling ni Satanas batok kay Jehova? (b) Ano ang desisyon nanday Adan kag Eva? (Tan-awa ang piktyur sa umpisa sini nga artikulo.)

⁹ Naggamit si Satanas nga Yawa sing man-ug para limbungan si Eva nga lapason ang iya Amay nga si Jehova. (Basaha ang Genesis 3:1-5; Bug. 12:9) Ginpagua ni Satanas nga indi kuno puede kaunon sang mga anak sang Dios sa duta ang “bunga sang tanan nga kahoy sa hardin.” Daw pareho lang nga nagsiling sia: ‘Ano? Indi kamo makapagusto?’ Dayon nagbinutig sia: “Indi kamo mapatay.” Kag ginkumbinsi niya si Eva nga indi niya dapat pagpamatian ang Dios, paagi sa pagsiling: “Nakahibalo ang Dios nga sa adlaw nga magkaon kamo sini, magamuklat ang inyo mga mata.” Ginpahangop ni Satanas nga indi gusto ni Jehova nga magkaon sila sang bunga kay magahatag ini sa ila sing pinasahi nga ikasarang. Nagbinutig pa gid si Satanas paagi sa pagpromisa sa ila: “Mangin kaangay kamo sa Dios, nga nakahibalo kon ano ang maayo kag malain.”

¹⁰ Dapat magdesisyon sanday Adan kag Eva. Sundon bala nila si Jehova, ukon pamatian nila ang man-ug? Nagdesisyon sila nga indi pagtumanon ang Dios. Bangod sini, naghimbon sila kay Satanas sa pagrebelde. Ginsikway nila si Jehova bilang ila Amay kag manuggahom, gani wala na niya sila gin-amligan.—Gen. 3:6-13.

11. Ngaa wala ginkunsinti ni Jehova ang pagrebelde?

¹¹ Bangod nagrebelde sanday Adan kag Eva kay Jehova, indi na sila himpit. Napahilayo man sila kay Jehova kay “tuman kaputli sang [iya] mga mata sa pagtan-aw sing malain.” Gani, “indi [niya] mabatas ang kalautan.” (Hab. 1:13) Kon ginkunsinti niya ang pagrebelde, mabutang sa katalagman ang kaayuhan sang tanan nga buhi nga tinuga sa langit kag sa duta. Labaw sa tanan, kon wala sing may ginhimo ang Dios sa sala sang mga rebelde sa Eden, maduhaduhaan ang iya pagkamasaligan. Pero ginasunod gid ni Jehova ang iya mga talaksan; wala gid niya ini ginalapas. (Sal. 119:142) Gani, bisan pa may kahilwayan sa pagdesisyon  sanday Adan kag Eva, wala ini nagahatag sa ila sing rason nga lapason ang sugo sang Dios. Bangod sang ila pagrebelde kay Jehova, napatay sila kag nagbalik sa yab-ok nga gingamit sa pagtuga sa ila.—Gen. 3:19.

12. Ano ang natabo sa mga anak ni Adan?

¹² Sang ginkaon nanday Adan kag Eva ang bunga, ginsikway sila sang Dios sa iya bug-os uniberso nga pamilya. Ginpagua sila sang Dios sa Eden, kag indi na gid sila makabalik. (Gen. 3:23, 24) Makatarunganon nga ginpadapat ni Jehova ang mga epekto sang ila desisyon. (Basaha ang Deuteronomio 32:4, 5.) Bangod indi na himpit ang tawo, indi na niya mailog sing bug-os ang mga kinaiya sang Dios. Indi lang si Adan ang nadulaan sing matahom nga palaabuton. Ginpapanubli man niya sa iya mga anak ang pagkadihimpit, sala, kag kamatayon. (Roma 5:12) Bangod sa iya, nadula ang paglaum sang iya mga kaliwat nga mabuhi sing dayon. Indi na himpit ang mangin anak nanday Adan kag Eva; kag amo man ang mangin anak sang ila mga anak. Pagkatapos mapatalikod ni Satanas nga Yawa sanday Adan kag Eva sa pagsunod sa Dios, padayon niya nga ginapatalang ang katawhan asta subong.—Juan 8:44.

13. Ano ang gusto ni Jehova para sa mga tawo?

¹³ Pero, ginahigugma gihapon sang Dios ang mga tawo. Bisan pa nagrebelde sanday Adan kag Eva, gusto ni Jehova nga may maayo nga kaangtanan ang mga tawo sa iya. Indi niya luyag nga mapatay ang bisan sin-o. (2 Ped. 3:9) Gani pagkatapos gid sang pagrebelde, naghimo dayon ang Dios sing paagi para mangin abyan niya liwat ang mga tawo. Ginhimo niya ini nga wala ginalapas ang iya matarong nga mga talaksan. Paano ini ginhimo ni Jehova?

14. (a) Suno sa Juan 3:16, ano ang ginhimo sang Dios para mapasag-uli sa iya ang mga tawo? (b) Ano nga pamangkot ang mahimo naton binagbinagon sa mga interesado?

