NIK’E ta nde o 26 má So̱ṅe̱ 1937, bato ba lo̱ndo̱ baba ba ta ba máwo̱le̱ byingane̱no̱ mutoa mabu mu ta mu málonde̱ na dibudu ná yō̱ o mundi ma Sydney, o Ostralia. Botea etum a mbu mō̱ basumwe̱no̱ o mu mundi, ba dango etum a 19 300 km o mangea ma betika na ma bobe ma y’epas’a mundi ma wase ye̱se̱. Ba bato ba si ta bamuwaso to̱so̱ badangwedi ba mawase̱ o je̱ne̱ bepolo. Artur Wilis na Bil Ńuland ba ta nde paonia ya ko̱di iba i ta i no̱ngo̱ bedomsedi o lańse̱ myango ma bwam ma Janea la Loba o mindi ma teten a Ostralia ńe̱se̱.

Nate̱na walea la su la mbu má 1920, son a dibo̱to̱ la bokwe̱ Bibe̱l * o Ostralia di ta nde di máte̱ dikalo buka te̱ o mindi ma sanj’a y’ekombo. Teten a y’ekombo e si ta e be̱ne̱ milongi mi so̱ngo̱m, e ta nde mundi ma ngońa mwena mwe buka mongo maba ma mundi ma Bekombo be lati ba Amerika. Nde, ban bonasango ba ta ba bia ná bokwedi ba Yesu bangame̱n o be̱ mboṅ ao “nate̱na o masu ma wase,” nika e mombwea pe̱ betika na teten a mundi ma Ostralia. (Bebolo 1:8) Nde ne̱ni beno̱ ná ba tongwe̱le̱ o bola nink’ebolo ende̱ne̱ e? Ba ta ba no̱ngo̱ bedomsedi o bola kaponda ngud’abu, na din lakisane̱ ná Yehova a me̱nde̱ namse̱ miwe̱n mabu.

O mbu má 1929 myemba ma Kwinsland na me o jedu la Ostralia mi ta mi longa ngus’a mitoa mi boṅsane̱be̱ ka bolongi o we̱le̱ so̱lo̱ o mindi ma teten me̱se̱. Paonia ya ngińa yena i wusa duane̱ o ngea bobe na po̱ngulane̱ pe̱ mutoa ke̱ mu ńam nde i ta be̱ i duane̱ min mitoa. Yin paonia i pe̱pe̱le̱ jita la bepolo we̱ni Mboṅ a Yehova i si tano̱ i mápo̱.

Paonia yena i si ta i be̱ne̱ ngudi o janda mutoa i ta nde be̱ i so̱lo̱ o mi mindi ma teten na medi ma mundi. K’eyembilan, o mbu má 1932, Benet Brikel nu ta bodun ba 23 a ta asumwe̱ o Rokhampton, Kwinsland, wala o epas’a pongo ya mu mundi o lo̱ndo̱ la dikalo la myo̱di mitanu. Ombusa medi mao a ta a londe̱ sango kana elangiti, mbo̱ti, da, na jita la kalati. Mabao ma medi mao ma ta be̱ ma ńam te̱, a mala nde oboso, na mbaki ná Yehova a me̱nde̱ die̱le̱ mo̱. O 320 km be sukan ba lo̱ndo̱ lao, a ta a nime̱le̱ medi mao o wum’a ngońa we̱ni ńo̱ng’a madiba e tano̱ be̱ e bwa bato. Mine̱ 30 ma mimbu a batino̱ walane̱ ebolo oboso, munasango  Brikel a bolane̱ medi ma mundi, tututu, na mutoa o dangwa bebwea ba lokoli ba km oteten Ostralia. Mo̱ nde a wanedi somsom a bato ba Ostralia myango ma bwam; ongwane̱ pe̱ o bokise̱ jita la myemba. A timbi biane̱ jita na bolabe̱ pe̱ edube o mindi ma teten me̱se̱ ma Ostralia.

