KAN Marso 26, 1937, luway-luway na pigmamaneho kan duwang pagal-pagal nang lalaki an maalpog nindang trak pa-Sydney, Australia. Puon kan maghali sinda sa siyudad sarong taon na an nakaagi, nakapagbiyahe na sinda nin labing 19,300 kilometros, na inaagihan an pira sa pinakahararayo asin lubak-lubak na marhay na mga lugar kan kontinente nin Australia. An mga lalaking ini bako man arog kaidtong mga mahilig magbiyahe para magdiskubre o mamasyar. Si Arthur Willis asin Bill Newlands duwa sana sa mahihigos na mga payunir na desididong maipaabot an maugmang bareta kan Kahadian nin Diyos sa mahiwason na puwerang mga lugar nin Australia.

Kan mga huring taon kan dekada nin 1920, haros nahulitan na kan sadit na grupo nin Mga Estudyante sa Bibliya * sa Australia an mga siyudad asin banwaan na harani sa dagat pati na an mga lugar sa palibot kan mga iyan. Sa katahawan kan nasyon, na haros mga disyerto asin durudakula sana sa kabanga kan Estados Unidos, yaon an puwerang mga lugar na kadikit sana an populasyon asin magkaharayo an mga harong. Aram nanggad kan mga tugang na iyan na an mga parasunod ni Jesus dapat na magpatotoo manungod sa saiya sagkod “sa pinakaharayong parte kan daga,” kaiba na an puwerang mga lugar nin Australia. (Gibo 1:8) Pero paano ninda magigibo an dakulaon na gibuhon na iyan? Huling bilog an saindang pagtubod na bebendisyunan ni Jehova an saindang mga paghihinguwa, determinado sindang gibuhon an pinakamakakaya ninda.

Kan 1929, an kongregasyon sa Queensland asin sa Western Australia naggibo nin mga van na kumpleto na kan mga kaipuhan ninda para magamit sa paghuhulit sa mga lugar sa katahawan kan nasyon. An mga nagmamaneho kan mga van na ini mga payunir na kayang atubangon an masakit na sitwasyon sa dalan asin tataong maghirahay pag narautan. Dakul sindang nadumanan na lugar na dai pa lamang napapatotoohan.

An mga payunir na dai kayang magbakal nin lunadan nagbibisikleta pasiring sa puwerang mga lugar. Halimbawa na diyan an 23 anyos na si Bennett Brickell na kan 1932 nagbisikleta hali sa Rockhampton, Queensland para maghulit nin limang bulan sa hararayong lugar sa norteng parte kan nasyon. Kargado an saiyang bisikleta nin mga tamong, bado,  kakanon, asin kadakul na libro. Pag nararautan siya nin goma, nagpapadagos pa man giraray siya, na nagtitiwalang tatabangan siya ni Jehova. Sa ultimong 320 kilometros na pagbiyahe niya, naglakaw na sana siya usol-usol an bisikleta mantang binabagtas an mga lugar kun sain may mga nagadan na huli sa paha. Sa suminunod na 30 taon, ginatos na ribong kilometro na an nabiyahe ni Brother Brickell sa bilog na Australia gamit an bisikleta, motorsiklo, asin awto. Pinunan niya an paghuhulit sa mga katutubong Aborigen asin nagtabang para magkaigwa nin mga kongregasyon, kaya namidbid siya asin iginalang kan mga tawo sa puwerang mga lugar.

Saro an Australia sa may pinakadikit na populasyon sa kinaban, lalo na sa puwerang mga lugar kaiyan na kadikit sana an populasyon asin magkaharayo pa an mga harong. Pero maski arog kaiyan, determinado an mga lingkod ni Jehova na hanapon an mga indibidwal sa pinakahararayong parte kan kontinente.

Arog kaiyan an determinasyon kan mga payunir na si Stuart Keltie asin William Torrington. Kan 1933, binagtas ninda an Disyerto nin Simpson, sarong mahiwason na disyerto na may mga bulod na baybay, para maghulit sa banwaan nin Alice Springs, na yaon sa pinakatahaw kan kontinente. Kan maraot an sadit nindang awto asin kinaipuhan na nindang bayaan iyan, si Brother Keltie—na may artipisyal na bitis na gibo sa kahoy—nagpadagos sa paghuhulit, na lunad na nin sarong kamelyo! Nagkaigwa nin magayon na resulta an paghihinguwa kan mga payunir kan mamidbid ninda an sarong may sadiri nin hotel na si Charles Bernhardt sa William Creek, na sarong istasyon nin tren. Kan huri inako niya an katotoohan, ipinabakal an saiyang hotel, asin solong nagpayunir nin 15 taon sa pira sa pinakamainit asin pinakahararayong parte kan Australia.

Siguradong kinaipuhan kan inot na mga payunir an kusog nin buot asin pagtitiyaga para makayanan an kadakul na kadipisilan na inaatubang ninda. Kan magbiyahe tanganing maghulit sa puwerang mga lugar nin Australia si Arthur Willis asin Bill Newlands, na nasambitan sa inot na parapo, duwang semana sindang nasakitan sa pagbiyahe nin 32 kilometros huling an disyerto nagi nang garo dagat na laboy gibo kan makusugon na uran. Kun minsan, piggagaranot saka puwersado nindang itinutulod an trak sa kainitan kan aldaw patukad sa mga bulod na baybay, na nag-aagi pa sa magapong mga kababan saka nagbabalyo sa mabaybay na mga salog. Pag nararautan sinda nin trak, na parating nangyayari, nagbabaklay o nagbibisikleta sinda nin pirang aldaw pasiring sa pinakaharaning banwaan dangan naghahalat nin pirang semana sagkod na umabot an isasalidang mga piyesa. Sa ibong kan mga problemang iyan, positibo pa man giraray sinda. Arog kan sabi ni Arthur Willis na kinua niya sa sinabi kaidto sa magasin na The Golden Age, “Dai nin makakaulang sa Saiyang mga saksi dawa an lubak-lubak o halawigon na dalan.”

Sinabi nin sarong haloy nang payunir na si Charles Harris na an pagigin harayo asin an mga kadipisilan na naeksperyensiyahan niya sa puwerang mga lugar nakatabang pa ngani sa saiya na mas maparani ki Jehova. Sinabi pa niya: “Mas magian an satong pagbiyahe sa buhay kun mas dikit an satong bagahe. Kun andam ngani si Jesus na magturog sa luwas kun kinakaipuhan, dapat magin andam man kitang gibuhon iyan kun kaipuhan sa asignasyon ta.” Arog mismo kaiyan an ginibo kan dakul na payunir. Huli sa saindang daing kapagalan na paghihinguwa, nakaabot sa gabos na parte kan kontinente an maugmang bareta, asin natabangan an dakul na mga tawo na kumampi sa Kahadian nin Diyos.