1, 2. (a) Ano an iginpapahayag ha aton ni Jehova? (b) Ano an iginpapasarig ha aton han Isaias 46:10, 11 ngan 55:11?

MABABASA ha siyahan nga mga pulong han Biblia inin simple kondi importante gud nga kamatuoran: “Ha tinikangan an Dios naghimo han mga langit ngan han tuna.” (Gen. 1:1) Oo, gutiay gud la an aton hinbabaroan may kalabotan ha damu hinduro nga linarang han Dios sugad han kawanangan, kapawa, ngan grabidad; ngan gutiay gud la nga bahin han uniberso an aton nakikita. (Ekles. 3:11) Pero iginpapahayag ha aton ni Jehova an iya katuyoan para ha tuna ngan ha katawohan. An tuna magigin makalilipay nga urukyan para ha lalaki ngan babaye nga ginlarang ha ladawan han Dios. (Gen. 1:26) Magigin mga anak hira ni Jehova, ngan magigin Amay hiya nira.

² Sugad han iginsasaysay han Genesis kapitulo 3, nagkaada ulang ha katuyoan han Dios. (Gen. 3:1-7) Pero waray ulang nga diri masusulbad ni Jehova. Waray gud makakapugong ha iya katuyoan. (Isa. 46:10, 11; 55:11) Salit makakasiguro kita nga matutuman an orihinal nga katuyoan ni Jehova ha eksakto gud nga panahon!

3. (a) Ano nga importante nga mga kamatuoran an makakabulig ha aton nga masabtan an mensahe han Biblia? (b) Kay ano nga hihisgotan naton yana ito nga mga katutdoan? (c) Ano nga mga pakiana an aton hihisgotan?

³ Sigurado nga pamilyar kita ha mga kamatuoran ha Biblia mahitungod  han katuyoan han Dios para ha tuna ngan ha katawohan ngan han importante nga papel ni Jesus ha katumanan han katuyoan han Dios. Importante gud ini nga mga kamatuoran, ngan bangin ini an siyahan han mga kamatuoran nga aton hinbaroan han nagtikang kita pag-aram han Pulong han Dios. Karuyag liwat naton nga buligan an sinsero nga mga tawo nga mahibaro hinin importante nga mga katutdoan. Yana, samtang ginhihisgotan naton ini nga artikulo, nangangalimbasog kita ha pag-imbitar hin damu nga tawo tubtob nga posible para ha Memoryal han kamatayon han Kristo. (Luc. 22:19, 20) Damu an mahibabaroan han mga matambong hito nga okasyon may kalabotan ha katuyoan han Dios. Salit antes an Memoryal, maopay gud nga maghunahuna hin espisipiko nga mga pakiana nga aton magagamit basi maaghat an aton mga estudyante ha Biblia ngan an iba pa nga sinsero nga indibiduwal nga tumambong hinin importante nga okasyon. Hihisgotan naton an tulo nga pakiana: Ano an orihinal nga katuyoan han Dios para ha tuna ngan ha katawohan? Ano an nagin problema? Ngan kay ano nga an halad-lukat ni Jesus an yawi ha katumanan han katuyoan han Dios?

4. Paonan-o an mga linarang naghihimaya kan Jehova?

⁴ Hi Jehova an makatarag-ob nga Maglalarang. Perpekto an ngatanan niya nga linarang. (Gen. 1:31; Jer. 10:12) Ano an aton mahibabaroan ha makaruruyag ngan organisado gud nga mga linarang? Kon gin-oobserbaran naton an mga linarang ni Jehova, nabilib gud kita kay ito ngatanan, tikang ha pinakagutiay tubtob ha pinakadaku, may-ada katuyoan ngan kapulsanan. Hin-o an diri mabilib ha pagin komplikado han selyula han tawo, ha kaanyag han usa nga katatawo pa la nga bata, o ha katahom han pagtunod han adlaw? Nalilipay gud kita hini nga mga linarang kay may abilidad kita nga hibaroan kon ano an tinuod nga makaruruyag.—Basaha an Salmos 19:1; 104:24.