Ostralia nde e ta e be̱ne̱ muso̱ngi musadi ma bato o wase ńe̱se̱; sepo̱n teten a mundi ni si ta ni be̱ne̱ milongi mi so̱ngo̱me̱. Baboledi ba Yehova ba lee̱le̱ jemea dinde̱ne̱ o wasa bato o betika ba y’epas’a mundi ma wase.

Paonia Stuart Keltie na Wiliam Torington ba lee̱le̱ ni ńai a jemea. O mbu má 1933, ba kati eyaṅ a Simpson, eyaṅ a mukoko ende̱ne̱, o te̱ dikalo o mundi ma Alis Springs, o mulema ma y’epas’a mundi ma wase. Ponda son abu ya mutoa i ńamno̱, na ná ba ta eto̱m o caka mo̱, munasango Keltie​—nu ta nu be̱ne̱ mwende m’ebambu​—a bengi nde walane̱ lo̱ndo̱ lao la dikalo oboso, nde nin ngedi na kamel. Miwe̱n ma paonia mi yai bepuma ponda ba dongame̱nno̱ mombwed’a ndabo a be̱n o Wiliam Krek, epolo a etika wuma masin ma masueano̱. Mombwed’a ndabo a be̱n, Carle Bernhardt, o sukan a kasi mbale̱, andise̱ ndabo ao ńa be̱n, a bola ebol’a paonia muso̱lo̱ki 15 la mbu o bepolo ba ngońa basam na be po̱ti eyeka ba Ostralia.

Ye̱ke̱i te̱ e ta e pula ná paonia ya boso i be̱ne̱ ngiń’a mulema, i be̱ pe̱ timtimbe̱ o buka jita la mitakisan i tano̱ i be̱ne̱. O lo̱ndo̱ labu la dikalo o betika ba Ostralia, Artur Wilis na Bil Ńuland ba tubabe̱ mina o bebotedi ba min myango, ngedi me̱ne̱ ba taki woki iba ná ba dangwe 32 km ońolana mbua ninde̱ne̱ e ta e timbise̱le̱ eyaṅ munja ma dibo. Ponda iwo̱, oteten a miwe̱n minde̱ne̱ n’eńangi owas’a wei nde ba tano̱ be̱ ba nime̱le̱ mutoa mabu oteten a mikondoki ma mukoko; ba dangwa oteten a m’beṅsan ma madale na o sanj’a mukoko. Mutoa mabu mu ta be̱ mu ńam te̱, ka nje te̱ e tano̱ e po̱ye̱ babo̱ ponda te̱, ba ta nde ba dangwa to̱so̱ ba yo̱mbo̱ oteten a mindi me o mbasan o jenge̱le̱ woki jita ná ba kuse elongisan a peńa o po̱ngulane̱ mutoa. To̱na min mitakisan minde̱ne̱, ba si bo̱lo̱ne̱ muńe̱nge̱ mabu. Artur Wilis a sukan nde o kwala ná, o timbise̱le̱ o pe̱m byala bao be tilabe̱ ngedi po̱ o kalat’a mo̱di te̱ L’Âge d’Or: “Ngea to̱ po̱ e si ta bobe bwambi to̱ bwaba bwambi.”

Paonia ńa ponda bwaba Carle Haris a tele̱ye̱ ná ka ni po̱ti na ebe̱yed’a bobe ya mangea ma mindi ma betika ba boli ná a siseye be̱be̱ na Yehova. A bati pe̱ ná: “Longe̱ le moto bwam ke̱ a si be̱n jita la sango. Yete̱na Yesu emedi o nanga o eboko bulu ponda e pulino̱ nika, ke̱ jangame̱n be̱ muńe̱nge̱ o bola mulemlem yete̱na e mapula nika o ebol’asu ya Sango.” Ye pe̱ nde nje jita la paonia di bolino̱. Masoma ońola miwe̱n ba po̱ngino̱ esibe̱ wo̱lo̱, myango ma bwam mi po̱i o masu me̱se̱ ma y’epas’a mundi ma wase, nika ńongwane̱ dimuti la bato o te̱me̱ye̱ o mudi ma Janea la Loba.