MARCH 26, 1937 ai, tatau rua be edia motuka amo Sydney, Australia dekenai idia ginidae. Idia be laolao daudauna idia karaia dainai idia hesiku bada. Lagani ta gunanai idia ese siti idia rakatania, bona motuka amo kilomita 19,300 idia laolao, ororo bona sinavai momo idia hanaia. Unai tatau rua be loaloa eiava gabu stadilaia taudia lasi. Arthur Willis bona Bill Newlands be painia goadadia rua, bona idia ura bada Dirava ena Basileia ena sivarai namona be Australia ena gunika gabudia dekenai idia harorolaia.

Lagani 1928 bamona ai, Australia dekenai Bible Student taudia * be momo lasi, unai dainai Australia ena kone kahanai idia noho siti bona taoni sibona dekenai idia haroro. To ena gunika kahanai, taunimanima haida sibona idia noho. Unai be gabu kaukauna bona ena bada be United States ena kahana ta bamona. Tadikaka idia laloparara Iesu murinai idia raka taudia be “tanobada ena daudau momokani gabudia dekenai” iena sivarai do idia loalaia, Australia ena gunika gabudiai danu. (Kara 1:8) To unai gaukara badana be edena bamona do idia karaia? Idia abia dae Iehova ese edia hekwarahi do ia hanamoa, unai dainai edia lalona idia hadaia haroro gaukara do idia habadaia.

Lagani 1929 ai, Queensland bona Western Australia ai idia noho kongrigeisen be motuka haida idia abia gunika gabudia idia haroro totona. Unai motuka momo be painia taudia ese idia taria, bona idia be motuka idia hanamoa diba, unai dainai motuka ia dika neganai, sibodia ese idia hanamoa. Unai painia taudia be witnes taudia idia haroro lasi gabudia dekenai idia lao.

Motuka lasi painia taudia be basikele amo gunika gabudia dekenai idia lao. Hegeregere, lagani 1932 ai, mauri lagani 23 tadikakana, Bennett Brickell, be hua 5 lalonai haroro gaukara ia karaia. Ia be Rockhampton, Queensland amo ela bona unai gabu ena not kahanai idia noho gunika gabudia dekenai ia lao. Iena basikele ai, ia atoa gaudia be ena blanketi, dabua, aniani, bona buka momo. Ena be basikele ena taia idia dika, to ia lao noho, badina ia diba Iehova ese ia do ia naria. Kilomita 320 lalonai iena basikele ia pusia ela bona ia ginidae, guna unai gabu ai taunimanima be  ranu lasi dainai idia mase. Lagani 30 murinai, Tadikaka Brickell be basikele, motabaik, bona motuka amo Australia ena gabu idauidau dekenai ia lao. Ia ese dala ia kehoa Aborigine taudia idia haroro henia totona bona iena heduru amo kongrigeisen matamatadia idia haginia, bona unai gabu dekenai momo be ia idia diba bona matauraia.

Tanobada ibounai dekenai, Australia ena popiuleisen be bada lasi. To, Iehova ena taunimanima idia ura bada daudau gabudia idia noho taudia idia haroro henidia.

Painia tadikakadia, Stuart Keltie bona William Torrington, be idia ura bada unai idia karaia. Lagani 1933 ai, Simpson Desert idia hanaia, badina idia ura taoni ladana Alice Springs dekenai idia haroro. Edia motuka maragina ia dika neganai, unuseni idia rakatania. Tadikaka Keltie be ia haroro noho, to kamelo ia gaukaralaia—iena aena kahana be au amo idia karaia gauna! Unai painia tadikaka rua edia hekwarahi amo anina namona ia vara. William Creek ai, idia ese hotel ta ena biaguna idia davaria. Iena ladana be Charles Bernhardt, ia be gabeai hereva momokani ia abia dae, iena hotel ia hoihoilaia, bona lagani 15 lalonai, Australia ena gunika momokani gabudia dekenai ia haroro.

Unai painia taudia be idia boga-auka be namo, unai amo idia davaria hahetoho idauidau idia hanaia diba. Matamanai ita herevalaia tadikaka rua, Arthur Willis bona Bill Newlands, be Australia ena gunika gabudiai idia haroro neganai, wiki rua lalonai idia hekwarahi bada kilomita 32 idia laolao totona, badina medu bada dainai tano be ia kopukopu bada. Nega haida, dina ena siahu be bada herea bona mai varahu ida edia motuka idia pusia. Bona mai hekwarahi ida nadi momo kouradia bona sinavai ena miri momo gabudia idia hanai. Edia motuka ia dika neganai, dina momo lalonai idia raka eiava basikele amo kahirakahira ia noho taoni dekenai idia lao, bena unuseniai wiki momo lalonai idia naria motuka ena kahana haida (parts) idia abia totona. Ena be unai ibounai ia vara, to idia moale. Arthur Willis be The Golden Age ai ia noho herevana ia gwauraia, ia gwau: “Gau ta ese Iena witnes taudia edia gaukara do ia koua lasi.”

Lagani momo lalonai ia painia tadikaka ta, Charles Harris, ia gwau ena be gunika gabudiai sibona ia noho bona hahetoho idauidau ia davaria, to unai ese iena hetura karana Iehova ida ia hagoadaia. Ma ia gwau: “Bema ta ena kohu be momo lasi, unai be namo herea. Nega haida Iesu be murimuriai ia mahuta, to ia moale, unai hegeregerena, bema ita be mahuta ruma lasi, do ita moale noho.” Bona painia momo be unai idia karaia. Ita moale badina unai painia taudia edia hekwarahi dainai, taunimanima momo be hari sivarai namona idia kamonai, bona Dirava ena Basileia idia durua.