5. Paonan-o ginsisiguro ni Jehova nga an ngatanan niya nga linarang nagios nga nagkakauruyon?

⁵ Hi Jehova mahigugmaon nga nagbutang hin mga limitasyon ha ngatanan niya nga linarang. Naghimo hiya hin mga balaud ha aton palibot ngan mga balaud ha moral basi masiguro nga an ngatanan nagios nga nagkakauruyon. (Sal. 19:7-9) Salit an ngatanan nga butang ha uniberso may husto nga lugar ngan gamit uyon ha papel hito ha katuyoan han Dios. Pananglitan, an balaud han grabidad amo an nagtitipig han atmospera han tuna, nagkukontrol han pagtaob ngan paghubas han kadagatan, ngan nabulig basi magin posible an kinabuhi ha tuna. An ngatanan nga linarang, upod na an tawo, nagios uyon ha mga limitasyon nga iginbutang ni Jehova. Matin-aw nga an pagin organisado han mga linarang nagpapamatuod nga may katuyoan an Dios para ha tuna ngan ha katawohan. Ha aton pagsangyaw, puydi naton isumat kon hin-o an nagpapahinabo han pagkauruyon han mga butang ha uniberso.—Pah. 4:11.

6, 7. Ano an pipira han mga regalo nga iginhatag ni Jehova kanda Adan ngan Eva?

⁶ Orihinal nga katuyoan ni Jehova nga mabuhi an mga tawo ha waray kataposan dinhi ha tuna. (Gen. 1:28; Sal. 37:29) Mahigugmaon nga gintagan niya hira Adan ngan Eva hin presyoso nga mga regalo basi hira magin malipayon. (Basaha an Santiago 1:17.) Gintagan hira ni Jehova hin kagawasan ha pagbuot pati hin abilidad nga mangatadongan ngan maghigugma ngan magkaada kasangkayan. An Maglalarang nakiistorya kan Adan ngan ginsidngan hiya kon paonan-o niya maipapakita an iya pagin masinugtanon. Hinbaroan liwat ni Adan kon paonan-o hiya magkakaada han iya mga panginahanglan ngan kon paonan-o niya aatamanon an mga hayop ngan an tuna. (Gen. 2:15-17, 19, 20) Ginlarang liwat ni Jehova hira Adan ngan Eva nga may sentido  han panrasa, pag-abat, pagkita, pagpamati, ngan pag-amyon. Salit bug-os hira nga magpapahimulos ha ira maopay gud nga urukyan, an Paraiso. May higayon unta an siyahan nga mag-asawa nga magkaada makapatagbaw nga buruhaton ngan mahibaro hin bag-o nga mga butang ha waray kataposan.

⁷ Ano pa an iba nga bahin han katuyoan han Dios? Ginlarang ni Jehova hira Adan ngan Eva nga may abilidad nga magkaada hingpit nga mga anak. Katuyoan han Dios nga magkaanak an ira mga anak tubtob nga mapuno an tuna hin mga tawo. Karuyag niya nga higugmaon nira Adan ngan Eva pati na han ngatanan nga mga kag-anak an ira mga anak pariho ha paghigugma ni Jehova ha iya siyahan nga hingpit nga tawhanon nga mga anak. Iginhatag niya ha ira an tuna, upod na an mag-opay nga butang dida hito, basi magin ira permanente nga urukyan.—Sal. 115:16.