¹⁴ Basaha ang Juan 3:16. Madamo sa mga ginaagda naton sa Memoryal ang nakahibalo sini nga teksto. Pero ang pamangkot, Paano ginpaposible sang halad ni Jesus ang kabuhi nga wala sing katapusan? Sa tion sang kampanya para sa Memoryal, sa tion mismo sang Memoryal, kag sa tion nga kadtuan naton ang mga nagtambong, may kahigayunan kita nga ipaathag sa mga interesado ang sabat sa sining importante nga pamangkot. Kon mahangpan gid nila ang parte sa gawad, mas maapresyar nila ang gugma kag kaalam ni Jehova. Ano nga mga kamatuoran parte sa gawad ang mahimo naton ipaambit sa ila?

15. Bilang isa ka tawo, ano ang kinatuhayan ni Jesus kay Adan?

¹⁵ Nag-aman si Jehova sing himpit nga tawo para mangin manuggawad. Ining himpit nga tawo dapat mangin mainunungon kay Jehova kag handa nga ihatag ang iya kabuhi para sa makaluluoy nga katawhan. (Roma 5:17-19) Ginsaylo ni Jehova ang kabuhi ni Jesus, ang iya pinakauna nga tinuga, halin sa langit pakadto sa duta. (Juan 1:14) Gani si Jesus nangin isa ka himpit nga tawo, pareho ni Adan. Pero indi pareho sa ginhimo ni Adan, ginsunod ni Jesus ang talaksan ni Jehova para sa himpit nga tawo. Bisan pa sa pinakamabudlay nga mga pagtilaw, wala gid ginlapas ni Jesus ang mga sugo sang Dios.

16. Ngaa ang gawad isa ka hamili nga regalo?

¹⁶ Bilang isa ka himpit nga tawo, maluwas ni Jesus ang katawhan sa sala kag kamatayon paagi sa paghatag sang iya kabuhi. Ginhimo niya ang ginhimo kuntani ni Adan, ang mangin mainunungon kag matinumanon sa Dios. (1 Tim. 2:6) Si Jesus amo ang nangin halad-gawad nga nagpaposible nga matigayon sang “madamo” nga lalaki, babayi, kag kabataan ang kabuhi nga dayon. (Mat. 20:28) Huo,  ang gawad amo ang paagi para matuman ang orihinal nga katuyuan sang Dios. (2 Cor. 1:19, 20) Bangod sang gawad, may paglaum ang tanan nga matutom nga katawhan nga mabuhi sing wala sing katapusan.

17. Ano ang nangin posible bangod sa gawad?

¹⁷ Daku gid ang ginsakripisyo ni Jehova para maaman ang gawad. (1 Ped. 1:19) Palangga gid niya ang mga tawo amo nga ginhatag niya ang kabuhi sang iya bugtong nga Anak para sa aton. (1 Juan 4:9, 10) Daw pareho lang nga ginbuslan ni Jesus ang aton orihinal nga amay sa duta nga si Adan. (1 Cor. 15:45) Indi lang paglaum nga mabuhi sing dayon ang ginhatag ni Jesus; may paglaum man kita nga makabalik sa pamilya sang Dios. Huo, paagi sa halad ni Jesus, mabaton na ni Jehova ang mga tawo sa iya pamilya kag indi malapas sang Dios ang iya talaksan. Indi bala makalilipay gid hunahunaon ang tion nga himpit na ang tanan nga matutom nga tawo? Mahiusa na sing bug-os ang langitnon kag dutan-on nga bahin sang iya pamilya. Mangin anak na kita tanan sang Dios.—Roma 8:21.

18. San-o si Jehova “magagahom sa tanan”?

¹⁸ Ang pagrebelde ni Satanas wala nakapugong kay Jehova nga higugmaon ang katawhan, kag indi man ini makapugong sa indi himpit nga katawhan nga mangin mainunungon kay Jehova. Paagi sa aman ni Jehova nga gawad, buligan niya ang tanan niya nga anak nga mangin matarong. Imadyina ang kabuhi kon ang tanan nga “nagakilala sa Anak kag nagatuo sa iya” magakabuhi sing wala sing katapusan. (Juan 6:40) Bangod sang daku nga gugma kag kaalam ni Jehova, pahanabuon niya nga mangin himpit ang katawhan, nga amo ang iya orihinal nga katuyuan. Sa sina nga tion, si Jehova nga aton Amay amo na ang “magagahom sa tanan.”—1 Cor. 15:28.

19. (a) Bangod nagapasalamat gid kita sa gawad, ano ang dapat naton himuon? (Tan-awa ang kahon nga “ Padayon Naton nga Pangitaon ang mga Takus.”) (b) Ano nga kamatuoran parte sa gawad ang binagbinagon sa masunod nga artikulo?

¹⁹ Bangod nagapasalamat gid kita sa gawad, dapat naton himuon ang aton bug-os nga masarangan nga isugid sa iban ang benepisyo sa ila sining indi matupungan nga regalo. Dapat mahibaluan sang mga tawo nga ang gawad amo ang paagi ni Jehova sa paghatag sa katawhan sing paglaum nga mabuhi sing dayon. Pero, sobra pa sa sini ang nahimo sang gawad. Binagbinagon sa masunod nga artikulo kon paano ginasabat sang halad ni Jesus ang hangkat ni Satanas didto sa hardin sang Eden.