8. Kay ano nga gintagan han Dios hira Adan ngan Eva han balaud nga mababasa ha Genesis 2:16, 17?

⁸ Kay ano nga waray dayon matuman an katuyoan han Dios? Gintagan ni Jehova hira Adan ngan Eva hin simple nga balaud basi makita kon gagamiton ba nira an ira kagawasan uyon ha mga limitasyon hito. Hiya nagsiring: “Ha tagsa nga kahoy han tanaman makakahimo ikaw pagkaon hin waray makauulang, kondi han kahoy han kinaadman han kaopayan ngan han karautan, diri ka makakakaon: kay ha adlaw nga ikaw kumaon hito, ikaw gud mamamatay.” (Gen. 2:16, 17) Diri makuri kanda Adan ngan Eva nga sabuton ito nga balaud; diri man liwat makuri an pagsunod hito, kay damu hinduro an ira puydi kaunon ha hardin.

9, 10. (a) Ano an akusasyon ni Satanas kan Jehova? (b) Ano an nagin desisyon nira Adan ngan Eva? (Kitaa an retrato ha tinikangan hini nga artikulo.)

⁹ Pinaagi han usa nga halas, ginlimbongan ni Satanas nga Yawa hi Eva nga diri sugton an iya Amay, hi Jehova. (Basaha an Genesis 3:1-5; Pah. 12:9) Hi Satanas nagbangon hin isyu nga gindidid-an kuno han Dios an Iya tawhanon nga mga anak nga kumaon hin bunga ha “bisan ano nga kahoy dida ha tanaman.” Sugad hin nasiring hi Satanas: ‘Karuyag ba sidngon nga diri niyo puydi himoon an iyo karuyag?’ Katapos, direkta hiya nga nagbuwa: “Kamo diri gud mapatay.” Ginkombinse liwat niya hi Eva nga diri mamati ha Dios pinaagi ha pagsiring: “An Dios maaram nga ha adlaw nga kamo kumaon hito, an iyo mga mata mapupukrat.” Baga hin karuyag ipasabot ni Satanas nga gindidid-an hira ni Jehova kay magkakaada hira hin espesyal nga kahibaro kon kumaon hira hito. Ginbuwaan liwat hira ni Satanas pinaagi ha pagsiring: “Kamo mahanunugad ha Dios, nga maginaramon na han kaopayan ngan han karautan.”

¹⁰ Hito nga kahimtang, kinahanglan magdesisyon hira Adan ngan Eva. Hin-o an ira susugton—hi Jehova, o an halas? Makasurubo nga ginpili nira nga diri sugton an Dios. Tungod hito, inupod hira ha pagrebelde ni Satanas. Iginsalikway nira hi Jehova sugad nga ira Amay ngan nawad-an hira han iya panalipod.—Gen. 3:6-13.

11. Kay ano nga waray konsintera ni Jehova an pagrebelde nga nahitabo ha Eden?

¹¹ Tungod han pagrebelde nira Adan ngan Eva, nawara nira an ira pagin perpekto. Nagin hinungdan liwat ito nga mahibulag hira kan Jehova kay ‘baraan hin duro an iya mga mata hin pagtan-aw hin karat-an.’ Salit “diri [hiya] mailob hin pagkita hin mga tawo nga nagbubuhat hin sayop.” (Hab. 1:13, Maupay nga Sumat) Kon ginkonsinter niya an sayop, mamimeligro an kamurayawan ngan pagkaurosa han ngatanan niya nga intelihente nga linarang—ha langit man o ha tuna. Labaw ha ngatanan, kon waray ginhimo an Dios ha pagrebelde nga nahitabo ha Eden, pagruruhaduhaan an iya pagin masasarigan. Pero gintutuman ni Jehova an iya mismo mga suruklan; diri gud niya ito gintatalapas. (Sal. 119:142) Salit bisan kon may kagawasan ha pagbuot hira Adan ngan Eva, kinahanglan nira sundon an balaud han  Dios. Tungod han ira pagrebelde kan Jehova, namatay hira ngan binalik ha tapotapo—kay tikang hira dida hito.—Gen. 3:19.

12. Ano an nahitabo ha mga anak ni Adan?

¹² Han ginkaon nira Adan ngan Eva an bunga han kahoy, diri na hira puydi magin membro han bug-os-uniberso nga pamilya han Dios. Ginpagawas hira han Dios ha Eden, ngan waray na hira paglaom nga makabalik pa. (Gen. 3:23, 24) Hito nga paagi, makatadunganon nga gintugotan ni Jehova nga maeksperyensyahan nira an resulta han ira desisyon. (Basaha an Deuteronomio 32:4, 5.) Tungod kay diri na hira hingpit, diri na nira bug-os nga maipapakita an mga kalidad han Dios. Ginwara ni Adan diri la an iya makalilipay nga tidaraon kondi iginpasa liwat niya ha iya mga anak an pagkadiri-hingpit, sala, ngan kamatayon. (Roma 5:12) Ginwara liwat niya an paglaom han iya mga anak nga mabuhi ha waray kataposan. Dugang pa, diri na magkakaada perpekto nga anak hira Adan ngan Eva; diri liwat magkakaada perpekto nga anak an ira mga anak. Katapos maipahirayo ni Satanas nga Yawa hira Adan ngan Eva tikang ha Dios, padayon niya nga ginlilimbongan an mga tawo tubtob yana.—Juan 8:44.

13. Ano an karuyag ni Jehova para ha katawohan?

¹³ Hinigugma pa gihapon ni Jehova an mga tawo. Bisan kon nagrebelde hira Adan ngan Eva, karuyag pa gihapon niya nga magkaada maopay nga relasyon ha iya an katawohan. Diri niya karuyag nga may mamatay. (2 Ped. 3:9) Salit katapos gud la han pagrebelde ha Eden, naghimo hiya hin kahikayan basi maipahiuli an maopay nga relasyon han mga tawo ha iya nga diri gintatalapas an iya mismo matadong nga mga suruklan. Paonan-o niya ito ginhimo?

14. (a) Sumala ha Juan 3:16, ano an igintagana han Dios basi maipahiuli ha iya an mga tawo? (b) Ano nga pakiana an mahimo naton hisgotan ha mga interesado?

¹⁴ Basaha an Juan 3:16. Damu han aton gin-iimbitar ha Memoryal an pamilyar hini nga teksto. Pero an pakiana, Paonan-o nagin posible an kinabuhi nga waray kataposan pinaagi han halad ni Jesus? An kampanya para ha Memoryal, an pagsaurog mismo han Memoryal, ngan an aton pagbisita ha mga tinambong mahimo maghatag ha aton hin higayon nga mabuligan an sinsero nga mga namimiling han kamatuoran nga masabtan an baton hiton importante nga pakiana. An sugad nga mga indibiduwal bangin malipay gud kon mas masabtan nira kon paonan-o an tagana ni Jehova nga lukat nagpapakita han iya gugma ngan kinaadman. Ano nga mga punto may kalabotan ha lukat an mahimo naton pabug-atan?

15. Ano an kaibahan ni Jesus kan Adan?

¹⁵ Hi Jehova nagtagana hin hingpit nga tawo basi lukaton an katawohan. Inin hingpit nga tawo kinahanglan magin maunungon kan Jehova ngan magin andam nga ihalad an iya kinabuhi para ha waray paglaom nga katawohan. (Roma 5:17-19) Iginbalhin ni Jehova an kinabuhi han iya siyahan nga linarang, tikang ha langit nganhi ha tuna. (Juan 1:14) Salit hi Jesus nagin hingpit nga tawo, pariho kan Adan. Pero diri sugad kan Adan, hi Jesus nagkinabuhi uyon ha mga suruklan nga ginlalaoman nga bubuhaton han usa nga hingpit nga tawo. Bisan ha pinakamakuri nga pagsari, waray gud hi Jesus makasala o makatalapas hin bisan ano nga balaud han Dios.

16. Kay ano nga an lukat presyoso gud nga regalo?

¹⁶ Pinaagi han kamatayon ni Jesus sugad nga hingpit nga tawo, matatalwas niya an katawohan tikang ha sala ngan kamatayon. Hiya an eksakto nga katugbang han kinabuhi unta ni Adan—hingpit nga tawo ngan bug-os nga maunungon ngan masinugtanon ha Dios. (1 Tim. 2:6) Tungod han halad-lukat ni Jesus, nagkaada higayon an “damu nga tawo”—lalaki, babaye, ngan kabataan—nga mabuhi ha waray kataposan. (Mat. 20:28) Oo, an lukat amo an yawi ha katumanan han orihinal nga katuyoan han Dios. (2 Cor. 1:19, 20) An lukat naghahatag hin paglaom nga mabuhi ha waray  kataposan an ngatanan nga matinumanon nga tawo.

17. Ano an nagigin posible tungod han lukat?

¹⁷ Daku gud an iginsakripisyo ni Jehova basi maitagana an lukat. (1 Ped. 1:19) Hinigugma gud niya an mga tawo nga tungod hito andam niya isakripisyo an iya bugtong nga Anak para ha aton. (1 Juan 4:9, 10) Salit sugad hin ginsaliwnan ni Jesus an aton orihinal nga tawhanon nga amay nga hi Adan. (1 Cor. 15:45) Hito nga paagi, diri la an kinabuhi nga waray kataposan an iginpahiuli ni Jesus, kondi pati an higayon nga ha tidaraon magin membro utro an mga tawo ha pamilya han Dios. Oo, pinaagi han halad ni Jesus, mahimo karawaton utro ni Jehova an mga tawo nga magin membro han iya pamilya nga diri natatalapas an iya matadong nga mga suruklan. Diri ba makalilipay gud hunahunaon kon perpekto na an ngatanan nga matinumanon nga katawohan? Bug-os na nga magkakaurosa an langitnon ngan tunan-on nga bahin han pamilya han Dios. Matatawag na gud kita nga mga anak han Dios.—Roma 8:21.

18. San-o hi Jehova magigin ‘magmarando han ngatanan’?

¹⁸ An pagrebelde ni Satanas waray makaulang kan Jehova ha pagpakita han iya gugma ha mga tawo, ngan diri liwat ito makakapugong ha diri hingpit nga tawo nga magin maunungon kan Jehova. Pinaagi han iya tagana nga lukat, bubuligan niya an ngatanan niya nga anak nga magin bug-os nga matadong. Handurawa la an magigin kahimtang kon “an tagsa nga nakilala ha Anak ngan nagpapakita hin pagtoo” magkaada na kinabuhi nga waray kataposan. (Juan 6:40) Bubuligan han aton mahigugmaon ngan maaramon nga Amay an iya tawhanon nga mga anak nga magin hingpit utro, sumala han iya orihinal nga katuyoan. Hito nga panahon, hi Jehova na an magigin ‘magmarando han ngatanan.’—1 Cor. 15:28.

19. (a) An aton pagin mapasalamaton tungod han lukat sadang magpagios ha aton nga buhaton an ano? (Kitaa an kahon nga “ Padayon Naton nga Pamilngon an mga Takos.”) (b) Ano an aton hihisgotan ha sunod nga artikulo?

¹⁹ An aton pagin mapasalamaton tungod han lukat sadang magpagios ha aton nga buhaton an aton bug-os nga mahihimo basi sumatan an mga tawo nga puydi hira magpahimulos hinin presyoso gud nga regalo. Kinahanglan nira hibaroan nga pinaagi han lukat, mahigugmaon nga igintatanyag ni Jehova ha ngatanan nga tawo an paglaom nga mabuhi ha waray kataposan. Pero diri la ito an nahihimo han lukat. Hihisgotan ha sunod nga artikulo kon paonan-o liwat ginbabaton han halad ni Jesus an isyu nga iginbangon ni Satanas ha hardin han Eden.